Читать книгу: «Տաղեր»

[Ա]
ՏԱՂ ԱՒԵՏԵԱՑ, ՆԵՐՍԷՍ ԿԱԹՈՂԻԿՈՍԻ

 
Նոր երկինք յերկրի, արփւոյն պարունող,
Ծագողին ծագող:
Երրակի ունող աւետեաց ձայնիւ
Անմահից պետին:
Րոպէիցըն տիպ համայնից հոգւոց
Գոլով արեւելք:
Սըրտի մաքրելոյ զթափանցիկ լուսոյն
Ծագելով նըշոյլ:
Էին աննիւթի հիւթ պարունակող,
Նիւթեալ առ ի քէն:
Սիրատունկ ծառոյն սաղարթից բողբոջ
Ի քէն ընձիւղեալ:
Իսկական Բանին գիր քո մելանաւ
Արեամբ պարագրեալ:
Գեղմն ունակ ցաւղոյ Գեդէոն ետես,
Երգէ եւ Դաւիթ:
Ուրախ լե'ր, դըշխոյ, հարսըն պանծալի
Անմահ փեսային:
Վեհին անեղի էից եղակի
Եղակ վերըստին:
Երբին անկէտի կէտ ժամանակեայ,
Սկիզբն անըսկըզբան:
Սաւս խընկաբերին, նոր դրախտ Ադենի,
Ծառ կենաց պըտղոյն:
Տիրական որթոյն Հաւր տընկագործի
Երկիր բանաւոր:
Աբրահամին աւետ Սահակաւ տըւեալ
Ի քէն կատարումն:
Սառա ամլութեամբ, նորահրաշ ծնընդեամբ
Տիպ քո կուսութեանդ:
Տապանակ կտակի, սափոր ոսկի լի
Նոյն մանանայիւ:
Վէմ առանց ձեռին ի լեռնէդ հատեալ,
Կոյսդ անհայր ծընեալ:
Անկէզ մորենի Մովսեսի տեսեալ,
Ըզքեզ ծանուցեալ:
Ծընող ծնիցելոյն, անմայրըն յառաջ
Անհայր ծնանելով:
Անըստուեր լուսոյ խորան նոր Սինայ,
Տաճար Սաղիմայ:
Ծիր ծայրագունին, ծաւալումն արփւոյն
Յոգիս նըշողից:
Նըստելոյն ընդ Հաւր արքային փառաց
Հուպ մայր մըշտակաց:
Ի բարձունս առ նոյն լեր մեզ բարեխաւս
Սուրբ կոյս Մարիամ:
 

[Բ]
ՓՈԽ

 
Իմանալի սերովբէ,
Բանին աթոռ քերովբէ.
Խորան լուսոյ արքային,
Հարսըն մաքուր փեսային:
Նոր բուրաստան ծաղկերանգ,
Ողկուզաբեր բարունակ,
Դրախտ Տեառն դարձեալ քեւ տըւաւ
Մաւրն Եւայի, որ մեղաւ:
Րոտեալ զերկունս տըրտմական,
Փոխադրեցեր րախճական
Ուրախութիւն երկրայնոցս,
Հարսն ի յերկրէ երկնայնոց:
Մայր կենդանեացըն հոգւոց,
Զոր նախահայրըն ծանոյց.
Երկոտասան վըտակաւ
Վէմն առ ի քէն շնորհեցաւ:
Ծըրար քառիցըն խընկոց.
Հոգւոյն յոգիդ խառնելոց,
Իմաստութիւն, զաւրութիւն,
Արդարամէտ մաքրութիւն:
Նարդոս, զըմուռ ծովային,
Եւ կինամոն կընդըրկին,
Թագապաճոյճ զարմազան
Զըմրուխտ եւ կայծ կարկեհան:
Ով~ դու քաղաք կենդանի,
Տաճար շինեալ Քրիստոսի.
Րաբուն Բանին Յիսուսի,
Ծընող մարմնով ի յերկրի:
Որով հայցեմք մայր լուսոյ,
Զերգող երգոյս եւ զխընդրող,
Սըրբել ըզմեզ ի մեղաց
Լեր բարեխաւս անմոռաց.
Ի զըւարթնոց կայանին
Երգել ըզփառս ընդ նոսին,
Երրորդութեան անեղին
Յաւէտ ի նոյն միշտ Էին:
 

[Գ]
ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ, Ի ՍՈՒՐԲ ԱՍՏՈՒԱԾԱԾԻՆ ԿՈՅՍՆ

 
Նոր ծաղիկ ցուցաւ ի նորատունկ բուրաստանի,
Նոր արեւ հարաւի
Նորազուարճ առաւաւտի:
Երփնատիպ սաղարթ տերեւախիտ կանաչազուարճ
Հողմով Հոգւոյն շարժեալ,
Քաղցրիկ աւդով վայրաբերեալ:
 
 
Րախճանայ դրախտն Եդեմայ նոր ծառ կենաց տնկեալ ի նմա
Ի յաբրահամեան
Յեսսեան արմատ դաւթիազարմ:
 
 
Սքանչելեաւք Կոյսն յըղացաւ զէմմանուէլն ըստ Եսայեայ,
Ծընեալ զՀաւր համագոյն`
Մեզ համագոյ գոլ ըստ մարմնոյ:
Էն ի միշտ Էէն անժամանակ ծընեալ անմայր,
Նոյն ժամանակաւ
Ի կոյս մաւրէ անհայր ծընաւ,
Սիրով խոնարհեցաւ ճըշմարտապէս եւ տիրաբար,
Առնուլ ըզմերս մարմին,
Առանց մեղաց մնալ անմարմին:
Սիրով երկըրպագեա', եկեղեցի, ծնեալ արքային.
Փառաւք զքեզ պսակողին
Մատո ըզփառս միշտ յաւիտեան:
 

[Դ]
ՓՈԽ

 
Այսաւր ցընծութիւն հողեղինացս,
Եւ աւետիք խընդութեան փըրկողին ծննդեան:
Սա յերկնից իջեալ ի ծոցոյ Հաւր,
Որդի եւ Բան անմարմին` եղանի մարմին:
Է զարմանք հրաշից աննիւթ Բանին
Լինել մարմին տիրապէս եւ մնալ անմարմին:
Զանհաս այս խորհուրդ վերին զաւրացն
Ծանուցեալ ասէին` ըզփա~ռս ի բարձունս:
Աստղն արեւելեան զարդարութեան
Եցոյց յայրին զարեգակն ընծայաբեր հովուացն,
Յորմէ սրովբէքն ծածկեալ ըզդէմըս
ԶԵրեքսըրբեանն երգէին. հովիւքն աւրհնէին,
Սարսեալ քրովբէիցն տեսանելով
Զվերանըստեալըն ինքեանց ի գիրկըս Կուսին:
Բանն, որ կերակրէ բանիւ զհոգիս բանականաց,
Դընի յանբանից մըսուր:
Առած Միքիայ առ Բեթղահէմ այսաւր լըցաւ,
Ուստի հացիւ կենաց կերակրիմք:
Նոր երգս աւրհնութեան անճառ Բանին մարմնացելոյ
Մատուսցուք այժմ եւ յաւիտեան:
 

[Ե]
ՏԱՂ ՃՐԱԳԱԼՈՒՑԻ ԾՆՆԴԵԱՆ

 
Այսաւր աւետեաց Գաբրիելի լրումն
Եղանի առ կոյս Մարիամ:
Այսաւր աներբին իննամսեան աճմամբ
Առլըցեալ յարգանդի Կուսին:
Այսաւր գայ Յովսէփ ի քաղաք Դաւթի,
Ընդ Կուսին յայրն իջավանի:
Այսաւր երկնային արքայն մըտանէ
Ընդ երկրաւոր արքային գրոյն:
Այսաւր ազգ մարդկան վերագրին աշխարհագրաւն այն
Յաշխարհըն վերին:
Այսաւր ի Հաւրէ անմարմին ծընեալ Որդի
Նոյն մարմնով ծընանի:
Այսաւր Բանն աննիւթ թանձրացեալ
Հիւթական կերպիւ յայտնեալ երեւի:
Այսաւր լուծանի երկունք անիծից նախամաւրն
Ծնընդեամբ սուրբ Կուսին:
Այսաւր մեզ Դաւիթ տասնաղեաւըն տայ նըշանակ.
Գըտաք յԵփրաթայ:
Այսաւր ըստ Միքիայ Բեթղահէմ ցընծայ`
Տուն եղեալ երկնաւոր հացին:
Այսաւր ըստ Եսայեայ Կոյսըն մայր լինի
Սքանչելեաւք Էմմանուելի:
Այսաւր հոգեղէնք տան որդւոց մարդկան
Աւետիս._ Ծընաւ ձեզ փըրկիչ:
Այսաւր ընդ հովիւսն երգս առեալ գոչեմք.
Ասելով` ըզփառս ի բարձունս:
 

[Զ]
ՓՈԽ

 
Նոր ծաղիկ բըղխէ այսաւր յարմատոյն Յեսսեայ,
Եւ որդի Դաւթի ծնանի Որդին Աստուծոյ:
Րոպէից Տէրն աւծանի արքայ նոր Իսրայելի,
Սրովբէից անտես բնութիւնն տեսանի մարմնով,
Ի լոյսն անմատոյց բնակեալն խանձարրաւք պատի.
Սա անմայր յառաջ ծընեալ, անհայր ծընանի,
Ի բարձունս անբաւ վերնոցն` յայրըն պարագրի.
Երեւի տղայ ծերունին, մանուկ հինաւուրցն,
Անեղն եղանի այսաւր մարդ ճըշմարտապէս.
Յիւր պատկերըն գայ կամաւ կերպարանըն Հաւր,
Սիրով խոնարհի ի մեզ բարձրեալ թագաւորն:
Եկայք զնախատաւն ծնընդեանս վերապատուեսցուք,
Րամեալ մայրութեամբ հաղորդ լիցուք ծնիցելոյն.
Գոհութիւն տացուք նըմին ընդ Հաւր եւ Հոգւոյն,
Սուրբ Երրորդութեանըն փա~ռք յաւիտեանս, ամէն:
 

[Է]
ՏԱՂ ԾՆԸՆԴԵԱՆՆ ՏԵԱՌՆ, Ի ՆԵՐՍԻՍԷ ԿԱԹՈՂԻԿՈՍԷ

 
Այսաւր ի սկըզբան Բանն, որ ընդ Հաւր միշտ յէութեան,
Ծընանի մարմնով, անյեղապէս գոլով բնութեամբ:
Այսաւր ծոցածին լոյսն, որ յառաջ քան զյաւիտեանս,
Ծագեցաւ յերկրի ի կուսական յորովայնէ:
Այսաւր հինաւուրցն Աստուած էակն եղականաց,
Եղանի մանուկ ի զաւակէ Դաւթի ծընեալ:
Այսաւր յարմատոյն Յեսսեայ բըղխեալ մեզ գաւազան,
Ծաղկեցաւ ծաղիկ կենդանատու տիեզերաց:
Այսաւր զլոյս փառաց, որպէս զաւթոց արկող զինքեամբ,
Խանձարրաւք պատի եւ յանբանից մըսուր բազմի:
Այսաւր սրովբէիւք պարածածկեալ թեւաւք խորհուրդն
Յայտնեցաւ մարդկան ի սուրբ յայրին Բեթղահեմի:
Այսաւր ի հրանիւթ քառակերպեան նըստեալն յաթոռ,
Նըւաստացեալ բառնի ի գիրկըս հողեղինի:
Այսաւր կերակրողըն համայնից կենդանութեանց,
Կերակրի կաթամբ ի կուսական բըղխեալ ըստեանցն:
Այսաւր մոգքն աստեղբ յարեւելից եկեալք ի յայրն,
Երկիր պագին` ոսկի եւ զըմուռ, խունկ ընծայեալ:
Այսաւր որ հովուէրըն զԻսրայէլ հովիւըն քաջ,
Բացաւթեայ հովիւք երգեն նըմա. Փա~ռք ի բարձունս:
 

[Ը]
ՓՈԽ

 
Նոցին համաձայնեալ եւ մեք ցընծութեամբ
Երգեմք ընդ հովիւսն` ըզփառս ի բարձունս.
Րախճանամք երկրաւորքս ցընծութեամբ երկնայնոցն,
Սրովբէից անտեսն այսաւր տեսանի.
Ի բարձունս անհասն յերկրի երեւի,
Սոսկալին քրովբէից ի գիրկըս գըգուի.
Ի յայրն իջավանի որ յաթոռ ընդ Հաւր,
Երկնից թագաւորն դընի ի մըսուր.
Եւ խանձարրաւք պատի զլոյս փառաց զգեցեալն,
Րամից մարդկայնոց գայ ի փըրկութիւն:
Գովեմք նոր երգով զնորածին արքայն,
Սըմա միայնոյ տացուք այժմ ըզփառս:
 

[Թ]
ՏԱՂ ԾՆՆԴԵԱՆ, ՏԵԱՌՆ ՆԵՐՍԻՍԻ ԱՍԱՑԵԱԼ

 
Նոր եդեմ բանաւոր տընկոյն,
Նոր Ադամն ի քէն հընոյն նորոգող.
Երկակի դիմառից առիթ
Անքակ միութեան Էին ընդեղումն:
Րենական արփիւ առլըցեալ,
Զմինըն մարմնապէս ծընար վերըստին.
Սիրամարգ ոսկետիպ նըկար,
Տատրակ ողջախոհ, մաքուր աղաւնի:
Երեւեալ ծաղիկ գարնայնոյ,
Վարդ, մանիշակ, քըրքում, շուշան վայելուչ.
Սարդիոն, յակինթ, դահանակ,
Յասպիս, կարկեհան, զըմրուխտ, շափիւղայ:
Ի տիպ վակասին յեռեալ
Կայծ եւ տըպազիոն նորն Ահարոնի.
Երկնագոյն աւդամանուած շար,
Բեհեզ եւ ծիրանի` նիւթ նոր խորանիդ:
Րակերտեա համասեռիցս ելք,
Ընդ քեզ վերաբերիլ յառ ի քէն ծագումն.
Գոչելով զեռահիւսակ նուագս,
Երիցն ի միումն յաւէտ միշտ ըզփառս:
 

[Ժ]
ՓՈԽ

 
Մայր Աստուծոյ Մարիամ,
Դուստըր Դաւթեան թագազարմ.
Ծընար մարմնով զնորն Ադամ,
Որ նորոգեաց զհինն Ադամ:
Աստուածածին դաւանեմք,
Զնեալդ Աստուած քարոզեմք.
Ընդ հրեշտակին քեզ գոչեմք,
Զուրախութիւնն աւետեմք:
Խընդա', խորանըդ լուսոյ,
Բերկրե'ա, տաճարդ արեւոյ.
Ցընծա', աթոռ Աստուծոյ,
Բարձող Բանին բարձրելոյ:
Երկինք երկնից վեհագոյն,
Քերովբէից գերագոյն,
Ի սրովբէիցըն թեւոյն
Ծածկեալ խորհուրդ ծնիցելոյն:
Անտանելոյն կայարան,
Արեգականն աւթարան,
Ահեղ բոցոյն բնակարան,
Աննիւթ Բանին մարմնարան:
Զքեզ տեսանողքըն տեսեալ,
Մովսէս` մորենի ոչ կիզեալ,
Եսայիաս` կոյս յղացեալ,
Եզեկիէլ` դուռն աղխեալ:
Լեառն վիմածին` Դանիէլ.
Բլուր կընդըրկի` Սողոմոն,
Աղբիւր կընքեալ պահողին,
Պարտէզ փակեալ տընկողին:
Նըման գեղման` Գեդէոն,
Դաւիթ` իջման անձրեւոյն,
Եւ Միքիաս` ըզտեղւոյն
Ի Բեթղահէմ ծնանելոյն:
Նոյեան տապան կենարար,
Աբրահամեան տաղաւար,
Կըտակագրին տապանակ,
Անճառ լուսոյն աշտանակ:
Դրախտ Աստուծոյ ծաղկալի,
Նարդոս բուրեալ ի յոգի,
Հովիտ պայծառ շուշանի,
Աղբիւր գետոց քառակի:
Բուրուառ խընկոց անուշից,
Քառաբուրեանըն խառնից,
Զոր ծերունեացըն խըմբից
Զաղաւթս խընկեն քոց բանից:
Ի քէն հայցեմք, մայր կենաց,
Մաքրել ըզմեզ ի մեղաց.
Հայցմամբ առ Տէրն աշխարհաց,
Որում պատիւ սըրբասաց:
 

[ԺԱ]
ՓՈԽ

 
Մայր Աստուծոյ Մարիամ,
Դուստըր Դաւթեան թագազարմ.
Ծընար մարմնով զնորն Ադամ,
Որ նորոգեաց զհինն Ադամ:
Աստուածածին դաւանեմք,
Զնեալդ Աստուած քարոզեմք.
Ընդ հրեշտակին քեզ գոչեմք,
Զուրախութիւնն աւետեմք:
Խընդա', խորանըդ լուսոյ,
Բերկրե'ա, տաճարդ արեւոյ.
Ցընծա', աթոռ Աստուծոյ,
Բարձող Բանին բարձրելոյ:
Երկինք երկնից վեհագոյն,
Քերովբէից գերագոյն,
Ի սրովբէիցըն թեւոյն
Ծածկեալ խորհուրդ ծնիցելոյն:
Անտանելոյն կայարան,
Արեգականն աւթարան,
Ահեղ բոցոյն բնակարան,
Աննիւթ Բանին մարմնարան:
Զքեզ տեսանողքըն տեսեալ,
Մովսէս` մորենի ոչ կիզեալ,
Եսայիաս` կոյս յղացեալ,
Եզեկիէլ` դուռն աղխեալ:
Լեառն վիմածին` Դանիէլ.
Բլուր կընդըրկի` Սողոմոն,
Աղբիւր կընքեալ պահողին,
Պարտէզ փակեալ տընկողին:
Նըման գեղման` Գեդէոն,
Դաւիթ` իջման անձրեւոյն,
Եւ Միքիաս` ըզտեղւոյն
Ի Բեթղահէմ ծնանելոյն:
Նոյեան տապան կենարար,
Աբրահամեան տաղաւար,
Կըտակագրին տապանակ,
Անճառ լուսոյն աշտանակ:
Դրախտ Աստուծոյ ծաղկալի,
Նարդոս բուրեալ ի յոգի,
Հովիտ պայծառ շուշանի,
Աղբիւր գետոց քառակի:
Բուրուառ խընկոց անուշից,
Քառաբուրեանըն խառնից,
Զոր ծերունեացըն խըմբից
Զաղաւթս խընկեն քոց բանից:
Ի քէն հայցեմք, մայր կենաց,
Մաքրել ըզմեզ ի մեղաց.
Հայցմամբ առ Տէրն աշխարհաց,
Որում պատիւ սըրբասաց:
 

ՏԱՂ ԾՆՆԴԵԱՆ, ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

 
Անճառ է խորհուրդ սըրբոյ յայտնութեանն.
Բանն, որ ի ծոց Հաւր ծընեալն անմարմին,
Գըթացեալ ի մեզ, մարմին ըզգեցաւ`
Դարձումն առնելով նախաստեղծ մարդոյն:
Երանեն այսաւր մեզ ազգ եւ ազինք,
Զաւրք հոգեղինացն յերկիր ծաւալին`
Էմմանուելի գուշակ լինելով:
Ընդ մեզ Աստըւած շըրջեցաւ մարմնով,
Թագաւոր փառաց` ծառայի կերպիւ:
Ժամանակ եհաս փըրկութեան մարդկան,
Իջեալ ի յերկիր Որդին միածին,
Լոյս փառաց ծագեաց իւր արարածոցս:
Խաւար լուծանի երեւմամբ լուսոյն,
Ծագի արեգակն ի Բեթղահեմէ,
Կոչէ զտիեզերս ի լուսաւորիլ:
Հովուացն ընթացեալ ի տեսիլ լուսոյն,
Ձայնակից եղեն վերին զըւարթնոցն:
Ղամբար լուսափայլ յայտնեալ ի յայրին,
Ճառագայթ ծագեաց աստղըն յարեւելս:
Մոգուցըն տեսեալ, նըմին հետեւեալ,
Յայրն իջավանեալ տեսին զարեգակն,
Նըմա մատուցին զընծայս խորհըրդոյ,
Շարժեալ իմաստիւք զըմուռս մահացու,
Ոսկի` արքայի, կընդրուկ` Աստուծոյ:
Չնաշխարհիկ գոլով աճմամբ մարդկութեան,
Պարագայց լրութեամբ թիւ երեսնամեայ,
Ջրով Յորդանանու այսաւր զմեզ սըրբեաց:
Ռահ հորդեալ յերկինս որդւոց Ադամայ,
Սարսէր Յովհաննէս մերձենալ ի հուրն:
Վերնոց ահաւորն խոնարհի մարդկան,
Տէր Հոգին իջեալ կերպիւ աղաւնոյ,
Րաբունից րաբունն Հայր վըկայելով,
Ցուցեալ յայտնեցաւ սուրբ Երրորդութիւն,
Իիւսեալ միութեամբ անբաժանելի:
Փառաց, միշտ Էին փառաւորելոյն,
Քահանա'յք, երգով մատուսցուք ըզփառս:
 

[ԺԲ]
ՏԱՂ [ԾՆՆԴԵԱՆ], ՏԵԱՌՆ ՆԵՐՍԻՍԻ ԿԼԱՅԵՑՒՈՅ

 
Ծագումն յարփւոյն, ը~, փառաց
Փայլեալ, ը~, յարարածս եւ լուսաւորեաց:
Լոյսն, որ ի սկըզբանէ աշխարհի,
Վերըստին հաստատի դարձեալ:
Դարձեալ նոր Իսրայէլ ի Քրիստոս, ը~,
Հաւատոյ սեամբ լուսաւորի:
Զլոյս մեծ գիտութեան, ը~, տեսին, ը~,
Ժողովուրդք` որք ի խաւարի:
Խաւար ստուերին աւրինացն փոխեալ, ը~,
Տեղի ետ լուսոյն ճըշմարտի:
Ճըշմարիտ Մելքիսեդեկ, անմայրն յառաջ,
Այսաւր անհայր ծընանի:
Ծնընդեամբն, որ ի Կուսէն,
Զաւրէնըս բընութեան ելոյծ ըզծնելոց:
Ծնեալքս յապականութիւն ցընծամըք
Ծընընդեամբ անապականին:
Անապական կուսածին Որդին
Զանապական շնորհեաց մեզ ծընունդ:
Ծընեալք աւազանաւն,
Ըզծընեալն ի Կուսէն փառաւորեցէք:
 

[ԺԳ]
ՓՈԽ

 
Երգ նոր աւետեաց բարբառ այսաւր մեզ հընչեաց,
Րաբունն երկնային դասուց զաւրաւք յայրն իջեալ:
Գոչէր Գաբրիէլ հովուացն այսաւր._ Ցընծացէ'ք,
Նոր ծընաւ փըրկիչ աւծեալ ի քաղաք Դաւթի:
Երկինք երկնայնովք տաւնեն ըզծընունդ փըրկչին,
Րոպէից քառից կուսից լոյս ծաւալեցաւ:
Սոսկացեալ խըմբից մոգուցն ընդ փայլումն աստեղն
Ի յերկըրպագել ծնելոյն եկեալ ընծայիւք:
Սարսեալ Հերովդէս դողայր ընդ լուր արքային,
Ի խընդիր մահու շարժեալ կենաց տըւողին:
Արեամբ անմեղաց մանկանց լընոյր զԲեթղահէմ,
Յառաջեալ տըղայք վըկայք տըղայացելոյն:
Սոցին համաձայն լերուք, մանկունք Սիոնի,
Էին ծնիցելոյ Բանին տուք միշտ աւրհնութիւն:
 

[ԺԴ]
ՏԱՂ [ԾՆՆԴԵԱՆ], ՏԵԱՌՆ ՆԵՐՍԻՍԻ ԱՍԱՑԵԱԼ

 
Աստուծոյ ողորմութեանցըն ազդեցումն
Յառաքումըն միածնին Հաւր ի յերկիր,
Համբաւ ահեղ երեւեցաւ յաշխարհի
Առ ի քէն, Երուսաղէմ, քաղաք Դաւթի:
Թագաւորք եկին առ քեզ ահաւորք,
Եւ զաւրաւք պատեն ըզդրունըս քո, Սիոն.
Աստղ ունին փայլատակող` առաջնորդ,
Յարեւելից գան ի հարաւ փութապէս:
Արքայի ծընիցելոյ են ի խընդիր
Եւ սիրով նըշան հայցեն բերել ի մէջ.
Ո'չ կարես թաքուցանել, ո~վ սուրբ քաղաք,
Զի յերկնից է տեսութիւնըն, զոր ուսան:
Փութա', հա'րց ըզմարգարէն, որ եւ ասէ`
Ուր ծընանի արքայն հրէից կուսածին.
Ի բարբառոյ խուժադուժիցն աւետեաց
Խռովեցաւ Երուսաղէմ եւ Հերովդէս:
Յիրաւի դու խըռովիս, ո~վ Հերովդէս,
Զի երկնաւոր արքայն իջեալ բառնայ զթագդ.
Որոյ իւր են յաւիտեանքն ըստ Յակոբայ,
Նա կանգնէ զաթոռ Դաւթի յաւիտեան:
 

