Читать книгу: «Молитвы на каждый день»

Name: Молитвы на каждый день
ISBN: 978-5-17-164216-7

Шрифт:

Серия «Сила молитвы»

Последование молебнаго пения о сущих в скорбях и различных обстояниях

По обычном начале псалом избранный:

Господи, да не яростию Твоею обличиши мене, ниже гневом Твоим накажеши мене, яко стрелы Твои унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костях моих от лица грехов моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны мои от лица безумия моего. Пострадах и слякохся до конца, весь день сетуя хождах. Озлоблен бых и смирихся до зела, рыках от воздыхания сердца моего (Пс. 37:2–7,9). Исполнися зол душа моя и жизнь моя аду приближися (Пс. 87:4). Душа моя смятеся (Пс. 41:7), скорби сердца моего умножишася (Пс. 24:17). Исчезе в болезни жизнь моя, и лета моя в воздыханиях, изнеможе нищетою крепость моя, и кости моя смятошася (Пс. 30:11). На мне приидоша гневи Твои, устрашения Твоя возмутиша мя (Пс. 87:17). Рех во изступлении моем: отвержен есмь от лица очей Твоих (Пс. 30:23). Вскую, Господи, отрееши душу мою, отвращаеши лице Твое от Мене (Пс. 87:15)? Аз же на Тя, Господи, уповах, рех: Ты еси Бог мой. В руках Твоих жребии мои, избави мя из руки врагов моих и от гонящих мя. Просвети лице Твое на раба Твоего, спаси мя милостию Твоею. Господи, да не постыжуся, яко призвах Тя (Пс. 30:15–18).

Слава, и ныне. Аллилуиа (трижды).

На Бог Господь:

Тропарь, глас первый:

Спаси, Господи, людей Твоих и благослови достояние Твое, помоги труждающимся и обремененным, утеши скорбящих и унывающих и от всех бед сохрани рабов Твоих. (Дважды.)

Слава, глас 8: С вышних призираяяй, убогих приемляй, посети нас, грехов ради наших беды и скорби терпящих, Владыко Всемилостиве, молитвами Богородицы и святых даруй душам нашим велию милость.

И ныне, глас 2:

Всех скорбящих Радосте и обидимых Заступнице, алчущих Питательнице, странников Руководительнице и обуреваемых Пристанище, немощных Покров и Заступнице, Жезл старости, Мати Бога Вышняго, Ты еси, Пречистая; потщися, молимся, спастися рабам Твоим.

Посем иной псалом избранный:

Вскую прискорбна еси, душе моя, и Вскую смущаеши мя? Уповай на Бога, яко исповемся Ему. Реку Богу: Зacтупник мой еси, почто мя забыл еси и Вскую сетуя хожду (Пс. 41:6, 10). Ко Господу внегда скорблю, воззвах (Пс. 119:1). В день скорби моей Бога взысках руками моими (Пс. 76:3). Из глубины воззвах к Тебе, Господи, Господи, услыши глас мой. Да будут уши Твои внемлюще гласу моления моего (Пс. 129:1–2). Бог нам Прибежище и Сила, Помощник в скорбях, обретших нас зело (Пс. 45:2).

Услыши мя, Господи, яко блага милость Твоя, по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя, вонми души моей и избави мя (Пс. 68:17–19). Боже, в помощь мою вонми, Господи, помощи ми потщися (Пс. 69:2). Сохрани душу мою и избави мя, да не постыжуся, яко уповах на Тя (Пс. 24:20). На Тя, Господи, уповах, да не постыжуся в век (Пс. 70:1).

Канон, глас шестой:

Песнь первая

Милостиве Господи, помилуй рабов Твоих, милости ожидающих.

Пресвятая Богородице, спаси нас.

Святии Ангели Хранители наши, молите Бога о нас.

Крестителю Спасов Иоанне, моли Бога о нас.1

Слава, и ныне.

Песнь третья

Милостиве Господи, помилуй рабов Твоих, милости ожидающих.

Святый праведный Иове, моли Бога о нас.2

Святый пророче Божий Илие, моли Бога о нас.3

Святый праведньй Симеоне, моли Бога о нас.4

Слава, и ныне.

Катавасия:

По молитвам святых Твоих, Милостиве, избави от бед и скорбей рабов Твоих, милости ожидающих, яко мы усердно к Тебе прибегаем, к милости Подателю и всех скорбных Утешителю.

Спаси от бед и скорбей рабов Твоих, Пресвятая Богородице Дево, яко мы все по Бозе к Тебе прибегаем, яко к милосердой Матери нашей и всех скорбящих Радости.