[ԺԵ]
ՓՈԽ

 
Իսկ դու ընդէ՞ր ես խռովեալ, Երուսաղէմ.
Հակառակ քո փրկութեանըդ վարանիս,
Զի յազգէ աբրահամեան է շառաւիղն,
Եւ յարմատոյն Յեսսեայ ծաղկեալ է գաւազանն:
Երանեն, քեզ երանեն, քեզ երանեն,
Ամենայն ազգ եւ ազինք քեզ երանեն.
Քեզ փըրկիչ եւ ազատիչ յայտնեալ այսաւր,
Եւ մեզ պարտ է այնըր լուսովըն զարդարիլ:
Դու խընդա եւ զուարճացիր, Երուսաղէմ.
Ուրախացի'ր բերկրեալ, ցնծա', մայրաքաղաք.
Ձայն աւետեաց հընչեաց յերկնից առ ձեզ, մարդիկ.
Ելէք տեսէք ի Բեթղահէմ` զըսքանչելիս:
Հրեշտակաց իմն է բարբառս այս սոսկալի,
Եւ զաւրաց երկնաւորացըն` շուրջ զայրիւն.
_ Աւրհնութիւն Հաւր ի բարձունս, _ երգեն զուարթունք, _
Եւ յերկիր խաղաղութիւն որդւոց մարդկան:
Մեծարի այսաւր Կուսիւն մայրըն Սառա,
Պայծառանայ հայր Աբրահամ սուրբ ծերունին,
Զի աւետեաց Որդին եկեալ հիւր առ նմա
Հաղորդս առնել ուրախութեան ընդ զաւրս երկնից:
Որք էաք մեղաւք կապեալ ի յԱդամայ,
Քրիստոսիւ արձակեցաք ի կապանաց,
Եւայիւ դատապարտեալ ազգըն կանանց
Մարիամաւ ազատեցան ի յանցանաց:
Ընդ նոսին համաձայնեալ ուրախութեամբ.
Երգեմք եւ մեք Տեառն Աստուծոյ. Փա~ռք ի բարձունս:
 

[ԺԶ]
ՏԱՂ [ԾՆՆԴԵԱՆ], Ի ՆԵՐՍԻՍԷ

 
Այսաւր աւետեաց ձայն եհաս ի յունկն Եւայի,
Եւա` առաջին կոյս, ցնծայր դըստերբ Կուսիւն,
Կուսին խընդութեան լուր զըւարթունն իջեալ գոչէր,
Գոչէր Գաբրիէլ. «Որախ, ը~, լեր, բերկրեալե:
Բերկրեալ ցընծայր Կոյսն աւետեաւք հրեշտակապետին,
Հրեշտակըն զարհուրէր` տեսեալ ի նմա զառաքողն,
Զառաքողն առաքեալն ծանեաւ յառաջ եկեալ,
Եկեալ հուրն, որ ի մորենին վառեալ ոչ այրէր:
Ոչ այրեալ, այլ սըրբեալ ինքեան տաճարացոյց,
Տաճար հոգեւոր ի Հոգւոյն, ը~, նախ մաքրեալ,
Մաքուր խառնարան գինւոյն իմաստութեանըն Հաւր,
Հաւր մըշակեալ որթն անդ տընկեալ արմատացաւ:
Յարմատոյն Յեսսեայ գաւազան, ը~, ծաղկեցաւ,
Ծաղիկ կուսածին, ձըմերան հալածող գարուն,
Գարուն հոգեւոր աշխարհի յայտնեալ ճըշմարիտ,
Ճըշմարտութիւն յերկրէ ի Կուսէն բուսաւ պըտուղ:
Պըտղոյն առաջնոյ մահ լուծաւ կենացըն պըտղով,
Պըտուղ անմահին ծառոյ տուաւ մեռեալն Ադամայ,
Ադամ վերըստին եմուտ ի դրախտն Եւայիւ,
Եւա պարէ այսաւր ծնանելով զԱստուածորդին:
Որդին, ծածկեալն առ Հաւր, այսաւր յայտնի մարմնով,
Մարմնով անմարմին Բանն մարդկան փըրկող եկեալ,
Եկեալ մըկըրտել Յորդանան ի Յովհաննէ,
Յովհաննէս հրաժարէր. «Ինձ պարտ է ի քէն մկրտիլ, Տէ'րե:
Տէր լուսոյն լոյս զգեցեալ, որ ըզգեցոյց մեզ ըզլոյս,
Լուսափայլ Հոգին գայր աղաւնակերպ յերկնից,
Երկնիցըն փակեալ դրունք եղեն բացեալ այսաւր,
Այսաւր զմարմնացեալ Բանն Հայր` Որդի դաւանէր:
Դաւանեմք ընդ նըմին էակից Հաւր զՈրդի,
ԶՈրդի եւ զՀոգի ընդ Հաւր անճառ, ը~, միութեամբ.
Միոյ տէրութեանն յաւէտ նըւագեմք ըզփառս,
Փա~ռք երից միոյ միշտ, այժմ եւ յաւիտեանս, ամէն:
 

[ժէ]
ՓՈԽ

 
Բարբառ աւետեաց ձայնիւ
Գաբրիէլ գոչէր սըրբուհւոյն.
_ Առ քեզ առաքիմ, մաքուր,
Պատրաստել տեղի տէրունւոյն:
Նըւագ ցընծութեան երգեմք.
_ Ուրախ լե'ր, բերկրեալ, Տէր ընդ քեզ:
Նորոգի երկիրս այսաւր
Յառաջին մեղաց հնութենէն,
Երկինք երկնայնովք հանդերձ
Ընդ մարդկան տան փա~ռք ի բարձունս,
Րամեալ միանան սիրով,
Հաշտութեամբ Հաւր ընդ արարածս:
Սարտեաւ յողջունէն սուրբ Կոյսն,
Հաստատէր բանիւ հրեշտակին.
Ի տուն Զաքարիայ երթայր
Ի յողջոյն Եղիսաբեթին,
Սիրով զլուր բանին լըւեալ,
Եւ խայտայր ձայնն յորովայնին,
Ի բերան ծերոյն ամլոյ
Աւրհնութիւն տայր պըտղոյ Կուսին:
Երգեմք ընդ մեծին ի ծնունդս.
_ Փըրկողիդ փա~ռք եւ զաւրութիւն:
 

[ԺԸ]
ՏԱՂ [ԾՆՆԴԵԱՆ], Ի ՆԵՐՍԻՍԷ ԿԱԹՈՂԻԿՈՍԷ

 
Լոյս փառաց Էին ծագողին ծագումն,
Զաւրութիւն զաւրին, իմաստութեանն իմաստ,
Բան բերող խորհըրդոյ
Դէմ անձնաւոր կատար:
Կատարումն էից յանգոյից գոյակ.
Նախեղակ վեհից իմանալեացըն խումբ
Ստորակայ տարրից, ը~, քառիւք,
Յորոց միութեան, ը~, պատկեր` տիպ աննըմանոյն նըման:
Նըման միայնում սկըզբնատպին գեղոյ,
Խաւարին խաբմամբ փոխակերպեալ ընդ լուսոյ
Պըճնից, ը~, խաւար մերկացեալ
Ըզպատմուճանն անճառ փառաց:
Փառաց թագաւորն յայց ել պատկերին,
Գըտեալ յարգանդի անապական Կուսի,
Խանդակաթ, ը~, սիրով գըրկեալ համբուրիւ
Ըզխառնեցելոյ բնութեանն:
Զբնութիւն հողանիւթ ստուերամած կերպիւ,
Լուսափայլ պըճնիւք փառազարդեալ
Աստուածատեսակ, ը~, հրաշիւք ծընանի մարմնով, ը~,
Յիջավանեալ յայրին:
Յայր Բեթղահեմի, ի տուն Եփրաթայ,
Ի քաղաք Դաւթի հրեշտակերամ դասուց,
Ստոր իջեալ պարեն ընդ հովիւսն աւետաքարոզ, ը~,
_ Փա~ռք ի բարձունս, երգով:
Երագեալ մոգուցն աստեղբ նըշանաւ,
Եկին ի խընդիր արեգականն արդարութեան խորհըրդեան, ը~,
Բերմամբ ոսկի եւ կընդրուկ, զըմուռ
Ընծայեալ նըւէր:
Ընդ նոսին եւ մեք ընծայ հոգեւոր մատուսցուք
Ծնընդեան թագաւորին մերոյ
Ըզհաւատս, եւ ըզյոյս, ըզսէր`
Ի ձայն ցընծութեան երգել նըմա ըզփառս:
 

[ԺԹ]
ՓՈԽ

 
Նոր թագաւորին անժամանակ ծընեալ Բանին
Եկայք երկիր պագցուք եւ ընդ մոգուցն ընծայեսցուք,
Րամեալ զհոգի, զմարմին, զմիտըս տացուք երրեակ անձին:
Սիրով խոնարհելոյն մաքուր հոգւով տաճարասցուք,
Ի սիրտըս գըգուեսցուք, որպէս ի գիրկսըն` Սիմէոն:
Ստասցուք տիպ աւրինակ զանարատ կոյսըն Մարիամ
Ի նոյն նըմին նըման տաճար լինել Երրորդութեանն:
Երգով համաձայնեալք հոգեղինացն, որպէս հովիւքն,
Րաբունաբար զիմաստ իմաստութեան Հաւր ընծայեալ`
Գըլխոյն եկեղեցւոյ յաւդեալքս ի նոյն տացուք ըզփառս:
 

[Ի]
ՏԱՂ ԾՆՆԴԻ, Ի ՆԵՐՍԻՍԷ ԿԱԹՈՂԻԿՈՍԷ

 
Տիրուհի սուրբ Կոյս, մայր մարմնացելոյ Բանին,
Մաքուր կուսութեամբ ծընար տըղայ ըզՏէրն,
Տաճար հոգեւոր թագաւորին երկնից,
Առաքեցելոյն ի հայրական ծոցոյ:
Րաբունին էից իմաստութիւնըն Հաւր,
Առ քեզ խոնարհեալ շուշանափայլ հովիտ.
Րախական բայիւք երգաբանեալ գոչեմք.
_ Հարսն երկնից դըշխոյ, ուրախացի'ր բերկրեալ:
Ցընծութիւն կուսից աւետաբեր կանանց,
Բաց լուծանելով զանիծաբեր երկունս.
Ցաւղ ի Հերմոնէ վայր ի Սիոն հեղեալ,
Գեղմն իմանալի ի քեզ իջեալ Հոգւոյն:
Հինաւուրցն Աստուած մանուկ ի քէն յայտնեալ,
Մորենի վառեալ զքեզ Մովսեսի տեսեալ,
Հիւսակ հոգեւոր եաւթնարփեան շնորհաց
Ջահ վառեալ լուսով Զաքարիաս ետես:
Փունջ վարդից յեռեալ անուշահոտ հոգւով,
Խընկաբեր հովիտ, զըմուռ եւ տաշխ հալուէ,
Փառաց թագաւորն քեւ ի տաճարն եկեալ,
Սիմէոն ցընծայր քառասնաւրեայ մանկամբն:
Քառակերպ աթոռ սուրբ ծերունին գըտաւ`
Ի գիրկս իւր բարձեալ զ՚ի քերովբէս նըստեալն:
Քրիստոսի փըրկչին ընդ ծերունւոյն գոչեմք.
_ Արձակեա' եւ զմեզ ի կապանաց մեղաց:
 

[ԻԱ]
ՓՈԽ

 
Անճառ Բանին բարձրելոյն
Երկըրպագեն քերովբէք,
Որ միշտ ընդ Հաւր եւ Հոգւոյն
Փառաբանի յանմահից:
Անճառելի խորհըրդով
Նըւաստացեալ տեսանիւր,
Կոյս կուսական ծընընդեամբ
Զկանանցն ելոյծ զդատակնիք:
Ծընաւ ծընեալն ի Հաւրէ,
Զմեզ ազատեաց յանիծից,
Կեանք ի կենաց յայտնեց.
Մեզ կեցուցիչ եւ փըրկիչ:
Իջավանի ի յայրին
Այն, որ անտեսն է վերնոցն,
Ի խանձարուրս պատեցաւ,
Լուսով ըզմեզ զարդարեաց:
Կաթամբ Կուսին կերակրի
Հացըն կենաց անմահից,
Մըսուր եդաւ յանբանից
Անպարագիրն ի յէից:
Հովուացն եկեալ ի տեսիլ
Փառաց լուսոյ անեղին,
Ձայնակցելով ընդ վերնոցն`
Փա~ռք ի բարձունս, երգէին:
Մոգքն ընծայիւք կանխէին
Ի փառս ըզմեզ փըրկողին:
Ընդ որս եւ մեք գոչեսցուք.
_ Փա~ռըք ծնընդեան Քրիստոսի:
 

[ԻԲ]
ՏԱՂ ԾՆՆԴԵԱՆ, Ի ՆԵՐՍԻՍԷ ԿԱԹՈՂԻԿՈՍԷ

 
Էին միայնոյ միածին Որդին,
Ծընեալն յառաջ քան ըզկէտ ժամանակի սկըզբանց:
Սկիզբըն համայնից յանէից էից,
Պատճառ ստեղծողն անտարրից եւ տարրեղէն գոյից:
Գոյին պատկերի կորուսեալ դրամին
Իջեալ` այց առնելով ծառայական կերպիւ:
Կերպարանըն Հաւր ի կերպի եղեալ
Ադամայ` զնոյն վերաստեղծեալ վերածելով ի փառս:
Փառաց թագաւորն, որ նըստի ընդ Հաւր յաթոռ,
Ծընեալ ի Կուսէ եւ ի մըսուր բազմեալ:
Բազմի եւ ի գիրկըս դըստեր Դաւթի,
Տղայապէս կաթամբ կերակրի` որ կերակրէ զաշխարհս:
Յաշխարհի ծագաց մոգք ընծայաբերք եկին,
Աստեղբըն տեսին զանտեսական ըզլոյսն:
Լոյս փառաց ծագեաց բացաւթեայ հովուաց,
Հրեշտակք պարակցեալ մարդկան` փա~ ռք ի բարձունս երգեն:
Երգեմք ընդ նոսին եւ մեք զուարճալի ձայնիւ.
_ Փա~ռըք նորածին թագաւորիդ մեծի:
 

[ԻԳ]
ՓՈԽ

 
Նորահրաշ ծնընդեան քո, Տէ'ր,
Ընդ մոգուցն երկըրպագեմք,
Երկնաւոր հովուիդ երգեմք
Զերգս հովուացն` փա~ռք ի բարձունս:
Րաբունւոյդ աշակերտեալքս
Ընդ հրեշտակս այսաւր պարեմք,
Սրովբէից համաձայնեալ`
Յայտնութեամբ քո, Տէ'ր, ցընծամք:
Երեւելոյդ ի փըրկել
Քեւ փըրկեալքըս պաղատիմք.
_ Սըրբեա' ըզմեզ ի մեղաց
Կենարար քո սուրբ ծնընդեամբ.
Ի փա'ռըս վերաբերեա
Աղաչանաւք Աստուածածնին:
Եւկեալ նորոգող փըրկչիդ
Նորոգեալքս երգեմք ըզփառս:
 

[ԻԴ]
ՏԱՂ [ԾՆՆԴԵԱՆ], Ի ՆԵՐՍԻՍԷ ԿԱԹՈՂԻԿՈՍԷ

 
Սկըսեալն յանըսկիզբն ի Հաւրէ անժամանակ Որդին,
Որդին անըսկիզբն առեալ ըսկիզբն ի Կուսէն մարմնով.
Մարմնով պարագրի արկողն որպէս զաւթոց ըզլոյս,
Լոյս փառացըն Հաւր ի մըսուր խանձարրաւք պատեալ բազմի.
Բազմի եւ ի գիրկս Կուսի ի քերովբէից բարձեալն,
Բարձողըն կարեաց էից կերակրի կաթամբ Կուսին.
Կոյսըն մայր եղեալ հրաշիւք զբնութեանս ելոյծ զաւրէնս,
Աւրինաց տըւողն եմուտ ընդ աւրինաւք ծնընդեան.
Ծնընդեան արքային աստեղբն մոգքն ընծայաբերք եղեն,
Եղեն եւ հովիւք դասուց հրեղինաց համաձայնեալ:
Համաձայնելով եւ մեք երգեմք` փա~ռք ի բարձունս.
Ի բարձանց իջեալ փըրկչիդ տացուք յաւէտ ըզփառս:
 

[ԻԵ]
ՓՈԽ

 
Տէր փառաց անճառ ծընեալն յառաջ քան զյաւիտեանս,
     Նոյն ծընաւ այսաւր ի Բեթղահէմ քաղաք Դաւթի:
Րաբունն երկնային իմաստութիւնըն Հաւր եւ բան,
     Յանբանից մըսուր ի խանձարուրս պատեալ դընի:
Նըստեալն ի քրովբէս յաթոռ փառացըն հինաւուրցն,
     Ի գիրկըս Կուսին տըղայապէս բազմի մանուկ:
Երկնաւոր զաւրացըն թագաւոր մեծ եւ յաղթող,
     Յամպ թեթեւ նըստեալ, ի յԵգիպտոս փախչի կամաւ:
Րամից համայնից ստեղծող եւ Տէր, անտես վերնոցն,
     Յերկրի երեւի եւ ընդ որդւոց մարդկան շըրջի:
Սրովբէից թեւաւք պարածածկեալն ի սուրբ սըրբոցն
     Խոնարհեալ հայցէ ի ծառայէն իւր մըկըրտիլ:
Եկեալ հուրն Աստուած Յորդանանու յորձանսն իջեալ,
     Ջրով կիզու ըզմեղս ադամային բնութեան մարդկան:
Սարսեալ ամլորդւոյն ի կիզանող ահեղ բոցոյն,
     Հրաժարէր մերձիլ ի ճառագայթն անճառ փառաց:
Ի բարձանց Հոգին աղաւնակերպ էջ առ նըմա,
     Մատամբ ցուցանէր զծածկեալ մարմնով բնութիւնն Աստուած:
Երկնից դրունք բացան, այն զոր փակեաց մեղաւք Ադամ,
     Հաւր բարբառ հընչեաց._ Դա' իմ Որդի, դըմա' լուարուք:
Սուրբ Երրորդութեան երից անձանց խորհուրդ յայտնեալ,
     Զոր փառաւորեմք անլըռելի ձայնիւ երգով:
Այժմ եւ հանապազ ընդ Հաւր զՈրդի գովեմք Հոգւովն,
     Միաստուածութեան տացուք ըզփառս միշտ յաւիտեան:
 

[ԻԶ]
ՏԱՂ [ԾՆՆԴԵԱՆ], ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

***

 
Այսաւր ցընծան դասք հոգեղինացն
Ընդ փըրկութիւն հողեղինացս:
Այսաւր ցընծայ Ադամըն հին`
Նոր Ադամաւ նորոգելով:
Այսաւր ծընծայ կոյսն առաջին
Երկրորդ Կուսին ծընեալ զԱստուած:
Այսաւր իջեալ բանակք անմարմնոցն
Տան աւետիս մարմնաւորացս:
Այսաւր գոչէր հրեշտակապետն.
_ Ուրախ լերուք եւ ցընծացէ'ք,
Դասք երջանիկ ընտրեալ հովուացն.
Ծընաւ այսաւր ձեզ փըրկութիւն`
Տէր եւ աւծեալ Հաւր միածին
Ի Բեթղահէմ քաղաք Դաւթի:
Փութացարուք յայրն երկնանման
Ի տեսանել զհովիւըն քաջ,
Որ ի լընուլ զթիւ հարիւրոց
Իջեալ ի գիւտ մոլորելոցս,
Երգեմք նըմա` փա~ռք ի բարձունս:
 

ՓՈԽ

 
Այսաւր ցընծայ տունն աբրահամեան
Աւետաբեր Որդւոյն ծնընդեամբ:
Այսաւր ցընծան դասք նահապետացն,
Լըրմամբ ուխտին թըլփատութեան:
Այսաւր ցընծայ Մովսէս աւրինաւքն`
Տեսանելով զլրումն աւրինաց:
Այսաւր ցընծան հոյլք մարգարէիցն`
Տեսեալ ըզմարգարէացեալն:
Այսաւր փողէ դաւթեան քընարն.
_ Գըտաք ըզնա տուն յԵփրաթայ:
Այսաւր գոչէ մեծն Եսայիաս.
_ Ընդ մեզ Աստուած Կոյսըն ծընաւ:
Այսաւր հընչէ յայրըն Միքիաս.
_ Ծընցի իշխան ի Բեթղահէմ:
Այսաւր խայտայ ձայն բարբառոյն`
Որպէս երբեմն յորովայնին,
Այսաւր ցընծայ մեծ Կարապետն`
ԶԱստուած եկեալ տեսանելով:
Այսաւր գոչէ յանապատէ.
_ Ձեզ աւետի~ք, որք յԱդամայ.
Տէր գայ, հըզաւրըն զաւրութեամբ,
Վանէ զկարծեալըն զաւրութիւն,
Մերձ է երկնից արքայութիւն,
Պատրաստեցէք յոգիս շաւիղ:
Թագաւորին երկնաւորի
Լերինք եւ բլուրք խոնարհեցան,
Խորք անդընդոց բարձեալ լըցցին:
Իսկ դու ցընծա', գետ Յորդանան,
Զի զարհուրեալ անդրէն դառնաս,
Արագ փութա' այսրէն ի նոյն,
Ծափ ըզծափի հարցես ձեռամբ,
Յորդ վըտակաւք խաղա' զըւարթ,
Ել ընդառաջ ալեաւք խորոց,
Երկըրպագեա' արարողին.
Գայ մըկըրտիլ հուրն Աստըւած`
Լըւանալով զմեղս Ադամայ,
Ջախէ ի քեզ զգլուխ վիշապին:
 

ՓՈԽ

 
Այսաւր անմեղըն մըկըրտի,
Զի զմեղուցեալքըս սըրբեսցէ:
Այսաւր ստեղծողըն ձեռնադրի
Խոնարհութեամբ յարարածոյն:
Այսաւր Հոգին աղաւնակերպ
Էջ` վըկայեալ իւր էակցին:
Այսաւր փակեալ դըրունք բացան,
Եւ հինաւուրցն Աստուած յայտնեալ:
Այսաւր հընչեաց Հայր ի բարձանց.
_ Դա' է Որդի իմ սիրելի,
Բան եւ ծընունդ եւ ճառագայթ,
Լոյս ի լուսոյ, կեանք ի կենաց,
Իմաստութիւն եւ զաւրութիւն,
Սկիզբն սկըզբանց անժամանակ,
Արարչակից եւ գոյակից,
Միով բնութեամբ` ոչ բաժանեալ,
Իջեալ յինէն` ոչ հեռացեալ,
Մարմին առեալ` ոչ փոփոխեալ:
Դըմա' լուարուք, որդիք մարդկան,
Դա` ճանապարհ ճըշմարտութեան,
Ելէ'ք ընդ նոյն առ իս յերկինս:
 

ՓՈԽ

 
Այսաւր Հոգւովն ել յանապատ
Տէրըն` փորձիլ ի փորձողէն,
Այսաւր երկրորդ Ադամ պահեալ
Պարտեաց զյաղթող հնոյն Ադամայ:
Այսաւր պահաւք քառասնաւրեայ
Կանգնեաց զանկեալըն ճաշակմամբ:
Այսաւր ցընծամք որդիք մարդկան,
Զի ետ կոխան զաւձն առաջին:
Այսաւր տաւնեմք ուրախութեամբ
Զաւր աւետեաց ազատութեան:
Այսաւր եկայք, հաւատացեալք,
Տացուք փըրկչին չփառս յաւիտեան.
 

[ԻԷ]
ՏԱՂ ԾՆՆԴԵԱՆ, Ի ՆԵՐՍԻՍԷ

 
Քառանիւթիցըս Աստուած եւ աննիւթիցն
Անեղ յէութեան ծածկեալըն ի ծոց Հաւր,
Փըրկող ծագեցաւ ի լուսոյ մեզ լոյս,
Բան բովանդակեալ յորովայնի Կուսին:
Ւիւթիւ Սուրբ Հոգւոյն տնաւրինաբար յղացեալ
Զհինաւուրցն Աստուած ծընանելով մանուկ,
Ցուցաւ ի մարմնի եւ ցընծացաւ երկիր,
Պանծացաւ Եւա` զԱստուածորդին ծընեալ:
Րաբունին բազմեալ ի յանբանից մըսուր,
Պար առեալ հրեշտակք ընդ բացաւթեայ հովուացն
Տան փա~ռք ի բարձունս, յերկիր խաղաղութիւն,
Աւետիս մարդկան ընդ հաշտութեանըն Հաւր:
Վերնական աստեղբըն հրաւիրեալ մոգուցն
Ընծայաբերիլ թագաւորին նորոյ.
Սարսեալ Հերովդէս ընդ համբաւ Մանկանն,
Մոլեգնեալ լընոյր արեամբ ըզԲեթղահէմ:
Ռահ հորդէր Յովսէփ ըստ հրեշտակին տեսլեան,
Մանկամբն եւ Կուսիւ փախչէր ի յԵգիպտոս.
Ջահ լուսոյն դարձեալ ի Նազարեթ բնակէր,
Ծածկէր զճառագայթն երեսնամեայ լըրմամբ:
Պարագրեալ մարմնով ի Յորդանան եկեալ.
Զհընոյն Ադամայ լուանալ պարտեացն ըզգիր.
Չառնոյր Յովհաննէս ըզմըկըրտելն ի յանձն,
Խոնարհէր փըրկիչն` իջանելով ի ջուրսն:
Որդին կուսածին յամլորդւոյն ձեռնադրեալ,
Ձայնէր Հայր յերկնից._ Դա' իմ Որդի ընտրեալ:
Շնորհատու Հոգին աղաւնակերպ իջեալ,
Հանգչէր ի վերայ մարմնացելոյ Բանին:
Նա սկիզբն առնելով մըկըրտութեան նորոյ,
Ի հուր եւ Հոգի մըկըրտելով ըզմեզ,
Յաղթէր բնակելոյն վիշապ աւձին ի ջուրսն,
Զգլուխ նորին ջախեալ կոխան մարդկան տըւեալ:
Մեկնեալ յանապատ չար փորձողին յաղթէր,
Խրատելով ըզմեզ ըզգուշանալ շնորհին.
Ճաշակն ըզմեղաց ապաշխարէր անմեղն,
Անճաշակ եղեալ քառասնաւրեայ աւուրբք:
Ղաւղեալ բանսարկուն հալածեցաւ ի բաց,
Մատուցեալ հրեշտակք եւ պաշտէին ըզՏէրն:
Ձայնիւ քաղցր երգով համաձայնեալ նոցին,
Աւրհնեսցուք զեկեալն ի փըրկութիւն մարդկան:
 

[ԻԸ]
ՓՈԽ

 
Նոյն ինքն անդրանիկըն Հաւր յառաջ քան զարեւ,
Եղեւ անդրանիկ այսաւր կուսական ծնընդեամբն:
Րոպէից քառից ստեղծողն ի նոյն խոնարհեալ,
Սըրբել զԱդամայ զյանցանս ի գետն Յորդանան:
Եկեալ հուրն Աստուած մարմնով մըկըրտիլ ի ջուր,
Սարսեալ Յովհաննէս տեսլեամբն, ոչ իշխէր մերձիլ:
Ի վերուստ իջեալ Հոգին նըման աղաւնոյ,
Երկնիցըն բացան դըրունք, Հայր յայտնեալ ցուցաւ.
Աղաղակելով գոչէր. «Դա' է իմ Որդի
Յինէն առաքեալ յերկիր, դըմա~ լըւարուքե:
Սա տաւնից մեզ տաւն, եղբարք, ժողովոց ժողով,
Բոլորից փըրկիչն այսաւր Յիսուս կոչեցաւ:
Արդ, յաւուր տաւնիս այս Տեառն անուանադրութեան
Նըւագ ցընծութեան երգեմք` ըզփառս ի բարձունս:
 

[ԻԹ]
ՏԱՂ ՔԱՌԱՍՆԱԻՐԵԱՅ ԳԱԼԸՍՏԵԱՆ ՏԵԱՌՆ Ի ՏԱՃԱՐ, Ի ՆԵՐՍԻՍԷ

 
Այսաւր նորահրաշ լոյսն ի յերկնից ծագեալ,
Ծագեալ ի Հաւրէ լոյս ի լուսոյ ծընունդ:
Ծընունդ էական Աստուած ընդ Հաւր լոյս քան զարեւ յառաջ,
Յառաջ քան զըսկիզբն անժամանակ անեղ անմահ բնութիւն:
Բնութիւն միշտ էակ մին միածին Բանն, որ ի ծոցըն Հաւր,
Հաւր անեղ Որդին անճառելի ամենեցուն ստեղծիչ:
Ստեղծիչն, որ եստեղծ զիս` յանէից գոյացուցեալ բանիւ,
Բանիւ զաւրութեամբ կրէ զամենայն արարչական սիրով:
Սիրով խոնարհեալ եկն ի խընդիր իւր հողացեալ կերպին,
Կերպին նախեղակ զոր մահացոյց մահու առիթ պըտուղն:
Պըտուղ կենդանի, որ ի սկըզբան Բանն ի Կուսէն նոր մարդ,
Մարդ ճըշմարտապէս տնաւրինաբար ընդ աւրինաւք մըտեալ:
 

ՓՈԽ

 
Մըտեալ ի տաճարն այսաւր աւծեալն Աստուած,
Աստըւած եւ Տէր սինէական տառիցն:
Տառից աւրինաց մարգարէից նահապետացըն Տէրն,
Տէր Յիսուս ելից զերանաւետ ուխտ նոր ընդ հարսն այսաւր:
Այսաւր ծերունին գիրկս արկանէր Հաւր ծոցածին լուսոյն,
Լուսոյն անեղի Մանըւէլի տղայացելոյ Բանին:
Բանին Հաւր գոչէր աղերսալի արտասուագոչ ձայնիւ,
Ձայնիւ աղերսէր. «Լո'յսդ, որ եկիր լուսաւորել զաշխարհս,
Զաշխարհս փըրկեցեր, արձակեցեր յանլոյծ մեղաց կապից,
Կապից անիծից եղեր լուծիչ, այժմ արձակեա' եւ զիս.
Զի'ս այժմ արձակեա, զծե'րս, ի կապէ, ծեր տղայ ծերոյ ծընունդ,
Ծնունդ անեղ լուսոյ մանուկ տըղայ, Աստուած եւ Տէր, Քրիստոսե:
Քրիստոս Աստըւած, լուր մեզ եւ այժմ աղաչանաւք ծերոյն,
Ծերոյն աղաւթիւք մեզ ողորմեա' քո բանաւոր հաւտիս,
Հաւտի քո փոքու, զոր գընեցեր քո պատուական արեամբդ,
Արեամբ քո քաւիչ դեղ թողութեան մեղաց շնորհեա' եւ մեզ:
Մեզ այց արա, Տէ'ր, ընդ սուրբըս քո յայցելութեան աւուրն,
Յաւուրն աներեկ մեծի ծագման քո հայրենի փառաւք:
Փառաց թագաւո'ր, քեզ վայել է փառք եւ պատիւ ընդ Հաւր,
Ընդ Հաւր եւ Հոգւոյն փա~ռըք, պատիւ միշտ յաւիտեանս, ամէն:
 

[Լ]
ՏԵԱՌՆ ՆԵՐՍԻՍԻ, Ի ՅԱՐՈՒԹԻՒՆ ՂԱԶԱՐՈՒ ՈԳԵԱԼ

 
Անմահ թագաւորն իջեալ ի վայրըս մահու,
Մահու գերելոց առընել գերէդարձ.
Դարձոյց վերըստին ի կեանս անվախճանս,
Վախճան մահու եւ կենաց ըսկիզբն այսաւր:
Այսաւր կեանքն եկեալ ի Բեթանիայ առ մահն,
Մահուն փախուցեալ որպէս խաւար ի լուսոյ,
Լուսոյն ընթացեալ զհետ մահուն, ը~, խաւարի,
Խաւար ստուերամածըն եղեւ լոյս անըստուեր:
Ստուերաւ տըրտմութեամբ քոյրքն անկեալ առ ոտըս Տեառն.
_ Տէ'ր, թէ աստ պատահեալ, կեանքդ եղբաւրն ոչ հանդիպիւր մահ:
Մահու սիրելւոյն կրիւք մարդկաբար արտասուէր,
Արտասուաց բըղխումն այն զարտասուսըն բառնայր:
Բառնալ հրամայէր հզաւրն ըզվէմն առ ի բաց,
Բարձմամբ տապանին այնմ բացան դրունք դըժոխոց:
Դըժոխք սարսեցին ի ձայնելն առ Ղազար.
_ Ղազարէ', եկ արտա'քս, _ ձայնէր կոչողն Ադամայ:
Ադամայն կապ մահու լուծեալ ձայնիւ հըզաւրին,
Հըզաւրին զաւրութեամբ դարձաք դարձեալ ի կեանսն:
Կենսատու ձայնին մերձեալ ի յունկըն մեռելոյն.
Զմեռեալ չորեքաւրեայն ոչ արգելին դըժոխք:
Ի դըժոխս կապեալ անձն արագ գայր առ կոչողն,
Կոչողին հրաման լուծանէր զնա ի կապից.
_ Կապելոցն ի դըժոխս աւետի~ս յարութեան:
Յարութեան յուսով ցընծասցուք եւ մեք այսաւր,
Այսաւր զուարճանամք տաւնիւս ընդ Մարիամանցն:
Մարիամու մասին հաղորդս արա զմեզ, Տէ'ր,
Տիրականդ ոտից աւծմամբ թողութիւն շնորհել,
Շնորհաց քոց անճառից, Յիսո' ւս, մատուսցուք զփառս:
 

[ԼԱ]
ՓՈԽ

 
Նոր աւետեաց լուր այսաւր մեզ հընչեաց
Երկնային ձայնիւն Որդին որոտման.
Րոպէից Տէրն Յիսուս` ստեղծողն Ադամայ`
Սա այսաւր եկեալ ի Բեթանիայ
Ի յարուցանել ըզչորեքաւրեայն:
Սաստեաց հրամանաւ մահու բըռնութեան.
Ի կեանըս դարձոյց վերըստին զՂազար
Եւ նովին յուսով զմեզ անմահացոյց:
Րաբուն իմաստիւք սպասեալ յարութեան`
Գոչեսցուք եւ մեք` Կենարարին փա~ռք:
 

[ԼԲ]
ՏԱՂ ԾԱՂԿԱԶԱՐԴԻՆ

 
Տիրական տաւնիւս այսաւր եկայք ցընծասցուք,
Րախճանայ այսաւր երկինք անմարմնականաւք:
Նորոգի երկիրս այսաւր գալըստեամբ փըրկչին,
Երգս առեալ մանկանցն ոստովք` ովսաննա', աւրհնեալ:
Րաբունին էից այսաւր եկեալ ի Սիոն,
Սիոնի ցընծան մանկունք ելեալ ընդառաջ:
Երգս երգէ Զաքարիաս դըստեր Սիոնի,
Սիրով խոնարհեալ նըստի նոր յաւանակի:
Ի ծերոց ընծայ բանիւ ի տղայոց ձայնիւ,
Երգեմք ընդ նոսին ըզփառս գալըստեան քո, Տէ'ր:
 

[ԼԳ]
ՏԱՂ ՄԵԾԻ ՉՈՐԵՔՇԱԲԱԹԻՆ, Ի ՆԵՐՍԻՍԷ ԿԱԹՈՂԻԿՈՍԷ

 
Այսաւր ըզՏէրդ արարիչ որ գաս ի չարչարանս,
Այսաւր ժողով Հեբրայեցւոցն խորհին քեզ ը~, մահ:
Այսաւր Կայիափա խոստովանի զփըրկիչդ աշխարհի,
Այսաւր իւղով աւծանիս նըշան պատանացըն քոց:
Այսաւր յայտնէ Յուդա զախտ արծաթսիրութեան,
Այսաւր առնու զցանց ըմբըռնող զինքըն ի կորուստ:
Այսաւր` ըսկիզբն փըրկութեան եւ շընորհաց մերոց:
Այսաւր աւրհնեմք զեկեալդ կամաւ ի չարչարանս,
Քրիստոս Աստըւած յաւիտեանս, ամէն:
 

[ԼԴ]
ՏԱՂ ՄԵԾԻ ՈՒՐԲԱԹՈՒՆ, ՆԵՐՍԻՍԻ

 
Ի յուրբաթու մեծի զատկիս,
Գառն անարատ ածեալ ի սպանդ
Լըցեր զաւրէնըս քո ճըշմարտութեամբ զըստուերն:
Յառաւաւտու յայգոյն ծագեալ,
Արեւ պայծառ զնըշոյլ լուսոյ
Չարչարանացըդ քոց, զարդարեցեր զերկիր:
Ով~ անարատ, ամբիծ Յիսուս,
Կապանաւք պընդեալ տոռամբք,
Որ զպարտական ածար դատաւորաց ի ձեռս:
Երկնային բիւրուց բանակք
Սատակել իջին զմարդիկ,
ԸզՏէրն իւրեանց տեսեալ մեղաւորաց յատեանն:
Թագաւոր զաւրաց վերնոց,
Դաւանեցեր յայտնի ըզնոյն,
Յոր եւ ծընեալ եղեր նախքան զարեւ անուն:
Ի Պիղատոսի յատեանն
Արքայդ երկնից կացեր
Եւ սպասաւորաց քոց զհոյլսն ոչ մարտընչել թողեր:
Հեզութեամբ, Քրիստոս Աստուած,
Կոխեցեր զչարին ըզմարտ,
Ճըշմարտութեան վըկայ ի յաշխարհի յայտնեալ:
Զթիկունսդ ետուր ի գանս կամաւ,
Ոչ խըստացեալ դարձար ընդդէմ,
Եւ քեզ ոսոխ արդար ոչ ոք եկաց ի մէջ:
Այսաւր պըսակիս արքայ
Ի հեթանոսաց` փըշովք,
Ծիրանազգեստ պըճնեալ եկեղեցւոյ փեսայ:
Այսաւր առնուս եղեգն ի յաջդ,
Ի կեանս գըրես արեամբդ զմարդիկ
Եւ տաս կըտակ անջինջ քո` հաստատեալ մահուամբ:
Այսաւր թագաւորդ միայն
Ի մարտ յառնես փոխան հաւտիս,
Կալ ախոյեան չարին զինու վառեալ խաչիւ:
Յայս վըկայեցեր հանդէս
Ի Հաւրէ վերուստ տըւեալ,
Վիրաց մերոց բըժիշկ` այդ միածինդ ամբիծ:
Զքեզ, ով~ թագաւոր արդար,
Ընկալաւ եկեղեցի,
Զոր ուրացան հրեայքն` սա ամփոփեաց ի գիրկս:
Խոստովանիմք ըզշնորհս փըրկչիդ,
Դո'ւ, Քրիստոս, մեր թագաւոր,
Աղաղակեմք ի ձայն ընդդէմ ապերախտ ազգին:
Երկըրպագեմք նորոգողիդ,
Համբուրեմք սիրով զպարգեւս
Եւ տամք գոհութիւն փոխան այժմ եւ հանապազ:
 

[ԼԵ]
ՓՈԽ

 
Դուստըր Սիոնր,
Եկեղեցի հեթանոսաց ժողով,
Ե'լ ի հանդէս ահեղ:
Տես ըզՍողոմոն
Զխաղաղութեան արքայն յայտնեալ յերկիր,
Ըզքո փեսայն ամբիծ:
Այսաւր պըսակեաց
Մայրն իւր ըզնա` փշովք բոլորեալ թագիւ
Եւ առաքեաց առ քեզ:
Զգեցոյց ծիրանի
Արքունական քղամիդ ի փառս նորին`
Հաճոյ լինել սըրտիդ:
Բաց զքո զառագաստ,
Եղբաւրորդւոյն բաց եւ ընկալ ի գիրկս
Եւ տուր ողջոյն սիրով:
Այս այն թագաւորն,
Որ զհայրենիսն եթող ունայն եւ զմայրն
Եւ զքեզ արար մարմին:
Մեծ է այս խորհուրդ
Յեկեղեցի եւ ի Քրիստոս ցուցեալ,
Անճառ սիրոյ առիթ:
Դուք ճաշակեցէք
Եւ զայս տեսէք, եղբա'րք, մըտաց աչաւք
Ըզքաղցրութիւնըս Տեառն:
Չիք առ մեզ երկիւղ,
Այլ է մաքուր սիրոյ պատճառ բաժակ`
Մատըռուակեալ այսաւր:
Անդա'մք Յիսուսի,
Արեամբ նորին զմայլեցուցէք զըսիրտս
Եւ տուք պըտուղ զարտաւսր:
Կերայք եւ լացէք,
Կերայք արտասուաւք զմարմին փրկչին ձերոյ`
Չարչարանացն հաղորդ:
Սա առհաւատչեայ
Եւ գրաւական ձեզ հաստատուն տըւաւ
Ուրախութեան երկնից:
Տընկակիցք մահուն,
Բողբոջ եմք մեք այն կուսածին արեան,
Մեռցուք ընդ նմա կամաւք:
Գրեսցուք առաջի
Աչաց մերոց զՅիսուս ի խաչն այսաւր
Եւ խաչեսցուք ընդ նա:
Յայտնեաց ըզսէրն իւր
Աստուած ի մէջ երկրի ի մահու լեալ,
Այն ծոցածին ծաղիկն:
Զի արդարութիւն
Սուրբ միածնիս զամենեսեան հանցէ
Ի յանիծից մեղաց:
Շնորհաւք կենդանիք
Յարդարութիւն եղաք ի փառըս միշտ
Նորս Ադամայ մահուամբ:
Հաւատով առ սա
Եւ ոչ գործով եղաք արդարըք մեք,
Աղաղակէ Պաւղոս:
Հաւատացեալքըս
Փա~ռք եւ պատիւ հանցուք նըմա երգով
Ի յաւիտեանս, ամէն:
 

[ԼԶ]
ՏԱՂ ՄԵԾԻ ՈՒՐԲԱԹԻՆ

 
Անեղ Որդին Հաւր միածին բազկատարած
Այսաւր եկաց ի յատենին տիեզերաց:
Բարձեալ մարմնով ի խաչն անճառ խոնարհութեամբ,
Բերեալ բազկաւ ըզհեռացեալ ազգըս մարդկան:
Գառն անարատ, ածեալ ի սպանդ պատարագի,
Գայ հաշտութեամբ Հաւր` ի բառնալ զմեղս աշխարհի:
Դատափետք եղեն դըպիրքն առ Պիղատոս,
Դատաստանաւ բառնալ ի խաչ բողոքէին:
Եկն եհաս վախճան ամաց ÿստ նախատեսիցն,
Եւ ցուրտ եւ պարզ աւր մի յայտնի Տեառն Աստուծոյ
Զէլի էլին Տէր գըթութեանց տայր ի բարձունս`
Զխաղաղութիւն խաչահանուացն աղաւթելով:
Էնն է ինքն ընդ մեզ Աստուած յաւիտենից,
Էրեւեցաւ մեզ ի վախճան ժամանակի:
Ընդ մեզ Աստուած յայտնեալ, բարձեալ մարմնով ի խաչ`
Ընդդէմ լուսոյ արեգականըն կընքելով:
Թողեալ լըքաւ լոյսն ի ծոցոյ արեգականն,
Թաքոյց յինքեան ըզճառագայթս ի միջաւրեայ:
Ժամուն ոչ տիւ եւ ոչ գիշեր ՚ստ մարգարէին,
Ժամանեալ գայ Տէր զաւրութեանց ի պատերազմ:
Իշխանութեամբ առ Հայր զհոգին աւանդելով`
Ինքն ի հանդէս մարտի ընդդէմ մահու իջեալ:
Լըւեալ իշխանք չարին` պակեան ահիւ մեծաւ,
Լըւեալ մահու եւ դըժոխոց` սասանեցան:
Խոր խաւարին սաստէր Յիսուս լուսով խաչին,
Խընդիր առնէր իւր ծառայիցն անդ գերելոցն:
Ծանեաւ Ադամ զնըշան գալոյ Տեառն ի դըժոխս,
Ծանր ամաւթով կայր հիացեալ երկիւղագին:
 

[ԼԷ]
ՈՂԲՔ ՄԵԾԻ ՈՒՐԲԱԹԻՆ, Ի ՆԵՐՍԻՍԷ ԿԱԹՈՂԻԿՈՍԷ ՀԱՅՈՑ

 
Կայր մայր Տեառն առ խաչին`
Կոյսըն Մարիամ,
Ողբալով զայս ասէր
Առ միածին Որդին.
_ Ո'վ անմեղ գառն Աստուծոյ,
Ընդ ո՞ր մեղաց պատժիս.
Ես սրբութեամբ զքեզ յղացայ,
Մաքուր կուսութեամբ ծնայ:
Կոյս յետ ծնընդեան քո մնացի`
Ծնելոյդ զաւրութեամբ.
Ամբիծ շըրջեցար յերկրի,
Անփորձ ի մեղաց:
Մեղս ոչ արարեր մարմնով
Ըստ նախաձայն Բանին,
Եւ ոչ նենգութիւն գըտաւ
Ի բերան քո բարի:
Իշխանն աշխարհի ի քեզ
Ոչ եգիտ յիւրոցն,
Արդ, զի՞ մատնեցար, որդե'ակ,
Խաչի եւ մահու:
Ո՞ւր հրեշտակին բանն ըզքէն`
Թագաւորել անվախճան.
Ահա զձեռսդ, որ զերկինս ձգեցին,
Տարածեցին ի փայտին:
Զմատունսդ, որ զաւրէնս գրեցին,
Բեւեռեցին ի խաչիդ.
Զոտսդ, որ ի ծովուն գնացին,
Հեղուսեալ կապեցին:
Յայտնեա' ինձ, Յիսո'ւս, զխորհուրդ
Քո կամաւոր մահուանդ,
Զի հաստատեսցի սիրտ իմ
Ի մարդկեղէն կարծեաց:
 

ՓՈԽ

 
_ Ո~վ Մարիամ, կոյս եւ մայր,
Տաճար լուսոյ իմոյ.
Մի' տկարանար դու հոգով
Յիմ ծածկեալ խորհըրդոյս:
Ես մարգարէիւք իմովք
Յառաջ զայս ցուցի.
Աբրահամ կախեալ ետես զիս
Խոյ ընդ Սահակայ:
Մովսէս գուշակեաց տեսանել
Ըզկեանս ի փայտի,
Ըստ Դաւթայ ծակեցին զձեռս իմ
Եւ զոտս` ի փայտիս:
Ըստ Սողոմոնի եդին ինձ
Պըսակ ի փըշոց,
Ըստ Եսայեայ` իբրեւ զոչխար
Ի սպանդ վարեցայ:
Ըստ Դանիելի սպանին
Զաւծեալ Տեառն այսաւր,
Ըստ Երեմիայ արկին
Փայտ` ի հաց մարմնոյս:
Ըստ Զաքարիայ` հայեսցին
Յորս խոցեն տիգաւ:
Զիս Հայր իմ մատնեաց ընդ մեղաց
Որդւոց Ադամայ:
Ես հնազանդ եղէ Հաւր իմոյ
Մինչ ի մահ խաչիս,
Զանէծսն Ադամայ բառնամ
Փշեղէն պըսակաւս:
Զձեռսըն կարկամեալ փայտիւն,
Պարզեմ բեւեռաւքս,
Զոտիցըն կապանս ընդ ծառոյն
Արձակեմ հեղուսիւքս:
Դառնահամ պըտղոյն ճաշակ
Քաղցրանայ լեղեաւս,
Զկողածնին լըւանամ զխայթուած,
Կողիս վըտակաւք:
Մահ իմ տայ ըզկեանս մեռելոց,
Որք ի սկըզբանէ,
Փայտ խաչիս իմոյ` զփայտ մահու
Ի կեանս փոխարկէ:
Նընջեմ ի հող մահուընդ մեռեալս
Զորս ընդ իս յարուցից,
Ի դժոխս իջանեմ առ հոգիսն,
Որք են ի բանտի:
Զկապեալն արձակեմ զԱդամ,
Կապեմ ըզկապողն,
Ի դրախտն ուստի ել` տանիմ,
Ուր եւ զաւազակն:
Արդ, մի' վըհատիր, Մարիամ,
Այլ խընդա' յուսով,
Ես յետ յարութեան իմոյ
Քեզ երեւեցայց.
ԶՀաւր կամս կատարել կամիմ,
Առ նոյն վերանամ:
 

ՓՈԽ

 
_ Արդ, ո~վ Տէր եւ Որդի իմ,
Ո՞ւմ յանձն արարեր
Զմայր եւ զաղախին քո:
Դու յերկինս առ Հայր երթաս,
Ո՞վ զկեանս իմ տնաւրինէ
Փոխան քո յերկրի աստ:
Զի թէ հրէական նախանձն
Զլոյսդ հալածեցին,
Ինձ զի՞նչ արասցեն, որդեա'կ:
Ես ակն ունէի` Յիսուս
Թագ ի գլուխ եղեալ,
Եւ այժմ տեսանեմ խաչեալ:
Բան ի հրեշտակէն լըւայ,
_ Ուրախ լե'ր, բերկրեալ, _
Եւ այժըմ հոգւով խոցիմ:
Ի ժամ ծընըդեան քո
Հրեշտակք ցընծացին
Եւ այժմ անարգեն մարդիկ:
Մերկ ըզքեզ տեսի, որդեա'կ,
Պընդեալ ի փայտիդ,
Խաւար իմ աչացս այսաւր:
 

ՓՈԽ

 
_ Ո~Վ անմեղ աղաւնի իմ,
Մի' զանգիտեր դու սըրտիւ
Ի յերկիւղէ մարդկային:
Ընդ քեզ եմ յաւիտեան ես,
Որ բառնամ զարարածս իմ
Բանիւ զաւրութեամբ իմով:
Ո~վ սըրտիւ սիրեցեալդ իմ,
Ընդ քո մաքրութեան հոգւոյդ
Տամ մայր քեզ ըզՄարիամ մայր իմ:
Պատուեա' ՚ստ աւրինացն ըզնա,
Որպէս եւ տեսեր դու յիս,
Հնազանդ լինելով նըմա:
Եւ մեզ աղաւթիւք մաւր քո
Եւ Յովհաննու սիրելւոյն
Շնորհեա' զթողութիւն մեղաց:
 