Ектения сугубая:

Помилуй нас, Боже:

Еще молимся о милости, жизни, мире, здравии, спасении, посещении, прощении и оставлении грехов рабов Божиих (имя рек) и всех скорбящих, своими грехами беды на себя навлекающих и от злобы людской терпящих.

Еще молимся о братиях наших, на судищи, в темницах, узах, заточении, изгнании и горьких работах сущих.

Еще молимся о врагах наших, ненавидящих и гонящих нас, и всех сущих вне Православной Церкви и заблуждших.

Еще молимся за всю братию и за всех христиан.

Возглас: Яко милостив:

Песнь четвертая

Милостиве Господи, помилуй рабов Твоих, милости ожидающих.

Святый апостоле Петре, моли Бога о нас.

Святый апостоле Павле, моли Бога о нас.

Первомучениче и архидиаконе Стефане, моли Бога о нас.

Слава, и ныне.

Песнь пятая

Милостиве Господи, помилуй рабов Твоих, милости ожидающих.

Священномучениче Клименте, моли Бога о нас.

Святителю отче Афанасие, моли Бога о нас.

Святителю отче Иоанне Златоусте, моли Бога о нас.

Слава, и ныне.

Песнь шестая

Милостиве Господи, помилуй рабов Твоих, милости ожидающих.

Священномучениче Клименте, моли Бога о нас.

Святая великомученица Анастасие, моли Бога о нас.

Священномучениче Ермогене, моли Бога о нас.

Слава, и ныне.

Катавасия и ектения малая.

Прокимен, глас четыре:

Господи, услыши молитву мою и вопль мой к Тебе да приидет.

Стих: Воньже аще день скорблю, приклони ко мне ухо Твое.

Евангелие от Матфея, зачало 43 от полу (Мф. 11, 28–30).

Рече Господь: приидите ко Мне, вси труждающиися и обремененнии, и Аз упокою вы. Возмите иго Мое на себе, и научитеся от Мене, яко кроток есмь и смирен сердцем: и обрящете покой душам вашим. Иго бо Мое благо и бремя Мое легко есть.

Песнь седьмая

Милостиве Господи, помилуй рабов Твоих, милости ожидающих,

Святителю отче Николае, моли Бога о нас.

Преподобная и благоверная княгиня Анно, моли Бога о нас.

Преподобне и благоверне княже Иоанне, моли Бога о нас.

Слава, и ныне.

Песнь восьмая

Милостиве Господи, помилуй рабов Твоих, милости ожидающих.

Преподобне отче Пимене, моли Бога о нас.

Святый великомучениче Евстафие, моли Бога о нас.

Преподобнии Ксенофонте и Марие, Иоанне и Аркадие, молите Бога о нас.

Слава, и ныне.

Песнь девятая

Милостиве Господи, помилуй рабов Твоих, милости ожидающих.

Святителю отче Иоанне, моли Бога о нас.

Святый праведный Филарете, моли Бога о нас.

Святая праведная Иулиание, моли Бога о нас.

Преподобне отче Сампсоне, моли Бога о нас.

Преподобне отче Зотике, моли Бога о нас.

Слава, и ныне.

Достойно есть: Трисвятое. Отче наш:

Тропарь, глас седьмой:

Святии мученицы, добре страдальчествовашии и венчавшиися, молитеся ко Господу, помиловатися душам нашим.

Слава, и ныне. Богородичен, глас пятый:

Утоли болезни многовоздыхающей души моей, утолившая всяку слезу от лица земли; Ты бо человеков болезни отгоняеши и грешных скорби разрушаеши. Тебе бо вси стяжахом надежду и утверждение, Пресвятая Мати Дево.

Ектения сугубая:

Помилуй нас, Боже:

Еще молимся Тебе, Господу Богу нашему, о еже помиловати всех нас скорбящих, своими грехами беды на себя навлекающих и от злобы людской терпящих, и о еже милостиву и благоуветливу быти к нам Тебе, благому и человеколюбивому Богу нашему, отвратити гнев Свой, праведно на нас движимый, избавити нас от заслуженного нами и праведнаго наказания и помиловати нас.

Господи, помилуй (12).