 
Եւ քեզ երգեսցուք ընդ Հաւր,
Եւ ընդ Սուրբ Հոգւոյն ըզփառս
Յայժմուս եւ յաւիտենից, ամէն:
 

[ԼԸ]
ՏԱՂ ԽԱՉԵԼՈՒԹԵԱՆ ՔՐԻՍՏՈՍԻ

 
Ծարաւեցաւ որպէս ըզմարդ Տէրն ի խաչին,
Այն որ արար զծով եւ զերկինըս ջըրային:
Լեղի խառնեալ ընդ քացախոյ զինաւորին.
Արբուցանէր այն երկնաւոր թագաւորին:
Արեւն յերկինս խաւար դարձաւ մէջաւրէին,
Նըսեմացաւ ընդ անարգանս անմահ Բանին:
Բարձրագոչ ձայնիւ գոչէր Տէրն ի խաչին
Զէլի էլին եւ աւանդէր առ Հայր զհոգին:
Եւ վարագոյր հին աւրինին սուրբ տաճարին
Ընդ չարչարանս կենարարին պատառէին:
Երկիր հիմամբք ի յանդընդոց սասանէին,
Վէմք պատառեալ եւ գերեզմանըք բանային:
Դըժոխք սարսեալ սասանեցաւ բանտն ահագին
Եւ արձակեաց զկապեալ հոգիսն, որ անդ էին:
Յահեղ ձայնէն կենդանատու Տեառն Յիսուսին
Ազատեցան կապեալ հոգիքն, որ ի բանտին:
Յորժամ էջ մեր կենսատուն անդ ի ստորին,
Լուսաւորեաց զորս ի խաւար անդ նըստէին:
Եւ վեր ածեաց անտի զնոսին յերկինս վերին
Եւ դասեցոյց ընդ անմարմին զաւրսն երկնային:
Արժանացոյց պայծառ լուսոյ առագաստին,
Արքայութեանըն հարսանեաց սուրբ փեսային,
Ուր անդրանիկ որդիքըն մաւր սուրբ Սիոնին,
Աբրահամու գոգոյն ժառանգ Հաւրըն վերին,
Ու արդարոց դասք ամենայն սուրբ երամին
Ուրախանան յաջմէ փառաց սուրբ փեսային:
Նըմա երգեմք եւ մեք ընդ Հաւր եւ Սուրբ Հոգւոյն:
Փա~ռք յաւիտեանս խաչեցելոյ անմահ Բանին:
 

ԼԸա. ՓՈԽ

 
Ծարաւեցաւ Տէրն ի խաչին որպէս ըզմարդ,
Այն որ արար զովկիանոս ծով գեղեցիկ:
Ի Սամարացւոյն ջուր խընդըրէր յաղբիւրըն Տէրն,
Այն որ արբոյց տիեզերաց զանմահութիւն:
Լեղի խառնեալ ընդ քացախոյն զինաւորին,
Արբուցանէր անմահ Բանին թագաւորին:
Բարձրագոչ ձայնիւ գոչէր Տէրն ի խաչին
Զէլի էլին եւ աւանդէր առ Հայր զհոգին:
Նըմա երգեմք եւ մեք ընդ Հաւր եւ Սուրբ Հոգւոյն,
Խաչեցելոյն անմահ Բանին փա~ռք յաւիտեանս:
 

[ԼԹ]
ՏԱՂ ՅԱՐՈՒԹԵԱՆ, ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

 
Առաւաւտին շաւիղին
Շող ծագեալ, արեւ տարածեալ,
Արեւ, ը~, բարձըր իջեալ
Արփենւոյն արփւոյն տարփըմամբ,
Արփւոյն, ը~, տարփըմամբ անդ,
Ը~, քաղցրիկ ցաւղիկ արկանէր,
Ցաւղ ի Հերմոնէ իջեալ
Ի վերայ լերին սիրայնոյ,
Լերին, ը~, սիրայնոյ սէր
Ի սընունդ հովիտ շուշանի,
Հովիտ, ը~, յաւրինեալ, ը~,
Նուսխայնոյ կանայք տարփացեալք,
Կանայք, ը~, տարփացեալ, որ,
Ը~, գայք ի հանդէս գիշերոյ,
Հանդէս, ը~, խաչելոյն լոյս
Զըւարթնոյն զուարթուն հրեշտակին,
Զըւարթուն, ը~, սերովբէն
Ի վերայ վիմին փողերգէր,
Փողէր, ը~, զաւետիս.
_ Տէր յարեաւ, դուք, ը~, զո՞վ խընդրէք,
Յարեաւ անձկալին, ը~,
Սիոնի սիրով սիրեցեալն,
Սէր ողջոյն, ը~, խանդակաթ, ը~,
Սուրբ ոտիցն երկիր պագանեմք:
Փա~ռք նոյն ի նոյն ի նոյն, ը~,
Նըմին յաւիտեանս, ամէն:
 

[Խ]
ՓՈԽ

 
Նըստեալ կանայքն ողբային
Առ գերեզմանն անմահին,
Երեւելով հրեշտակին`
Ձայն աւետեաց լըսէին.
 
 
_ Րամից մաքրից անձկալին,
Զոր տապանաւ ծածկէին,
Սիրով յարեաւ սիրելին,
Զբնութիւն յարոյց զԱդամին:
 
 
Երկիւղալից լինէին
Պահապանաց խումբ դասին,
Սաւառնացեալ սերովբէն
Հոլաթեւէր ի վիմին:
 
 
Ի բաց լինել երկիւղին
Փողէր կանանց տարփալին,
Երթեալ պատմէր զաւետիս
Երամ դասուց Պետրոսին:
 
 
_ Րաբունից տէր վարդապետն
Այսաւր յարեաւ բաղձալին:
Գոչեմք եւ մեք ընդ նոսին.
_ Փա~ռք յարութեան փըրկողին:
 

[ԽԱ]
ՏԱՂ ՅԱՐՈՒԹԵԱՆ

 
Այսաւր լոյս ծագեաց յաւուրս առաջին,
Արեգակն արդար փայլեաց յարարածս
Եւ լուսաւորեաց` որք ի խաւարի:
 
 
Արեւմուտ տապանն եղեւ արեւելք,
Եւ գերութեան վայրն` դարձող գերելոց,
Ի խաւարէ լոյս մեզ ճառագայթեաց:
 
 
Զգլուխ անկեան ըզվէմն չարգել կափարիչն.
Եւ ոչ մատանին` զանպարագրելին,
Փառաւք յարուցեալ վէմն անխախտելի:
 
 
Բացան դրունք երկնից բարձմամբ սուրբ վիմին,
Եւ Ադամ եմուտ ի դրախտն Ադենայ
Եւ շաւիղ գործեաց որդւոցս ի յերկինս:
 
 
Մի զինուոր վերին պակոյց զըստորինսն,
Փողէր սուրբ կանանցն զաւետիս կենաց.
_ Մի' այլ արտասուէք զբարձողն արտասուաց.
 
 
Ցընծացէ'ք, յարեաւ անմահ կենդանին.
Նըմա միայնոյ երգեսցուք ըզփառս,
Որ նա յարուցեալ զԱդամ նորոգեաց:
 

ՓՈԽ

 
Լըւան զաւետեաց ձայն ուրախութեան,
Երթեալ պատմէին դասուցն ընտրելոց`
Ի Գալիլիայ լերին հետեւեալ:
 
 
Ընթացեալ տեսին եւ երկիր պագին,
Հրաման ընկալան զմեզ լուսաւորել.
_ Ընդ ձեզ եմ,_ ասէր,_ մինչ ի կատարած:
Ընդ որս երգեսցուք` փա~ռք յարուցելոյն:
 

[ԽԲ]
ՏԵԱՌՆ ՆԵՐՍԵՍԻ ԿԱԹՈՂԻԿՈՍԻ, Ի ՆՈՅՆՆ

 
Այսաւր, ը~, լոյս հաստատի, խաւար, ը~, լուծանի,
Այսաւր, ը~, նոր Իսրայէլ սեամբ, ը~, լուսաւորի.
Այսաւր լուսափայլ հրեշտակն տայր կանանցն զաւետիս.
_ Յարեաւ Աստըւած, ցըրուեցան թըշնամիք նորա:
Եկայք պարեսցուք ընդ հրեշտակս շուրջ զգերեզմանին,
Որով, ը~, մահ մեռաւ, կեանք թագաւորեաց:
Քրիստոսի արարողին զայս` փա~ռք յաւիտեանս, ամէն:
 

[ԽԳ]
ՓՈԽ

 
Նոր ծաղիկ պայծառ ցուցաւ
Այսաւր ի նոր բուրաստանին,
Երփնազարդ հոգւոցըն տունկք
Կենդանացան կանաչութեամբ,
Րենական լուսոյ սաղարթք
Ի հոգեւոր գարունս փըթթեալ,
Սիրով մեռեալըն վասըն մեր
Յարոյց ընդ իւր զանկեալ բնութիւնս:
Երեւեցաւ լոյս յարութեան
Ի խաւարէ ստուերաց մահու,
Սաւառնացեալ սերովբէին
Նըստէր փայլեալ վերայ վիմին,
Ի ձայն քաղցրիկ փողէր կանանցն.
_ Յարեաւ խաչեալըն Տէր Յիսուս,
Կենդանարարըն մեռելոց,
Զի՞ զկենդանին ողբայք մեռեալ:
Նա զդըժոխոց դրունս խորտակեաց
Եւ զբռնութիւն մահու ելոյծ,
Զգլուխ վիշապին ջախեաց մահուամբ,
Արբոյց նըմա զճաշակ մահու,
Դարձոյց զգերեալ հոգիսն ի նմա,
Աւար առեալ ել ի բարձունս,
Բաշխէ զպարգեւս որդւոց մարդկան:
Եկայք տեսէ'ք ըզգերեզմանն
Յաստուածային մարմնոյն ունայն,
Պետրեան դասուն պատմող լերուք,
Մահկանացուաց տուք զաւետիս,
Թէ` մահ մեռաւ, կեանքըն յարեաւ:
Ընդ անմահից անմահացեալքդ`
Համաձայնեալ տուք աւրհնութիւն
Յարուցելոյն` փա~ռք յաւիտեանս:
 

ԽԳա. ՏԱՂ ՅԱՐՈՒԹԵԱՆՆ ՔՐԻՍՏՈՍԻ

 
Նոր ծաղիկ պայծառ ցուցաւ
Այսաւր ի նոր գերեզմանէն,
Երփնազարդ հոգւոցըն տունկք
Կանաչացան կենդանութեամբ,
Րենական լուսոյ սաղարթք
Ի հոգեւոր գարունս փըթթեալք,
Սիրով մեռեալըն վասըն մեր
Յարոյց ընդ իւր զանկեալ բնութիւնս:
Երեւեցաւ լոյս յարութեան
Ի խաւարի ստուերաց մահու,
Սաւառնացեալ սերովբէին
Նըստէր փայլմամբ վերայ վիմին,
Ի ձայն քաղցրիկ փողէր կանանց.
_ Յարեաւ խաչեալն Յիսուս Աստուած,
Եկայք տեսէ'ք ըզգերեզմանն
Յաստուածային մարմնոյն ունայն:
Բաշխէ պարգեւս որդւոց մարդկան
Մահկանացուաց կենդանական.
Աւար առեալ ել ի բարձունս,
Զմարդիկ դասեաց ընդ զըւարթունս:
Նա զդըժոխոց դրունս խորտակեաց
Եւ զԲելիար դատապարտեաց,
Ստացաւ զԱդամ անդրէն ի կեանս
Յադենական տեղն եւ ի փառս:
 

[ԽԴ]
ՏԱՂ [ՅԱՐՈՒԹԵԱՆ]

 
Այսաւր ընդ ծագելն արեւուն
Անմուտ ծագեաց մեզ արեգակն:
 
 
Այսաւր խաւարն անգիտութեան
Հալածեցաւ յարարածոց:
 
 
Այսաւր լցան գիրք մարգարէիցն
Ի կատարումն եկեալ բանիցն:
 
 
Այսաւր յարեաւ Տէրն ի մեռելոց,
Յարոյց զանկեալքս ի գլորմանէ:
 
 
Այսաւր լուծան երկունք մահու,
Արձակեցան` որք յԱդամայ:
 
 
Այսաւր իջեալ հրեշտակապետն
Տայր աւետիս խընկաբերիցն.
 

ՓՈԽ

 
_ Աստուածասէր եւ սուրբ կանայք,
Զի՞ զկենդանին խընդրէք մեռեալ:
Մի' լայք անյոյս, այլ ցընծացէ'ք,
Յարեաւ խաչեալն, անմահըն միշտ:
Քարոզեցէ'ք պետրեան գընդին
Փութալ արագ առ բաղձալին:
Երգեմք եւ մեք ընդ հրեշտակին.
_ Յարուցելոյն փա~ռք յաւիտեանս:
 

[ԽԵ]
[ՅԱՐՈՒԹԵԱՆ], ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

 
Նորահրաշ արեգակն այսաւր ծագեցաւ աշխարհի
Ի գբոյ խաւարէ,
 
 
Եւ կեանք անվախճան տըւաւ մահացու բընութեանս
Ի ստուերաց մահու:
 
 
Րամից մեռելոց այսաւր պըտուղն առաջին յարեաւ
Ի գերեզմանէն,
Սիրով սուրբ կանայքն եկին աւծանել անոյշ իւղովք
Զաւծեալըն Քրիստոս:
Երեւեալ լուսափայլ հրեշտակըն գոչէր` ասելով.
_ Յարեաւ խաչելեալն:
Սարսեալ փախչէին` տըկար բնութեամբ ոչ տանելով
Տեսլեան զըւարթնոյն,
 
 
Իսկ Մարիամ ժուժկալեալ արժանի եղեւ տեսանել
Զանձկալին ինքեան,
 
 
Եւ գնացելոցն պատահիւր ի ճանապարհի յարուցեալն
Յողջոյն կենդանի:
 
 
Րաբունւոյն զողջոյնն այն առեալ տանէին աշակերտացն.
_ Տէրըն մեր յարեաւ:
 
 
Գանձին ծածկելոյ, զոր այսաւր գըտեալ մեծացաք,
Տացուք միշտ ըզփառս:
 

[ԽԶ]
ՓՈԽ

 
Կեանքն ընդ Հաւր անմահ մարմնով Տէր յարեաւ
Ի գերեզմանէն:
 
 
Առաւաւտ լուսոյ ծագեաց մեզ այսաւր
Ի գբոյ խաւարէ:
 
 
Թագաւորն, իջեալ ստորին վայր մահու,
Փըրկեաց ըզգերեալսն,
 
 
Որով մահ մեռաւ մահուամբ կենդանւոյն,
Կեանք թագաւորեաց:
 
 
Ղամբար բոցեղէն փայլեաց յարփենւոյն`
Որք ի խաւարի,
 
 
Ի կեանս վերածեաց անմահըն մահուամբ
Զմեռեալ բընութիւնս:
 
 
Կամաւ վասըն մեր զանձն իւր եդ ի մահ.
Կամաւ յարուցեալ:
 
 
Ողբային կանայքն ողբով արտասուաւք
Զբարձողն արտասուաց:
 
 
Սոսկալին փայլակնանըման երեւեալ
Լուսափայլ կերպիւ,
 
 
Ի ձայն ցընծութեան փողէր զաւետիս
Սուրբ խընկաբերիցն.
 
 
«Հայեցեալ տեսէ'ք զտեղի անմահին
Ունայն ի մարմնոյն:
 
 
Այսաւր Տէր յարեաւ, ցընծացէ'ք, ասէ,
Դըստերք Ադամայ:
 
 
ՅԵւայի մաւր լըսելիս ձայնեցէ'ք,
Աւձըն պարտեցաւ:
 
 
Ուրախ լե'ր, Ադամ, այսաւր Որդին քո
Ըզքեզ նորոգեացե:
Ցընծալով եւ մեք երգեսցուք փրկողին`
Ըզփառս յաւիտեան:
 

[ԽԷ]
ՏԱՂ [ՅԱՐՈՒԹԵԱՆ]

 
Այսաւր յարութեան մեզ ծագեցաւ, ը~, լոյս,
Լոյսն որ ի Հաւրէ
Յառաջ քան զարեւ անունն իւր:
 
 
Իւրական բանիւ ստեղծողն աւուրց լուսով,
Ի սկըզբանն աւուր հաստատեալ ըզլոյս,
Ելոյծ ըզխաւարն աննիւթ:
 
 
Աննիւթ գոյացոյց այսաւր հոգւոց, ը~, լոյս,
Լուծեալ ըզգիշեր մեղաց` ստեղծողն առաջին
Զաշխարհս եստեղծ նորոգ:
 
 
Նորոգի ի կեանս Ադամըն հին այսաւր,
Եւ նորափետուր պըճնիւք զարդարի փառաւք
Անիծաբեր երկիր:
 
 
Երկիրս երկնայնոցն եղեւ տեղի եւ էջք,
Որ աւետաբեր քարոզ`
Ի յունկն Եւայի դըստերց գոչեն ըզձայն:
 
 
Ձայնէր ի վիմին հրեշտակապետն այսաւր,
Տարփողէր կանանցն, ը~, զուարթ.
_ Յարեաւ խաչեալըն Յիսուս, փըրկիչ եւ Տէր:
 
 
Տէր գայ զաւրութեամբ յարուցանել ընդ իւր
Պըտուղն առաջին կենաց,
Ի մեռեալս ազատ զմեզ ազատեաց յուսով:
 
 
Յուսով յարուցեալքս առ մահացուն մեր գոչեսցուք.
_ Ուր մահ` յաղթութիւն քո,
Ուր դըժոխք խայթոց` կործանեցաւ խաչիւն:
 

[ԽԸ]
ՓՈԽ

 
Ցընծան այսաւր երկինք
Եւ երկնային զաւրք անմարմինք:
 
 
Ցընծայ լոյս եղանակ
Ընդ անեղին լուսոյ ծագման:
 
 
Ցընծայ լուսին ստուերին
Փայլմամբ լուսոյ անըստուերին:
 
 
Ցընծան պարք աստեղաց
Ընդ յարութիւն յաւրինողին:
 
 
Ցընծան երկիր եւ ծով`
Ի հնութենէ նորոգելով:
 
 
Ցընծան ծառք անտառի
Ըստ իսկըզբանըն զարդարին:
 
 
Ցընծան բոյսք դալարի
Ի գարնայնոյս իմանալի:
 
 
Ցընծան կենդանականք
Ընդ անմահին կենդանութեան:
 
 
Ցընծան որդիք մարդկան,
Քանզի յԱդին դրախտըն դարձան:
 
 
Ցընծայ եկեղեցի`
Զփեսայն տեսեալ յառագաստի:
 
 
Ցընծայ նորով Զատկիս,
Զենմամբ գառինն անարատի:
 
 
Ցընծան ըզգայարանքս`
Աւծեալք արեամբ պատարագին:
 
 
Ցընծամք այսաւր ի տիպ
Հանդերձելոյ մեր յարութեան:
 
 
Ցընծամք եւ անդ փառաւք,
Պարեմք ընդ զաւրս իննեակ դասին:
Ցընծամք փառատրելով,
Միշտ զյարուցեալըն գովելով:
 

[ԽԹ]
ՏԱՂ Ի ՏԷՐ ՆԵՐՍԻՍԷ, Ի ՅԱՐՈՒԹԻՒՆՆ ՏԵԱՌՆ

 
Նոր իմն աւետեաց բարբառ նորազուարճ ձայնիւ
Այսաւր գոչէր հրեշտակապետն ի վերայ վիմին:
 
 
Եդին զգլուխ անկեան ըզվէմն վիմափոր տապանն,
Զոր ոչ արգել մատանին զանպարագրելին:
 
 
Րամից անմահիցըն պետն փողէր սուրբ կանանցն.
_ Յարեաւ խաչելեալն Յիսուս, զի՞ լայք զկենդանին:
 
 
Սիրով խընկաբեր կանայքն տային զաւետիս
Դասուն սիմոնեան խըմբին. Տէրըն մեր յարեաւ:
 
 
Երեւեալ ունայն բանիցն ոչ հաւատային,
Պետրոս առ անձուկ սիրոյն արագ ընթացեալ:
 
 
Սէրըն սիրելւոյն յայտնեալ նախ եւ առանձին,
Յետ լոկ տեսանելոյ կտաւոցն ընդ միտս հիացմանն:
 
 
Ի դասս անդամոց դարձեալ` գլուխըն Կեփայեան
Պատմէր զյարութիւն գըլխոյն սուրբ եկեղեցւոյ:
 
 
Եկայք ընդ նոսին եւ մեք հոգւով ցընծացեալք,
Յարուցելոյն տացուք զփառս այժմ եւ յաւիտեանս:
 

[Ծ]
ՓՈԽ

 
Հաւր կամաւ իջեալ` Որդին մարմին ըզգեցաւ,
Արեամբ եւ մահուամբ իւր գնեաց զորդիս Ադամայ:
Յարեաւ յարութիւն եւ կեանք, յարոյց ըզբնութիւնս,
Որով պարակից եղեաք վերին զըւարթնոցն:
Ցընծալով տաւնեմք այսաւր, առ նոյն պաղատիմք.
_ Կենարար տեսլեան քո, Տէ'ր, ընդ մետասանիցն
Արժանաւորեա ըզմեզ յերկրորդ գալըստեանն.
Թագաւոր փառաց, Քրիստո'ս, յորժամ գաս փառաւք,
Որով զհողացեալ բնութիւնս հրեղէն նորոգես,
Ղամբարափայլեալ փառաւք շնորհեա մեզ յառնել,
Ի դասս աջակողմ աւդեացն կարգեա եւ ըզմեզ:
Կենդանի բարբառ քո, Տէ'ր, ըզմեզ կոչեսցէ,
Որպէս զարդարոցն երամք, ընդ քեզ վերանալ
Սրաթռիչ լուսափայլ ամպաւք յերկնային խորանսդ,
Ի նոյն միանալ սիրով ընդ սուրբ փեսայիդ,
Նոցին համաձայն աւրհնել սուրբ զԵրրորդութիւնդ:
 

[ԾԱ]
ՏԱՂ [ՅԱՐՈՒԹԵԱՆ]

 
Նոյնագոյ ընդ Հաւր բանն Աստուած,
Ի սկըզբանն առ Աստուած միշտ Էն:
 
 
Էն անմարմին անյեղ եղեալ
Եւ բնակեաց ի մեզ րամաւրէն:
 
 
Րամից Տէրն յանձն առեալ ընդ մեր
Մեռանիլ մարմնով սիրաբար:
 
 
Սէր անունն դընիւր ի տապան,
Սիրով ողբային իւղաբերքն:
 
 
Իւղաբեր կանանցն արտասուք
Դադարեաց տեսլեամբ սիրելւոյն:
 
 
Սիրեցեալն տարփմամբ անձկալւոյն
Բարբառէր` մի' յիս մերձենար:
 
 
Ի մերձենալ զուարթնոցն առ վիմին
Փողէր խընկաբերիցն` ասելով` ձեզ աւետի~ք:
 

ՓՈԽ

 
Յարեաւ փառաց թագաւորն, աւետի~ք,
Զի՞ խընդրէք զանմահն ընդ մեռեալս, մեծ աւետի~ք:
 
 
Յարոյց զբնութիւնըն Ադամայ, աւետի~ք,
Կանգնեաց ըզգլորեալ նախամայրն, մեծ աւետի~ք:
 
 
Պատմեցէք դասուն պետրոսեան, աւետի~ք,
Յովհաննու սուրբ սիրեցելոյն, մեծ աւետի~ք:
 
 
Քրիստոս յարեաւ ընդ նմա արիք, աւետի~ք:
Որդիք մարդկան, այսաւր ցընծացէ'ք, մեծ աւետի~ք:
 
 
Քրիստոս ի վեր, ելէք ընդ նմա, աւետի~ք,
Երկրաւորք, լերուք երկնայինք, մեծ աւետի~ք:
 
 
Քրիստոս յարեաւ ի մեռելոց, աւետի~ք,
Պըտուղ նընջեցելոց առաջին, մեծ աւետի~ք:
Այսաւր դրունք բացան դըժոխոց, աւետի~ք,
Ելին կապեալ հոգիքն որ ի նմա, մեծ աւետի~ք:
 
 
Այսաւր մահ մեռաւ ի կենացն, աւետի~ք,
Խաւար լուծաւ, լոյս հաստատեցաւ, մեծ աւետի~ք:
 
 
Այսաւր հինն Ադամ նորոգեալ, աւետի~ք,
Յարութեամբ նորոյ Ադամայ, մեծ աւետի~ք:
 
 
Այսաւր նոր արարածք եղեալք ի Քրիստոս,
Նորոգողին երգեմք ընդ հրեշտակս` փա~ռք ի բարձունս:
 

[ԾԲ]
ՏԵԱՌՆ ՆԵՐՍԻՍԻ ՏԱՂ ՅԱՐՈՒԹԵԱՆ

 
Նոր ձայն աւետեաց հրեշտակապետն այսաւր
Փողէր խընկաբեր կանանցն ի վերայ վիմին.
_ Խաչելեալն յարեաւ, ձեզ մեծ աւետի~ք:
 