Еще молимся и о еже услышати:

Возглас: Услыши ны, Боже:

Молитва

Владыко Господи Иисусе Христе Боже наш, Боже всякаго милосердия и щедрот, долготерпеливый и многомилостивый, любящий праведных и грешных милующий. Ты рекл еси пречистыми Твоими устами: приидите ко Мне, вси труждающиися и обремененнии, и Аз упокою вас. Се мы, грешные и недостойные, в скорбях и бедах изнемогающии, к Тебе притекаем и припадающе молим: вонми предстательству о нас рождшей Тя Богоматери, приими молитвы святых Твоих, снизойди к нашим немощам и яви милость людям Твоим, в различных состояниях сущим и на Твое человеколюбие уповающим: скорбящих утеши, унывающих ободри, ослабевших укрепи, больных исцели, изувеченным и расслабленным терпение пошли, гладных напитай, нагих одей, безприютным приют даруй, труждающимся помоги, обремененным заботами житейскими и тяжелыми трудами облегчение подаждь, на судилищах, в темницах, узах, заточении, изгнании и горьких работах сущих в терпении укрепи и на свободу скоро изведи, на брани сущих сохрани, плененных возврати, разлученных соедини, враждующих примири, всем во всем милость яви и всех Церкви Твоей Святой представи благоугождающими. Тебе бо свойственно есть миловати и спасати нас, Господи Боже наш, и Тебе славу возсылаем со Безначальным Твоим Отцем и Святым Духом, ныне и присно и во веки веков. Аминь.

Отпуст:

Христос истинный Бог наш, молитвами Пречистой Своей Матери, предстательством святых Ангелов Хранителей наших, святых славных и всехвальных апостолов, святых славных и добропобедных мучеников и всех святых, помилует и спасет нас, яко Благ и Человеколюбец.

Лик: Господи, помилуй (трижды).

Молитва о доме, который терпит наваждение от злых духов (Молитва о храмине, стужаемой от злых духов)

Го́споди Бо́же спасе́ния на́шего, Сы́не Бо́га жива́го, на херуви́мех носи́мый, превы́ше сы́й вся́каго нача́ла и вла́сти, и си́лы, и госпо́дства: Ты еси́ вел́ий и стра́шный над все́ми су́щими окре́ст Тебе́: Ты еси́ сотвори́вый зе́млю в кре́пости Твое́й, и испра́вивый вселе́нную в прему́дрости Твое́й: трясы́й поднебе́сную от основа́ний, столпы́ же ея́ неподви́жны: глаго́ляй со́лнцу, и не возсия́ет, зве́зды же запечатле́яй: запреща́яй мо́рю, и изсуша́яй е: его́же я́рость та́ет нача́ла и вла́сти, и ка́мение сотро́шася от Тебе́. Врата́ ме́дная стерл еси́, и вереи́ желе́зныя сломи́л еси́: кре́пкаго связа́л еси́, и сосу́ды его́ раздра́л еси́: мучи́теля кресто́м Твои́м низложи́л еси́, и зми́я у́дицею вочелове́чения Твоего́ привле́кл еси́, и у́зами мра́ка в та́ртаре посади́в связа́л еси́.

Сам у́бо Го́споди, отжени́ и в бе́гство претвори́ вся́кое диа́вольское де́йство, и вся́кое сатани́нское нахожде́ние, вся́кий наве́т сопроти́вныя и належа́щия си́лы от кро́ва сего́, и от одержи́мых от него́, и от обходя́щих под ним; вся су́щыя во дому́ сем сохрани́, избавля́я их от стра́ха нощна́го, и стрелы́ летя́щия во дни, от ве́щи во тме преходя́щия, от сря́ща и де́мона полу́деннаго. Я́ко Ты еси́ Бо́же утвержде́ние мое́, кре́пкий облада́тель, князь ми́ра, Оте́ц бу́дущаго ве́ка, и ца́рство Твое́ ца́рство ве́чное: и Тебе́ еди́наго есть ца́рство, и си́ла, и сла́ва, со Отце́м и Святы́м Ду́хом, ны́не и при́сно, и во ве́ки веко́в. Ами́нь.

Перевод: Господь Бог спасения на́шего, Сын Бога живого, на херувимах носимый, превыше всякого начала и власти, и силы, и господства: Ты – великий и страшный над всеми сущими вокруг Тебя: Ты Тот, Который сотворил землю в силе Твоей, и исправил вселенную в премудрости Твоей: трясущий поднебесную от оснований, столпы же её неподвижны: говоря солнцу, и не будет сиять, звёзды запечатлевший: запрещая морю, и иссушая его: его ярость таят начала и власти, и камни потреслись от Тебя. Медные ворота ты стёр и железные затворы сломил: крепкого связал, и его сосуды разбил: мучителя крестом Твоим низложил, и змея удочкой вочеловечения Твоего привлёк, и узами мрака, в адской бездне посадив, связал.

Сам Господи, отгони и в бегство обрати всякое дьявольское действо, и всякое сатанинское нахождение, всякое покушение враждебное и теснящие силы от этого дома, и от одержимых от него, и от обходящих под ним; всех находящихся в этом доме сохрани, избавляя их от ужасов в ночи, стрелы, летящей днём, язвы, ходящей во мраке, заразы, опустошающей в полдень (Пс. 90:5–6). Потому что Ты, Боже, утверждение моё, крепкий обладатель, князь мира, Отец будущего века (Ис. 9:6), и царство Твоё – царство вечное: и Тебя одного есть царство, и сила, и слава, со Отцом и Святым Духом, ныне и всегда, и во веки веков. Ами́нь.