 
Երթեալ խընդութեամբ աշակերտեալ կանայքն,
Պատմէին դասուց ընտրեալ սուրբ մետասանին.
_ Ցընծացէ'ք, յարեաւ Տէրն ի մեռելոց:
 
 
Րաբունւոյն էից յաշակերտաց խըմբիցն
Պետրոս Յովհաննու հանդերձ արագ ընթացեալ,
Տեսին զգերեզմանն ունայն ի մարմնոյն:
 
 
Սէրըն տարփողին աւտարանայր յաչաց,
Ձայնէր ողբալով առ նոյն._ Ո~վ պարտիզապան,
Ցոյց ինձ, թէ բարձեր, զի առից ըզնա:
 
 
Երեւեալ անդրէն քաղցրիկ հընչէր բարբառ.
_ Ցընծա', Մարիամ, յարեայ, մի' լար զիս մեռեալ:
Րաբունին բարի գոչէր Մարիամ,
 
 
Սըրտիւ անձկալեաւ առ բաղձալին դիմեալ.
_ Մի' յիս մերձենար,_ ասէ,_ չեմ ելեալ առ Հայր`
Զպըտուղս առաջին նըւէր տալ նըմին:
 
 
Ի ձայն ցընծութեան աւետաւոր նըւագ
Որդին Որոտման գոչէ որդւոց Սիոնի
Զյարութիւնըն Տեառն Աւետարանաւն:
 
 
Էից ստեղծողին յարուցելոյ լուսոյն
Ընդ Հաւր եւ Հոգւոյն տացուք յաւէտ միշտ ըզփառս
Յայժմուս յաւիտեան եւ յանվախճանին:
 

[ԾԳ]
ՓՈԽ

 
Կանայքն արտասուաւք լային զբարձողն արտասուաց,
Զմեռելոց կենդանատուն որպէս ըզմեռեալ:
 
 
Անմահ իւղ թափեալ անուան իւղ անոյշ բերին,
Կընդրուկ եւ զըմուռ հալուէ կենսատու բուրմանն:
 
 
Թաղեալըն մարմնով յերկրի զմահ մեռուցանէր,
Զադամեան բնութիւն մեռեալըն կենագործէր:
 
 
Ուստի եւ զուարթունքն իջեալ լուսափայլ ծագմամբ,
Խընդութեամբ տային մարդկան զաւետիս կենաց:
 
 
Ղամբար բոցեղէն վառեալ ի վերայ վիմին,
Մեռաւրէն պակեան յահէն դասք պահապանացն:
 
 
Ի բաց մերկացեալ զերկիւղ խընկաբեր կանանցն,
Աւետեաց քարոզք եղեն սուրբ առաքելոցն:
 
 
Կարաւտ անձկալի սիրով Պետրոս յարուցեալ,
Սիրեցեալըն Յովհաննէս արագ սըլացեալ:
 
 
Ունայն ի մարմնոյն տեսին ըզսուրբ գերեզմանն,
Հիացեալ անդրէն դարձան առ համադասիցն:
 
 
Սըրտիւ Մարիամ թախծեալ հեղոյր զարտասուս.
Զըղձալին տեսեալ աչաւք եւ ոչ ծանուցեալ:
 
 
_ Ի գերեզմանէն զմարմինն, ո~վ պարտիզապան,
Եթէ դու բարձեր, ասա', զի ես առնուցում:
 
 
Հայցելին առ նա ձայնէր. «Ո~վ դու Մարիամ,
Զիս, որ յարութիւն եւ կեանք, զի՞ ողբաս մեռեալ:
 
 
Արդ, մի' մերձենար դու յիս, անկատար գոլով,
Որպէս մայրըն քո Եւա` ի ծառ գիտութեանն:
 
 
Յորժամ առ բնութեան իմ Հայր եւ ձեր ըստ շնորհի
Եւ Աստուած մարմնոյս իմոյ ես ելանիցեմ,
 
 
Որոտմամբ իջեալ Հոգին ըզձեզ կատարէ,
Արժանաւորք յայնժամ առ իս մերձենալե:
Ցընծացեալք այսու յուսով զուարճասցուք Հոգւովն,
Զյարուցեալն ի մեռելոց աւրհնեմք ընդ Հաւր յաւիտեան:
 

[ԾԴ]
ՏԱՂ ՍՈՒՐԲ ՀՈԳՒՈՅՆ: ՏԵԱՌՆ ՆԵՐՍԻՍԻ ԵՐԳ ԵԿԵՂԵՑՒՈՅ ՄԱՆԿԱՆՑ` ՀԱՄԱԳՈՅ ՍՈՒՐԲ ԵՐՐՈՐԴՈՒԹԵԱՆՆ ԵՒ ՄԻԱՍՏՈՒԱԾՈՒԹԵԱՆՆ, ՀԱՄԱՁԱՅՆԵԼՈՎ ԵՐԿՆԱՒՈՐԱՑՆ ԴԱՍՈՒՑ

 
Ներպարունակեալ
Իննեակ դասուց կայք մի առ մի ձայնիւ:
 
 
Երգս առեալ գոչեն
Երրակի անձանց միոյ տէրութեանն:
 
 
Րախացեալ եւ մեք`
Համաձայնելով ընդ սրովբէից խումբս.
 
 
_ Սուրբ, սուրբ, սուրբ, մի Տէր,
Հայր յաւէտ եւ միշտ, Որդի եւ Հոգի:
 
 
Երրորդութիւն սուրբ`
Միաստուածութիւն անբաժանելի:
 
 
Սուրբ եկեղեցի
Երգէ ընդ հրեշտակս յաւէտ քեզ ըզփառս:
 

[ԾԵ]
ՓՈԽ

 
Ներհիւսեսցուք քաղցր եղանակ
Վայելչահիւս երրեակ անձանց,
Անըսկըզբանն անծընելոյն
Գոլ ծնիցելոյն եւ բըղխելոյն:
 
 
Երեք դիմաց միով բնութեամբ
Հաւր եւ Որդւոյ եւ Սուրբ Հոգւոյն,
Որոյ աթոռք են քերովբէքն,
Գովեն սրովբէքըն վեցթեւեանք:
 
 
Ւիւսեն զերիս սուրբն ի մի Տէր,
Որով ծանեաւ եկեղեցի,
Յոր հաստատեալ երկըրպագէ,
Նոցին ձայնիւ փառաբանէ:
 
 
Տէր եւ Աստուած զՀայր քարոզեմք,
Ընդ Հաւր զՈրդի Տէր դաւանեմք,
Վեհին Հոգւոյ բըղխումն ասեմք,
Որ է անհաս` ի մէնջ պատուէմք:
 
 
Ղաւղեալ խորհուրդ Երրորդութեան
Ի յերկրայնոցս անքըննական,
Նոյն ի վերնոցըն ծանուցան,
Ի սրովբէիցըն յայտնեցան:
 
 
Մանկունք վերինըն Սիոնի,
Առէք քընար եւ տասնաղի,
Սըրբաբանիցըն համաձայն
Տուք աւրհնութիւն քրովբէական
 
 
Բանին, որ էր ընդ Հաւր յառաջ,
Ամենազաւր բազուկ եւ աջ,
Նոյն ի կենացըն կենարար,
Ի լուսոյն լոյս եւ բարերար:
 
 
Ընդ Որդւոյ զՀոգին Սուրբ եւ բարի,
Նորոգ ըզմեզ ըստեղծողի,
Դուռըն բացող մեզ այս բանի,
Ձայնի եւ քաղցր եղանակի,
Անըսկըզբան Հաւր անեղի,
Յորմէ Որդին է եւ Հոգի,
Նոյն եւ նըման երիցն ի մի,
Ի մէնջ յաւէժ փառըս տացի:
 

[ԾԶ]
ՏԱՂ ՎԱՐԴԱՎԱՌԻՆ, Ի ՆԵՐՍԻՍԷ ԿԱԹՈՂԻԿՈՍԷ

 
Արփիական, ը~, լոյսն.
Որ ի ծոց Հաւր իջեալ յերկնից ծածկեցաւ մարմնով,
 
 
Մարմնով ծածկեալ, ը~, լոյսն
Այսաւր փայլեաց փառաւք ի Թաբաւր լերինն:
 
 
Լերինք ցընծասցեն այսաւր
Առաջի Տեառն` Հերմոն եւ Թաբաւր:
 
 
Ի Թաբաւր պարեն, ը~,
Դասք առաքելոցն այսաւր եւ մարգարէիցն:
 
 
Մարգարէքն Մովսէս եւ Հեղիաս
Եկին ի տեսանել` որում ցանկային:
 
 
Ցանկալին էից, ը~, Հայր
Ի բարձանց աղաղակէր. Դա' է Որդի իմ սիրելի:
 
 
Սիրող Որդւոյ, ը~, վէմն
Յաւրինէր երիս տաղաւարս` Տեառն եւ ծառայիցն:
 
 
Ծառայքս ելցուք ի լեառըն,
Տեառըն երկիր պագցուք` ի նմա ծագեալ լուսոյն:
 
 
Լուսաւորե'ա ըզմեզ, Քրիստոս,
Յորժամ գաս հայրենի փառաւք ի նորոգել զերկիրս
 
 
Երկիրս ընդ երկնայնոցն
Մատուցանեմք քեզ, Տէր, փառս ի յաւիտեանս, ամէն:
 

[ԾԷ]
ՓՈԽ

 
Տէր փառաց այսաւր ի Թաբաւր յայտնեաց զփառս իւր.
Րախացան տեսլեամբ լուսոյն դասք առաքելոցն:
 
 
Նոյն ինքն անդ ածեալ զՄովսէս, զմեծըն Հեղիաս,
Երրեակ տաղաւար շինէր վէմն եկեղեցւոյ:
 
 
Րաբունւոյն էից յերկնից Հայր վըկայելով.
_ Սիրելի Որդի դա է իմ, դըմա' լուարուք:
 
 
Երեւեայ Հոգին ի տիպ լուսափայլ ամպոյ,
Սինա նոր եղեւ Թաբաւր եւ էջք Աստուծոյ:
 
 
Ի նոյն մեք ելցուք հոգւով լեառն իմանալի,
Էական լուսոյն նըւէր մատուսցուք ըզփառս:
 

[ԾԸ]
ՏԱՂ ՎԱՐԴԱՎԱՌԻՆ

 
Նոր իմն ահաւոր խորհուրդ նոր են աւետիք,
Լերանցդ աւետիս պատմեմք պարգեւաւք Հոգւոյն:
 
 
Սինայի լերին տըւաւ խորհուրդ պատգամաց,
Տախտակ քարեղէն գըծեալ սէր արարչութեան:
 
 
Աստանաւր տեսիլ ահեղ ի լեառըն Թաբաւր,
ԶՈրդին Աստուծոյ տեսեալ ի սմա խոնարհեալ:
 
 
Երիցս երանեալ արամբք հինգ կատարելովք,
ԶՊետրոս Սիմոնեանըն` զվէմն, Զեբեդեայ զորդիսն,
 
 
ԶՄովսէս զաւրինաց տըւողն, զմեծըն Հեղիաս,
Զմարգարէսն ի մէջ ածեալ պատմիչ խորհըրդոյ:
 
 
Դաւիթ վաղընջուց ձայնեալ զայս տեսիլահրաշ,
Նախագուշակեալ ասէր զելիցն ըզխորհուրդ:
 
 
Ցընծալով ցընծա', Թաբաւր, հանդերձ Հերմոնիւ,
ԶՏէր տեսեալ ի քեզ բազմեալ փառաւք հայրենի:
 
 
Ցաւղ հոսեալ իջմամբ Հոգւոյն ի լեառըն Սինեայ,
ԶՈրդի Աստուծոյ տեսեալ բազմեալ խորհըրդով:
 
 
Զարթի'ք, Սիոնի որդիք, յաւրհնութիւնըս Տեառն,
Ելէ'ք տեսանել ըզՏէր լեռնէս Հերմոնէ:
 
 
Մի' յայս մերձենայք ի լեառն անսուրբ խորհըրդով,
Տաւն տաղաւարաց տաւնէ տըւողն աւրինաց:
 
 
Այլակերպեցոյց Որդի զփառսըն զոր ունէր,
Ծածկեաց ճառագայթ փառացն զլոյսն արեգական:
 

ՓՈԽ

 
Հայր վըկայելով յամպոյն. Դա' է իմ Որդի,
Դա իմ սիրելի Որդի, դըմա' լըւարուք:
 
 
Տեսին եւ պակեան յահէն դասք առաքելոցն,
Յերկիր դողալով անկան յահաբեկ լուսոյն:
Մի' ոք կարծիցէ ըզդա նըման Մովսեսի,
Եղիա ըզդա մի' կարծէք, ըզՏէրդ Եղիայի:
 
 
Ծոցածին ծաւալ ծագումն ծաղիկ հայրենի,
Որ մեզ յարութիւն տըւեալ գալըստեամբ այսաւր:
 
 
Մեզ են աւետիք, եղբա'րք, տաւնիս տաւնողացս,
Տաւն Վարդավառի տաւնէ տըւողն աւրինաց:
 
 
Տաւնիս տըւողին տացուք ըզփառս եւ զպատիւ
Այժմ եւ հանապազ եւ միշտ յաւիտեանս, ամէն:
 
 
Մի' յայս մերձենայք ի լեառն անսուրբ խորհըրդով,
Տաւն տաղաւարաց տաւնէ տըւողն աւրինաց:
 
 
Մի' յայս մերձենայք ի լեառն անսուրբ խորհըրդով,
Տաւն տաղաւարաց տաւնէ տըւողն աւրինաց:
 

ԾԸա. [ՎԱՐԴԱՎԱՌԻ]

 
Նոր իմն ահաւոր խորհուրդ նոր են աւետիք,
Լերանցդ աւետիս պատմեմք պարգեւաւք Հոգւոյն:
 
 
Սինայի լերին տըւաւ խորհուրդ պատգամաց,
Տախտակ քարեղէն գըծեալ սէր արարչութեան:
 
 
Աստանաւր տեսիլ ահեղ ի լեառըն Թաբաւր,
ԶՈրդին Աստուծոյ տեսեալ ի սմա խոնարհեալ:
 
 
Մեզ են աւետիք, եղբա'րք, տաւնիս տաւնողացս,
Տաւն Վարդավառի տաւնէ տըւողն աւրինաց:
 
 
Երիցս երանեալ արամբք հինգ կատարելովք,
ԶՊետրոս Սիմոնեան` ըզվէմն, Զեբեդեայ որդիսն,
 
 
ԶՄովսէս զաւրինաց տըւողն, զմեծըն Հեղիաս,
Զմարգարէսն ի մէջ ածեալ պատմիչ խորհըրդոյ:
 
 
Դաւիթ վաղընջուց ձայնեալ զայս աւուր խորհուրդս.
_ Լերինք ցընցասցեն,_ ասէ,_ ընդ յառաջ քո, Տէ'ր.
 
 
Ցընծալով ցընծայ Թաբաւր, հանդերձ Հերմոնիւ,
ԶՏէր տեսեալ ի յինքն եկեալ փառաւք հայրենի:
 
 
Զարթի'ք, Սիոնի որդիք, յաւրհնութիւնըս Տեառն,
Ելէ'ք տեսանել ըզՏէր լեռնէս Հերմոնէ:
 
 
Զարթի'ք, Սիոնի որդիք, յաւրհնութիւնըս Տեառն,
Ելէ'ք տեսանել ըզՏէր լեռնէս Հերմոնէ:
 
 
Ցաւղ հոսեալ իջմամբ Հոգւոյն ի լեառըն Սինեայ,
ԶՈրդին Աստուծոյ տեսեալ բազմեալ ի նըմա:
 
 
Զարթի'ք, Սիոնի որդիք, յաւրհնութիւնըս Տեառն,
Ելէ'ք տեսանել ըզՏէր ի լեառըն Թաբաւր:
 
 
Մի' դուք մերձենայք ի լեառն անսուրբ խորհըրդով,
Զտաւն տաղաւարացն այսաւր վերապատուեսցուք:
 
 
Տաւնիս տըւողին տացուք ըզփառս եւ զպատիւ
Այժմ եւ հանապազ եւ միշտ յաւիտեանս, ամէն:
 

ԾԸբ. ՏԱՂ ՎԱՐԴԱՎԱՌԻՆ

 
Աստանաւր տեսիլ ահեղ ի լեառըն Թաբաւր,
ԶՈրդին Աստուծոյ տեսեալ ի նմա խոնարհեալ:
 
 
Երիցս երանեալ արամբք հինգ գըլխաւորաւք,
ԶՊետրոս` վէմըն հաւատոյ, զորդիսն Որոտման:
 
 
Ծոցածին ծաւալ ծագումն ծաղիկ հայրենի,
Որ մեզ յարութիւն տըւեալ գալըստեամբ այսաւր:
 
 
Զտըւողն աւրինաց Մովսէս, զմեծըն Հեղիաս,
Զմարգարէսն ի մէջ ածեալ պատմիչ խորհըրդոյ:
 
 
Դաւիթ վաղընջուց ձայնեալ զայս աւուր խորհուրդ,
Նախագուշակեալ ասէր զցընծութիւն աւուրս:
 
 
Ցընծալով ցընծա', Թաբաւր, հանդերձ Հերմոնիւ,
ԶՏէր տեսեալ ի քեզ փայլեալ հայրական փառաւք:
 
 
Հայր վըկայելով յամպոյն. Դա' է իմ Որդի,
Դըմա' լըւարուք, ասէ, ընդ որ հաճեցայ:
 
 
Ցաւղ հոսեալ իջմամբ Հոգւոյն ի լեառըն Սինեայ,
ԶՈրդի Աստուծոյ տեսեալ բազմեալ խորհըրդով:
 
 
Ցաւղ հոսեալ իջմամբ Հոգւոյն ի լեառըն Սինեայ,
ԶՈրդի Աստուծոյ տեսեալ բազմեալ խորհըրդով:
 
 
Մի' ոք կարծեսցէ ըզդա նըմա Մովսեսի,
Եղիա ըզդա մի' ասէք, ըզՏէրդ Եղիայի.
 
 
Յովհաննու դա չէ հանգոյն, անտես է վերնոցն,
Ի'մ է սիրելի Որդի` Հաւրս երկնաւորի:
 
 
Զտաւն Վարդավառիս այսաւր եկայք տաւնեսցուք,
Մեզ ողորմութիւն հայցել տաւնիս տաւնողացս:
 

[ԾԹ]
ՏԱՂ ՎԱՐԴԱՎԱՌԻՆ, ՏԵԱՌՆ ՆԵՐՍԻՍԻ ԱՍԱՑԵԱԼ

 
Ներպարունակեալ խորհուրդ լուսոյն ի հրեղինաց
Այսաւր ի յերկրի յայտնեալ ցուցաւ հողեղինացս:
 
 
Էական Բանին բնութիւն մարմնով պարածածկեալն
Այսաւր ի Թաբաւր արտափայլեալ պայծառ ծագմամբ:
 
 
Րաբունեացըն պետք երից ընտրեալ առաքելոցն
Անկեալ դողային` յահեղ լուսոյն ոչ հանդուրժեալ:
 
 
Սոսկալի հրամանն ածեալ զՄովսէս ի մեռելոց,
Զմեծըն Հեղիաս ի կենդանեաց վայրաբերեալ:
 
 
Էնն Աստուած եւ Հայր յերկնից ձայնիւ աղաղակէր.
_ Դա' է իմ Որդի, դըմա' լուարուք, որդիք մարդկան:
 
 
Սուրբ Հոգին ընդ Հաւր հովանացեալ իւր էակցին,
Ի նըմանութիւն լուսոյ փայլեալ պայծառ ամպոյ:
 
 
Ի Թաբաւր լերինն խորհուրդ յայտնեալ Երրորդութեանն,
Զոր եւ Պետրոսի երիւք ազդէր տաղաւարաւք:
 
 
Երգս առեալ Դաւիթ յառաջագոյն նախաձայնէր.
_ Թաբաւր եւ Հերմոն,_ ասէ._ յանուն քո ցընծասցեն:
 
 
Րոպէից հանուրց այսաւր ծագեաց լոյսն երկնային
Եւ պայծառացոյց զեկեղեցիս հեթանոսաց:
 
 
Գոչեմք ընդ տեսողսն այսաւր լուսոյդ անճառելւոյ.
_ Փա~ռըք ծագողիդ այժմ եւ յաւէտ, միշտ յաւիտեանս:
 

[Կ]
ՓՈԽ

 
Ընդ որս եւ մանկունք նորոգ դըստեր Սիոնի
Քեզ վերագոչեն ընդ Հաւր զաւրհնութիւնս երգով,
Որ զաստուածութեանդ ըզլոյս զծածկեալըն մարմնով
Այսաւր ի Թաբաւր լերինն փառաւք փայլեցեր`
Ձայն Հաւր ի բարձանց յերկնից քեզ վըկայելով.
_ Դա' է իմ Որդի ընտրեալ ընդ որ հաճեցայ:
Յերկիր վայր անկեալ դողմամբ դասք առաքելոցն,
Պետրոս զարհուրեալ խաւսղէր ըզտաղաւարացն:
Մովսէս` աւրինաց տըւողն, մեծըն Հեղիաս,
Մաղթէին զելից քոց, Տէ~ր, ի յԵրուսաղէմ
Խաչիւ եւ արեամբ փըրկել զորդիս Ադամայ:
Նոցին պաղատանք ընդ մեր քեզ հաճոյասցին`
Հանել ընդ նոսին ըզմեզ լեառն իմանալի
Ի մեծի ծագման քո, Տէր, հայրական փառաւք:
Արժանաւորե'ա տեսլեան փառաց քոց, Քրիստոս,
Յորժամ արդարոցըն դասք ընդ քեզ ծագեսցին,
Զորոյ զաւրինակ փայլման յայսմ աւուր ցուցեր,
Լուսաւորեսցես ըզմեզ լուսով քո, փըրկիչ,
Երգակից լինել վերնոցն ի յարքայութեանդ,
Անդադար ձայնիւ աւրհնել սուրբ զԵրրորդութիւնդ
ԸզՀայր եւ զՈրդի Հոգւով յաւիտեանս. ամէն:
 

[ԿԱ]
ՏԱՂ ՓՈԽՄԱՆ ՍՈՒՐԲ ԱՍՏՈՒԱԾԱԾՆԻՆ, Ի ՆԵՐՍԻՍԷ ՀԱՅՈՑ ԿԱԹՈՂԻԿՈՍԷ

 
Այսաւր Գաբրիէլ հրեշտակապետն եկեալ,
Բերեալ բրաբիոն պըսակ յաղթող Կուսին:
 
 
Այսաւր կոչելով առ բոլորիցըն Տէր
Զտաճար բարձրելոյն եւ զբնակարան Բանին:
 
 
Այսաւր հրաւիրմամբ Հոգւոյն ժողովեցան
Գունդք առաքելոցն եւ իմաստուն կուսիցն:
 
 
Այսաւր խոնարհեալ անմարմնական դասուք
Միածին Որդին առ կուսութեանցըն մայրն:
 
 
Այսաւր աւանդեալ ըզմաքրական Հոգին,
Փայլակնանըման վեր համբարձեալ վեհիցն:
 
 
Այսաւր ամփոփեալ ըզսըրբասնեալ մարմինն,
Ծածկելով յերկրի զանապական ըզգանձն:
 
 
Այսաւր երկնայնոց խըմբիցըն պար առեալ,
Եղանակէին շուրջ ըզգերեզմանաւն:
 
 
Այսաւր երգակցեալ նոցին առաքելոցն
Եւ դասք կուսանացն գովեն ըզմայր կուսիցն:
 
 
Այսաւր փոխադրեալ ի զգայական բնութեանց
Զմարմինըն մաքուր յիմանալեաց կայանս:
 
 
Այսաւր ցընծութիւն երկնաւորաց դասուց
Համամաքրենի Կուսին երթեալ յերկինս:
 
 
Այսաւր շնորհեցաւ բըժըշկութեանց պարգեւս,
Պատկեր Տիրամաւրն լուսազարդեալ յերկնից:
 
 
Այսաւր երգս առեալ գոչեմք եւ մեք ձայնիւ.
_ Կուսական տաւնիւս Երրորդութեանըն փա~ռք:
 

[ԿԲ]
ՓՈԽ

 
Անարատ տաճար եւ առագաստ լուսոյ,
Մայր անհարսնացեալ Աստուածածին միշտ կոյս,
 
 
Զքեզ նախատեսացըն գուշակեալ ցուցին
Ծառ կենաց ի մէջ աստուածատունկ դրախտին:
 
 
Զքոյդ Աբրահամու ի խորանին լըւեալ
Աւետեաց ծընունդ ի ծնիցելոյ Բանէն:
 
 
Զքեզ Մովսէս անկէզ ի մորենին տեսեալ
Եւ սափոր ոսկի` մանանայիւ լըցեալ:
 
 
Գեղմըն Գեդէոն քաղցրիկ ցաւղով հեղեալ,
Եւ աղբիւր կընքեալ Սողոմոնի տեսեալ:
 
 
Զքեզ Եսայիաս կոյս յըղացեալ ծանոյց,
Տումար անքընին եւ ամպ թեթեւագին:
 
 
Զքեզ դուռըն փակեալ` Եզեկիէլ եցոյց,
Լեառըն վիմածին զքեզ Դանիէլ ետես:
 
 
Քեզ Գաբրիելի ի կատարումն եկեալ,
Աւետեաց ձայնիւ զուրախութիւն գոչէր:
 
 
Դու զանտանելին յորովայնի տարար
Եւ ծընար մարմնով զառ ի Հաւրէ ծընեալն:
 
 
Դուռն արեւելեան Ադին դրախտին բացող
Եւ արեգականն արդարութեան ծագող:
 
 
Զքեզ այսաւր Որդին քո միածին եկեալ,
Փոխադրեալ դասեաց ի յերկնային խորանսն:
 
 
Հիացեալ տեսին իմանալեացըն դասքն
Մարմին հողեղէն վերասլացեալ յերկինս:
 
 
Քեզ առ ի պատիւ ընթանային յառաջ`
Գունդք սերովբէից թեւասքաւղեալ գոլով:
 
 
Զքեւ քառակերպիցըն հոյլքն ակումբ առեալ,
Սպասաւորէին հրեշտակական երամքն:
 
 
Դու ի յերկնաճեմ յաստուածակերտ խորանսն
Զանազան փառաւք պայծառացեալ մըտեր:
 
 
Զքեզ առաքելոցըն գովէին գումարք,
Եւ դասք կուսանացն` հըրճուողական ձայնիւ:
 
 
Քեզ այսաւր տաւնեն եկեղեցւոյ մանկունք
Եւ խոստովանին. «Աստուածածին միշտ կոյս,
 
 
Լո'ւր պաղատանաց յուսացելոցս ի քեզ
Եւ լե'ր բարեխաւս առ միածին Որդիդ:
 
 
Ծո'ւնր առ ի խոնարհ ընդ հաշտութեան մերոյ
Կըրկնեա', մայր կենաց, կամեցողին բարեաց:
 
 
Աղբիւրս արտասուաց ընդ փրկութեան մերոյ
Բըղխե'ա յորդառատ, մարդասիրին ծընող,
 
 
Սուրբ զեկեղեցի անշարժ պահել յաւէժ,
Եւ զհաւատացեալքս անփորձ մընալ ի սմա:
 
 
Եւ ի գալըստեան մեծի ծագման լուսոյդ
Մըտցուք յառագաստ ընդ իմաստուն կուսանսն`
 
 
Արժանաւորիլ ընդ անմարմնոց դասուցն,
Փառս վերահընչել Երրորդութեանըն միշտե:
 

[ԿԳ]
ՏԱՂ ՓՈԽՄԱՆ ԱՍՏՈՒԱԾԱԾՆԻՆ, Ի ՆԵՐՍԷՍԷ

 
Նոր քերովբէ հողանիւթ, աթոռ էից բարձողին,
Աստուածածին` սուրբ տաճար Բանին, ը~, Հաւր,
Երկինք երկնից ի յերկրի ցուցար, ո~վ սըրբուհի Կոյս,
Մարիամ` մայր Աստուծոյ անհարսնացեալ:
 
 
Րոպէից կուսից համայնից մարդկան ծագեցեր լոյս,
Նոր արեւելք արեգականն արդարութեան,
Սա այսաւր իջեալ զաւրաւք հրեշտակաց առ քեզ, կոյս եւ մայր,
Բարձրացոյց ըզքեզ ի վերինն Երուսաղէմ:
 
 
Եկեալ եւ դասք սուրբ առաքելոցն ի փոխումըն քո,
Համաձայն զըւարթնոցն գովէին զաւրհնեալդ ի կանայս:
Սոցին նըման եւ մեք երգեսցուք քեզ, տիրուհի սուրբ,
Ընդ սրովբէից դասուց բարձրացելոյդ ի փառս:
 

[ԿԴ]
ՓՈԽ

 
Նարդոս բուրեալ եղբաւրորդին
Եւ իւղ թափեալ անուն նորին,
Ընդ աւրիորդ դըստեր Դաւթի
Անճառ սիրով բաղձմամբ կապի:
 
 
Վարդ կարմրերփեան յառաւաւտին,
Սաղարթապատ յերեկոյին,
Արեգական լոյս պարագրի,
Ընդ պատենիւ լուսոյն ծածկի:
 
 
Գայ այծեման որթուց նըման,
Վերայ լերանցըն Բեթելեան,
Եմուտ ի վրանըն Կեդարու,
Արար տաճար իւր լուսատու:
 
 
Անձրեւըն Հաւր ամպով Հոգւոյն,
Իջեալ ի գեղմն իմանալոյն,
Սերմըն սիրոյ Բանին բուսաւ,
Եթող յերկրի եւ վերացաւ:
 
 
Տաճար լուսոյն աստ բնակեցաւ,
Որքան բնակեալըն կամեցաւ.
Վեր համբառնայ այսաւր կառաւք
Եւ բազմաչեայ քրովբէաւք:
 
 
Առաքելոցըն գումարեալ,
Սուրբ կուսանացըն ժողովեալ,
Ծածկեն զկուսից մայրն ի յերկրի
Պայծառ ջահիւք եւ լապտերաւք:
 
 
Անմարմնականքըն վայր իջեալ,
Զգերեզմանաւըն պար առեալ,
Ծագմամբ լուսոյ երգել երգ նոր`
Զերիս աւուրս ոչ լըռելով:
 
 
Նոքին զմարմինըն սուրբ առեալ,
Հրեղէն կառաւք վեր համբարձեալ
Ի լուսաճեմ խորանս վերին,
Յեղականաց անմըտելին:
 
 
Նոցին եւ մեք համաձայնեալ,
Քե'զ, Տիրամայր, զայս երգս առեալ,
Երկըրպագեմք հետ միածնին`
Մեր փըրկութեանըն պատճառին:
 
 
Րամեալքս տաւնեմըք ցընծութեամբ
Զվերափոխումըն քո յերկինս.
Գանձին ունակ, փարթամացո'
Զաղքատս` երգել փառս Աստուծոյ:
 

[ԿԵ]
ՏԱՂ ԵԿԵՂԵՑՒՈՅ, Ի ՆԵՐՍԻՍԷ ԿԱԹՈՂԻԿՈՍԷ

 
Նորազուարճ խընդութեամբ բերկրեա` ցընծալով,
Կոյս անապական, հարսըն պանծալի Որդւոյ արքայի.
Դուստըր վերինն Երուսաղեմի, ո~վ սուրբ եկեղեցի:
 
 
Եկեալ ի Սաբայ դըշխոյ, բերեալ խունկս եւ ոսկի
Նոր Սողոմոնի հաւր իմաստութեան` հաւատ, յոյս եւ սէր.
Թագուհի գերապանծ վայելչութեամբ պայծառացեալ, ո~վ սուրբ եկեղեցի:
 
 
Րաբունւոյն շըրթանց շընորհք ըզքեւ, ը~, սփռեցան,
Թագաւորըն ցանկացաւ պայծառ քո գեղոյ, մոռա ըզտուն Հաւր:
Հարսն ի հեթանոսաց ընտրեալ ի յազգաց, ո~ վ սուրբ եկեղեցի:
 
 
Սըրտիւ ի սէր քո հարեալ փեսայն երկնաւոր,
Արեամբ իւր գընեալ մաքրեալս յանմաքրից կողին վըտակաւք.
Դըշխոյ զարդարեալ ի վերջաւորս յոսկեհուռն, ո~վ սուրբ եկեղեցի:
 
 
Եդեալ ի հիմունըս քո քարինք պատուականք` յասպիս, կարկեհան,
Զդասս առաքելոցն եւ մարգարէից.
Քաղաք Աստուծոյ ուրախացեալ գընացիւք գետոց, ո~վ սուրբ եկեղեցի:
 
 
Սիւնս եաւթըն կանգնեալ ի քեզ ճարտարապետն,
Զեաւթնարփեան շընորհս պէսպէս պարգեւաւք Հոգւոյն բաժանմամբ.
Տուն իմաստութեան, յորում խառնի գինին ուրախարար, ո~վ սուրբ եկեղեցի:
 
 
Ի նոյն պարիսպ քո շինեալ աշտարակ ոսկեղէնս.
Պատուար արծաթի, դրունք երկոտասան մի մի մարգարտեայ.
Մայրաքաղաք վերինդ Երուսաղէմ, ո~վ սուրբ եկեղեցի:
 
 
Երեւեալ ախճապակըք քո բիւրեղ սառնագոյն,
Ի նմա որդիք լուսոյ լուսով կերակրեալ գառամբն Աստուծոյ.
Սիոն լեառն, յորում հոգիք անդրանկաց գրելոց ի յերկինս, ո~վ սուրբ եկեղեցի:
 
 
Եկին ի հեռաստանէ որդիք քո ցըրուեալք,
Զդըստերըս լո ուսովք բարձեալ թագաւորք բերին ընծայիւք.
Տաճար նոր, գերապատուեալ քան զառաջինն ի փառս, ո~վ սուրբ եկեղեցի:
 
 
Րամեալ ժողովին ի քեզ մանկունք առագաստի,
Պարեն ընդ հրեշտակս գինեաւ սուրբ արեամբն հացիւըն կենաց.
Հարսնարան յաւէժ հարսանեաց անմահ փեսային, ո~վ սուրբ եկեղեցի:
 
 
Գոչեա' ուրախութեամբ, երբեմն` ամուլ, անծին,
Եւ արդ` բազմորդի, քան զարամբին ծընար ազգս եւ ազինս.
Մայր հաւտից բանաւորաց եւ լուսակիզըն գառանց, ո~վ սուրբ եկեղեցի:
 
 
Ստեամբըք կերակրես միշտ ըզմանկունս կաթամբ եւ մեղու`
Հին եւ նոր Կտակարանաւք, մարմնով եւ արեամբ քո սուրբ փեսային.
Մայր հոգւոց, երգեմք ի քեզ Երրորդութեանն ըզփառս, ո~վ սուրբ եկեղեցի:
 

[ԿԶ]
ՓՈԽ

 
Ի լուսոյն արփւոյ առ լոյսն, որ յԵրուսաղէմ,
Ստուերն անգիտութեան ի քէն հալածեցաւ.
Ուրախ լե'ր, ցընծա', Սիոն, մայր եկեղեցի,
Ւիւսեալ քեզ պըսակ փառաց յաւրինէ արքայ:
Րախճական ձայնիւ գովեա', Երուսաղէմ, զՏէր,_
Բազմի յառագաստ քո սուրբ փեսայն երկնաւոր,
Երգս առեալ պարեն սրովբէք սըրբասաց ձայնիւ,
Կայ դըշխոյ յաջմէ փառաւք սուրբ թագաւորին,_
Եւ զարթո' զմանկունըս քո յաւրհնաբանութիւն:
Ղամբարափայլ տաճար երանգաւք ծաղկեալ,
Երկնից վեհագոյն գըտար գերապանծ լուսով,
Ցուցաւ արեգակն ի քեզ` պայծառ աստեղաւք,
Ի ձայն ցընծութեան գոչեա' փըրկողին ըզփառս:
 

[ԿԷ]
ՏԱՂ ԵԿԵՂԵՑՒՈՅ, Ի ՆԵՐՍԻՍԷ ԿԱԹՈՂԻԿՈՍԷ

 
Յաւէժ, եկեղեցի, ցընծա,
Եկեալ ի քեզ փեսայն.
Ե'լ ընդառաջ, դըշխոյ հարսն:
Ի զարդ շափիւղայ զարդից`
Մայր Սիոն որդւովք բերկրեալ,
Մայրաքաղաք յաւէժ պըճնեալ:
Թագաւորն եկեալ ի քեզ,
Զքո մանկունսդ զարթո' ի յերգս.
Յորջորջ քեզ վերըստին ծընունդ
Ի ջուրցն աւազանին լուսոյ:
Առաքելական հիմըն,
Մարգարէից քարոզ,
Երկնանըման երկինք
Ի քեզ հաստատեալ սեղան:
Հայր վըկայելով Որդւոյ,
Ի քեզ հաց կենաց բաշխեալ,
Հոգին աղաւնակերպ իջեալ
Ի վերայ մարմնացեալ Բանին:
Տաւիւս ի տաւնս երգով
Միշտ գոչեսցուք ձայնիւ,
Ի սմա ըզԴաւթեանն երգեմք
Զոր արար Տէր. Եկայք ցընծասցո'ւք.
Հաւր եւ Որդւոյ պատիւ,
Նորոգողին ըզփառս
Այժմ եւ հանապազ ի նոյն,
Նոյն յաւիտեանս, ամէն:
 

[ԿԸ]
ՓՈԽ

 
Ի յերգս սիրեցեալ անձին,
Նիշ բանի նըշան առեալ.
Բերկրին զուարճացեալ անձինք,
Սեռք երկնաւորաց խըմբից:
 
 
Լերինք Սինային զարդիւք,
Տառք մարգարէիցն ըղձիւք,
Ի յուղխից շարժեալ գետոց
Սիք հարաւ աւդից հողմոյն:
 
 
Տունկ տեսանողաց մայրից,
Ծաղիկ մատուցին վարդից,
Ծովուն խուճապեալ շարժեալ,
Խաղայր յեզերացն ափունս:
 
 
Նոր զարմանք յերկրի տեսին,
Նոր գեղապարեն երգ նոր,
Կանայք են երկու թռուցեալ
Ի ներքս աւդային հողմոց:
 
 
Թեւս են տարածեալ ի յաւդս,
Սիրասլաց աւդիւք ճեմեալ,
Հիւսք են հուր եռանդ շաղեալ
Նոյն բայաստեղնեայ հրէից:
 
 
Հեզ կամար ի սէր շարժեալ,
Ծիր երկնի շաւիղ աւդից,
Լոյս առաւաւտին ծագեալ
Արեգակնային աչացն:
 
 
Լիալիր լըրմամբ լուսոն,
Նոյն գունագեղի գունեն,
Ի սէր շընչմանէ բուրեալ
Ի քիմս իւղաբեր հոտոցն:
 
 
Նիւթ յաննիւթ կապեալ շըրթանց,
Ձայն ի Սադայէ լըւեալ,
Ձեռքըն ծաւալեն զըմուռս,
Հոտ անոյշ բուրեն ըզխունկս:
 
 
Ի ստեանց աւրիորդք ընտրեալք,
Դըստերք Սիոնի վերին,
Յայտ ծանեալ տեսաք յամպոյ,
Կոյսք են կաթոգին գեղով:
 
 
Այսք են գուշակեալ ըզմայր,
Նոր Սիոն նըման Սինեայ,
Փառք են ի Սիոն ծագեալ
Ի Հաւրէ լուսոյ փառաց:
 
 
Ի մեծ հարսնարանն Սիոն
Նոր Երուսաղէմ յայտնեալ,
Բրաբիոն պըսակ փառաց
Ի սմանէ կանգնեալ նըշան:
 
 
Րաբունիքըն քեւ պարծին,
Սըրբոց սըրբասնեալ անձինք,
Որ ես գերագոյն երկնից
Նորահրաշ յերկրի յայտնեալ:
 
 
Նոյն քեւ նորոգի սեղան`
Զենարան անմահ գառինն,
Ի մեզ նա բաշխէ պարգեւ
Կենացունաբեր ի կեանս:
 
 
Անմահագործեալ փառաւք
Զÿի Հոգւոյն ծընեալսն ի սմա,
Յորոց փառատրի երգով
Այժմ եւ յաւիտեանս, ամէն:
 

[ԿԹ]
ՏԱՂ ՍՈՒՐԲ ԽԱՉԻՆ ՔՐԻՍՏՈՍԻ, ՏԵԱՌՆ ՆԵՐՍԻՍԻ ԱՍԱՑԵԱԼ

 
Նոր դրախտին եկեղեցւոյ
Ծառ կենաց տընկեալ ի մէջ,
Զոր ոչ քրովբէիւք փակեալ,
Այլ դիւրահուպ ի մէնջ:
 
 
Երկակի ներհակաց տիպ
Մահաբերին տընկոյն ձեւով
Եւ կենարարաւն ի քեզ
Ծառոյն կենաց նըման:
 
 
Րոպէից բանաւորաց
Բանալի եղեր դրախտին,
Մըտից վերըստին ի նոյն
Անփոփոխելի կայիւք:
 
 
Սեռն անապակ սիրոյ Էին
Ծածկելոյն առ Հաւր յայտնիչ.
ԶՈրդին իւր տալով վասն իմ
Ի մահ մարմնով ի քեզ:
 
 
Իմանալի տապան Նոյեան,
Զաւժանդակեալքս ի քեզ պահեա
Ի հեղձական մեղաց ծովէ
Եւ ի հըրեղէն գետոցն:
 
 
Սաբեկայ ծառոյն նըման
Ոչ խոյ յողջակէզ կախեալ,
Այլ գառն Աստուծոյ զենեալ
Մեզ հաշտութեան նըւէր:
 
 
Ի Գողգոթայ կանգնեալ սանդուղք
Տեսլեամբ Յակոբայ ցուցեալ
Հրեշտակաց իջման` յերկիր
Եւ մարդկան ելից` յերկինս:
 
 
Երեւեալ Մովսեսեան ցուպ`
Զծով մեղաց հերձանելով,
Եւ Իսրայելի նորոյ
Դու առաջնորդես ի լոյս:
 

[Հ]
ՓՈԽ

 
Կենաց փայտ տընկեալ ըզքեզ տընկողին զԵդեմ,
Զտընկագործն էից ի քէն պըտղաբերեցեր:
 
 
Անհասին ի սրովբէից բոցեղէն թեւոց
Հողեղէն բնութեանս եղեր դիւրահաս պատճառ:
 
 
Թագաւորն երկնից ի քեզ տարածմամբ ձեռաց
Ժողովեաց ըզհեռացեալսն ընդ թեւաւք իւրովք:
 
 
Որ ըզկապ մահու ելոյծ կապելովն ընդ քեզ,
Ի կապից մեղաց ըզմեզ արձակե'լ հայցեա:
 
 
Ղեղւոյն դառնութեան փոխան, զոր վասն իմ էարբ,
Դառնաբեր վիժմունք հոգւոյս քաղցունք բըղխեսցեն:
 
 
Ի քեզ բեւեռմամբ ձեռացըն զիմս արձակեա',
Հեղուսեալ ոտիւքն ուղղեա' զգընացս իմ յերկինս:
 
 
Կենդանւոյն մահուամբ մարմնով` զհոգիս իմ կեցո~,
Խոնարհեալ գըլխոյն ընդ իմ` զիմըս բարձրացո~:
 
 
Որ խոցմամբ կողին տիգաւ վասըն կողածնին
Մաքրեցար հրահոս բըղխմամբ կըրկին վըտակացն,
 
 
Սըրբե'ա ջրովն այնու զմարմնոյս յանցանս արտասուաւք
Եւ զհոգւոյս մասունս մաքրեա' արեան վըտակաւն:
 
 
Ի դըժոխս իջմամբըն քեւ ազատեաց զգերեալսն.
Ազատե'լ մեղթեա եւ զիս ի բանտէ մեղաց:
 
 
Հոսեալ հրեղինաց դասուցն առ գերեզմանաւն
Զքոյդ նախապատիւ անուն վերաձայնէին:
 
 
Առ խընկաբերիցըն դասս փողէր զըւարթունն.
_ Զխաչեալն,_ ասէ,_ զի՞ խընդրէք, չէ աստ, այլ յարեաւ:
 
 
Յորժամ լուսափայլ ծագիս ի յարեւելից,
Զմեզ լուսաւորեա' փառաւք, նըշան տէրունեան:
 
 
Որով զուարճացեալ ցընծան դասք խաչակրաւնիցն,
Զուարճակից լինել նոցին զմեզ արժանացո':
 
 
Ցանկալի վերնոց դասո'ւցըն համադասեա`
 

[ՀԱ]
ՏԱՂ ՍՈՒՐԲ ԽԱՉԻՆ, ՏԵԱՌՆ ՆԵՐՍԻՍԻ ԿԱԹՈՂԻԿՈՍԻ

 
Միակն ի միոյն յանըսկիզբն Էէն անեղ,
Ծընեալ նոյնաբար անժամանակ Որդին:
 
 
Որդին անեղին եղելոց էակ ընդ Հաւր,
Հոգւով ներգործեալ զարարածոց գոյակս:
 
 
Գոյակ նախեղակ իննեկի դասուց աննիւթ,
Հոգւոց հրեղինաց Երրորդութեանըն հուպ:
 
 
Հուպ իւր տիրական պատկերաւ պատուեալ ըզմարդն
Եդեալ տընկագործ անմահական դրախտին:
 
 
Դրախտին Ադենայ ծառ կենաց ի մէջ նըմին,
Դիմակ մահառիթ` մի' ճաշակել պատուէր:
 
 
Զպատուիրան լուսոյ խաւարին խաբմամբ թողեալ`
Մերկացաւ զլոյսն անըստուերական փառացն:
 
 
Փառաց թագաւորն ի խընդիր ելեալ իւրոյ
Ստեղծեալ պատկերին` ըզնոյն առեալ բնութիւն:
 
 
Բնութիւն միացեալ կուսական ծնընդեամբ Բանին,
Ընդ հողեղինիս անյեղապէս գոլով:
 
 
Գոլով յաշխարհի հրաշալի ծագմամբ լուսոյն,
Եկեալ կամաւ Հաւր ի կատարումըն գրոց:
 
 
Զգիրս մարգարէիցն նախաձայն բարբառ լըցեալ`
Ի խաչ բարձրանալ երկնակառոյց ձեռինն:
 
 
Ձեռին Ադամայ փոխանակ ձըգմանն ի ծառն,
Տարածեալ ի սմա զիւր զանարատ բազուկսն:
 
 
Բազուկ կարութեան Հաւր աջոյ ձեռինն մարմնով
Կամաւ բեւեռեալ ի կենսունակ փայտին:
 

***

 
Փայտըն կենարար քառանկիւն կանգնեալ յերկրի
Քառակողմ ազանց անմահ արկեալ սեղան:
 
 
Սեղան Աբրահամին Սահակայ տուեալ փոխան
Խոյ ի յողջակէզ ընդ բանաւոր զենմանն:
 
 
Զենեալ ի վերայ քառաթեւ խաչին, անմահ
Գառըն Աստուծոյ` բարձող մեղաց մարդկան:
 
 
Զմարդկայինն առ Հայր աւանդեալ զհոգի, որով
Աղաղակելով` Էլի էլի գոչէր:
 
 
Գոչմամբ զարհուրեալ սանդարամետիցըն հոյլք,
Սարսեալ սաքրէին յանդընդասոյզ խաւարն:
 
 
Խաւար լուսածին միջաւրեայ եհաս ժամու,
Որով լուծանէր զխաւար մեղաց մահուամբ:
 
 
Մահուամբ անմահին մահու մեռանէր պատճառ,
Եւ ի մեռելոց յառնէր բնութիւնս անկեալ:
 
 
Անկեալ նախահայրն մահաբեր ծառոյն հըպմամբ,
Կանգնէր կենարմատ փայտին մերձեալ ի նմա:
 
 
Նըման նոյնակի ի յաւձին հարեալ թունից,
Լուանայր կողածինըն տիգախոց կողիւն:
 
 
Կողին դուզնաքեայ շիթք արեան հոսեալ շնորհեաց
Յաւէժ միշտ երգել Երրորդութեանն ըզփառս:
 

[ՀԲ]
ՓՈԽ

 
Արդ, աւրհնեալ ես փայտ կենաց եւ փըրկութեան,
Զոր տեսանողացըն ծանուցեալ զխորհուրդն:
 
 
Զքեզ Նոյեան տապանըն գուշակեաց փըրկող`
Զծառոյն Սաբեկայ գառն Աստուծոյ կախեալ:
 
 
Սանդուղք Յակոբեան յերկրէ յերկինս ելից,
Ցուպըդ Մովսեսեան ծովահերձող մեղաց:
 
 
Զմահաշունչ վիշապըն կըլանող հրաշիւք,
Ձող բարձող աւձին ի յաւրինակ ներհակ:
 
 
Գաւազան ծաղկեալ Ահարոնի նորոյ,
Զարքայն երկնաւոր պըտղաբերեալ ի քեզ:
 
 
Գայիսոն յաղթող նոր Յեսուայ բարձեալ,
Կանգնեալ Գողգոթա` նըշան ընդդէմ մահու:
 
 
Կառըք քառադէմ քերովբէիւք բերեալ,
Սուրբըն սրովբէից փառաւք ի քեզ բազմեալ:
 
 
Լեառըն դիտանոց իմանալի Սիոն,
Սիւն իմաստութեան տանն Աստուծոյ բարձող:
 
 
Լոյս Տեառն երեսաց նըշանակեալ ի մեզ,
Զէն երկիւղածաց դիմակ նետից գաղտնեաց:
 
 
Բարունակ բերող ուրախարար պըտղոյն,
Հընձան ողկուզի ճըշմարտութեան որթոյն:
 
 
Սեղան հոգեւոր յերկնից իջեալ հացին,
Խառնարան անոյշ երկնավըտակ աղբիւրն:
 
 
Խորհուրդըն ծածկեալ ի սկըզբանէ յազգաց,
Քեւ յայտնեալ ցուցաւ Բանն ի Հաւրէ ծընունդ:
 