Молитвы в продолжение дня

Молитва перед выходом из дома

Отрицаюся тебе, сатано, гордыни твоей и служению тебе, и сочетаюся Тебе, Христе, во имя Отца и Сына и Святаго Духа. Аминь. (И оградить себя крестным знамением.)

Молитва

Огради мя, Господи, силою Честнаго и Животворящаго Твоего Креста и сохрани мя от всякаго зла. Господи, направи ко благу путь мой. Господи, благослови все мои вхождения и исхождения. (И осенить себя крестным знамением.)

Молитва Оптинских старцев

Господи, дай мне с душевным спокойствием встретить все, что принесет мне наступающий день. Дай мне всецело предаться воле Твоей святой. На всякий час сего дня во всем наставь и поддержи меня. Какие бы я ни получал известия в течение дня, научи меня принять их со спокойной душою и твердым убеждением, что на все святая воля Твоя. Во всех словах и делах моих руководи моими мыслями и чувствами. Во всех непредвиденных случаях не дай мне забыть, что все ниспослано Тобою. Научи меня прямо и разумно действовать с каждым членом семьи моей, никого не смущая и не огорчая. Господи, дай мне силу перенести утомление наступающего дня и все события в течение дня. Руководи моею волею и научи меня молиться, верить, надеяться, терпеть, прощать и любить. Аминь.

Молитвы до и после еды

Молитва пред вкушением пищи

Очи всех на Тя, Господи, уповают, и Ты даеши им пищу во благовремении: отверзаеши Ты щедрую руку Твою и исполняеши всякое животно благоволения.

Oтче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.

Слава Отцу и Сыну и Святому Духу, и ныне и присно и во веки веков. Аминь. Господи, помилуй. (Трижды.) Благослови.

На благословение пищи и пития мирянам

Господи, Иисусе Христе, Боже наш, благослови нам пищу и питие молитвами Пречистыя Твоея Матере и всех святых Твоих, яко благословен во веки веков. Аминь. (И перекрестить пищу и питие.)

После еды

Благодарим Тя, Христе Боже наш, яко насытил еси нас земных Твоих благ; не лиши нас и Небеснаго Твоего Царствия, но яко посреде учеников Твоих пришел еси, Спасе, мир даяй им, прииди к нам и спаси нас.

Слава Отцу и Сыну и Святому Духу, и ныне и присно и во веки веков. Аминь. Господи, помилуй. (Трижды.) Благослови.

Благодарение за всякое благодеяние Божие

Тропарь, глас четвертый

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Кондак, глас третий

Твоих благодеяний и даров туне, яко раби непотребнии, сподобльшеся, Владыко, к Тебе усердно притекающе, благодарение по силе приносим, и Тебе яко Благодетеля и Творца славяще, вопием: слава Тебе, Боже Всещедрый.

Слава и ныне: Богородичен

Богородице, христианом Помощнице, Твое предстательство стяжавше раби Твои, благодарно Тебе вопием: радуйся, Пречистая Богородице Дево, и от всех нас бед Твоими молитвами всегда избави, Едина вскоре предстательствующая.

Призывание помощи Духа Святаго на всякое дело доброе

Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Тропарь, глас 2

Творче и Создателю всяческих, Боже, дела рук наших, к славе Твоей начинаемая, Твоим благословением спешно исправи, и нас от всякаго зла избави, яко Един Всесилен и Человеколюбец.

Кондак, глас 6

Скорый в заступление и крепкий в помощь, предстани благодатию силы Твоея ныне, и благословив укрепи, и в совершение намерения благаго дела рабов Твоих произведи: вся бо елика хощеши, яко Сильный Бог, творити можеши.

Молитва перед началом и по окончании всякого дела

Перед началом всякого дела

Благослови, Господи, и помоги мне, грешному, совершить начинаемое мною дело, во славу Твою.

Господи, Иисусе Христе, Сыне Единородный Безначальнаго Твоего Отца, Ты бо рекл еси пречистыми усты Твоими, яко без Мене не можете творити ничесоже. Господи мой, Господи, верою объем в души моей и сердце Тобою реченная, припадаю Твоей благости: помози ми, грешному, сие дело, мною начинаемое, о Тебе Самом совершити, во имя Отца и Сына и Святаго Духа, молитвами Богородицы и всех Твоих святых. Аминь.

Бесплатный фрагмент закончился.