 
Զլոյս փառաց արկողն, որպէս զաւթոց ծածկոյթ,
Մերկ կրեցեր մարմնով ընդ մերկութեան մերոյ:
 
 
Արեամբ Աստուծոյ հոսեալ ի քեզ ներկար
Եւ յահեղ բոցոյն ոչ տապացեալ կիզար:
 
 
Աթոռ անեղին քառակերպեան գըտար
Եւ կառք հըզաւրին` հեծելութեան մարտի,
 
 
Որով ի դըժոխս իջեալ փըրկեաց զգերեալսն
Եւ քեւ պըսակեաց զեկեղեցի իւր սուրբ:
 
 
Պահեա ի հաւատըս ճըշմարիտ ըզսա,
Ի սմա` եւ զմանկունըս հաւատոյ անշարժ:
 
 
Զգիր պարտեաց մերոց լուասցես ջըրոյն բըղխմամբ,
Ի կեանըս գրեսցես արեամբն ի քեզ մածեալ:
 
 
Եւ յորժամ ծագիս յարեւելից նըշան,
Շնորհեա' մեզ դասիլ խաչակրաւնից դասուցն:
 
 
Ընդ նոսին երգել միշտ աւրհնութիւն յաւէտ,
Սուրբ Երրորդութեան փա~ռք յաւիտեանս, ամէն:
 

[ՀԳ]
ՏԱՂ ՍՐԲՈՑ ՀՐԵՇՏԱԿԱՊԵՏԱՑՆ, Ի ՆԵՐՍԻՍԷ ԿԱԹՈՂԻԿՈՍԷ

 
Առաջինըն լոյս երրեակ եւ միաստուածութիւն
Բանիւ յանէից զերկրորդ լուսոյ ստեղծ նախ ըզգոյս:
 
 
Գերագոյն գոլով հուպ իւրական փառաց տեսողք`
Դասք սերովբէիցն եւ քերովբէք, հոյլք աթոռոցն:
 
 
Երկրորդ պարունակ պարագրելոց սոքումբք վեհից`
Զաւրութեանցըն խումբք իշխանութեանց եւ տէրութեանց:
 
 
Էրրորդ հոսկ յետոյ` պետականացըն պետութիւն,
Ընդ հրեշտակապետսն եւ հրեշտակացըն բազմութիւնք:
 
 
Թագաւորք յաւէտք եւ քահանայք մըշտանըւէրք,
Ժառանգորդք երկնից արքայութեանն ի սկըզբանէ:
 
 
Ի Հաւրէն լուսոյ լոյս գիտութեան միշտ ընկալեալք,
Լոյս իմաստութեան որդւոց մարդկան վերաբերողք:
 
 
Խոնարհագունիցն ի վեհագոյն դասուցն առեալք,
Ծագումն իմաստից յուսապայծառ հեղումն յարփւոյն:
 
 
Կամաւոր բարիք ի յաղբիւրէն բարւոյ հոսեալք,
Հոգիք հարկաւորք վեհին կամացըն սպասաւորք:
 
 
Ձեւանան տեսլեամբ ձիւնանըման պատմուճանաւ,
Ղամբարք լուսափայլ վառեալք ի տիպ ըզգայական:
 
 
Ճառագայթք փառաց գերապայծառք եւ պանծալիք,
Մերձ յանհըպելի լոյսըն մաքուր աստուածութեանն:
 
 
Յիննեակ թիւ դասուց ըստ խորհըրդեան դրամից տասանց,
Նոյն եւ հարիւրոց ի յանապատ յերկինս հաւտից:
 
 
Շարժեալ միակին նըւազեցոյց ըզկատարեալսն,
Որում ի խընդիր էջ այցելուն մոլորելոց:
 
 
Չարին պատճառաւ յերկնից անկեալ արուսեկին,
Պատուեալ պատկերին անպատուելի թաղեալ ախտիւք:
 
 
Ջընջէր խռովութիւնն, որ յաղագս այսր ընդ մարդկութեանս,
Ռահ գործեալ յերկնից իջանէին ընդ միածնին:
 
 
Սուրբըն Գաբրիէլ նախ աւետէր Մարիամու
Վասըն խորհըրդոյ տնաւրէնութեանն անճառելոյ:
 
 
Տիրական ծնընդեանըն սպասաւորք դասք վերնոցն,
Րամեալք ընդ հովուացն տան Աստուծոյ` փա~ռք ի բարձունս:
 
 
Ցընծութեամբ տային նոյնք աւետիս իւղաբերիցն,
Ւիւծեալ մեռաւրէն տագնապէին ըզպահապանսն:
 
 
Փա~ռըք քեզ, Յիսո'ւս, արարող այսըր հաշտութեան,
Քեւ համաձայնեալ ընդ երկնայնոցն երգեմք ըզփառս:
 

[ՀԴ]
ՓՈԽ

 
Նոր տաւնիւս երկնաւորաց հրեշտակական դասուց
Եկայք ցընծասցուք, նոր ժողովուրդք, այսաւր:
 
 
Երջանիկ զուարճացելոցն յաւէտ` հոգւոցն սրբոց
Հաղորդք եղիցուք ուրախական երգով:
 
 
Րաբունեացն իմանալեաց հողեղինացս ազանց
Մատուսցուք բանիւ աղերսական նըւէր:
 
 
Սըրբազանք եւ երկնայինք աստուածամերձ հոգիք,
Քահանայապետք մըշտապաշտաւն բուրմամբ,
 
 
Էական բարւոյն պաղատեցէ'ք յաւէժ
Վասն եկեղեցւոյ մանկանց պահիլ անփորձ:
 
 
Սոսկալիք յերկաքանչիւրսն, մեզ աւգնական լերուք,
Բարեկամք բարիք եւ մարդասէր հոգիք:
 
 
Ի մարմնոյս լուծանելոյ հոգւոց կապից ժամու
Եւ ի վերըստին անլոյծ կապիլն անմահ,
 
 
Երեւեալ բարեկամացըդ զուարթագին տեսլեամբ,
Աւանդել զհոգիս մեր յարդարոց կայանս:
 
 
Անդր ի յարութեան, յորժամ փողով մեծաւ
Ժողովէք զընտրեալսն առ ի չորից հողմոց,
 
 
Յամպըս լուսաւորս ընկալարուք ըզմեզ`
Ընդ առաջ փըրկչին վերաբերիլ յերկինս:
 
 
Սըրբասաց ձայնիւ վերագոչեմք ընդ ձեզ,
Սուրբ հրեշտակապետք, զերեքսըրբեան նըւագս.
 
 
Բարեխաւսք եւ ի յայժմուս կենդանութեան լերուք`
Փըրկել յանցանաց պատուհասից զանձինս:
 
 
Այսաւր խոնարհեալ, ո'վ Միքայէլ յաղթող,
Մեծըդ Գաբրիէլ, մեզ տաւնակից լերուք,
 
 
Նոյնք եւ պահապանք յելս եւ ի մուտս եղեալք,
Ի յորոգայթից չար թըշնամւոյն փըրկել:
 
 
Սուրբ Երրորդութեանըն միշտ երգել ըզփառս
Այժմ եւ հանապազ եւ յաւիտեանս, ամէն:
 

[ՀԵ]
ՏԱՂ ԱՌԱՔԵԼՈՑՆ. Ի ՆԵՐՍԻՍԷ ԿԱԹՈՂԻԿՈՍԷ

 
Առաքեալք Աստուածորդւոյն
Ի ծոցոյ Հաւր առաքելոյն,
Բանաւոր հաւտից հովիւք,
Բանին կենաց պայծառ քարոզք:
 
 
Գեղեցիկ ոտք ընթացեալք,
Աւետաբերք խաղաղութեան,
Դատա որք Իսրայելին,
Աթոռակիցք Հաւր անդրանկին:
 
 
Երկնաւոր թագաւորին
Կարգեալ իշխանք տիեզերաց,
Զինուորեալք արիաբար
Ընդդէմ մահու չար իշխանին:
 
 
Էրկոտասանք նախակարգեալք,
Եաւթանասուն թիւ կատարեալք,
Ընտրեալք յառաջ ի սկզբանէ,
Սուրբք եւ մաքուրք յորովայնէ:
 
 
Թագաւորըք գումարեալք,
Յերկնաւորէն ի մարտ խըմբեալք,
Ժուժկալեալք ի պատերազմ,
Զոգիս մարդկան գերի առեալք:
 
 
Ի Սաղիմ քաղաք վեհին
Ձիւնափայլեալ սպիտակացեալք,
Լեզուաւք հրեղէն լուսաւորեալք,
Ի վերնատունն հոգիացեալք:
 
 
Խորհըրդոցն աստուածայնոց
Առատաբաշխ հազարապետք,
Ծընողք սըրբոյ աւազանաւն
Որդւոց մարդկան յորդիս լուսոյ:
 
 
Կըրկնաստեամբ կաթն արբուցէք
Տղայացելոցս առ ի Քրիստոս,
Հացիւ կենաց յերկնից իջեալ
Կերակրեցէք ըզկարաւտեալս:
 
 
Ձայնեցէք առ յիմարեալըս
Բարձրագոչ փողոյ հընչմամբ`
Ղամբարմամբ լուսոյ բանին
Գալ ի յարբումն իմաստութեան:
 
 
Ճըշմարիտ որթոյն ստեղունք
Եւ բարունակք ողկուզաբերք,
Մըշակին երկնաւորի
Յաւտմամբ խնամոց պըտղաբերեալք:
 
 
Յորդահոս գետոց գնացիւք
Քառավըտակ ի յԱդենայ
Նորակերտ քաղաքըն սուրբ
Առոգելով ուրախանայ:
 
 
Շնորհատուք հողեղինաց
Ձըրի պարգեւըս հրեղինաց,
Ունելով իշխանութիւն`
Թողուլ ըզմեղս երկրաւորաց:
 
 
Չար վիրաց աղ մորմոքիչք,
Մաքուր հոգւոց լուսաւորիչք,
Պարագլուխք պարուն վեհից
Ի միածնին Հաւր հարսանիս:
 
 
Ջուր կենդանի բըղխմամբ ի նոյն
Ի ծարաւի մեզ արբուցէք,
Ռետնիւ քաղցու բըժըշկական
Զհիւանդ բնութիւնս ողջացուցէք:
 
 
Սուրբ Հոգւոյն տաճարք մաքրեալք,
Իմաստութեամբ նորին լըցեալք,
Վարդապետք ի ձըկնորսաց
Եւ խորագէտք ի տըգիտաց:
 
 
Տանն Աստուծոյ տընտեսք բարի,
Վէմք պատուականք նոր Սիոնի,
Րաբունք հըմուտք վարդապետաց
Եւ ուսուցիչք հանճարեղաց:
 
 
Ցաւղով արեամբ ձերով յերկրի
Պըսակեցէք զեկեղեցի,
Ւիւսմամբ լուսոյ այսաւր տաւնի
Ըզյիշատակ ձեր պանծալի:
 
 
Փառաւք ըզձեզ պըսակողին
Փառք եւ պատիւ մատուցանեմք,
Քաւութիւն մեզ խընդրեցէք
Յառատաձիր պարգեւողէն:
 

[ՀԶ]
ՓՈԽ

 
Եկայք, զուարճացեալք, պայծառասցուք տաւնիւս,
Րաբունեաց մերոց աշակերտեալ մանկունք,
Գովասանական քաղցրաձայնիւ երգով
Սուրբ Երրորդութեանըն մատուսցուք նըւէր:
 
 
Աղերս մաղթանաց յիշատակի սոցա
Յուսոյն բոլորից Տեառն առաջի արկցուք,
Սոցին պաղատանք, որ վասըն մեր առ քեզ,
Եղիցին հաճոյ կամեցողիդ բարեաց:
 
 
Նորոգեա' ըզմեզ ի հնութենէ մեղաց,
Երկնային ցաւղովդ ըզծարաւիս արբո',
Րոտեա' միութեամբ ՚ստ առաքելոց դասուն
Սըրբութեան սիրով` որպէս ի վերնատունն:
 
 
Ի յահեղ աւուր քում գալըստեան մեծի
Սըրբոցն ընտրելոց արժանասցուք խըմբից,
Ի ձայն գոհութեան ընդ անդրանկաց գրելոց
Փառս վերահընչել Երրորդութեանըն միշտ:
 

[ՀԷ]
ՏԱՂ ՍՐԲՈՑ ՄԱՐԳԱՐԷԻՑՆ, Ի ՆԵՐՍԻՍԷ ԿԱԹՈՂԻԿՈՍԷ

 
Աստուածային խորոցն անճառ
Խորհըրդակից սուրբ մարգարէքն.
Բանիւ պատմողք յառաջագոյն
Զապագայիցն եղելութիւն:
 
 
Գաղտնի գործոց Աստուածորդւոյն
Տնաւրինական սուրբ խորհըրդոյն
Դաւանողք ամենեքեան
Բազմապատիկ աւրինակաւք:
 
 
Երեւեալն ի ջրոյ Մովսէս`
Գաւազանաւ զջուրսըն հերձող,
Զծնունդն ետես ըզկուսական
Ի մորենին անկիզական:
 
 
Էսսէածին արքայն Դաւիթ`
Հայր ըստ մարմնոյ Հաւր միածնին,
Ըզցաւղ հոսեալ վերայ գեղման`
Տըպաւորեաց Որդւոյ իջման:
 
 
Թագաւորաց աւծողն իւղով
Սամուէլ` պըտուղ ամլոյն գոլով,
Ժառանգ եղեւ նոր աւրինաց
Փոխան Հեղեայ հին աւրինաց:
 
 
Իսայիաս տայ մեզ նըշան
Ծնանիլ Կուսին առանց սերման,
Լըսող ձայնի սրովբէական,
Տեսող փառացն աստուածութեան:
 
 
Խըստամբերողըն Հեղիաս`
Երկնից փակողն եւ արձակողն,
Ծայրագոյն յերկրի ճըգնեալ,
Հրեղէն կառաւք յերկինս ելեալ:
 
 
Կըրկին Հոգւոյ նորին ստացող`
Եղիսէոս սուրբ տեսանող,
Համանըման վարդապետին
Զորդի այրւոյն յարուցանող:
 
 
Ձայնիւ պատմողն Եզեկիէլ
Զքառակերպեանըն քրովբէից,
Ղաւղեալ խորհուրդ բացայայտէ,
ԶԱւետարանըն ցուցանէ:
 
 
Ճըշմարիտըն ի յարգանդէ`
Երեմիաս կոյս մարգարէ,
Մեզ երեսաց հոգի ասէ
Զլոյսըն Քրիստոս, որ ի Հաւրէ:
 
 
Յայսոսիկ յեռեալ խըմբից
Երկոտասան մարգարէից
Նոյնաբար քարոզէին
Առ ի յերկիր զգալուստ Բանին:
 
 
Շնորհատու շնորհաց Հոգին
Գործի ստանայր զլեզուս նոցին,
Ուսուցանէր նոքաւք մարդկան
Զանճառ խորհուրդըն տէրունեան:
 
 
Չորրեակ դարին սկիզբն արարեալ
Յաբրահամեան սուրբ աւետեացն,
Պարառաբար պարագրելով,
Ի վեցերորդն աւարտելով:
 
 
Ջընջէր նոքաւք զխաւար հոգւոց
Յիսրայելեան ժողովըրդոց,
Ռահ գործէր ի յաւրինացն
ՅԱւետարանըն Քրիստոսի:
 
 
Սոփոնիաս եւ Անգէաս,
Ովսէ, Ամովս եւ Միքիաս,
Վեհագունին տիպըն Յովնան,
Յովէլ քարոզն եւ Աբդիաս,
 
 
Տեսանող Զաքարիաս`
Աւետաւորըն Սիոնի,
Րակերտեալ մեծն Ամբակում,
Նաւում հրեշտակ Մաղաքիաս,
 
 
Ցանկալին Գաբրիելի`
Հրաշից տեսողըն Դանիէլ,
Ւիւսեալ նորին վարուց մանկունքն,
Յորոց եւ հուրըն պատկառեաց:
 
 
Փառք են սոքա ազգի մարդկան,
Եւ լուսատուք տիեզերաց,
Քրիստոսի նախաքարոզք,
Որում պատիւ, փա~ռք յաւիտեանս:
 

[ՀԸ]
ՓՈԽ

 
Նորահրաշ տաւնիւս տեսանողացըն ցընծասցուք,
Ունակաց Հոգւոյն յիշատակաւ պայծառասցուք:
 
 
Երրաբուն Էին ծովածաւալ շնորհին հոսման
Զոգիս յարդարեալ ըստ ծարաւուտ երկրի յարբումն:
 
 
Րաբունւոյն էից Հոգւոյն Սըրբոյ աշակերտեալք
Ընտրեալ ի հովուաց, հովուէր սոքաւք զհինն Իսրայէլ:
 
 
Սըրբեալ մաքրութեամբ զիշխանական հոգւոյն իմաստ,
Տըպաւորելով ի նմա ըզլոյսն արփիական:
 
 
Էին անեղին անճառ խորոց խորհըրդագէտք,
Տեսլեամբ անմարմնոցըն հրեղինաց լուսաւորեալք:
 
 
Սոսկալի փառացն անհասութեան գոլով տեսողք,
Նոր այնու ստացան աչք գերազանց ունկն ի լըսել:
 
 
Ի ներկայ ժամու զապագայից տեսեալ զխորհուրդ,
Հոգին ծանուցեալ զանեղականսն իբրեւ զեղեալս:
 
 
Երկնաւորք յերկրի անճառելեացըն մեզ պատմողք:
Ամպանման հոսեալ զանձրեւ կենաց առ ծարաւիս:
 
 
Րամեալք ի Սիոն եկեղեցիք հեթանոսաց,
Տաւնեմք զաղբիւրացն Իսրայելի սուրբ զյիշատակ:
 
 
Գոչմամբ մաղթանաց մեղաւորացըս թողութիւն
Հայցեցէք առ Տէր, որում հանցուք փառք յաւիտեանս:
 

[ՀԹ]
ՏԱՂ ՀԱՄԱՒՐԷՆ ՍՈՒՐԲ ՀԱՅՐԱՊԵՏԱՑՆ, Ի ՆԵՐՍԷՍ ԿԱԹՈՂԻԿՈՍԷ ՀԱՅՈՑ

 
Այսաւր մայր Սիոն ցընծայ տաւնելով,
Բանայ զառագաստ, զարդարի փառաւք,
Գոչէ խընդութեամբ յաւր յիշատակի
Դասուց ընտրելոց սուրբ հայրապետաց,
Երջանիկ խըմբից սուրբ վարդապետաց:
Զաւրք երկնից ընդ մեզ տաւնակից լինին,
Էրկիրս երեւի երկնից վեհագոյն,
Ընդ իննեակ պարուց աստ պարագայից:
Թագաւորն երկնից փոխան իւր կարգեաց
Ժառանգս աթոռոց զքահանայապետս.
Ի Հոգւոյն Սըրբոյ լըցեալք գիտութեամբ
Լուսաւորեցին սուրբ զեկեղեցի,
Խորհըրդով ծանեան ըզխորս Աստուծոյ,
Ծանուցին բանիւ բանաւոր հաւտից.
 
 
Կենացըն հացի քաղցելոց բաշխողք,
Համեղաճաշակ գինւոյն մատըռուակք,
 
 
Ձայնիւ կոչեցին առ ի ճաշակել.
Ղաւղեաց յաշխարհէ մէգ տըգիտութեան:
Ճառագայթ լուսոյ յերկիր ծագեցէք,
Միածնին քարոզք ճըշմարիտ բանիւք
Յանմահ աղբիւրէն ըզմեզ արբուցէք,
Նոր նորոգելով հոգւով գիտութեամբ.
 
 
Շարժմամբ վըտակաց ի յորովայնից
Ուրախ արարէք զքաղաքս Աստուծոյ :
Չարին արմատոց տապալիչ տապարք,
Պարուց ոչխարաց հովիւք եւ տածողք,
Ջրով կենարարաւ սնուցողք ըզգառինս,
Ռահիւք ի յերկինս առաջնորդեցէք`
Սըրբելով զոգիս սուրբ աւազանաւն:
Վարդապետք բարիք բանիւ եւ գործով,
Տան եկեղեցւոյ տընտեսք իմաստունք,
Րաբունք կատարեալք տղայոց ի Քրիստոս,
Ցաւղեցէ'ք ստեամբ կաթն խառնեալ ընդ մեղու,
Ւիւթիւ Սուրբ Հոգւոյն ըզհինն եւ ըզնորս,
Փութացեալ ելէ'ք առ հովիւըն քաջ,
Քաւիչ մեզ լերուք բարեխաւսելով:
 

[Ձ]
ՓՈԽ

 
Նորոյ գինւոյն իմաստութեան
Յոգիս նորոգ արկող Յիսուս.
 
 
Երրախումբ միակին խորհուրդ
Անհաս ի հնումն նորոց պարգեւ:
 
 
Րենական լոյս յարփւոյն ծագեալ
Ի րաբունից փայլեալ յաշխարհս:
 
 
Սապէս ծով ու երկիր լըրիւ
Սոքաւք լըցեալ գիտութեամբ Տեառն:
 
 
Երգէ Դաւիթ` գետք Աստուծոյ
Ջրովք պարարին բըղխմամբ Հոգւոյն:
 
 
Սըմին նըման համբարձան գետք
Ի ջուրց բազմաց ձայն քարոզչաց:
 
 
Իմանալի գետոցս այս գնացք
Ուրախ առնեն զքաղաքըն սուրբ:
 
 
Եկայք, տածեալք ի ջրոյն կենաց,
Տընկեալք ի գաւիթս Աստուծոյ:
 
 
Րամեալք ի մի զմեզ տընկողացւ
Զտաւնս կատարեմք ի տանըն Տեառն:
 
 
Գոչեմք ընդ հարցն համաձայնեալ,
Զփառս համագոյ Երրորդութեանն:
 

[ՁԱ]
ՏԱՂ ՀԱՄԱՒՐԷՆ ՄԱՐՏԻՐՈՍԱՑ, ՏԵԱՌՆ ՆԵՐՍԷՍԻ

 
Արեգակն արդար ըզհուր սիրոյ ծագեալ,
Զանհաւատութեան սառըն հոգւոց հալեաց.
Բանաւոր ծառոց երեւեցան ծաղիկք,
Երփնազարդ գունով, անուշահոտ բուրմամբ:
 
 
Գարուն հոգեւոր դալարացոյց զոգիս,
Գաւսացեալ տընկոց կանաչացան սաղարթք,
Դրախտին Ադենայ ծառք բազմացան յերկրի,
Ի տանն Աստուծոյ արմաւենիք տընկեալք:
 
 
Երկնից լուսաւորքն իջեալ շըրջին ընդ մեզ,
Եւ աստեղք պայծառք` համաբնակից մարդկան,
Զաւրք անմարմնականք զըւարճացեալ տաւնեն,
Մարմնաւոր զա րաց համադասեալ նոցունց:
 
 
Էրեւեալ սըրբոցն ի հանդիսի ճըգանց
Զաւրացուցանել ի հոգեւոր մարտին,
Ըզհրաւէրս ետուն ի հարսանիսն երկնից,
Ընդ որս եւ մըտին արեաներանգ զգեստիւք:
 
 
Թագաւորն անմահ ի յաշխարհէ մահու
Առեալ իւր զինուորս, անմահացոյց բնութեամբ
Ժողով զինուորաց թագաւորին երկնից
Գրեցան` ժառանգել զԵրուսաղէմ վերինն:
 
 
Ի յերկրի ճըգնեալ չարչարանաւք մարմնոյ`
Ի յերկինս ելին գերապայծառ լուսով,
Լըւան զկենարար հովուապետին բարբառ,
Ընթացան ի յաղըն բանաւոր զենմունքն:
 
 
Խաչի եւ մահու ճանապարհի հովուին
Եղեն հետեւեալ ողջակիզեալ գառինքն,
Ծընան վերըստին աւազանաւ նորով,
Մըկըրտեալք արեամբ զբաժակ մահու արբին:
 
 
Կոյսք, իմաստութեամբ զլապտերս հոգւոց լուցեալք,
Կանացի բնութեամբ մահու եղեն յաղթողք,
Հուր սիրոյ յինքեան սուրբ փեսային վառեալք
Զհուր մեղաց բոցոյ զայն շիջուցին արեամբ:
 
 
Ձիւնափայլ զոգւոց ըզպատմուճանս լուացեալ,
Գոյն արեան մարմնոյ պըսակ փառաց ներկեալ,
Ղամբարմամբ լուսոյ ի յառագաստ մըտին,
Մաքուր հարսանեաւքն ուրախացան յաւէժ:
 
 
Ճըշմարիտ վըկայք Աստուածորդւոյն եղէք,
Վըկայեցելոյն Հաւր կամաւոր մահուամբ,
Միածնի Բանին մարմնով վասն իմ մահու
Մահակից գոլով չարչարանաց կըցորդ:
 
 
Յամենայն ազանց ընծայեցայք պըտուղ,
Մեծ քահանային երախայրեաց նըւէրք,
Նըռնենեաց նըման յետ գարնայնոյ ծաղկեալք,
 
 
Ծաղկեալ նըշենեաց ի յերկրորդին սկըզբանց:
 
 
Շարադրին շինուածք անդամըք ձեր հատեալ,
Աստիճանք ելից յերկրէ յերկինըս մեզ,
Ոտից ձեր հատմամբ մեզ ուղղեցէք շաւիղս,
Ձեռաց եւ մատանց ըզմեզ գրեցէք ի կեանս:
 
 
Չարաչար կիզմամբ ողջակիզեալ մարմնոյդ,
Ըզմեզ փըրկեցէք ի կիզանող բոցոյն,
Պատուական գըլուխք յաւդեալ ի գլուխն Յիսուս,
Ըզմեզ յաւդեցէք ընդ նոյն հիւսմամբ սիրոյ:
 
 
Ջախմամբ անդամոց ձեր ընդ սիրոյ նորին
Զհոգիս մեր յախտից բըժըշկեցէք ցաւոց
Ռահիւք յաշխարհէ հալածանաւքն ըզձեզ
Յաշխարհըն վերին բարձրացուցէք ըզմեզ:
 
 
Սոսկալի ճըգամբք սուրբ վըկայից քոց, Տէ'ր,
Ի հնութեան մեղաց վերնորոգեա' ըզմեզ.
Վիրաւք քերանաց եւ գազանաց քանցիւք
Ի թունից վիրաց չար վիշապին` փըրկեա':
 
 
Տարախիլ ունկամբքն եւ կուրութեամբ աչացն
Լո'յս ծագեա յոգիս եւ զլըսելիս մաքրեա'.
Րախճանից անձանց տըրտմականաց կըրիւք
Զմեզ ի սգոյ մեղաց յուրախութի'ւն դարձո:
 
 
Ցաւալից սըրտիւքն եւ խաւարին բանտիւքն
Ի լոյսն ընդ նոսին շնորհեա' եւ մեզ լինել,
Ւիւծմամբ անդամոցն ի կիզանող տապակս
Զբոց տապոյ մեղաց շիջո յոգւոյս մասանց:
 
 
Փառացն անճառից ընդ երջանիկ վըկայսն
Հաղորդ զմեզ ընկալ աղաչանաւք սոցա.
Քե'զ, ընդ երանեալ մարտիրոսաց դասուցն,
Փառաց թագաւո'ր, մատուցանեմք ըզփառս:
 

[ՁԲ]
ՓՈԽ

 
Բանիւ աւետաւոր բարառնաբար բարբառեսցուք
Առ քեզ, եկեղեցի', դուստըր վերինըն Սիոնի.
Աստեղս անթիւ ծընար գերապայծառս եւ երկնաճեմս,
Ձագս աղաւնակերպս թաթաւելով արեամբն իւրեանց:
 
 
Նըստիս յառագաստի սպիտակափայլ բոցոյ նըման,
Զոր կազմեցին քեզ քո որդիքն չարչարանաւք եւ սուրբ արեամբ,
Ի պարզ եւ գերազանց բնակես ի լոյս դու անմատոյց,
Փոխան խաւարային բանտից նոցա եւ կապանաց:
 
 
Վանել զքո զաւրութիւնդ ոչ կարացին դրունք դըժոխոց,
Զի փեսայն ընդ քո խաչեալ եւ հարսնորդիքն են խողխողեալ.
 
 
Կենացըն կերակրով եւ բաժակաւըն զուարճանաս,
Փոխան ժուժկալութեան նոցին քաղցի եւ ծարաւոյ:
 
 
Անմահ ունիս փեսայ, թէեւ սիրով քոյին մեռաւ,
Ի կեանս են եւ որդիք, թէեւ ետուր գերեզմանի,
Յանեղծ յաւիտենին բերկրեալ խընդաս երբեմն ամուլ,
Յորժամ բնակես ի տան մայր` քո որդւովք ուրախամիտ:
 
 
Սիրով անճառ կապիս ի սէր անմահ քո փեսային
Եւ զորդիս քո ընդգըրկես խանդակարաւտ սուրբ համբուրիւ,
Նորոգ նորափետուր լուսապայծառ յորժամ ծագիս,
Արեգական նըման յարքայութեան ըստ հրամանին:
 
 
Ի մի յարմարութիւն զոգդիս ընտրեալ քոց անդրանկաց,
Ժողովեա' բարեխաւսել ընդ կենդանեացըս փըրկութեան,
Նոյնաբար, որպէս ծընար լուսազարդեալ աւազանաւն,
Վերըստին զմեզ նորոգել ի հնութենէ մեղաց մերոց:
 
 
Երրեակ յաւիտենիւք շնորհել առատ զողորմութիւն
Յայժմուս եւ յապագայն ի յանըսպառ յաւիտենին,
Րամել ի մի լրութիւն կաթողիկէ վերնում Սիոն`
Ըզմեզ զամենեսեան ընդ երանեալ սուրբ վըկայիցն:
 
 
Սըրբել սպիտակափայլ ըզպատմուճան հոգւոց մերոց
Արեան նոցա հեղմամբ եւ հոտ անոյշ պատարագաւք,
Ի գլուխըն վերըստին ըզմեզ սիրով նորին յաւդել,
Զայրի եղեալ հոգիս ընդ փեսային միաւորել:
 
 
Սըրբել զարիւն գառանցս, նաեւ զաճիւն ողջակիզացս,
Երկրորդ տալ աւազան ի մաքրութիւն մեղաց մերոց.
Էին երրեակ միոյ պըսակելոց պըսակողին,
Որդւոյ ընդ Հաւր Հոգւով փառք ի յայժմուս եւ յապագայն:
 

[ՁԳ]
ՏԱՂ ԱՆՏՈՆԻ, ՏԵԱՌՆ ՆԵՐՍԻՍԻ ԱՍԱՑԵԱԼ

 
Անտոն սկիզբն երկնաւոր ճանապարհին,
Բիւրք առաջնորդեալք նովաւ առ Աստըւած`
Գանձին յագարակի ծածկելոյ գըտողք,
Դըռնապանք արթունք ի բախել փեսային:
Երջանիկ աղքատք հոգւովք եւ սգաւորք մարմնով,
Զոր ոչ արժէ աշխարհ հալածեալք յաշխարհէ,
Էրանեալ քաղցեալք ծարաւիք արդարութեան,
Ընդ նեղ մըտէք դուռն անձուկ ճանապարհաւս:
Թագաւորին Քրիստոսի զինուորք արիք,
Ժուժկալք ի պատերազմի թըշնամւոյն:
Ի յերկրի աղ անհամից նեխելոց մեղաւք,
Լոյսք աշխարհի խաւարելոց.
Խաչին Տեառըն բարձողք չարչարանաւք,
Ծառայք մըտերիմք կոչեցեալ բարիք,
Կըցորդք տըրտմականացըն կըրից փըրկչին,
Հաղորդք ուրախութեանց նորա.
Ձայնի սուրբ փեսային գալոյ սպասողք`
Ղամբարափայլ լապտերաւք հաւատոյ:
Ճարակողք զարաւտ կենաց ընտրեալ հաւտ փոքրիկ,
Մեռեալք աշխարհի եւ խաչեալք ընդ Տեառն.
Յայգի պատուիրանացըն մըտէք գործաւնեայք,
Նոյնք յուղղակի ակաւսոյն ոչ դարձեալք.
Շինողք աշտարակի աւրինացն ի կատարումն,
Ուռք ողկուզաբերք ճըշմարիտ որթոյն:
Չարչարանաւք ստացայք զանչարչարութիւն,
Պահեցէք նորոգ ըզպատկեր սկըզբնատըպին.
Ջըրով արտասուաց զանդըս մըտաց առոգելով`
Ռահիւք լուսոյ ի յերկինս ելէք.
Սըրբոցս քոց ընտրելոցս, Յիսո~ւս, մաղթանաւք
Վերելս ի սըրտի դընել ընդ սոսա տուր մեզ
Տիրական քոց ոտից հետեւել շաւղաց
Րաբունեաց մերոց ճանապարհաւ յերկինս:
Ցընծասցուք յիշատակաւ արդարոցս այսաւր,
Ւիւսեսցուք յոգիս զաւրինակ սոցա.
Փութասցուք ի յաւթեվանս ելանել սըրբոցս,
Քրիստոսի երգել ընդ նոսին միշտ ըզփառս:
 

[ՁԴ]
ՓՈԽ

 
Նոր դրախտին քո, Տէ'ր, զոր տընկեցեր յերկրի,
Վարդ անուշահոտ եւ մանիշակ քըրքում
Առեալ ընծայեմք քեզ, թագաւո'ր փառաց,
Գերապանծ ըզվարս աստուածայնոց արանց:
Բանաւոր ծառոց զերախայրեաց պըտուղս,
Անցեալ ընդ երկինս, քահանայիդ նուիրեմք,
Նոյն խունկ բուրուառաւք զաղաւթըս սուրբ սոցա
Ի հոտ անուշից մատուցանեմք քեզ, Տէ'ր:
Սոցին մաղթանաւք եւ մաքրական վարուք
Նորոգեա' զմեզ ի հնութենէ մեղաց,
Երանականացս արժանացո' դասուց,
Րամեա' ընդ նոսին զմեզ ի լուսոյ խորանսդ:
Սըրբեա' զխաւարին ի մէնջ զխորհուրդ մըտաց
Եւ լուսաւորեա' խընդըրուածաւք սոցա'
Սոցին հետեւել լուսաշաւիղ գնացից,
Ի յանճառելւոյդ արփիանալ լուսով,
Երգել ընդ նոսին Երրորդութեանդ ըզփառս:
 

[ՁԵ]
ՏԱՂ ՅՈՎՀԱՆՆՈՒ ՄԿՐՏՉԻՆ, Ի ՆԵՐՍԻՍԷ ԿԱԹՈՂԻԿՈՍԷ

 
Անմարմնոցըն հրեղինաց
Մարմնով հաղորդ սուրբ Յովհաննէս,
Բանին Հաւր բանիւ քարոզ,
Մեծի լուսոյն նախատեսող:
 
 
Գարնան գուշակ երկրի մերում,
Քաղցրախաւսիկ ձայն տատրակի,
Դրախտին հոգւոց աստուածատունկ
Առոգանող ջուր մաքրութեան:
 
 
Երկնաւորին ճանապարհի
Յառաջընթաց աւետաւոր,
Զաւրական թագաւորին
Նախամարտիկ յասպարիսին:
 
 
Էրեւմամբ Գաբրիելին
Զաքարիայ ի տաճարին,
Ընկալար ծնունդ աւետեաւք
Անուանագրեալ ի տախտակին:
 
 
Թափեցելոյն յանճառ փառաց,
Պարագրելոյն յարգանդ Կուսին,
Ժամանեցեր յողջոյն կենաց
Յամուլ ծերոյն յորովայնէ:
 
 
Ի բերանոյն բարբառելով
Զաւրհներգութիւն պըտղոյ Կուսին,
Լըցար Հոգւով Սուրբ անդըստին,
Ըստ աւետեացըն հրեշտակին:
 
 
Խայտալով յարգանդ ծընար,
Կաքաւելով կատարեցար,
Ծագեցար նախ արուսեակ
Արեգականն արդարութեան:
 
 
Կարապետ մեծ արքային
Եւ փեսաւէր սուրբ փեսային,
Հրաւիրող յառագաստին
Մաքուր զարդիւք պըճնեալ հարսին:
 
 
Ձայն բարբառոյ յանապատէ
Ի դադարել մարգարէիցն,
Ղեւտական քահանայիցն
Լըրումն եղեր ստուերականացն:
 
 
Ճրագդ աւրինացըն Մովսեսի,
Նըսեմացեալն Իսրայելի,
Մարգարէ եւ առաքեալ
Եւ մեծ ի ծնունդըս վըկայեալ:
 
 
Յանապատի վայրաբնակեալ,
Անմարմնական վարուք մաքրեալ,
Նոր Հեղիաս Հոգւով լըցեալ,
Կըրկին ազանց արձան կանգնեալ:
 
 
Շնորհաց նորոց ի քէն սկըսեալ,
Հին աւրինաց քեւ կատարեալ,
Որ ոչ լուծեր ըզխրացս ոտից
Տնաւրէնութեան սուրբ միածնին:
 
 
Չընաշխարհիկ մարդկան ցուցար,
Կոչմամբ Հոգւոյն երեւեցար,
Պապանձեալ լեզուին լուծող,
Եւ ամլութեան մաւրն արձակող:
 
 
Ջահըն լուսոյ յերկնից ծագեալ,
Երեսնամեայ յերկրի շըրջեալ,
Ռահ գործեալ ի Յորդանան`
Ի քէն հայցէր ջուր մաքրական:
 
 
Սոսկալի հոգեղինաց
Հուրն ի հողոյդ մաքրիւր ձեռաց,
Վըկայելով Բանին կենաց`
Լըւար ձայնին Հաւր ի բարձանց:
 
 
Տեսեր զՀոգին աղաւնակերպ
Յերկնից իջեալ առ զուգականն,
Րաբունւոյն աւանդեցեր
Վարդապետել զաշակերտեալսն:
 
 
Ցընծայ այսաւր եկեղեցի
Ի յիշատակ քո պանծալի,
Ւիւսէ պըսակ զարմանալի
Յոգնանըկար քեզ գովեստի:
 
 
Փա~ռք ամենայն առաքինեաց,
Նախապըսակ մարտիրոսաց,
Քահանայ բազմանըւէր,
Քաւիչ մեզ լեր հայցմամբ առ Տէր:
 

[ՁԶ]
ՓՈԽ

 
Բարբառոյն յանապատէ ձայնիւ տացուք նըւէր,
Արուսեկին արեւուն նախընթաց ծագողին:
 
 
Նոր հարսին հրաւիրողի առ երկնաւոր փեսայն,
Սա որ յարգանդէ ընտրեալ խայտաց ընդ առաջ Տեառն:
 
 
Այն որ մեծ ի ծնունդս կանանց Տէրըն վըկայեաց,
Յանաւրէն գինարբուսն խորհին մահ նըմա:
 
 
Սաւս երփնազարդ պըճնիւք կաքաւէր աղջիկն,
Նըւէր խընճոյից խընդրէր զարիւն արդարոյն:
 
 
Վարձ կաքաւելոյն առեալ ըզգլուխ քարոզչին,
Առ գլուխըն Քրիստոս յաւդեալ գըլուխ Մըկըրտչին:
 
 
Գերեալ ի դըժոխս հոգւոցն աւետէր Հոգւովն.
_ Ե'ս մըկըրտեցի զաւծեալն, որում սպասէիք:
 
 
Ադամ նախաստեղծ, զարթի'ր, արի, որ նընջեսդ,
Լուսատու լիցի Քրիստոս քեզ ի խաւարիդ:
 
 
Ի յամլորդւոյս ընկա'լ, Եւա, զաւետիս`
Նոր Ադամ ծընաւ քո դուստրն` կոյսըն Մարիամ:
 
 
Ես յառաջընթաց նըմին յաշխարհ կենդանեաց
Րահիս ի ստորին վայրիս նոյն կարապետեմ:
 
 
Սա խաչիւ մահու գայ աստ, ազատէ զգերեալսն,
Ի սոյն ցընծասցուք եւ մեք աւետեաց յուսով:
 
 
Սուրբ յիշատակաւ սըրբոյս փա~ռք երրեակ անձանց,
Երիցն ի միում բնութեան այժմ եւ յաւիտեանս:
 

[ՁԷ]
ՏԱՂ ՈՐԴՒՈՑՆ ՈՐՈՏՄԱՆ, Ի ՆԵՐՍԷՍ ԿԱԹՈՂԻԿՈՍԷ ԱՍԱՑԵԱԼ

 
Որդիքն Որոտման, որք ի վերուստ որոտացին,
Յամպոց հրեղինաց հողմով Հոգւոյն հընչեալ յաշխարհս:
 
 
Յաշխարհ ծարաւուտ զանձրեւ կենաց հոսեալ յերկնից,
Զերկիր բանաւոր առոգելով առատապէս:
 
 
Առատավըտակ գետոց բըղխումն ի յԱդենայ,
Չորրորդն Եփրատէս նըշանակէր ըզՅովհաննէս:
 
 
Յովհաննէս` սիրող սիրեցելոյն առ ի Հաւրէ,
Անկեալ ըզլանջաւքն եւ ոչ կիզաւ յահեղ բոցոյն:
 
 
Բոցով բորբոքեալ անձկակարաւտ տարփմամբ սիրոյ,
Ճեպիւր փոյթընթաց ի գերեզման յարուցելոյն:
 
 
Յարուցեալն յայտնիւր առ ծովակին Տիբերական,
Ծանեաւ սիրեցեալն, աղաղակէր, թէ` այն է Տէրն:
 
 
Տէրըն հրաւիրէր զՊետրոս ըզկնի իւր հետեւել,
ԶՅովհաննու ասէր. «Զի թէ կամիմ` կեցցէ ի սպառե:
 
 
Ի սպառ սիրեաց զսէրն եւ սիրեցաւ անզուգապէս,
Զոյգ եւ հարազատըն Յակոբոս մաքրեալ անձամբ:
 
 
Յանձն առին ըմպել զբաժակ մահու կենարարին,
Մըկըրտեալ արեամբ, զոր ընկալաւ Տէրն ի խաչին:
 
 
Ի խաչին ըզմայրըն սիրելւոյն իւր աւանդէր,
Շնորհիւ դաւանէր ըզնա Որդի սըրբոյ Կուսին:
 
 
Զկոյսըն Մարիամ առեալ յինքեան սպասաւորէր,
Մինչեւ ի Փոխումն յիմանալեացըն կայարանս:
 
 
Կացեալ յաշխարհի քարոզ բանին ճըշմարտութեան,
Աւետեաց ձայնիւ գոչէր ըզկենդանի ըզԲանն:
 
 
Բանն որ էր Աստուած ի սկըզբանէ առ Աստուած Հայր,
Ծընունդ միշտ Էին, որով եղեն գոյք յանգոյից:
 
 
Գոչումն որոտմանցն յետ հոսելոյն զանձրեւ կենաց,
Ամփոփեալ յերկինս առ առաքողն անդրէն դարձան:
 
 
Յակոբոս վըկայ վաղահասուկ տընկոյն պըտուղ,
Ի Հերովդիայ զբաժակ մահու արեան արբեալ:
 
 
Արբ եւ Յովհաննէս` թէ ոչ զարեանն, այլ ըզսիրոյ,
Որով հետեւեաց իշխանաբար առ բաղձալին:
 
 
Ի բաղձալին լոյս արփիական փափագեցին,
Զոր տեսին աչաւք ի սուրբ լերինն Թաբաւրական:
 
 
Ի լեառըն սիոն վերասլացեալ ելին փառաւք,
Յանդրանկաց կայանս, ուր անդրանիկն է մեռելոց:
 
 
Մեռելոց լերուք եւ կենդանեաց միշտ բարեխաւս`
Տալ ըզքաւութիւն եւ ըզպարգեւս ողորմութեան:
 
 
Որ ողորմութեամբ շինեաց զաշխարհս բանն Աստըւած,
Տացուք նմա ընդ Հաւր եւ Սուրբ Հոգւոյն զփառս յաւիտեան:
 

[ՁԸ]
ՓՈԽ

 
Նոր լոյս յարփենւոյն առեալ Որդիքն Որոտման,
Որդւոց Սիոնի ծագեն Աւետարանաւն:
 
 
Եդեմեան վըտակ բըղխեն յերկիր ծարաւուտ,
Ծառքըն Տեառն ըմպեն յամպոց զանձրեւըն կենաց:
 
 
Րաբունն երկնաւոր յաւտեալ զորթըն հոգեւոր,
Զուռս ի նոյն հաստեալ սըրբեաց լինել պըտղաբեր:
 
 
Սիրելիք սիրոյն զբաժակն ըմպել խոստացան,
Մըկըրտել արեամբ ընդ նոյն կամաւ յանձն առին:
 
 
Էն ի միշտ Էէն ծընեալն մարմնով ծընանի,
Զոր քարոզք Բանին տեսին եւ շաւշափեցին:
 
 
Սիրատարփ զլանջաւքն անկեալ կիզանող բոցոյն,
Զոր եւ ի լերինն Թաբաւր տեսեալ թըմբրեցան:
 
 
Ի մակադրութիւն անուանց վերապատուեցան,
Յորդւոց Զեբեդեայ փոխեալ յՈրդիսն Որոտման:
 
 
Եւս ի բարձրագոյն ելեալ որդի կուսական,
Էութեան Բանին պատմող գոլ աստուածաբան:
 
 
Րենական լուսով լըցին զաշխարհս ամենայն,
Անձկալի հոգւով առ նոյն վերափոխեցան:
 
 
Գովել զըստեղծողն էից զԲանըն ծանուցին,
Որում եւ տացուք ըզփառս ընդ Հաւր եւ Հոգւոյն:
 

[ՁԹ]
ՏԱՂ ՍՐԲՈՅՆ ՍՏԵՓԱՆՈՍԻ ՆԱԽԱՎԿԱՅԻ, ՏԵԱՌՆ ՆԵՐՍԷՍԻ ԿԱԹՈՂԻԿՈՍԻ

 
Ի խաչին տընկեալ որթոյն
Ողկոյզ վաղահաս խայծեալ,
Քարամբըք ճըմլեալ գինի
Ուրախարար սիրով:
 
 
Սէր սիրոյ սերման ծընունդ,
Սիրաբողբոջ բուսոյ ծաղիկ,
Պըտուղ քաղցրահամ ճաշակ
Հրեշտակատիպ տեսիլ:
 
 
Տեսանող Էին լուսոյ
Անտեսին Հաւր ի բարձունս.
Այլեւ ծոցածին Բանին
Անեղին եղեալ երբին:
 
 
Երբեմն անեղին առեալ
Սկիզբն եղականի բնութեանս,
Զոր եւ տեսեալ վըկայն
Յերկինըս բազմեալ փառաւք:
 
 
Փառաց թագաւորն երկնից
Յայտնեալ զինուորին յերկրի.
_ Ի յասպարիսիդ վասն իմ
Դու մի' երկընչիր,_ ասէ:
 
 
Ասէր աղաղակելով
Առ տիրասպանիցն հանդէս.
_ Ահա տեսանեմ զՅիսուս
Հաւր ընդ աջմէ նըստեալ:
 
 
Նըստեալն յառնէր ցուցանել
Վերին հրեղինաց դասուցն.
_ Տեսէ'ք զհողեղէն բնութիւնն
Վասն իմ չարչարեալ նըման:
 
 
Նըման խաչելոյն հայցէր
Թողութիւն ըսպանողացն,
Որով կոչեցեալ Սաւղոս
Սորին հետեւեալ ոտից:
 
 
Ոտիւք սըլացեալ յերկինս
Ի ձեռըս քո, ասէ,
Յիսո'ւս, աւանդեմ զհոգիս
Մինչեւ ի գալուստ քո սուրբ:
 
 
Սուրբըդ Ստեփանոս պըսակ
Եւ նախամարտիկ վըկայ,
Վասըն տաւնողացըս քո
Լեր միշտ բարեխաւս առ Տէր:
 

[Ղ]
ՓՈԽ

 
Նոր ծառոյն կենաց աստուածատունկ դրախտին,
Ծաղիկ նախածին փըթթեալ բուրմամբ անուշից,
Պըտղաբերելով զսուրբն Ստեփանոս:
 
 
Արեւն ամփոփեալ ի ծոց ծագողին զարեւ,
Աստղ համապայծառ ծագեալ փոխան լուսատու,
Յարփենւոյն կենաց, սուրբըն Ստեփանոս:
 
 
Խաչին խաղողոյ զիմաստութեան բաժակն
Մանկանց Սիոնի նորոյ ի յուրախութիւն
Մատըռուակելով, սուրբըն Ստեփանոս:
 
 
Անմահին մահու նոյն մահակից գոլով,
Ըզմահ մեռուցեալ մահուամբ ըստ կենարարին
Քարկոծ խողխողմամբ, սուրբըն Ստեփանոս:
 
 
Վըկայ խաչելոյն անմահութեան կենաց,
ԶՈրդի տեսանեմ մարմնով ընդ աջմէ բարձրելոյն,
Աղաղակելով գոչէր, սուրբըն Ստեփանոս:
 
 
Կացեալ յատենի վասն ոչխարին իւր, գառն
Որոջ վայելուչ կըտրեալ գեղմըն լուսակիզն
Հրէական ձեռաւք, սուրբըն Ստեփանոս:
 
 
Առ Տէրըն փառաց աղաւթելով նըման
Ծունըր մաղթանաւք նուիրէր չհամարել ըզմեղս
Ապերախտ ազգին, սուրբըն Ստեփանոս:
 
 
Յաւանդ առ Յիսուս զհոգին տըւեալ նորուն,
Փառաց ընկալեալ պըսակ ըզյաղթանակաց,
Յաղթողն ի մարտի, սուրբըն Ստեփանոս:
 
 
Նախասարկաւագ եւ առաջին վըկայ
Ստեփանո'ս, պըսակ շնորհաց զքեզ պըսակողին,
Լեր միշտ բարեխաւս զմեզ կեցուցանել:
 
 
Էին միայնոյ երրակ եւ մի լուսոյն
Մատուսցուք յաւէտ ըզփառս ի յիշատակի
Նախավըկային, յաւէտ յաւիտեանս, ամէն: