Читать книгу: «Акафистник»
5-е издание, исправленное
Рекомендовано к публикации Издательским советом Русской Православной Церкви
ИС Р15-545-3692
Тексты всех акафистов настоящего издания соответствуют текстам, полученным из Издательского совета Русской Православной и рекомендованным к публикации
© Сретенский монастырь, 2015
Акафист
Сладчайшему Господу нашему Иисусу Христу
Кондак 1
Взбра́нный Воево́до и Го́споди, а́да победи́телю, я́ко изба́влься от ве́чныя сме́рти, похва́льная воспису́ю Ти, созда́ние и раб Твой; но я́ко име́яй милосе́рдие неизрече́нное, от вся́ких мя бед свободи́, зову́ща: Иису́се, Сы́не Бо́жий, поми́луй мя.
Икос 1
А́нгелов Тво́рче и Го́споди сил, отве́рзи ми недоуме́нный ум и язык на похвалу́ пречи́стаго Твоего и́мене, я́коже глухо́му и гугни́вому дре́вле слух и язы́к отве́рзл еси́, и глаго́лаше зовы́й такова́я: Иису́се пречу́дный, а́нгелов удивле́ние; Иису́се преси́льный, прароди́телей избавле́ние. Иису́се пресла́дкий, патриа́рхов велича́ние; Иису́се пресла́вный, ве́рных укрепле́ние. Иису́се прелюби́мый, проро́ков исполне́ние; Иису́се преди́вный, му́чеников кре́посте. Иису́се прети́хий, мона́хов ра́досте; Иису́се преми́лостивый, пресви́теров сла́досте. Иису́се премилосе́рдый, по́стников воздержа́ние; Иису́се пресла́достный, преподо́бных ра́дование. Иису́се пречестны́й, де́вственных целому́дрие; Иису́се предве́чный, гре́шников спасе́ние. Иису́се, Сы́не Бо́жий, поми́луй мя.
Кондак 2
Ви́дя вдови́цу зе́льне пла́чущую, Го́споди, я́коже тогда́ умилосе́рдився, сы́на ея́ на погребе́ние несо́ма воскреси́л еси́: си́це и о мне умилосе́рдися, Человеколю́бче, и греха́ми умерщвле́нную мою́ ду́шу воскреси́, зову́щую: Аллилу́иа.
Икос 2
Ра́зум неуразуме́нный разуме́ти Фили́пп ища́: «Го́споди, покажи́ нам Отца́», – глаго́лаше; Ты же к нему́: «Толи́кое вре́мя сый со Мно́ю, не позна́л ли еси́, я́ко Оте́ц во Мне, и Аз во Отце́ есмь?» Те́мже, Неизсле́дованне, со стра́хом зову́ Ти: Иису́се, Бо́же предве́чный; Иису́се, Царю́ преси́льный. Иису́се, Влады́ко долготерпели́вый; Иису́се, Спа́се преми́лостивый. Иису́се, храни́телю мой преблаги́й; Иису́се, очи́сти грехи́ моя́. Иису́се, отыми́ беззако́ния моя́; Иису́се, отпусти́ непра́вды моя́. Иисусе, наде́ждо моя́, не оста́ви мене́; Иису́се, помо́щниче мой, не отри́ни мене́. Иису́се, Созда́телю мой, не забу́ди мене́; Иису́се, Па́стырю мой, не погуби́ мене́. Иису́се, Сы́не Бо́жий, поми́луй мя.
Кондак 3
Си́лою свы́ше апо́столы облеки́й, Иису́се, во Иерусали́ме седя́щия, облецы́ и мене́, обнаже́ннаго от вся́каго благотворе́ния, теплото́ю Ду́ха Свята́го Твое́го и даждь ми с любо́вию пе́ти Тебе́: Аллилу́иа.
Икос 3
Име́яй бога́тство милосе́рдия, мытари́, и гре́шники, и неве́рныя призва́л еси́, Иису́се; не пре́зри и мене́ ны́не, подо́бнаго им, но я́ко многоце́нное ми́ро, приими́ песнь сию́: Иису́се, си́ло непобеди́мая; Иису́се, ми́лосте безконе́чная. Иису́се, красото́ пресве́тлая; Иису́се, любы́ неизрече́нная. Иису́се, Сы́не Бо́га жива́го; Иису́се, поми́луй мя гре́шнаго. Иису́се, услы́ши мя, в беззако́ниих зача́таго; Иису́се, очи́сти мя, во гресе́х рожде́ннаго. Иису́се, научи́ мя, непотре́бнаго; Иису́се, освети́ мя, те́мнаго. Иису́се, очи́сти мя, скве́рнаго; Иису́се, возведи́ мя, блу́днаго. Иису́се, Сы́не Бо́жий, поми́луй мя.
Кондак 4
Бу́рю внутрь име́яй помышле́ний сумни́тельных, Петр утопа́ше; узре́в же во пло́ти Тя су́ща, Иису́се, и по вода́м ходя́ща, позна́ Тя Бо́га и́стиннаго, и ру́ку спасе́ния получи́в, рече́: Аллилу́иа.
Икос 4
Слы́ша слепы́й мимоходя́ща Тя, Го́споди, путе́м, вопия́ше: «Иису́се, Сы́не Дави́дов, поми́луй мя!» И, призва́в, отве́рзл еси́ о́чи его́. Просвети́ у́бо ми́лостию Твое́ю о́чи мы́сленныя се́рдца и мене́, вопию́ща Ти и глаго́люща: Иису́се, вы́шних Созда́телю; Иису́се, ни́жних искупи́телю. Иису́се, преиспо́дних потреби́телю; Иису́се, всея тва́ри украси́телю. Иису́се, души́ моея́ уте́шителю; Иису́се, ума́ моего́ просвети́телю. Иису́се, се́рдца моего́ весе́лие; Иису́се, те́ла моего́ здра́вие. Иису́се, Спа́се мой, спаси́ мя; Иису́се, Све́те мой, просвети́ мя. Иису́се, му́ки вся́кия изба́ви мя; Иису́се, спаси́ мя недосто́йнаго. Иису́се, Сы́не Бо́жий, поми́луй мя.
Кондак 5
Богото́чною Кро́вию я́коже искупи́л еси́ нас дре́вле от зако́нныя кля́твы, Иису́се, си́це изми́ нас от се́ти, е́юже змий запя́т ны страстьми́ плотски́ми, и блу́дным наважде́нием, и злым уны́нием, вопию́щия Ти: Аллилу́иа.
Икос 5
Ви́девше о́троцы евре́йстии во о́бразе челове́честем созда́вшаго руко́ю челове́ка, и Влады́ку разуме́вше Его́, потща́шася ве́твьми угоди́ти Ему́, оса́нна вопию́ще. Мы же песнь прино́сим Ти, глаго́люще: Иису́се, Бо́же и́стинный; Иису́се, Сы́не Дави́дов. Иису́се, Царю́ пресла́вный; Иису́се, А́гнче непоро́чный. Иису́се, Па́стырю преди́вный; Иису́се, храни́телю во мла́дости мое́й. Иису́се, корми́телю во ю́ности мое́й; Иису́се, похвало́ в ста́рости мое́й. Иису́се, наде́ждо в сме́рти мое́й; Иису́се, животе́ по сме́рти мое́й. Иису́се, утеше́ние мое́ на суде́ Твое́м; Иису́се, жела́ние мое́, не посрами́ мене́ тогда́. Иису́се, Сы́не Бо́жий, поми́луй мя.
Кондак 6
Пропове́дник богоно́сных веща́ние и глаго́лы исполня́я, Иису́се, на земли́ я́влься и с челове́ки невмести́мый пожи́л еси́, и боле́зни на́ша подъя́л еси́; отню́дуже ра́нами Твои́ми мы исцеле́вше, пе́ти невыко́хом: Аллилу́иа.
Икос 6
Возсия́ вселе́нней просвеще́ние и́стины Твоея́, и отгна́ся лесть бесо́вская: и́доли бо, Спа́се наш, не терпя́ще Твоея́ кре́пости, падо́ша. Мы же, спасе́ние получи́вше, вопие́м Ти: Иису́се, и́стино, лесть отгоня́щая; Иису́се, све́те, превы́шший всех све́тлостей. Иису́се, Царю́, премога́яй всех кре́пости; Иису́се, Бо́же, пребыва́яй в ми́лости. Иису́се, хле́бе живо́тный, насы́ти мя а́лчущаго; Иису́се, исто́чниче ра́зума, напо́й мя жа́ждущаго. Иису́се, оде́ждо весе́лия, оде́й мя тле́ннаго; Иису́се, покро́ве ра́дости, покры́й мя недосто́йнаго. Иису́се, пода́телю прося́щим, даждь ми плач за грехи́ моя́; Иису́се, обре́тение и́щущим, обря́щи ду́шу мою́. Иису́се, отве́рзителю толку́щим, отве́рзи се́рдце мое́ окая́нное; Иису́се, искупи́телю гре́шных, очи́сти беззако́ния моя́. Иису́се, Сы́не Бо́жий, поми́луй мя.
Кондак 7
Хотя́ сокрове́нную та́йну от ве́ка откры́ти, я́ко овча́ на заколе́ние веде́н был еси́, Иису́се, и я́ко а́гнец пря́мо стригу́щаго его́ безгла́сен, и я́ко Бог из ме́ртвых воскре́сл еси́, и со сла́вою на небеса́ возне́слся еси́, и нас совоздви́гл еси́, зову́щих: Аллилу́иа.
Икос 7
Ди́вную показа́ тварь явле́йся Творе́ц нам: без се́мене от Де́вы воплоти́ся, из гро́ба, печа́ти не руши́в, воскре́се и ко апо́столом, две́рем затворе́нным, с пло́тию вни́де. Те́мже чудя́щеся, воспои́м: Иису́се, сло́ве необыме́нный; Иису́се, сло́ве несогляда́емый. Иису́се, си́ло непостижи́мая; Иису́се, му́дросте недомы́слимая. Иису́се, Божество́ неопи́санное; Иису́се, госпо́дство неисче́тное. Иису́се, ца́рство непобеди́мое; Иису́се, влады́чество безконе́чное. Иису́се, кре́посте высоча́йшая; Иису́се, вла́сте ве́чная. Иису́се, Тво́рче мой, уще́дри мя; Иису́се, Спа́се мой, спаси́ мя. Иису́се, Сы́не Бо́жий, поми́луй мя.
Кондак 8
Стра́нно Бо́га вочелове́чшася ви́дяще, устрани́мся су́етнаго ми́ра и ум на Боже́ственная возложи́м. Сего́ бо ра́ди Бог на зе́млю сни́де, да нас на небеса́ возведе́т, вопию́щих Ему́: Аллилу́иа.
Икос 8
Весь бе в ни́жних, и вы́шних ника́коже отступи́, неисче́тный, егда́ во́лею нас ра́ди пострада́, и сме́ртию Свое́ю на́шу смерть умертви́, и воскресе́нием живо́т дарова́ пою́щим: Иису́се, сла́досте серде́чная; Иису́се, кре́посте теле́сная. Иису́се, све́тлосте душе́вная; Иису́се, быстрото́ у́мная. Иису́се, ра́досте со́вестная; Иису́се, наде́ждо изве́стная. Иису́се, па́мяте предве́чная; Иису́се, похвало́ высо́кая. Иису́се, сла́во моя́ превознесе́нная; Иису́се, жела́ние мое́, не отри́ни мене́. Иису́се, Па́стырю мой, взыщи́ мене́; Иису́се, Спа́се мой, спаси́ мене́. Иису́се, Сы́не Бо́жий, поми́луй мя.
Кондак 9
Все естество́ а́нгельское безпреста́ни сла́вит пресвято́е и́мя Твое́, Иису́се, на небеси́, Свят, Свят, Свят вопию́ще; мы же, гре́шнии, на земли́ бре́нными устна́ми вопие́м: Аллилу́иа.
Икос 9
Вети́и многовеща́ннии, я́коже ры́бы безгла́снии, ви́дим о Тебе́, Иису́се, Спа́се наш: недоуме́ют бо глаго́лати, ка́ко Бог непрело́жный и Челове́к соверше́нный пребыва́еши? Мы же, та́инству дивя́щеся, вопие́м ве́рно: Иису́се, Бо́же предве́чный; Иису́се, Царю́ ца́рствующих. Иису́се, Влады́ко владе́ющих; Иису́се, Судие́ живы́х и ме́ртвых. Иису́се, наде́ждо ненаде́жных; Иису́се, утеше́ние пла́чущих. Иису́се, сла́во ни́щих; Иису́се, не осуди́ мя по дело́м мои́м. Иису́се, очи́сти мя по ми́лости Твое́й; Иису́се, отжени́ от мене́ уны́ние. Иису́се, просвети́ моя мы́сли серде́чныя. Иису́се, даждь ми па́мять сме́ртную. Иису́се, Сы́не Бо́жий, поми́луй мя.
Кондак 10
Спасти́ хотя́ мир, Восто́че восто́ком, к те́мному за́паду – естеству́ на́шему прише́д, смири́лся еси́ до сме́рти; те́мже превознесе́ся и́мя Твое́ па́че вся́каго и́мене, и от всех коле́н небе́сных и земны́х слы́шиши: Аллилу́иа.
Икос 10
Царю́ Предве́чный, Уте́шителю, Христе́ И́стинный, очи́сти ны от вся́кия скве́рны, я́коже очи́стил еси́ де́сять прокаже́нных, и исцели́ ны, я́коже исцели́л еси́ сребролюби́вую ду́шу Закхе́а мытаря́, да вопие́м Ти, во умиле́нии зову́ще: Иису́се, сокро́вище нетле́нное; Иису́се, бога́тство неистощи́мое. Иису́се, пи́ще кре́пкая; Иису́се, питие́ неисчерпа́емое. Иису́се, ни́щих оде́яние; Иису́се, вдов заступле́ние. Иису́се, си́рых защи́тниче; Иису́се, тружда́ющихся по́моще. Иису́се, стра́нных наста́вниче; Иису́се, пла́вающих ко́рмчий. Иису́се, бу́рных оти́шие; Иису́се Бо́же, воздви́гни мя па́дшаго. Иису́се, Сы́не Бо́жий, поми́луй мя.
Кондак 11
Пе́ние всеумиле́нное приношу́ Ти, недосто́йный, вопию́ Ти, я́ко ханане́а: Иису́се, поми́луй мя: не дщерь бо, но плоть и́мам, страстьми́ лю́те беся́щуюся и я́ростию пали́мую, и исцеле́ние даждь вопию́щу Ти: Аллилу́иа.
Икос 11
Светопода́тельна свети́льника су́щим во тьме неразу́мия, пре́жде гоня́й Тя Па́вел, богоразу́мнаго гла́са си́лу внуши́ и душе́вную быстроту́ уясни́; си́це и мене́ те́мныя зе́ницы душе́вныя просвети́, зову́ща: Иису́се, Царю́ мой прекре́пкий; Иису́се, Бо́же мой преси́льный. Иису́се, Го́споди мой пребезсме́ртный; Иису́се, Созда́телю мой пресла́вный. Иисусе, Наста́вниче мой предо́брый; Иису́се, Па́стырю мой преще́дрый. Иису́се, Влады́ко мой преми́лостивый; Иису́се, Спа́се мой премилосе́рдый. Иису́се, просвети́ моя́ чу́вствия, потемне́нная страстьми́; Иису́се, исцели́ мое́ те́ло, острупле́нное грехми́. Иису́се, очи́сти мой ум от по́мыслов су́етных; Иису́се, сохрани́ се́рдце мое́ от по́хотей лука́вых. Иису́се, Сы́не Бо́жий, поми́луй мя.
Кондак 12
Благода́ть пода́ждь ми, всех долго́в реши́телю, Иису́се, и приими́ мя ка́ющася, я́коже прия́л еси́ Петра́, отве́ргшагося Тебе́, и призови́ мя уныва́ющаго, я́коже дре́вле Па́вла, гоня́ща Тя, и услы́ши мя, вопию́ща Ти: Аллилу́иа.
Икос 12
Пою́ще Твое вочелове́чение, восхваля́ем Тя вси, и ве́руем со Фомо́ю, я́ко Госпо́дь и Бог еси́, седя́й со Отце́м и хотя́й суди́ти живы́м и ме́ртвым. Тогда́ у́бо сподо́би мя десна́го стоя́ния, вопию́щаго: Иису́се, Царю́ предве́чный, поми́луй мя; Иису́се, цве́те благово́нный, облагоуха́й мя. Иису́се, теплото́ люби́мая, огре́й мя; Иису́се, хра́ме предве́чный, покры́й мя. Иису́се, оде́ждо све́тлая, украси́ мя; Иису́се, би́сере честны́й, осия́й мя. Иису́се, ка́меню драги́й, просвети́ мя; Иису́се, со́лнце пра́вды, освети́ мя. Иису́се, све́те святы́й, облиста́й мя; Иису́се, боле́зни душе́вныя и теле́сныя изба́ви мя. Иису́се, из руки́ сопроти́вныя изми́ мя; Иису́се, огня́ негаси́маго и про́чих ве́чных мук свободи́ мя. Иису́се, Сы́не Бо́жий, поми́луй мя.
Кондак 13
О пресла́дкий и всеще́дрый Иису́се! Приими́ ны́не ма́лое моле́ние сие́ на́ше, я́коже прия́л еси́ вдови́цы две ле́пте, и сохрани́ достоя́ние Твое́ от вра́г ви́димых и неви́димых, от наше́ствия иноплеме́нник, от неду́га и гла́да, от вся́кия ско́рби и смертоно́сныя ра́ны, и гряду́щия изми́ му́ки всех, вопию́щих Ти: Аллилу́иа.
Этот кондак читается трижды, затем 1-й икос: «А́нгелов Тво́рче…» и 1-й кондак: «Возбра́нный Воево́до…»
Молитва
Влады́ко Го́споди Иису́се Христе́ Бо́же мой, И́же неизрече́ннаго ра́ди Твоего́ человеколю́бия на коне́ц веко́в во плоть оболки́йся от Присноде́вы Мари́и, сла́влю о мне Твое́ спаси́тельное промышле́ние, раб Твой, Влады́ко; песносло́влю Тя, я́ко Тебе́ ра́ди Отца́ позна́х; благословлю́ Тя, Его́же ра́ди и Дух Святы́й в мир прии́де; покланя́юся Твое́й по пло́ти Пречи́стей Ма́тери, такове́й стра́шней та́йне послужи́вшей; восхваля́ю Твоя́ а́нгельская ликостоя́ния, я́ко воспева́тели и служи́тели Твоего́ вели́чествия; ублажа́ю Предте́чу Иоа́нна, Тебе́ крести́вшаго, Го́споди; почита́ю и провозвести́вшия Тя проро́ки, прославля́ю апо́столы Твоя́ святы́я; торжеству́ю же и му́ченики, свяще́нники же Твоя́ сла́влю; покланя́юся преподо́бным Твои́м, и вся Твоя́ пра́ведники пе́стунствую. Такова́го и толи́каго мно́гаго и неизрече́ннаго ли́ка божестве́ннаго в моли́тву привожду́ Тебе́, всеще́дрому Бо́гу, раб Твой, и сего́ ра́ди прошу́ мои́м согреше́нием проще́ния, е́же да́руй ми всех Твои́х ра́ди святы́х, изря́днее же святы́х Твои́х щедро́т, я́ко благослове́н еси́ во ве́ки. Ами́нь.
Акафист
Воскресению Христову
Кондак 1
Взбра́нный Воево́до, Го́споди небесе́ и земли́, побе́дно благода́рственное пе́ние прино́сим Тебе́, раби́ Твои́, во ад ны́не сше́дшему и с Собо́ю вся воскреси́вшему, и на́ше избавле́ние пра́зднующе, све́тло вопие́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 1
А́нгел Госпо́день, в ве́чер суббо́тний в тру́се ве́лии соше́д с небесе́, отвали́ ка́мень от две́рий гро́ба Иису́сова и седя́ще на нем. От стра́ха его́ сотрясо́шася стрегу́щии и бы́ша я́ко ме́ртви. Мы же воскре́сшему живо́му Бо́гу с мироно́сицами покланя́емся и Па́сху та́йную благовеству́ем, вопию́ще: Христо́с воскре́се, и кня́зи а́дстии падо́ша. Христо́с воскре́се, и устраши́шася вра́тницы а́довы. Христо́с воскре́се, и сокруши́шася врата́ ме́дная. Христо́с воскре́се, и тверды́ни а́довы положи́шася в запусте́ние. Христо́с воскре́се, и смерть рыда́ет. Христо́с воскре́се, и ад, стеня́, вопие́т: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 2
Ви́дяще Мари́я Магдали́на, и Мари́я Иа́ковля, и Саломи́я ю́ношу во гро́бе Иису́сове, оде́яна во оде́жду белу́ и седя́ща в десны́х, ужасо́шася. Он же глаго́ла к ним: «Иису́са Распя́таго и́щете? Несть зде, воста́ бо, я́коже рече́. Прииди́те, ви́дите ме́сто, иде́же лежа́ Госпо́дь, и ско́ро ше́дше рцы́те ученико́м Его́: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в».
Икос 2
Ра́зум неразумева́емый разуме́ти и́щуще, Петр и други́й учени́к теча́ста ко гро́бу и, вше́дше в онь, ви́деша ри́зы еди́ны лежа́ща и суда́рь, и́же бе на главе́ Иису́сове, не с ри́зами лежа́щ, но осо́бь свит на еди́нем ме́сте, ве́ровавше же, возопи́ша с весе́лием: Христо́с воскре́се, и вся тварь ра́дуется. Христо́с воскре́се, небеса́ да веселя́тся. Христо́с воскре́се, и сликовству́ют нам а́нгели. Христо́с воскре́се, и просвети́шася преиспо́дняя. Христо́с воскре́се, воспо́йте пра́ведных ду́ши, из а́да свобо́ждшеся. Христо́с воскре́се, воскли́кнем с весе́лием, от сме́рти спасе́ннии. По́йте же Го́сподеви вся земля́: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 3
Си́лою свы́ше облече́ Госпо́дь Своя́ ученики́ по воскресе́нии. Ти́и же идо́ша в Галиле́ю, в го́ру, а́може повеле́ им Иису́с, и прише́дшим им глаго́ла Иису́с: «Даде́ся Ми вся́ка власть на Небеси́ и на земли́. Ше́дше у́бо, научи́те вся язы́ки, крестя́ще их во и́мя Отца́ и Сы́на и Свята́го Ду́ха, уча́ще их блюсти́ вся, ели́ка запове́дах вам». Ти́и же поклони́шася Ему́, зову́ще: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 3
Иму́щи в се́рдце свое́м любо́вь к Учи́телю, Мари́я Магдали́на стоя́ще у гро́ба вне, пла́чущи, и Воста́вшаго из ме́ртвых ви́дящи, я́ко вертогра́даря, вопроша́ше: «А́ще Ты еси́ взял Его́, пове́ждь ми, где еси́ положи́л Его́, и аз возьму́ Его́». Оба́че, па́че ча́яния, слы́шавши: «Мари́е, восхожду́ ко Отцу́ Моему́ и Отцу́ ва́шему и Бо́гу Моему́ и Бо́гу ва́шему», прии́де ко ученико́м, глаго́лющи: Христо́с воскре́се, и жа́ло грехо́вное притупи́ся. Христо́с воскре́се, и мир от пото́па грехо́внаго спасе́ся. Христо́с воскре́се, и мы от рабо́ты врагу́ свободи́хомся. Христо́с воскре́се, и диа́воле прельще́ние упраздни́ся. Христо́с воскре́се, и бы́вшее на нас рукописа́ние загла́дися. Христо́с воскре́се, и вся тварь обнови́ся, зову́щи: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 4
Бу́рю помышле́нии сумни́тельных внутрь име́я, Фома́ ученико́м, глаго́лющим, я́ко ви́дехом Го́спода, рече́ им: «А́ще не уви́жу на руку́ Его́ я́звы гвозди́ныя и вложу́ пе́рста моего́ в я́звы гвозди́ныя, и вложу́ ру́ку в ре́бра Его́, не иму́ ве́ры», но, уве́рився, с весе́лием возопи́: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 4
Слы́шав Фома́ учени́к, ви́девших Го́спода, и очи́ма свои́ма хотя́й Того́ зре́ти, рече́: «Не иму́ ве́ры». По днех же осьми́х прии́де Иису́с затворе́нным две́рем, ста посреде́ учени́к и глаго́ла Фоме́: «Принеси́ перст твой се́мо, и виждь ру́це Мои́, и принеси́ ру́ку твою́, и вложи́ в ре́бра Моя́: и не бу́ди неве́рен, но ве́рен». И отвеща́ Фома́, и рече́: Христо́с воскре́се, Ты еси́ Госпо́дь мой. Христо́с воскре́се, Ты еси́ Бог мой. Христо́с воскре́се, и вси нетле́ние и жизнь восприя́хом. Христо́с воскре́се, и ме́ртвии воста́ша. Христо́с воскре́се, и изба́вихомся осужде́ния и му́ки. Христо́с воскре́се, и жизнь из гро́ба возсия́ ми́рови пою́щему: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 5
Божества́ огне́м не опали́ся Фома́, ребро́ Спа́сово дерзнове́нно осяза́в. Па́че же просвети́ся, Бо́га, на спасе́ние на́ше воплоти́вшася и па́ки с пло́тию воскре́сшаго, позна́в. Те́мже неве́рием свои́м блаже́нный близне́ц церко́вную ве́ру утвержда́ет, ю́же испове́дующе согла́сно вопие́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 5
Ви́девше Иису́са воскре́сша, ученицы́ убоя́хуся, мня́ще дух ви́дети. Иису́с же, хотя́ уве́рити их, показа́ им ру́це и но́зе и ре́бра Своя́, та́же ры́бы печены́ часть прие́м и от пчел сот пред ни́ми яде́. Тем уве́рившеся и страх свой и печа́ль свою́ отложи́вше, в ра́дости поя́ху: Христо́с воскре́се, ху́ждшая восприи́м, и подаде́ нам лу́чшая. Христо́с воскре́се, и ад умертви́ся блиста́нием Божества́ Его́. Христо́с воскре́се, и тьма разруши́ся, и мра́чнии де́мони отгна́шася. Христо́с воскре́се, и истле́вшее страстьми́ челове́ческое естество́ обнови́ся. Христо́с воскре́се, и беззако́ния на́ша ту́не очи́стишася. Христо́с воскре́се, и мы вси, в нетле́ние обле́кшеся, песнь сию́ Ему́ прино́сим: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 6
Пропове́дники по воскресе́нии Твое́м в мир посыла́я, богоно́сныя апо́столы Твоя́, Христе́, рекл еси́ им, ду́нув: «Приими́те Дух Свят. И́мже отпустите́ грехи́, отпу́стятся им; и и́мже держите́, держа́тся». Те́мже да́же и до днесь во всем ми́ре ча́да церко́вная, от грехо́в разреша́еми, сла́вят непреста́нно Твое́ милосе́рдие и душа́ми чи́стыми в ра́дости пою́т: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 6
Возсия́л еси́, Христе́, и во мра́чных удо́лиях а́да свет Твоего́ Воскресе́ния, проще́ние и осла́бу, и избавле́ние благовеству́я, Многоми́лостиве, душа́м от ве́ка та́мо содержи́мым. Те́мже от зми́я, человекоуби́йцы, исхища́еми, игра́юще, к све́ту Твоему́ устреми́шася, пою́ще: Христо́с воскре́се, и у́зы на́ша разтерза́шася. Христо́с воскре́се, и сень сме́ртная в ве́чную жизнь преложи́ся. Христо́с воскре́се, и держа́ва сме́рти уже́ не возмо́жет держа́ти челове́ка. Христо́с воскре́се, и мучи́телева де́рзость низложи́ся. Христо́с воскре́се, и рай вме́сто а́да жи́ти нам дарова́ся. Христо́с воскре́се, и мир воспева́ет при́сно: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 7
Хотя́й па́дшему Ада́му послужи́ти, Спа́се наш, на земли́ яви́лся еси́, и на земли́ того́ не обре́т, да́же до а́да низше́л еси́ ища́, да, сре́тив Тя до́лу, в преиспо́дних земли́, со все́ми спаса́емыми пое́т: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 7
Но́выя жи́зни нача́ло положи́л еси́ ми́рови, Го́споди, Твои́м сла́вным Воскресе́нием. Ве́тхая бо вся мимоидо́ша: и ад, и смерть, и власти́тельство диа́вола. Свобо́дна у́бо вся тварь познава́ется, и пре́жде омраче́ннии, ны́не я́ко сы́нове Бо́жии, лику́ют, пою́ще: Христо́с воскре́се, бе́здну ми́лости и щедро́т излия́в на род наш. Христо́с воскре́се, в ров низпа́дших нас воздви́гнувый с Собо́ю. Христо́с воскре́се, и мы от сете́й де́монских изба́вихомся. Христо́с воскре́се, и го́ресть греха́ в сла́дость ра́йския жи́зни преложи́ся. Христо́с воскре́се, и дре́вом умерщвле́ннии ожи́хом. Христо́с воскре́се, и нас возведе́ в пре́жнее достоя́ние, да зове́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 8
Стра́нствуя с Клео́пою и Луко́ю в весь, отстоя́щую ста́дий шестьдеся́т от Иерусали́ма, и не позна́н быв и́ма, поноси́л еси́, Спа́се, неве́рствию их и жестосе́рдию, глаго́ля: «Не сия́ ли подоба́ше пострада́ти Христу́ и вни́ти в сла́ву Свою́?» И, наче́н от Моисе́я и от всех проро́к, научи́л еси́ их пе́ти: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 8
Всего́ Себе́, Бо́га су́ща и челове́ка соверше́нна, препода́л еси́, Спа́се, двема́ ученико́ма Твои́ма во Еммау́се, егда́ прии́мь хлеб, благослови́л еси́ и, преломи́в, дал еси́ и́ма. О́нема и отверзо́стеся о́чи, и позна́ста Тебе́, Ты же неви́димь бысть и́ма, и реко́ста к себе́: Христо́с воскре́се, и жизнь воцари́ся. Христо́с воскре́се, и диа́воля лесть обличи́ся. Христо́с воскре́се, и преста́ же́ртва и́дольская. Христо́с воскре́се, и вся земля́ прино́сит Ему́ же́ртву хвале́ния. Христо́с воскре́се, и мы, вкуси́вше дре́вле преслуша́ннаго бра́шна, ны́не вкуша́ем пи́щи ве́чныя. Христо́с воскре́се, и мы ра́дости присносу́щныя прича́стницы быва́ем, пою́щии: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 9
Вси а́нгели, Христе́ Спа́се, Твое́ воскресе́ние пою́т на небеси́. Сподо́би и нас на земли́ чи́стым се́рдцем в весе́лии воспева́ти: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 9
Вети́я всеми́рный и учи́тель язы́ков Па́вел богоглаго́ливый, я́ко труба́, вопие́т: «Христо́с воскре́се от ме́ртвых, нача́ток воста́ния уме́рших бысть. Я́коже во Ада́ме вси умира́ют, та́кожде и о Христе́ вси оживу́т». Те́мже воскресе́ние Христо́во ви́девше, в ра́дости вопие́м: Христо́с воскре́се, и князь ми́ра низложи́ся. Христо́с воскре́се, и трепе́щет преиспо́дняя. Христо́с воскре́се, и смерть поже́рта бысть побе́дою. Христо́с воскре́се, и ад плене́н бысть Того́ держа́вою. Христо́с воскре́се, и свободи́хомся от а́довых неруши́мых уз. Христо́с воскре́се, и мы, из истле́ния изба́вльшеся, сы́ны воскресе́ния яви́хомся, и пое́м: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 10
Спасти́ хотя́ род челове́ческий от рабо́ты вра́жия, распя́тие и смерть претерпе́л еси́, Го́споди, погребе́н же быв, в тре́тий день от ме́ртвых воста́л еси́. Тем же а́нгел, блиста́яйся во гро́бе, благовеству́ет жена́м, глаго́ля: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 10
Тре́тие по воскресе́нии яви́ся Иису́с на мо́ри Тивериа́дстем ры́бу ловя́щим Си́мону Петру́, и Фоме́, и Нафана́илу, и сыно́м Зеведе́евым со ине́ма от учени́к Его́ двема́ и, я́ко Влады́ка всех, повелева́ет мре́жу одесну́ю страну́ корабля́ воврещи́, и бысть сло́во де́ло вско́ре, и мно́гое рыб мно́жество, и ве́черя стра́нна гото́ва на земли́. Ея́ же ны́не мы́сленно наслади́тися и нас сподо́би, Го́споди, пою́щих: Христо́с воскре́се, и даде́ся Ему́ власть на небеси́ и на земли́. Христо́с воскре́се, и Ца́рство Бо́жие наста́. Христо́с воскре́се, и Те́ло Его́, я́ко Хлеб Жи́зни, вси прие́млем. Христо́с воскре́се, и Кро́ви Его́, я́ко Исто́чника Безсме́ртнаго, вкуша́ем. Христо́с воскре́се, и Ада́м, свобожде́н, с на́ми лику́ет. Христо́с воскре́се, и Е́ва, от уз избавля́ема, ра́дуется, зову́щи: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 11
Пе́ние всеумиле́нное приноша́ше воскре́сшему Тебе́, Петр, три́щи бо отве́ржеся Тебе́, три́щи же и испове́дуя: «Го́споди, Ты вся ве́си, Ты ве́си, я́ко люблю́ Тя». Три́щи и слы́шит от Тебе́ сладча́йшее на па́ству па́ки призва́ние: «Паси́ а́гнцы Моя́, паси́ о́вцы Моя́». Те́мже и зове́т: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 11
Све́та Пода́телю, я́коже со́лнце, возсия́л еси́ тридне́вно от гро́ба и вся просвети́л еси́ све́том и́стиннаго богопозна́ния. Те́мже седя́щии во тьме неве́рия и сомне́ния уве́рихомся со апо́столы, я́ко Госпо́дь еси́, и не истязу́ем уже́: «Ты кто еси́?» Но воскре́сшаго Тя сла́вяще, во умиле́нии зове́м: Христо́с воскре́се, и вся́ческая просвети́ Воскресе́нием Свои́м. Христо́с воскре́се, и свет ве́чный возсия́ во тьме и се́ни сме́ртней седя́щим. Христо́с воскре́се, и ве́рным подаде́ та́йно осеня́ющее свы́ше Ду́ха сия́ние. Христо́с воскре́се, и духо́вная очеса́ пре́жде слепы́х отверзо́шася. Христо́с воскре́се, и мы Отца́ све́тов позна́хом. Христо́с воскре́се, да посра́мятся вси отве́ргшиися Го́спода сла́вы и с на́ми да воспою́т: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 12
Благода́тию Твое́ю вся́кому челове́ку удо́бнейший путь спасе́ния указу́я, Христе́, глаго́лал еси́ Си́мону Петру́: «Егда́ состаре́ешися, возде́жеши ру́це твои́, и ин тя поя́шет и веде́т, а́може не хо́щеши», назна́менуя, ко́ею сме́ртию просла́вит Бо́га. Возлю́бленному же ученику́ повеле́л еси́ пребыва́ти, до́ндеже прии́деши. Те́мже, а́ще и разлучи́вшеся апо́столи, оба́че сою́зом любве́ связу́еми, согла́сно воспева́ху: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Икос 12
Пою́ще Твое́ тридне́вное воскресе́ние, Христе́, ра́дуемся Твоему́ непрело́жному обеща́нию. С на́ми бо до сконча́ния ве́ка бы́ти обеща́лся еси́, от вся́каго зла нас избавля́я и к жи́зни ве́чней руково́дствуя. Сего́ ра́ди, сла́вяще Тя, вопие́м: Христо́с воскре́се, и мы вре́да вся́каго избавля́емся ны́не. Христо́с воскре́се, и нас одесну́ю Отца́ с Собо́ю посади́л есть. Христо́с воскре́се, и нас прича́стники ве́чныя сла́вы Своея́ соде́ла. Христо́с воскре́се, и дре́вле сокруши́вый пра́отца си́льный враг сокруши́ся. Христо́с воскре́се, и со а́нгелы мы, пре́жде отринове́ннии, водворя́емся. Христо́с воскре́се, и с Собо́ю вся воскреси́т, зову́щия: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Кондак 13
О Па́сха ве́лия и свяще́ннейшая, Христе́ Иису́се, Спаси́телю наш, благода́рно испове́дуем спаси́тельную вели́кую ми́лость Твою́, я́ко и па́ки сподо́бил еси́ нас, недосто́йных, ны́не вкуси́ти ра́дости Све́тлаго Воскресе́ния Твоего́. Подава́й нам в невече́рнем дни Ца́рствия Твоего́ и́стее и соверше́ннее Тебе́, Сладча́йшаго, причаща́тися, да со а́нгелы и все́ми святы́ми во ве́ки веко́в пое́м вси ра́достно: Христо́с воскре́се из ме́ртвых, сме́ртию смерть попра́в и су́щим во гробе́х живо́т дарова́в.
Этот кондак читается трижды, затем 1-й икос: «А́нгел Госпо́день…» и 1-й кондак: «Возбра́нный Воево́до…»
Молитва
Воскресе́ние Христо́во ви́девше, поклони́мся Свято́му Го́споду Иису́су, еди́ному безгре́шному. Кресту́ Твоему́ покланя́емся, Христе́, и Свято́е Воскресе́ние Твое́ пое́м и сла́вим: Ты бо еси́ Бог наш, ра́зве Тебе́ ино́го не зна́ем, и́мя Твое́ имену́ем. Прииди́те, вси ве́рнии, поклони́мся Свято́му Христо́ву Воскресе́нию: се бо прии́де Кресто́м ра́дость всему́ ми́ру. Всегд€а благословя́ще Го́спода, пое́м Воскресе́ние Его́: распя́тие бо претерпе́в, сме́ртию смерть разруши́.
Акафист
Кресту Христову
Кондак 1
Прииди́те, христоимени́тии лю́дие, соста́вим похвалу́ Честно́му Кресту́, на нем же Христо́с, Царь Сла́вы, ру́це распросте́р, возведе́ нас на пе́рвое блаже́нство, из него́ же низпадо́хом пре́лестию зми́евою. Ты же, о пресвяты́й Кре́сте, я́ко име́яй прису́щую тебе́ си́лу Распя́таго Христа́, спаса́й и сохраня́й от вся́ких бед любо́вно зову́щия ти: Ра́дуйся, Честны́й Кре́сте, всера́достное зна́мение на́шего искупле́ния.
Икос 1
А́нгелов ли́цы, я́ко Бо́жии служи́телие, Крест обстоя́ще, во́льную страсть Христа́ Жизнода́вца прославля́ют. Мы же страда́ньми Того́ ве́чныя сме́рти изба́вльшеся, подража́я го́рним си́лам, ра́достно взыва́ем: Ра́дуйся, Кре́сте, я́ко на тебе́ Христо́с Бог наш, во́лею ру́це распросте́р, спасе́ние на́ше соде́ла; ра́дуйся, я́ко распросте́ршимся на тебе́ Христо́м преступле́ние Ада́ма и Е́вы, просте́рших ру́це ко дре́ву запреще́нному, упраздни́ся. Ра́дуйся, я́ко воздви́жену бы́вшу на тебе́, а́ки престу́пну, Законода́вцу, дре́вняя кля́тва, я́же на нас бы́вшая, потреби́ся; ра́дуйся, я́ко соде́явшимся на тебе́, стра́нным та́инством род челове́ческий от тли сме́ртныя свободи́ся. Ра́дуйся, я́ко Пострада́вшим и У́мершим на тебе́ жа́ло сме́рти сокруши́ся; ра́дуйся, Того́ ра́ди страда́ния Бог с челове́ки примири́ся. Ра́дуйся, Честны́й Кре́сте, всера́достное зна́мение на́шего искупле́ния.
Кондак 2
Ви́дя па́дших челове́ков, Го́споди, Ты вочелове́чився, крест и смерть во́льно пло́тию претерпе́л еси́ за род наш, да от сме́рти ве́чныя изба́виши испове́дающия Тя, Сы́на Бо́жия и вопию́щия Ти: Аллилу́иа.
Икос 2
Ра́зум челове́ч изнемога́ет в постиже́нии ве́лия та́йны Твоего́, Христе́, воплоще́ния и во́льнаго за ны страда́ния: ка́ко Ты, Бог сый безстра́стный, страсть кре́стную, я́ко челове́к, претерпе́л еси́ и сие́ ору́дие сме́рти Твоея́ соде́лал еси́ исто́чником жи́зни и спасе́ния всем благоче́стно в Тя ве́рующим и хвале́бно воспева́ющим: Ра́дуйся, Кре́сте, на не́м же соде́яся та́инство, от ве́ка предопределе́нное; ра́дуйся, я́ко на тебе́ соверши́ся на́ше искупле́ние, многообра́зне во о́бразех и се́нех предъявле́нное. Ра́дуйся, я́ко уме́рый на тебе́ Жизнода́вец, кровь и во́ду источи́, и́ми же грехи́ на́ша омыва́ются; ра́дуйся, я́ко ка́плями святе́йшей кро́ве Его́ грехо́вныя стру́пы душ на́ших очища́ются. Ра́дуйся, Кре́сте, я́коже дре́во живо́тное, е́же есть посреде́ рая́ Бо́жия, христиа́ном вожделе́нный; ра́дуйся, плода́ми безсме́ртия у́мно нас пита́ющий и наде́ждою жи́зни ве́чныя малоду́шие на́ше ободря́ющий. Ра́дуйся, Честны́й Кре́сте, всера́достное зна́мение на́шего искупле́ния.
Кондак 3
Крест Твой, а́ще и дре́во ви́димо есть существо́м, но Боже́ственною оде́яно есть си́лою, и чу́вственное ми́ра выявля́емо, у́мно на́ше чудотвори́т спасе́ние, подвиза́я пе́ти Тебе́: Аллилу́иа.
Икос 3
Иму́ще пред очи́ма на́шима Крест пресвяты́й, святоле́пным поклоне́нием той почита́ем распе́ншагося ра́ди на нем Спа́са Христа́, и, лобыза́я, взыва́ем: Ра́дуйся, Кре́сте, просла́вленный послуша́нием и страда́нием Христо́вым; ра́дуйся, возвели́ченный возвыше́нием на тебе́ Сы́на Бо́жия, И́же весь мир от паде́ния Ада́мля воздви́же. Ра́дуйся, я́ко сбы́вшагося на тебе́ ужа́снаго та́инства земля́ ужасе́ся и вострепета́, а́ки бы хотя́щи поглоти́ти законопресту́пныя; ра́дуйся, я́ко заклавшуся на тебе́ А́гнцу Бо́жию заве́са хра́ма раздра́ся и же́ртва ветхозаве́тная упраздни́ся. Ра́дуйся, Кре́сте, я́ко распа́дшуся под тобо́ю ка́мню, каменносерде́чнии ро́ди евре́йстии неве́рием от Бо́га отпадо́ша, благода́ти же свяще́нства и ца́рства лиши́шася; ра́дуйся, я́ко омрачи́вшуся со́лнцу в стра́сти Христо́вой нощь многобо́жия пре́йде и свет ве́ры возсия́. Ра́дуйся, Честны́й Кре́сте, всера́достное зна́мение на́шего искупле́ния.
Кондак 4
Бу́рею зло́бы ды́шуще и за́вистию дви́жими, первосвяще́нницы иуде́йстии скры́ша в зе́млю Крест Твой, Христе́ Бо́же, да не бу́дет обличе́нием безу́мие их; но той, я́ко сокро́вище драго́е, из недр земли́ возсия́, тща́нием благочести́выя цари́цы Еле́ны обре́тенный и на ра́дость всему́ ми́ру явле́нный, с богокра́сною пе́снию: Аллилу́иа.
Икос 4
Ви́девше тогда́ христиа́нстии лю́дие Честна́го Креста́ обре́тение, прославля́ху распе́ншагося на нем Христа́ Бо́га, «Го́споди поми́луй», – взыва́юще. Мы же ны́не, подража́юще им, прославля́ем Крест Его́ святы́й хвале́ньми сицевы́ми: Ра́дуйся, Кре́сте, в зе́млю сокрове́нный и оскверне́нное греха́ми на́ше естество́ земно́е освяти́вый; ра́дуйся, явле́нием свои́м из недр земны́х хули́телей воплоще́ния и Божества́ Христо́ва посрами́вый. Ра́дуйся, я́ко Пострада́вый на тебе́ пло́тию прия́ вся́ку власть на небеси́ и на земли́, да всех и вся к Бо́гу Отцу́ приведе́т; ра́дуйся, я́ко уме́рый на тебе́ я́ко челове́к си́лою Божества́ Своего́ сокруши́ закле́пы а́да и изведе́ отту́да ду́ши пра́ведных. Ра́дуйся, Кре́сте, я́ко разбо́йник благоразу́мный, Христу́ сраспя́выйся, Того́ испове́давый, тобо́ю, а́ки ле́ствицею, на небеса́ взы́де; ра́дуйся, я́ко и всех отсече́нием страсте́й Христу́ сраспина́ющихся возво́диши в Ца́рствие Небе́сное. Ра́дуйся, Честны́й Кре́сте, всера́достное зна́мение на́шего искупле́ния.
Кондак 5
Го́споди, при Моисе́е иногда́ проро́це то́чию о́браз Креста́ Твоего́ явля́ем побежда́ше враги́ Твоя́, ны́не же са́мый Крест Твой иму́ще, по́мощи про́сим: укрепи́ Це́рковь Твою́ и да́руй ей побе́ды на враги́, да расточа́тся вси врази́ Твои́, не вопию́щии Ти: Аллилу́иа.
Икос 5
Честна́го Креста́, Христе́, де́йство прообрази́в Моисе́й, победи́ проти́внаго Амали́ка в пусты́не Сина́йстей: егда́ бо простира́ше ру́це, креста́ о́браз творя́, укрепля́хуся лю́дие; ны́не же все веще́й сбы́тие в нас испо́лнися: днесь Крест воздвиза́ется, и де́мони бе́гают, днесь тварь вся от тли свободи́ся, я́ко вся Креста́ ра́ди возсия́ша нам дарова́ния. Те́мже, ра́дующеся, вопие́м: Ра́дуйся, Кре́сте, ору́жие Христо́во стра́шное, его́же де́мони трепе́щут; ра́дуйся, я́ко си́лою на тебе́ распя́таго Христа́ бесо́встии по́лчища дале́че прогоня́ются. Ра́дуйся, я́ко си́лою де́йствующия в тебе́ Боже́ственныя благода́ти побе́ды на сопроти́вныя христолюби́вым лю́дем да́руются; ра́дуйся, я́ко от тебе́, я́ко высокоро́слейнаго и многоплодови́таго дре́ва Христо́ва на тебе́ страда́ния, плоды́ жи́зни и спасе́ния нам произраста́ют. Ра́дуйся, Честны́й Кре́сте, всера́достное зна́мение на́шего искупле́ния.
Кондак 6
Пропове́дником си́лы и Божества́ Христо́ва яви́ся иногда́ животворя́щее Дре́во Кре́стное, егда́ прикоснове́нием свои́м воскреси́ ме́ртваго и к жи́зни возведе́ его́, е́же ви́девше, мно́зи от иуде́й и язы́чников позна́ша ве́лию благоче́стия та́йну: я́ко спасе́ния ра́ди челове́ческаго, Бог во пло́ти яви́ся и страсть кре́стную претерпе́, да спасе́т вопию́щия Ему́: Аллилу́иа.
Икос 6
Я́коже дре́во ра́йское преве́лие, возвы́сися на Голго́фе Честны́й Крест Христо́в, отону́дуже во всю вселе́нную распростре́ мы́сленныя ве́тви благода́ти и Распе́ншагося на нем: под его́же се́нию обрета́ют прохла́ду пали́мии зно́ем страсте́й и хотя́щии благоче́стно жи́ти о Христе́ Иису́се. Те́мже и мы, благода́ти Того́ прича́стницы, ве́село взыва́ем: Ра́дуйся, святы́й Кре́сте, дре́вом жи́зни, Ада́ма ра́ди в Еде́ме насажде́нным, преображе́нный; ра́дуйся, но́вым Ада́мом, ру́це на тебе́ распросте́ршим, ми́ру явле́нный. Ра́дуйся, я́ко под сень благода́тнаго защище́ния твоего́ вси ве́рнии прибега́ют; ра́дуйся, я́ко милосе́рдием Дарова́вшаго нам тебе́ ка́ющиися гре́шницы огня́ гее́нскаго избега́ют. Ра́дуйся, Кре́сте, утеше́ние на́ше в ско́рбех и печа́лех; ра́дуйся, живи́тельная отра́до и по́мощь изнемога́ющим в борьбе́ с прило́гами страсте́й, ми́ра и диа́вола. Ра́дуйся, Честны́й Кре́сте, всера́достное зна́мение на́шего искупле́ния.
Кондак 7
Хотя́ яви́ти ро́ду челове́ческому бла́гости и милосе́рдия Своего́ неизсле́димую пучи́ну, Крест Твой, Го́споди, дал еси́ нам тве́рда блюсти́теля и прогони́теля де́монов. Те́мже вси мы, и́же в Тя ве́рующии, прославля́ем вели́чие стра́сти Твоея́, благода́рно пою́ще Тебе́: Аллилу́иа.
Икос 7
Ди́вны дела́ яви́л еси́, Го́споди, Кресто́м Твои́м Честны́м: распе́ншуся бо Ти на том пло́тию, вся тварь измени́ся: со́лнце лучи́ своя́ сокры́, основа́ния земли́ восколеба́хуся, ад сокруши́ся держа́вою вла́сти Твоея́ и изведе́ ю́зники, я́же от ве́ка содержа́л есть. Сего́ ра́ди увяза́ем той си́ми пе́сненными цве́ты: Ра́дуйся, Кре́сте, я́ко пострада́вшему на тебе́ вся тварь сострада́ше, я́ко Творцу́ своему́ и Влады́це; ра́дуйся, я́ко си́лу Того́ и Божество́ свиде́тельствоваху со́лнце помраче́нием и земля́ колеба́нием. Ра́дуйся, я́ко Уме́рый на тебе́ не удержа́н бысть в ме́ртвых, но, разруши́в держа́ву сме́рти, в тре́тий день воскре́се; ра́дуйся, я́ко воскре́сшу Тому́ про́поведь ева́нгельская, от ли́ка апо́стольскаго наче́ншаяся, во вся концы́ земли́ изы́де. Ра́дуйся, Кре́сте, я́ко тобо́ю кумирослуже́ние и многобо́жие язы́ческое упраздни́ся; ра́дуйся, я́ко тебе́ ра́ди пра́вая ве́ра во Еди́наго Бо́га, в Тро́ице сла́вимаго, по всей земли́ утверди́ся. Ра́дуйся, Честны́й Кре́сте, всера́достное зна́мение на́шего искупле́ния.
Кондак 8
Стра́нно Бо́га вочелове́чшася и на кресте́ ра́спята бы́вша мы́сленно ви́дяще, устрани́мся су́етнаго ми́ра, ум на небеса́ прело́жше. Сего́ ра́ди Бог на зе́млю сни́де и на Крест взы́де, да тем, а́ки ле́ствицею, на небеса́ возведе́т вопию́щия Ему́: Аллилу́иа.
Икос 8
Днесь Ада́м со Е́вою весели́тся, предлежа́щий ви́дяще Крест, и́мже пораже́н бысть супоста́т, и́же дре́вле в раи́ вкуше́нием запреще́ннаго плода́ тех прельсти́вый и пле́нники себе́ сотвори́вый. Те́мже и мы, сра́дующеся пра́отцем на́шим о избавле́нии от плене́ния на́шего душе́внаго, благогове́йно воспева́ем: Ра́дуйся, Кре́сте, я́ко на тебе́ Па́стырь до́брый ду́шу Свою́ положи́ за о́вцы Своя́ и да́же до а́да сни́де, ища́ заблу́дших; ра́дуйся, я́ко Той не презре́ де́ло руку́ Свое́ю, Ада́ма со Е́вою, но со ине́ми пра́ведники исхити́ я́ из а́да, я́ко из че́люстей зве́ря кре́пкаго, и в рай всели́ их. Ра́дуйся, я́ко на тебе́ пригвожде́нному Христу́ пла́менное ору́жие плещи́ даде́ и херуви́м, Еде́м храня́щий, отступи́ от дре́ва жи́зни; ра́дуйся, я́ко мы, ны́не креще́нием возрожде́ннии, во Христе́ но́вые лю́дие, невозбра́нно причаща́емся ра́йския пи́щи. Ра́дуйся, Кре́сте, же́зле си́лы Христо́вы, от Сио́на по́сланный, и́мже мы пасе́мся на па́житех ева́нгельских уче́ний; ра́дуйся, я́ко тобо́ю невреди́ми сохраня́емся от волко́в душегу́бных, я́ко льво́ве рыка́ющих и и́щущих, кого́ поглоти́ти. Ра́дуйся, Честны́й Кре́сте, всера́достное зна́мение на́шего искупле́ния.
Кондак 9
Вся́ких бед и ко́зней вра́жиих изба́ви ны, Кре́сте треблаже́нный, я́ко прие́мый благода́ть и си́лу от пригвожде́ннаго на тебе́ Христа́, Ему́же я́ко Бо́гу и Изба́вителю на́шему благода́рственно и хвале́бно пое́м: Аллилу́иа.
Икос 9
Вети́йство вся́кое земноро́дных не довле́ет к прославле́нию Креста́ Твоего́, Го́споди, на не́мже спасе́ние на́ше соде́лал еси́; те́мже, недоумева́юще восхвали́ти той по достоя́нию, взыва́ем си́це: Ра́дуйся, Кре́сте, я́ко вознесе́нный на тебе́ Спас ми́ра мно́зи лю́ди в позна́ние Свое́ призва́ и до ны́не призыва́ет; ра́дуйся, я́ко возсия́вый на тебе́, а́ки на све́щнице, Свет и́стинный вся концы́ земли́ све́том богове́дения озаря́ет. Ра́дуйся, я́ко ны́не Восто́к и За́пад пострада́вшаго на тебе́ прославля́ют; ра́дуйся, я́ко и тя, я́ко подно́жие Христо́во, вси ве́рнии, вознося́ще, прославля́ют. Ра́дуйся, я́ко от тебе́, я́ко от неизсяка́емаго исто́чника, христоимени́тии лю́дие оби́лие благ ве́чных почерпа́ют. Ра́дуйся, Честны́й Кре́сте, всера́достное зна́мение на́шего искупле́ния.
Кондак 10
Спасти́ся хотя́щим нам и под сень защище́ния твоего́ прибега́ющим, бу́ди помо́щник, пресвяты́й Кре́сте, сохраня́я ны от всех зол си́лою на тебе́ распя́таго Христа́, Ему́же я́ко Бо́гу и Изба́вителю на́шему благода́рственно и хвале́бно пое́м: Аллилу́иа.
Икос 10
Стена́ еси́, огражда́ющая нас от бед и напа́стей, Кре́сте всечестны́й, и столп кре́пкий проти́ву лица́ вра́жия, к нему́же неви́димии бори́телие приступи́ти не сме́ют, боя́щеся взира́ти на си́лу твою́. Сего́ ра́ди с ве́рою огражда́емся святы́м твои́м зна́мением и ве́село воспева́ем: Ра́дуйся, пречестны́й Кре́сте Христо́в, от нападе́ния духо́в зло́бы нас защища́яй; ра́дуйся, от разли́чных стрел их невреди́мы ны сохраня́яй. Ра́дуйся, я́ко от зна́мения твоего́, с ве́рою благоче́стно твори́маго, вся си́лы а́да, я́ко дым от ве́тра, исчеза́ют; ра́дуйся, я́ко тобо́ю вся кре́пость их, я́ко воск от лица́ огня́, иста́ивает. Ра́дуйся, я́ко святи́и му́ченицы, зна́мением твои́м огражда́шеся и и́мя Христо́во призва́вше, вся́кий вид муче́ний му́жественно претерпе́ша; ра́дуйся, я́ко преподо́бнии отцы́ помо́щию си́лы Божества́, зна́мению твоему́ прису́щия, бесо́вская страхова́ния и страсте́й возста́ния победи́ша. Ра́дуйся, Честны́й Кре́сте, всера́достное зна́мение на́шего искупле́ния.
Кондак 11
Пе́ние всеумиле́нное прино́сим ти, всечестны́й Кре́сте, и смире́нно мо́лимся распя́тому на тебе́ Христу́ Бо́гу на́шему, И́же дарова́ нам тебе́ во отра́ду и утеше́ние в ско́рбех, да стра́стию Свое́ю изба́вит нас от страсте́й душевре́дных и научи́т благове́рно воспева́ти Ему́: Аллилу́иа.
Икос 11
Све́том благода́ти Бо́жией, та́инственне ти прису́щия, просвети́ на́ша душе́вная чу́вствия, Кре́сте пресвяты́й, да то́ю озаря́еми и наставля́еми, не поткне́мся о ка́мень собла́зна, но да возмо́жем путе́м за́поведей Бо́жиих правоше́ствовати во всей жи́зни на́шея, воспева́юще ти си́це: Ра́дуйся, непрестаю́щих чуде́с Христо́вых ве́стниче и милосе́рдия Его́ к ро́ду челове́ческому пропове́дниче; ра́дуйся, Кре́сте, ро́да челове́ча обновле́ние и Но́ваго Заве́та Христо́ва печа́ть и утвержде́ние. Ра́дуйся, торжество́ ве́ры христиа́нския и благонаде́жный я́корю упова́ния на́шего; ра́дуйся, святы́х хра́мов Бо́жиих украше́ние и домо́в благочести́вых огражде́ние. Ра́дуйся, поле́й и вертогра́дов благослове́ние; ра́дуйся, всех стихи́й освяще́ние. Ра́дуйся, Честны́й Кре́сте, всера́достное зна́мение на́шего искупле́ния.
Кондак 12
Благода́ть Твою́ всемо́щную пода́ждь нам, Го́споди, да после́дуем Тебе́, Влады́це на́шему, взе́мше крест наш, не гвоздьми́ пригвожда́ющеся тому́, но труда́ми, воздержа́нием и смире́нием, да та́ко прича́стницы бу́дем страда́ний Твои́х, от ни́хже истека́ют пото́цы жи́зни ве́чныя, напая́ющия вся правове́рныя, благоче́стно пою́щия Ти: Аллилу́иа.
Икос 12
Пою́ще вели́чие твое́, всечестны́й Кре́сте, восхваля́ем тя вси, я́ко победоно́сный ски́петр Царя́ Небе́снаго, на́шего же спасе́ния всера́достное зна́мение, те́мже и вопие́м: Ра́дуйся, Кре́сте, правосла́вных христиа́н держа́во и несокруши́мое их огражде́ние; ра́дуйся, святи́телей украше́ние и всех подви́жников ве́ры и благоче́стия си́ла и подкрепле́ние. Ра́дуйся, Кре́сте, от колыбе́ли и до гро́ба на всех путе́х жи́зни нас огражда́яй и по сме́рти на возду́шных мыта́рствах от духо́в зло́бы нас защища́яй; ра́дуйся, я́ко под зна́мением твои́м почива́ющии, уме́ршии в ве́ре и благоче́стии, в после́дний день воскре́снут в жизнь ве́чную. Ра́дуйся, Кре́сте, явле́нием свои́м на небеси́ предвари́ти имы́й сла́вное Второ́е Прише́ствие Христо́во; ра́дуйся, я́ко распе́ншии Христа́ и вси неве́рнии у́зрят тя тогда́ и го́рце возрыда́ют, лю́бящии же Го́спода, зря́ще тя, вельми́ возра́дуются. Ра́дуйся, Честны́й Кре́сте, всера́достное зна́мение на́шего искупле́ния.
Кондак 13
О пречестны́й и животворя́щий Кре́сте Госпо́день, всех христиа́н утеше́ние! Тя ны́не предлежа́ща ви́дяще, возво́димся мы́слию к распя́тому на тебе́ Христу́, Ему́же и мо́лимся смире́нно, да тебе́ ра́ди поми́лует нас, гре́шных, и сподо́бит в селе́ниих ра́йских воспева́ти Ему́: Аллилу́иа.
Этот кондак читается трижды, затем 1-й икос: «А́нгелов ли́цы…» и 1-й кондак: «Прииди́те, христоимени́тии лю́дие…»
Молитва
Кре́сте Честны́й, храни́тель души́ и те́лу бу́ди ми: о́бразом свои́м бе́сы низлага́я, враги́ отгоня́я, стра́сти упражня́я и благогове́ние да́руя ми, и жизнь, и си́лу, соде́йствием Свята́го Ду́ха и честны́ми Пречи́стыя Богоро́дицы мольба́ми. Ами́нь.
Акафист
Пресвятой Богородице
Кондак 1
Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице; но я́ко иму́щая держа́ву непобеди́мую, от вся́ких нас бед свободи́, да зове́м Ти: ра́дуйся, Неве́сто Неневе́стная.
Икос 1
А́нгел предста́тель с небесе́ по́слан бысть рещи́ Богоро́дице: ра́дуйся, и со безпло́тным гла́сом воплоща́ема Тя зря, Го́споди, ужаса́шеся и стоя́ше, зовы́й к Ней такова́я: Ра́дуйся, Е́юже рa€дость возсия́ет; ра́дуйся, Е́юже кля́тва изче́знет. Ра́дуйся, па́дшаго Ада́ма воззва́ние; ра́дуйся, слез Е́виных избавле́ние. Ра́дуйся, высото́ неудобовосходи́мая челове́ческими по́мыслы; ра́дуйся, глубино́ неудобозри́мая и а́нгельскима очи́ма. Ра́дуйся, я́ко еси́ Царе́во седа́лище; ра́дуйся, я́ко но́сиши Нося́щаго вся́. Ра́дуйся, звездо́, явля́ющая Со́лнце; ра́дуйся, утро́бо Боже́ственнаго воплоще́ния. Ра́дуйся, Е́юже обновля́ется тварь; ра́дуйся, Е́юже покланя́емся Творцу́. Ра́дуйся, Неве́сто Неневе́стная.
Кондак 2
Ви́дящи Свята́я Себе́ в чистоте́, глаго́лет Гаврии́лу де́рзостно: «Пресла́вное твоего́ гла́са неудобоприя́тельно души́ Мое́й явля́ется: безсе́меннаго бо зача́тия рождество́ ка́ко глаго́леши, зовы́й: Аллилу́иа?»
Икос 2
Ра́зум недоразумева́емый разуме́ти Де́ва и́щущи, возопи́ к служа́щему: «Из боку́ чи́сту, Сы́ну ка́ко есть роди́тися мо́щно, рцы Ми?» К Не́йже он рече́ со стра́хом, оба́че зовы́й си́це: Ра́дуйся, сове́та неизрече́ннаго таи́ннице; ра́дуйся, молча́ния прося́щих ве́ро. Ра́дуйся, чуде́с Христо́вых нача́ло; ра́дуйся, веле́ний Его́ глави́зно. Ра́дуйся, ле́ствице небе́сная, Е́юже сни́де Бог; ра́дуйся, мо́сте, преводя́й су́щих от земли́ на не́бо. Ра́дуйся, а́нгелов многослову́щее чу́до; ра́дуйся, бесо́в многоплаче́вное пораже́ние. Ра́дуйся, Свет неизрече́нно роди́вшая; ра́дуйся, е́же ка́ко, ни еди́наго же научи́вшая. Ра́дуйся, прему́дрых превосходя́щая ра́зум; ра́дуйся, ве́рных озаря́ющая смы́слы. Ра́дуйся, Неве́сто Неневе́стная.
Кондак 3
Си́ла Вы́шняго осени́ тогда к зача́тию Браконеиску́сную и благопло́дная Тоя́ ложесна́, я́ко село́ показа́ сла́дкое, всем хотя́щим жа́ти спасе́ние, внегда́ пе́ти си́це: Аллилу́иа.
Икос 3
Иму́щи Богоприя́тную Де́ва утро́бу, востече́ ко Елисаве́ти; младе́нец же о́ноя а́бие позна́в Сея́ целова́ние, ра́довашеся, и игра́ньми я́ко пе́сньми вопия́ше к Богоро́дице: Ра́дуйся, о́трасли неувяда́емыя розго́; ра́дуйся, плода́ безсме́ртнаго стяжа́ние. Ра́дуйся, де́лателя де́лающая Человеколю́бца; ра́дуйся, Сади́теля жи́зни на́шея ро́ждшая. Ра́дуйся, ни́во, растя́щая гобзова́ние щедро́т; ра́дуйся, трапе́зо, нося́щая оби́лие очище́ния. Ра́дуйся, я́ко рай пи́щный процвета́еши; ра́дуйся, я́ко приста́нище душа́м гото́виши. Ра́дуйся, прия́тное моли́твы кади́ло; ра́дуйся, всего́ ми́ра очище́ние. Ра́дуйся, Бо́жие к сме́ртным благоволе́ние; ра́дуйся, сме́ртных к Бо́гу дерзнове́ние. Ра́дуйся, Неве́сто Неневе́стная.
Кондак 4
Бу́рю внутрь име́я помышле́ний сумни́тельных, целому́дренный Ио́сиф смяте́ся, к Тебе́ зря небра́чней, и бракоокра́дованную помышля́я, Непоро́чная; уве́дев же Твое́ зача́тие от Ду́ха Свя́та, рече́: Аллилу́иа.
Икос 4
Слы́шаша па́стырие а́нгелов пою́щих плотско́е Христо́во прише́ствие, и те́кше я́ко к Па́стырю ви́дят Сего́ я́ко а́гнца непоро́чна, во чре́ве Мари́ине упа́сшася, Ю́же пою́ще ре́ша: Ра́дуйся, А́гнца и Па́стыря Ма́ти; ра́дуйся, дво́ре слове́сных ове́ц. Ра́дуйся, неви́димых враго́в муче́ние; ра́дуйся, ра́йских две́рей отверзе́ние. Ра́дуйся, я́ко небе́сная сра́дуются земны́м; ра́дуйся, я́ко земна́я сликовству́ют небе́сным. Ра́дуйся, апо́столов немо́лчная уста́; ра́дуйся, страстоте́рпцев непобеди́мая де́рзосте. Ра́дуйся, тве́рдое ве́ры утвержде́ние; ра́дуйся, све́тлое благода́ти позна́ние. Ра́дуйся, Е́юже обнажи́ся ад; ра́дуйся, Е́юже облеко́хомся сла́вою. Ра́дуйся, Неве́сто Неневе́стная.
Кондак 5
Боготе́чную звезду́ узре́вше волсви́, тоя́ после́доваша зари́ и, я́ко свети́льник держа́ще ю́, то́ю испыта́ху кре́пкаго Царя́, и, дости́гше Непостижи́маго, возра́довашася, Ему́ вопию́ще: Аллилу́иа.
Икос 5
Ви́деша о́троцы халде́йстии на руку́ Деви́чу созда́вшаго рука́ма челове́ки, и Влады́ку разумева́юще Его́, а́ще и ра́бий прия́т зрак, потща́шася дарми́ послужи́ти Ему́, и возопи́ти Благослове́нней: Ра́дуйся, Звезды́ незаходи́мыя Ма́ти; ра́дуйся, заре́ та́инственнаго дне. Ра́дуйся, пре́лести пещь угаси́вшая; ра́дуйся, Тро́ицы таи́нники просвеща́ющая. Ра́дуйся, мучи́теля безчелове́чнаго измета́ющая от нача́льства; ра́дуйся, Го́спода Человеколю́бца показа́вшая Христа́. Ра́дуйся, ва́рварскаго избавля́ющая служе́ния; ра́дуйся, тиме́ния изыма́ющая дел. Ра́дуйся, огня́ поклоне́ние угаси́вшая; ра́дуйся, пла́мене страсте́й изменя́ющая. Ра́дуйся, ве́рных наста́внице целому́дрия; ра́дуйся, всех родо́в весе́лие. Ра́дуйся, Неве́сто Неневе́стная.
Кондак 6
Пропове́дницы богоно́снии бы́вше волсви́, возврати́шася в Вавило́н, сконча́вше Твое́ проро́чество, и, пропове́давше Тя, Христа́, всем, оста́виша И́рода, я́ко буесло́вна, не ве́дуща пе́ти: Аллилу́иа.
Икос 6
Возсия́вый во Еги́пте просвеще́ние и́стины, отгна́л еси́ лжи тьму, и́доли бо его́, Спа́се, не терпя́ще Твоея́ кре́пости, падо́ша, сих же изба́вльшиися вопия́ху к Богоро́дице: Ра́дуйся, исправле́ние челове́ков; ра́дуйся, низпаде́ние бесо́в. Ра́дуйся, пре́лести держа́ву попра́вшая; ра́дуйся, и́дольскую лесть обличи́вшая. Ра́дуйся, мо́ре, потопи́вшее фарао́на мы́сленнаго; ра́дуйся, ка́меню, напои́вший жа́ждущия жи́зни. Ра́дуйся, о́гненный сто́лпе, наставля́яй су́щия во тьме; ра́дуйся, покро́ве ми́ру, ши́рший о́блака. Ра́дуйся, пи́ще, ма́нны прие́мнице; ра́дуйся, сла́дости святы́я служи́тельнице. Ра́дуйся, земле́ обетова́ния; ра́дуйся, из нея́же тече́т мед и млеко́. Ра́дуйся, Неве́сто Неневе́стная.
Кондак 7
Хотя́щу Симео́ну от ны́нешняго ве́ка преста́витися преле́стнаго, вда́лся еси́ я́ко Младе́нец тому́, но позна́лся еси́ ему́ и Бог соверше́нный. Те́мже удиви́ся Твое́й неизрече́нней прему́дрости, зовы́й: Аллилу́иа.
Икос 7
Но́вую показа́ тварь, я́влься Зи́ждитель нам от Него́ бы́вшим, из безсе́менныя прозя́б утро́бы, и сохрани́в Ю́, я́коже бе, нетле́нну, да, чу́до ви́дяще, воспое́м Ю́, вопию́ще: Ра́дуйся, цве́те нетле́ния; ра́дуйся, ве́нче воздержа́ния. Ра́дуйся, воскресе́ния о́браз облиста́ющая; ра́дуйся, а́нгельское житие́ явля́ющая. Ра́дуйся, дре́во светлоплодови́тое, от него́же пита́ются ве́рнии; ра́дуйся, дре́во благосенноли́ственное, и́мже покрываются мнози. Ра́дуйся, во чре́ве нося́щая Изба́вителя плене́нным; ра́дуйся, ро́ждшая Наста́вника заблу́дшим. Ра́дуйся, Судии́ Пра́веднаго умоле́ние; ра́дуйся, мно́гих согреше́ний проще́ние. Ра́дуйся, оде́ждо наги́х дерзнове́ния; ра́дуйся, любы́, вся́кое жела́ние побежда́ющая. Ра́дуйся, Неве́сто Неневе́стная.
Кондак 8
Стра́нне рождество́ ви́девше, устрани́мся ми́ра, ум на небеса́ прело́жше: сего́ бо ра́ди высо́кий Бог на земли́ яви́ся смире́нный Челове́к, хотя́й привлещи́ к высоте́ Тому́ вопию́щия: Аллилу́иа.
Икос 8
Весь бе в ни́жних и вы́шних ника́коже отступи́ неопи́санное Сло́во: снизхожде́ние бо Боже́ственное, не прехожде́ние же ме́стное бысть, и рождество́ от Де́вы Богоприя́тныя, слы́шащия сия́: Ра́дуйся, Бо́га невмести́маго вмести́лище; ра́дуйся, честна́го та́инства две́ри. Ра́дуйся, неве́рных сумни́тельное слы́шание; ра́дуйся, ве́рных изве́стная похвало́. Ра́дуйся, колесни́це пресвята́я Су́щаго на херуви́мех; ра́дуйся, селе́ние пресла́вное Су́щаго на серафи́мех. Ра́дуйся, проти́вная в то́жде собра́вшая; ра́дуйся, де́вство и ро́ждество сочета́вшая. Ра́дуйся, Е́юже разреши́ся преступле́ние; ра́дуйся, Е́юже отве́рзеся рай. Ра́дуйся, ключу́ Ца́рствия Христо́ва; ра́дуйся, наде́ждо благ ве́чных. Ра́дуйся, Неве́сто Неневе́стная.
Кондак 9
Вся́кое естество́ а́нгельское удиви́ся вели́кому Твоего́ вочелове́чения де́лу; непристу́пнаго бо я́ко Бо́га, зря́ще всем присту́пнаго Челове́ка, нам у́бо спребыва́юща, слы́шаща же от всех: Аллилу́иа.
Икос 9
Вети́и многовеща́ннии, я́ко ры́бы безгла́снии, ви́дим о Тебе́, Богоро́дице, недоумева́ют бо глаго́лати, е́же ка́ко и Де́ва пребыва́еши, и роди́ти возмогла́ еси́. Мы же, та́инству дивя́щеся, ве́рно вопие́м: Ра́дуйся, прему́дрости Бо́жия прия́телище; ра́дуйся, промышле́ния Его́ сокро́вище. Ра́дуйся, любому́дрыя нему́дрыя явля́ющая; ра́дуйся, хитрослове́сныя безслове́сныя облича́ющая. Ра́дуйся, я́ко обуя́ша лю́тии взыска́теле; ра́дуйся, я́ко увядо́ша баснотво́рцы. Ра́дуйся, афине́йская плете́ния растерза́ющая; ра́дуйся, ры́барския мре́жи исполня́ющая. Ра́дуйся, из глубины́ неве́дения извлача́ющая; ра́дуйся, мно́ги в ра́зуме просвеща́ющая. Ра́дуйся, кораблю́ хотя́щих спасти́ся; ра́дуйся, приста́нище жите́йских пла́ваний. Ра́дуйся, Неве́сто Неневе́стная.
Кондак 10
Спасти́ хотя́ мир, И́же всех Украси́тель к сему́ самообетова́н прии́де и, Па́стырь сый, я́ко Бог, нас ра́ди яви́ся по нам челове́к: подо́бным бо подо́бное призва́в, я́ко Бог слы́шит: Аллилу́иа.
Икос 10
Стена́ еси́ де́вам, Богоро́дице Де́во, и всем к Тебе́ прибега́ющим, и́бо небесе́ и земли́ Творе́ц устро́и Тя, Пречи́стая, все́лься во утро́бе Твое́й, и вся приглаша́ти Тебе́ научи́: Ра́дуйся, сто́лпе де́вства; ра́дуйся, дверь спасе́ния. Ра́дуйся, нача́льнице мы́сленнаго назда́ния; ра́дуйся, пода́тельнице Боже́ственныя бла́гости. Ра́дуйся, Ты бо обнови́ла еси́ зача́тыя сту́дно; ра́дуйся, Ты бо наказа́ла еси́ окра́денныя умо́м. Ра́дуйся, тли́теля смы́слов упраждня́ющая; ра́дуйся, Се́ятеля чистоты́ ро́ждшая. Ра́дуйся, черто́же безсе́меннаго уневе́щения; ра́дуйся, ве́рных Го́сподеви сочета́вшая. Ра́дуйся, до́брая младопита́тельнице де́вам; ра́дуйся, невестокраси́тельнице душ святы́х. Ра́дуйся, Неве́сто Неневе́стная.
Кондак 11
Пе́ние вся́кое побежда́ется, спростре́тися тща́щееся ко мно́жеству мно́гих щедро́т Твои́х: равночи́сленныя бо песка́ пе́сни а́ще прино́сим Ти, Царю́ Святы́й, ничто́же соверша́ем досто́йно, я́же дал еси́ нам, Тебе́ вопию́щим: Аллилу́иа.
Икос 11
Светоприе́мную свещу́, су́щим во тьме я́вльшуюся, зрим Святу́ю Де́ву; невеще́ственный бо вжига́ющи огнь, наставля́ет к ра́зуму Боже́ственному вся, заре́ю ум просвеща́ющая, зва́нием же почита́емая, си́ми: Ра́дуйся, лу́че у́мнаго Со́лнца; ра́дуйся, свети́ло незаходи́маго Све́та. Ра́дуйся, мо́лние, ду́ши просвеща́ющая; ра́дуйся, я́ко гром враги́ устраша́ющая. Ра́дуйся, я́ко многосве́тлое возсиява́еши просве́щение; ра́дуйся, я́ко многотеку́щую источа́еши реку́. Ра́дуйся, купе́ли живопису́ющая о́браз; ра́дуйся, грехо́вную отъе́млющая скве́рну. Ра́дуйся, ба́не, омыва́ющая со́весть; ра́дуйся, ча́ше, че́рплющая рa€дость. Ра́дуйся, обоня́ние Христо́ва благоуха́ния; ра́дуйся, животе́ та́йнаго весе́лия. Ра́дуйся, Неве́сто Неневе́стная.
Кондак 12
Благода́ть да́ти восхоте́в, долго́в дре́вних, всех долго́в Реши́тель челове́ком, прии́де Собо́ю ко отше́дшим Того́ благода́ти, и раздра́в рукописа́ние, слы́шит от всех си́це: Аллилу́иа.
Икос 12
Пою́ще Твое́ рождество́, хва́лим Тя вси, я́ко одушевле́нный храм, Богоро́дице: во Твое́й бо всели́вся утро́бе содержа́й вся руко́ю Госпо́дь, освяти́, просла́ви и научи́ вопи́ти Тебе́ всех: Ра́дуйся, селе́ние Бо́га и Сло́ва; ра́дуйся, свята́я святы́х бо́льшая. Ра́дуйся, ковче́же, позлаще́нный Ду́хом; ра́дуйся, сокро́вище живота́ неистощи́мое. Ра́дуйся, честны́й ве́нче люде́й благочести́вых; ра́дуйся, честна́я похвало́ иере́ев благогове́йных. Ра́дуйся, це́ркве непоколеби́мый сто́лпе; ра́дуйся, Ца́рствия неруши́мая стено́. Ра́дуйся, Е́юже воздви́жутся побе́ды; ра́дуйся, Е́юже низпа́дают вра́зи. Ра́дуйся, те́ла моего́ врачева́ние; ра́дуйся, ду́ши моея́ спасе́ние. Ра́дуйся, Неве́сто Неневе́стная.
Кондак 13
О Всепе́тая Ма́ти, ро́ждшая всех святы́х Святе́йшее Сло́во! Ны́нешнее прие́мши приноше́ние, от вся́кия изба́ви напа́сти всех, и бу́дущия изми́ му́ки, о Тебе́ вопию́щих: Аллилу́иа.
Этот кондак читается трижды, затем 1-й икос: «А́нгел предста́тель…» и 1-й кондак: «Взбра́нной Воево́де…»
Молитвы
О Пресвята́я Госпоже́ Влады́чице Богоро́дице, вы́шши еси́ все́х а́нгел и арха́нгел, и всея́ тва́ри честне́йши, помо́щнице еси́ оби́димых, ненаде́ющихся наде́яние, убо́гих засту́пнице, печа́льных утеше́ние, а́лчущих корми́тельнице, наги́х оде́яние, больны́х исцеле́ние, гре́шных спасе́ние, христиа́н всех поможе́ние и заступле́ние. О Всеми́лостивая Госпоже́, Де́во Богоро́дице Влады́чице, ми́лостию Твое́ю спаси́ и поми́луй святе́йшия патриа́рхи правосла́вныя, преосвяще́нныя митрополи́ты, архиепи́скопы и епи́скопы и весь свяще́ннический и и́ноческий чин, и вся правосла́вныя христиа́ны ри́зою Твое́ю честно́ю защити́; и умоли́, Госпоже́, из Тебе́ без се́мене воплоти́вшагося Христа́ Бо́га на́шего, да препоя́шет нас си́лою Свое́ю свы́ше, на неви́димыя и ви́димыя враги́ на́ша. О Всеми́лостивая Госпоже́ Влады́чице Богоро́дице! Воздви́гни нас из глубины́ грехо́вныя и изба́ви нас от гла́да, губи́тельства, от тру́са и пото́па, от огня́ и ме́ча, от нахожде́ния иноплеме́нных и междоусо́бныя бра́ни, и от напра́сныя сме́рти, и от нападе́ния вра́жия, и от тлетво́рных ветр, и от смертоно́сныя я́звы, и от вся́каго зла. Пода́ждь, Госпоже́, мир и здра́вие рабо́м Твои́м, всем правосла́вным христиа́ном, и просвети́ им ум, и о́чи серде́чнии, е́же ко спасе́нию; и сподо́би ны, гре́шныя рабы́ Твоя́, Ца́рствия Сы́на Твоего́, Христа́ Бо́га на́шего; я́ко держа́ва Его́ благослове́на и препросла́влена со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
О Пресвята́я Де́во Ма́ти Го́спода, Цари́це небесе́ и земли́! Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас, с ве́рою и любо́вию покланя́ющихся пречи́стому о́бразу Твоему́. Се бо грехми́ погружа́емии и скорбьми́ обурева́емии, взира́я на Твой о́браз, я́ко живе́й Ти су́щей с на́ми, прино́сим смире́нныя моле́ния на́ша. Не и́мамы бо ни ины́я по́мощи, ни ина́го предста́тельства, ни утеше́ния, токмо́ Тебе́, о Ма́ти всех скорбя́щих и обремене́нных. Помози́ нам немощны́м, утоли́ скорбь на́шу, наста́ви на путь пра́вый нас, заблужда́ющих, уврачу́й и спаси́ безнаде́жных, да́руй нам про́чее вре́мя живота́ на́шего в ми́ре и тишине́ проводи́ти, пода́ждь христиа́нскую кончи́ну, и на Стра́шнем Суде́ Сы́на Твоего́ яви́ся нам милосе́рдая Засту́пница, да всегда́ пое́м, велича́ем и сла́вим Тя, я́ко благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.
Акафист
Успению Пресвятой Богородицы
(празднование 15/28 августа)
Кондак 1
Избра́нной от всех родо́в Бо́жией Ма́тери и Цари́це, восходя́щей от земли́ к небеси́, благогове́йная пе́ния о пречестне́м Твое́м успе́нии прино́сим раби́ Твои́, Богоро́дице. Ты же, я́ко иму́щая побе́ду над сме́ртию, от вся́ких нас смертоно́сных бед свободи́, да зове́м Ти: Ра́дуйся, Обра́дованная, во успе́нии Твое́м нас не оставля́ющая.
Икос 1
А́нгел предста́тель по́слан бысть рещи́ Богоро́дице ко преми́рным Ея́ возше́ствие и приити́ предъявля́ше к Ней Сы́ну Ея́ и Бо́гу, све́тло о Ней блиста́яся и стоя́, зовы́й такова́я: Ра́дуйся, прера́дованная Ма́ти Царе́ва; ра́дуйся, Небе́сная Цари́це, Ма́ти Бо́га и Го́спода небесе́ и земли́. Ра́дуйся, предпочте́нная превели́чеством прише́ствия к Тебе́ Сы́на Твоего́ и Бо́га; ра́дуйся, возвели́ченная извеще́нием Твоего́ к Сы́ну отше́ствия. Ра́дуйся, от всех родо́в Бо́гом избра́нная; ра́дуйся, свято́е вмести́лище Сло́ва Бо́жия. Ра́дуйся, проро́ческаго прорече́ния исполне́ние; ра́дуйся, апо́столом пречестны́й ве́нче. Ра́дуйся, святи́телем украше́ние и свяще́нником добро́то; ра́дуйся, прави́телем удобре́ние и держа́во. Ра́дуйся, богому́дрых и́ноков возведе́ние к го́рнему Ца́рствию; ра́дуйся, отверза́ющая ра́йския две́ри христиа́нскому ро́ду, при́сно Тя блажа́щему. Ра́дуйся, Обра́дованная, во успе́нии Твое́м нас не оставля́ющая.
Кондак 2
Ви́дяще апо́столов лик, всеси́льным манове́нием от коне́ц земли́ на о́блацех предста́вших ко пречестно́му Твоему́, Пренепоро́чная, успе́нию, священнонача́льницы: Диони́сий – небе́сный таи́нник, Иерофе́й ди́вный и Тимофе́й с боголе́пною че́стию свяще́нства поя́ху Бо́гу: Аллилу́иа.
Икос 2
Разу́мная вся тварь, старе́йшая чинонача́лия а́нгельская приидо́ша со свои́м Царе́м, И́же во Своя́ живонача́льнейшия ру́це ду́шу Ма́тере Своея́ прия́т; те́плый же ве́рою Петр со слеза́ми мно́гая к Ней изрече́, зовы́й: Ра́дуйся, ко преми́рным, Ма́ти Творца́ ми́ру, восходя́щая; ра́дуйся, к пренебе́сным, простра́ннейшая небе́с, взе́млющаяся. Ра́дуйся, четвероча́стное стихи́й освяти́вшая Твои́м восхожде́нием; ра́дуйся, не́бесных возвесели́вшая Твои́м прехожде́нием. Ра́дуйся, во Иерусали́м го́рний прекра́сный прия́тая; ра́дуйся, в нерукотворе́нныя хра́мы прера́достно вше́дшая. Ра́дуйся, херуви́мов и серафи́мов Цари́це; ра́дуйся, арха́нгелов Влады́чице. Ра́дуйся, прибе́жище ве́рных и избавле́ние; ра́дуйся, достоя́нию Твоему́ по́мощь и защище́ние. Ра́дуйся, о всем ми́ре христиа́нстем к Бо́гу Хода́таице; ра́дуйся, благ вся́ческих Всеблага́я Пода́тельнице. Ра́дуйся, Обра́дованная, во успе́нии Твое́м нас не оставля́ющая.
Кондак 3
Си́ла Вы́шняго восхи́ти от И́ндии Фому́, за не́кое изволе́ние Бо́жие не прилу́чшуся ему́ в пречестно́е успе́ние Богома́тере, и предпоста́ви живоприе́мному Ея́ гро́бу, и́же, преста́вльшуюся прини́к ви́дети, уразуме́ вознесе́нную на небеса́ с те́лом и, ве́ровав, о сем возопи́: Аллилу́иа.
Икос 3
Име́я в себе́ помышле́ние учени́к, я́ко Бо́жиим смотре́нием бе ему́ не обрести́ся ко провожде́нию Богома́тере с про́чими вку́пе, обра́дован быв о безсме́ртнем Ея́ успе́нии, сия́ вопия́ше к Ней: Ра́дуйся, восприе́млемая от земли́ дла́ньма Сы́на Твоего́; ра́дуйся, ко превы́шним возше́дшая наслажда́тися сла́вы Его́. Ра́дуйся, провожда́емая от всех чинонача́лий а́нгельских в Го́рняя; ра́дуйся, подъе́млемая херуви́мы в небе́сная и наднебе́сная. Ра́дуйся, в небе́сных врате́х от старе́йших сил велеле́пно пе́сньми возноси́мая; ра́дуйся, от всех небе́сных гра́ждан окружа́емая и блажи́мая. Ра́дуйся, Не́бо земно́е, к го́рнему селе́нию возвы́шенное; ра́дуйся, Престо́ле Госпо́день, от земли́ вознесе́нный в Ца́рствие Небе́сное. Ра́дуйся, предста́тельство на́ше и кре́пкое заступле́ние; ра́дуйся, гре́шником Спору́чнице во спасе́ние. Ра́дуйся, христиа́ном Цари́це и по Бо́зе наде́ждо Небе́снаго Ца́рствия; ра́дуйся, Ма́ти живота́ и по Го́споде нам упова́ние жи́зни ве́чныя. Ра́дуйся, Обра́дованная, во успе́нии Твое́м нас не оставля́ющая.
Кондак 4
Бу́рю внутрь име́я помышле́ний неве́рных евре́ин Аффо́ний, и зря богоно́сными апо́столы Богома́тере пречестно́е те́ло всече́стне ко гро́бу несе́нное, ко опроверже́нию устреми́ся; внеза́пу же, егда́ со ослепле́нием о́чию ру́це его́ отъя́те ко одру́ прилепле́не ви́сясте, ве́рою Ма́терь Бо́жию испове́даше, вопия́ Бо́гу: Аллилу́иа.
Икос 4
Слы́шавше таи́нницы и самови́дцы Сло́ва а́нгелов, пою́щих превы́шними пе́сньми при погребе́нии богоприя́тнаго те́ла Бо́жия Ма́тере, и честь пода́ти хотя́ще богоуго́дную, потща́шася согла́сно пе́ти, глаго́люще: Ра́дуйся, благове́стие прие́мшая о преше́ствии Твое́м в Го́рнее Ца́рствие; ра́дуйся, от благовести́вшаго Гаврии́ла прие́мшая ра́достнаго рая́ вра́вие. Ра́дуйся, пречестно́е херуви́мское мно́жество просвети́вшая; ра́дуйся, пресла́вное серафи́мское естество́ возра́довавшая. Ра́дуйся, от патриа́рхов прообразова́нная; ра́дуйся, от проро́ков предвозвеще́нная. Ра́дуйся, злую де́рзость Аффо́ниеву ско́ро отмсти́вшая; ра́дуйся, исцеле́ние тому́жде пода́вшая. Ра́дуйся, обрати́вшая в ве́ру Аффо́ниево неве́рие; ра́дуйся, ве́рное того́ прие́мшая испове́дание. Ра́дуйся, возводя́щая к небеси́ любо́вь и ве́ру к Тебе́ иму́щих; ра́дуйся, спаса́ющая ве́рою и́мя Твое́ призыва́ющих. Ра́дуйся, Обра́дованная, во успе́нии Твое́м нас не оставля́ющая.
Кондак 5
Боготе́чныя звезды́, апо́столи святи́и, в поднебе́сней разсе́яннии ра́ди Ева́нгелия, восхище́ни бы́ша на о́блацех, по широте́ возду́шней, ко погребе́нию Ма́тере Госпо́дни, Ю́же пе́ньми и пе́сньми провожда́юще, с невеще́ственными взыва́ху: Аллилу́иа.
Икос 5
Ви́девше богови́дцы своего́ Влады́ку, в ру́це Ма́тере Своея́ ду́шу прие́мша, и Го́спода Того́ разуме́вше, потща́шася священносло́вия пе́сньми благосло́вне воспе́ти Ю́: Ра́дуйся, Цари́це, над все́ми Ца́рствующаго носи́вшая; ра́дуйся, и Сама́ рука́ма Его́ сыно́внима носи́мая. Ра́дуйся, ски́птре ца́рский в Христо́вой десни́це; ра́дуйся, в руце́ Но́я ве́тве голуби́цы. Ра́дуйся, же́зле Ааро́нов, прозя́бший нетле́ние; ра́дуйся, кри́не неувядае́мый, процве́тший безсме́ртие. Ра́дуйся, Богоотца́ Дави́да цевни́це богодохнове́нная; ра́дуйся, проро́чествия его́ возста́вшая сло́во, псалти́рю и гу́сли прекра́сныя. Ра́дуйся, одушевле́нный святы́ни Госпо́дни киво́те; ра́дуйся, в поко́й Госпо́день воскре́сший наш животе́. Ра́дуйся, ски́ние, от херуви́мов осеня́емая; ра́дуйся, Свята́я святы́х, от серафи́мов глаго́лемая. Ра́дуйся, Обра́дованная, во успе́нии Твое́м нас не оставля́ющая.
Кондак 6
Пропове́дницы богоно́снии апо́столи, по отше́ствии ко преми́рным Бо́жия Ма́тере во о́бщем седе́нии обы́чныя трапе́зы бы́вше и предложе́ние ча́сти хле́ба во и́мя Госпо́дне вознося́ще, внеза́пу свы́ше Богоро́дицу Цари́цу, прише́дшую со светоно́сными а́нгелы, зря́ху и, мир тем от Сы́на и Бо́га пода́вшую слы́шавше, возгласи́ша о сем: Аллилу́иа.
Икос 6
Возсия́ нам Со́лнце пра́вды, Христо́с Бог от Твои́х пречи́стых ложе́сн, во́лею и благоразу́мием пропове́дания чрез апо́столы мир просвети́ и Тя, Богома́терь, от ро́да и в род просла́ви. Те́мже и мы вси ублажа́ем Тя, вопию́ще Ти: Ра́дуйся, приснобла́женная от всех родо́в во ве́ки; ра́дуйся, благоутро́бная и ми́лостивая на челове́ки. Ра́дуйся, учени́ческому ли́ку обеща́ние испо́лнившая; ра́дуйся, присеще́нием Твои́м от Сы́на Твоего́ и Бо́га мир тому́ пода́вшая. Ра́дуйся, всежела́тельное святы́х и сла́дкое зре́ние; ра́дуйся, преподо́бных матере́й и дев святы́х всевеселя́щее ра́дование. Ра́дуйся, преходя́щая ра́йское селе́ние пра́ведных; ра́дуйся, посеща́ющая всех во сла́ве небе́сней су́щих. Ра́дуйся, нача́ло челове́ческаго спасе́ния; ра́дуйся, исполне́ние всех благи́х жела́ния. Ра́дуйся, по Бо́зе, Царе́ ца́рствующих, Богоро́дице Цари́це; ра́дуйся, по Го́споде госпо́дствующих, Влады́це на́шем, Госпоже́ и Влады́чице. Ра́дуйся, Обра́дованная, во успе́нии Твое́м нас не оставля́ющая.
Кондак 7
Хотя́щих всех с ве́рою входи́ти в храм Твой святы́й, Бого́родице, при́сно спаса́еши и сла́вящих Тя от вся́ких напа́стей и бед свобожда́еши; те́мже и благове́рным лю́дем, присноблажа́щим Тя, побе́ды на сопроти́вныя да́руй и вся ко спасе́нию проше́ния нам подава́й, о сем моля́щимся Тебе́ и пою́щим Бо́гу: Аллилу́иа.
Икос 7
Но́вую показа́ тварь, я́влься нам, всех Творе́ц Госпо́дь Тобо́ю, Богоро́дице. Ты же сро́дное промышле́ние о нас к Нему́ иму́щи, че́стне почита́ющих пречестно́е Твое́ успе́ние, приими́ сицева́я Тебе́ вопию́щих: Ра́дуйся, Ма́ти Бо́гу, избра́нная от земны́х; ра́дуйся, превы́шшая земны́х и небе́сных. Ра́дуйся, херуви́мов и серафи́мов горе́ превозше́дшая; ра́дуйся, лик учени́ческий о́блаком ко погребе́нию Ти до́ле совоку́пльшая. Ра́дуйся, Фому́ по погребе́нии Твое́м си́лою Бо́жиею предпоста́вившая изря́днее; ра́дуйся, чрез него́ уве́рившая Твое́ на не́бо с пло́тию преселе́ние. Ра́дуйся, красото́ю всех доброде́телей укра́шенная; ра́дуйся, красне́йшему па́че сыно́в челове́ческих Сы́нови Своему́ сопричте́нная. Ра́дуйся, я́ко фи́никс, пло́тию воскре́сшею процве́тшая; ра́дуйся, я́ко кедр в Лива́не небе́сном, умно́жившаяся. Ра́дуйся, дре́во живота́, насажде́нное посреде́ рая́ превы́шняго; ра́дуйся, ковче́же мы́сленный возвы́шенный в го́рняя от пото́па сме́ртнаго. Ра́дуйся, Обра́дованная, во успе́нии Твое́м нас не оставля́ющая.
Кондак 8
Стра́нно в превы́шних ве́дуще Тя, Избра́нная, я́ко со́лнце, Влады́чице, внутрь пренебе́сных недомы́слимых красо́т и неизрече́нных добро́т, уми́льно к Сы́ну и Бо́гу, дла́ньма Его́ держи́му, возше́дшую и прера́достно прекло́ньшуюся живонача́льней Его́ десни́це, о сем непреста́нно вопие́м: Аллилуиа.
Икос 8
Вся бы́вши горе́, к небе́сным взята́ и, земны́х не оставля́ющи, Богома́ти, рука́ма сыно́внима носи́ма, в незаходи́мая вни́де, во о́ный град всесветя́щий и прекра́сный, Иерусали́м вы́шний, херуви́мы обстои́ма со все́ми Небе́сными Си́лами, иде́же слы́шит пою́щих сия́: Ра́дуйся, Ея́же пресвята́я душа́ в вы́шнем всесве́тлом Сио́не вселя́ется; ра́дуйся, Ея́же и нетле́нное те́ло та́можде с душе́ю ку́пно прославля́ется. Ра́дуйся, вше́дшая в престо́льный град Самаго́ Вседержи́теля; ра́дуйся, возне́сшаяся в прекра́сный рай Вы́шняго Насади́теля. Ра́дуйся, пренесе́нная во град, основа́нный от ка́меней всесветя́щих; ра́дуйся, введе́нная во огра́ду, обстои́мую во́и сил превы́шних. Ра́дуйся, превы́шше небе́с во благоле́пие Бо́жие взя́тая; ра́дуйся, па́че всех невеще́ственных умо́в почте́нная. Ра́дуйся, принося́щая к Сы́ну Своему́ и Бо́гу моле́ние ве́рных; ра́дуйся, и Сама́ непреста́нно у Престо́ла Сы́на Твоего́ и Бо́га моля́щаяся о всех. Ра́дуйся, Предста́тельнице к Бо́гу, мир спаса́ющая; ра́дуйся, Засту́пнице, ро́ду христиа́нскому от Бо́га дарова́нная. Ра́дуйся, Обра́дованная, во успе́нии Твое́м нас не оставля́ющая.
Кондак 9
Вся́кое естество́ а́нгельское превозно́сит Тя, Богоро́дице, челове́честии же ро́ди вси Ма́терь Тя Бо́жию сла́вим и почита́ем пречестно́е Твое́ успе́ние, Цари́це: Тебе́ бо ра́ди земни́и небе́сным совокупля́ются, согла́сно пою́ще Бо́гу: Аллилу́иа.
Икос 9
Вети́йства боговеща́нных проро́ческих рече́ний ны́не зрим о Тебе́ сбы́вшаяся, Богоро́дице, я́ко вои́стину Бо́га пло́тию родила́ еси́ нам. Те́мже та́инству словесе́ Бо́жия ве́рующе, вопие́м: Ра́дуйся, зако́на и проро́ков глави́зно соверше́нная; ра́дуйся, звездо́ Иа́ковля, Валаа́мом пророкова́нная. Ра́дуйся, о́дре Царя́ Вели́каго, веща́нный Соло́моном; ра́дуйся, руно́, ороше́нное Иису́сом, образова́нное Гедео́ном. Ра́дуйся, Неопали́мая Купино́, законополо́жником предзри́мая; ра́дуйся, горо́ свята́я, му́жем жела́ния усмотре́нная. Ра́дуйся, ле́ствице небе́сная, Иа́ковом предви́димая; ра́дуйся, две́ре непроходи́мая, Иезеки́илем предзри́мая. Ра́дуйся, со́лнце селе́ния Христо́ва, псалмопе́вцем предъявле́нное; ра́дуйся, та́инство, многообра́зне проро́ки пронарече́нное. Ра́дуйся, проро́ческих глаго́л всех, предрече́нных о Тебе́, коне́ц прине́сшая; ра́дуйся, Вы́шняго смотре́ния вся за спасе́ние ми́ра соверши́вшая. Ра́дуйся, Обра́дованная, во успе́нии Твое́м нас не оставля́ющая.
Кондак 10
Спасти́ хотя́ мир, И́же всех Госпо́дь от земна́го Тя ро́да избра́ в Ма́терь Себе́ и, нас ра́ди быв челове́к, взы́де, отню́дуже сни́де, к небеси́ от земли́, и Тебе́ с Собо́ю возведе́ ко пребыва́нию во сла́ве ве́чней и соца́рствованию с Собо́ю, конца́ не иму́щему. Те́мже, я́ко Бог, слы́шит от всех: Аллилу́иа.
Икос 10
Стена́ еси ве́рным, Богоро́дице Де́во, и заступле́ние всем, к Тебе́ прибега́ющим, и́бо небесе́ и земли́ Творе́ц, от Тебе́ пло́тию проше́д, Пречи́стая, ду́хом и те́лом в небе́сная Тя пресели́, ко ближа́йшему предста́тельству о всех, и́хже приглаша́ти научи́: Ра́дуйся, гра́де Царя́ Вели́каго верху́ горы́ небе́сныя; ра́дуйся, стено́ и покро́ве, не кры́ющийся от на́шего притека́ния. Ра́дуйся, ве́рным на враги́ посо́бствующая; ра́дуйся, наше́ствия ага́рянская побежда́ющая. Ра́дуйся, ве́ры благочести́выя недви́жимое сохране́ние; ра́дуйся, ерети́чествующих полко́в разоре́ние. Ра́дуйся, ра́дость и умире́ние ми́ру су́щая; ра́дуйся, всегуби́тельнаго а́да попра́вшая. Ра́дуйся, вои́нствующих на плоть целому́дрием изря́дное венча́ние; ра́дуйся, му́ченических по́двигов всечестно́е прославле́ние. Ра́дуйся, преподо́бных трудо́м Хода́таице блаже́ннаго упокое́ния; ра́дуйся, и́ноком благоскорбя́щим Пода́тельнице ве́чнаго ра́дования. Ра́дуйся, Обра́дованная, во успе́нии Твое́м нас не оставля́ющая.
Кондак 11
Пе́ние вся́кое богодухнове́нных пе́сней не довле́ет от нас ко похвале́ всечестна́го успе́ния Твоего́, всехва́льная Влады́чице, Цари́це Богоро́дице, но усе́рдно Тебе́ прино́сим, я́ко Ма́тери Царя́ всех, смире́нное моле́ние на́ше, с небе́сными чи́нми пою́ще еди́ному досто́йно прославля́ющему Тя Бо́гу: Аллилу́иа.
Икос 11
Светоприе́мная свеща́ и́стиннаго Све́та су́щим нам на земли́ я́вльшися, ду́ши просвеща́еши и чту́щих Твое́ всечестно́е преставле́ние к ра́зуму боже́ственному наставля́еши, да пое́м Ти сицева́я: Ра́дуйся, свеще́ неугаси́мая огня́ невеще́ственнаго; ра́дуйся, заре́ незаходи́мая Све́та невече́рняго. Ра́дуйся, луно́, от Со́лнца пра́вды облистава́емая; ра́дуйся, све́тлосте, во тьме светя́щая. Ра́дуйся, свети́льниче, на све́щнице превы́шнем поста́вленный; ра́дуйся, исто́чниче жи́зни, из гро́ба во свет изведе́нный. Ра́дуйся, Ма́ти Све́та у́мнаго, благочести́вых ду́ши просвеща́ющаго; ра́дуйся, Ма́ти всех Бо́га, озло́бленных ду́ши утеша́ющаго. Ра́дуйся, упова́ющим на Тя живота́ коне́ц непосты́дный да́рующая; ра́дуйся, достоя́ние Бо́жиим и Свои́м рабо́м на Суде́ Сы́на Твоего́ одесну́ю Его́ устроя́ющая. Ра́дуйся, Преблаже́нная, я́ко Тобо́ю блаже́ни есмы́ и мы, и́же Помо́щницу Тя и́мамы; ра́дуйся, Преблагослове́нная в род и род, я́ко Госпо́дь с Тобо́ю, и Тобо́ю с на́ми. Ра́дуйся, Обра́дованная, во успе́нии Твое́м нас не оставля́ющая.
Кондак 12
Благода́ть высокопресто́льныя сла́вы, на небесе́х дарова́нную Богома́тери, почте́нной седе́нием одесну́ю Сы́на Ея́ и Бо́га ви́дяще го́рнии умы́, подъя́ша Ю́ престо́ли и си́лы, окружи́ша нача́ла и вла́сти, припадо́ша стра́шнии херуви́ми, серафи́ми и госпо́дства, со арха́нгелы и а́нгелы вопию́ще: Аллилу́иа.
Икос 12
Пою́ще всечестно́е Твое́ успе́ние, восхваля́ем вси ко пренебе́сным возсше́ствие Твое́, Цари́це Богома́ти. Ты же освяти́, просла́ви и спаси́ всех, любо́вию пою́щих Тебе́: Ра́дуйся, очи́стившая зе́млю пречи́стыми ног Твои́х стопа́ми; ра́дуйся, освяти́вшая возду́х восхожде́нием Твои́м к небеси́. Ра́дуйся, на небе́сный круг возступи́вшая; ра́дуйся, вся добро́ты неизрече́нныя зря́щая. Ра́дуйся, во сла́ве приседя́щая Престо́лу Сы́на Твоего́ и Бо́га; ра́дуйся, с Сы́ном и Бо́гом ве́чно ца́рствующая. Ра́дуйся, красото́ в десни́це Госпо́дней, украша́ющая блажа́щих Тя всех небе́сных; ра́дуйся, обра́довавшая наде́янием на Тя всех земны́х. Ра́дуйся, облече́нная в со́лнце, сия́ющая благода́тию и сла́вою всей вселе́нней; ра́дуйся, обеща́вшая сохраня́ти и спаса́ти призыва́ющих Тя всех в поднебе́сней. Ра́дуйся, от христиа́нских родо́в Ма́ти Бо́жия почита́емая и Богоро́дица имену́емая; ра́дуйся, от восто́к со́лнца до за́пад пресла́вно и правосла́вно от всех благочести́вых сла́вимая. Ра́дуйся, Обра́дованная, во успе́нии Твое́м нас не оставля́ющая.
Кондак 13
О Всепе́тая Ма́ти Безсме́ртнаго Царя́ небесе́ и земли́, Христа́ Бо́га на́шего, живу́щая и по сме́рти, ны́нешняя приноше́ния о всечестне́м Твое́м успе́нии от нас прие́мши, в жи́зни сей и в сме́ртнем успе́нии на́шем от вся́кия напа́сти, бед и му́ки изба́ви и Небе́снаго Ца́рствия нас, Цари́це, сподо́би, о Тебе́ вопию́щих: Аллилу́иа.
Этот кондак читается трижды, затем 1-й икос: «А́нгел предста́тель…» и 1-й кондак: «Избра́нной от всех родо́в…»
Молитва
О Пресвята́я Бого́родице Де́во, Влады́чице, вы́шшая а́нгел и арха́нгел и всея тва́ри честне́йшая, а́нгельское вели́кое удивле́ние, проро́ческая высо́кая про́поведь, апо́стольская пресла́вная похвало́, святи́телей изря́дное украше́ние, му́чеников кре́пкое утвержде́ние, и́ноков спаси́тельное наставле́ние, по́стников неизнемога́ющее воздержа́ние, де́вствующих чистото́ и сла́во, матере́й ти́хое весе́лие, младе́нцев му́дросте и наказа́ние, вдови́ц и си́рых корми́тельнице, наги́х оде́яние, боля́щих здра́вие, пле́нников избавле́ние, по мо́рю пла́вающих тишино́, обурева́емых небу́рное приста́нище, блужда́ющих нетру́дная наста́внице, путеше́ствующих ле́гкое прохожде́ние, тружда́ющихся благо́е поко́ище, в беда́х су́щих ско́рая Засту́пнице, оби́димых покро́ве и прибе́жище, ненаде́ющихся наде́яние, тре́бующих Помо́щнице, печа́льных при́сное утеше́ние, ненави́димых любо́вное смире́ние, гре́шников спасе́ние и к Бо́гу присвое́ние, правове́рных всех тве́рдое огражде́ние, непобеди́мое поможе́ние и заступле́ние! Тобо́ю нам, Влады́чице, Неви́димый ви́дим бысть, и Тебе́ мольбу́ прино́сим, Госпоже́, гре́шнии раби́ Твои́: О Преми́лостивая и Пречу́дная Све́та у́мнаго Цари́це, ро́ждшая Царя́ Христа́, Бо́га на́шего, Живода́вца всех, от небе́сных сла́вимая и от земны́х хвали́мая, а́нгельский у́ме, светоза́рная звездо́, святы́х Пресвяте́йшая, Влады́чице всех тва́рей, Боголе́пная, Нескве́рная Неве́сто, пала́то Ду́ха Пресвята́го, о́гненный Престо́ле Неви́димаго Царя́, небе́сный киво́те, носи́ло Сло́ва Бо́жия, огнеобра́зная колесни́це, поко́ище жива́го Бо́га, неизрече́нное составле́ние пло́ти Христо́вы, гнездо́ Орла́ Небе́снаго, Го́рлице Богогла́сная, Голуби́це кро́ткая, ти́хая и незло́бивая, Ма́ти чадолюби́вая, ми́лостей бе́здно, разверга́ющая ту́чу гне́ва Бо́жия, неизмери́мая глуби́но, неизрече́нная та́йно, несве́домое чу́до, нерукотворе́нная Це́ркве Еди́наго Царя́ всех век, благоуха́нное кади́ло, честна́я багряни́це, боготка́нная порфи́ро, душе́вный раю́, живоно́снаго са́да о́трасле, цве́те прекра́сный, процве́тший нам небе́сное весе́лие, гро́зде спасе́ния на́шего, ча́ше Царя́ Небе́снаго, в не́йже раствори́ся от Ду́ха Свята́го вино́ неисчерпа́емыя благода́ти, Хода́таице зако́на, зача́ло и́стинныя ве́ры Христо́вы непоколеби́мый сто́лпе, мечу́ я́рости Бо́жия на богопроти́вных, бесо́в устраше́ние, во бра́нех побежде́ние, христиа́н всех нело́жная Храни́тельнице и ми́ра всего́ изве́стное спасе́ние!
О Всеми́лостивая Госпоже́, Де́во Влады́чице, Богоро́дице, услы́ши нас, моля́щихся Тебе́, и яви́ ми́лость Твою́ на лю́дех Твои́х, моли́ Сы́на Своего́ изба́витися нам от вся́каго зла и сохрани́ оби́тель на́шу и вся́ку оби́тель, и град, и страну́ ве́рных, и лю́ди, благоче́стно прибега́ющия и призыва́ющия и́мя Твое́ свято́е, от вся́кия напа́сти, губи́тельства, гла́да, тру́са, пото́па, огня́, меча́, наше́ствия иноплеме́нников и междоусо́бныя бра́ни, от ве́яния боле́зни и вся́каго обстоя́ния: да ни ра́нами, ни преще́нием, ни мо́ром, ни вся́ким гне́вом Бо́жиим ума́лятся раби́ Твои́. Но соблюда́й и спаса́й ми́лостию Свое́ю, Госпоже́, за ны моля́щися, и поле́зное благорастворе́ние возду́ха во вре́мени пло́днаго приноше́ния нам да́руй. Обле́гчи, возста́ви и поми́луй, Преми́лостивая Влады́чице, Богоро́дице препе́тая, во вся́кой беде́ и нужде́ су́щия. Помяни́ рабы́ Твоя́ и не пре́зри слез и воздыха́ния на́шего, и обнови́ нас бла́гостию Своея́ ми́лости, да со благодаре́нием утеша́емся, обре́тше Тя Помо́щницу. Умилосе́рдися, Госпоже́ Пречи́стая, на не́мощныя лю́ди Твоя́, наде́ждо на́ша. Разсе́янныя собери́, заблу́дшия на путь пра́вый наста́ви, отпа́дшия от благочести́выя оте́ческия ве́ры па́ки возврати́, ста́рость поддержи́, ю́ныя вразуми́, младе́нцы воспита́й и просла́ви сла́вящия Тя, изря́днее же – Це́рковь Сы́на Твоего́ соблюди́ и сохрани́ в долготу́ дний. О Ми́лостивая и Преми́лостивая Цари́це небесе́ и земли́, Богоро́дице Присноде́во! Хода́тайством Твои́м поми́луй страну́ на́шу и во́инство ея́ и вся правосла́вныя христиа́ны, сохраня́ющи их под кро́вом ми́лости Твоея́, ри́зою Твое́ю честно́ю защити́ и моли́ из Тебе́ вопло́щшагося без се́мене Христа́ Бо́га на́шего, да препоя́шет ны свы́ше си́лою на вся ви́димыя и неви́димыя враги́ на́ша. Спаси́ же и поми́луй, Госпоже́, Вели́каго Господи́на и Отца́ на́шего Кири́лла, Святе́йшего Патриа́рха Моско́вского и всея́ Руси́, преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны и весь при́чет церко́вный, и весь мона́шеский чин, и вся правове́рныя лю́ди, поклоня́ющияся и моля́щияся пред честно́ю Твое́ю ико́ною. При́зри на всех нас призре́нием ми́лостивнаго Твоего́ заступле́ния, воздви́гни нас из глубины́ грехо́вныя и просвети́ о́чи серде́чныя ко зре́нию спасе́ния, ми́лостива нам бу́ди зде и на Стра́шнем Суде́ Сы́на Твоего́ о нас умоли́, преста́вльшияся во благоче́стии от жития́ сего́ рабы́ Твоя́ в ве́чней жи́зни со а́нгелы и арха́нгелы и со все́ми святы́ми причти́, да одесну́ю Сы́на Твоего́ Бо́га предста́нут, и моли́твою Твое́ю сподо́би вся правосла́вныя христиа́ны со Христо́м жи́ти и ра́дости а́нгельския в небе́сных селе́ниих наслажда́тися. Ты бо еси́, Госпоже́, сла́ва небе́сных и упова́ние земны́х, Ты на́ша наде́жда и Засту́пница всех притека́ющих к Тебе́ и Твоея́ свя́тыя по́мощи прося́щих. Ты моле́бница на́ша те́плая к Сы́ну Твоему́ и Бо́гу на́шему. Твоя́ ма́терняя моли́тва мно́го мо́жет на умоле́ние Вла́дыки, и Твои́м предста́тельством ко престо́лу благода́ти Пресвяты́х и Животворя́щих Его́ Та́ин приступа́ти дерза́ем, а́ще и недосто́йнии. Те́мже всечестны́й о́браз Твой и руко́ю Твое́ю держи́маго Вседержи́теля ви́дяще на ико́не, ра́дуемся, гре́шнии, со умиле́нием припа́дающе, и лю́бовию сей целу́ем, ча́юще, Госпоже́, Твои́ми святы́ми богоприя́тными моли́твами дойти́ небе́сныя безконе́чныя жи́зни и непосты́дно ста́ти в день су́дный одесну́ю Сы́на Твоего́ и Бо́га на́шего, сла́вяще Его́ ку́пно со Безнача́льным Отце́м и Пресвяты́м, Благи́м, Животворя́щим и Единосу́щным Ду́хом, во ве́ки веко́в. Ами́нь.
Акафист
Покрову Пресвятой Богородицы
(празднование 1/14 октября)
Кондак 1
Избра́нней Предве́чным Царе́м, превы́шшей вся́каго созда́ния небесе́ и земли́ Цари́це, прише́дшей иногда́ во Влахе́рнскую це́рковь на моли́тву, досто́йное поклоне́ние с благодаре́нием принося́ще, я́ко во тьме су́щии, под Твой светя́щийся омофо́р с ве́рою и умиле́нием прибега́ем. Ты же, я́ко иму́щи держа́ву непобеди́мую, от вся́ких нас бед свобожда́й, да зове́м Ти: Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Икос 1
Арха́нгел и а́нгел мно́жество, со Предте́чею, Богосло́вом и всех святы́х ли́ком, сопредста́ша Тебе́, Цари́це свое́й, в це́ркви Влахе́рнстей и, умиле́нная моле́ния Твоя́ о всем ми́ре слы́шавше, со удивле́нием возопи́ша такова́я: Ра́дуйся, Бо́га Отца́ безнача́льнаго предве́чное благоволе́ние; ра́дуйся, Бо́га Сы́на безле́тнаго пречи́стое вмести́лище. Ра́дуйся, Бо́га Ду́ха Всесвята́го избра́нное жили́ще; ра́дуйся, го́рних чино́в а́нгельских непрестаю́щее удивле́ние. Ра́дуйся, те́мных сил а́дских всегро́зное устраше́ние; ра́дуйся, Ю́же на возду́се срета́ют многоочи́тии херуви́ми. Ра́дуйся, Е́йже похва́льная воспису́ют шестокрила́тии серафи́ми; ра́дуйся, Ея́же преблаго́му покро́ву и мы, земноро́днии, благода́рне покланя́емся. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 2
Ви́девше Тя святы́й Андре́й со Епифа́нием в це́ркви на возду́се за христиа́ны Бо́гу моля́щуюся, позна́ша, я́ко Ма́терь еси́ возне́сшагося на не́бо Христа́ Бо́га на́шего, и, припа́дше на зе́млю, ра́достно покланя́хуся всеблаго́му покро́ву Твоему́, зову́ще: Аллилу́иа.
Икос 2
Ра́зум неуразуме́нен еси́, Богоро́дице Де́во, в защище́нии люде́й правосла́вных, сего́ ра́ди врази́ на́ши не позна́ют, коль сильна́ есть моли́тва Бо́жия Ма́тере. Мы же, о Твое́м всемо́щнем заступле́нии до́бре ве́дуще, си́це к Тебе́ со умиле́нием зове́м: Ра́дуйся, премилосе́рдая Уте́шительнице всех скорбя́щих и обремене́нных; ра́дуйся, неусыпа́ющая Наста́внице всех заблу́ждших и ослепле́нных. Ра́дуйся, пра́ведно дви́жимый гнев Бо́жий на нас Твои́м моле́нием ско́ро утоля́ющая; ра́дуйся, злы́я стра́сти на́ша всемо́щным манове́нием укроща́ющая. Ра́дуйся, кре́пкое возбужде́ние спя́щих со́вестей; ра́дуйся, нетру́дное преодоле́ние беззако́нных на́выков. Ра́дуйся, Ея́же ра́ди ад стене́т и ду́си зло́бы трепе́щут; ра́дуйся, Ея́же ра́ди врата́ рая́ всем нам отверза́ются. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 3
Си́ла Вы́шняго осеня́ет с ве́рою и благогове́нием прибега́ющих к Твоему́ всечестно́му покро́ву: еди́ней бо то́чию Тебе́, Пресвяте́й и Пречи́стей Ма́тери Бо́жией, даде́ся, да вся́кое проше́ние Твое́ испо́лнится. Тем у́бо всяк во́зраст ве́рных славосло́вит Тя и Сы́на Твоего́, зову́щ: Аллилу́иа.
Икос 3
Иму́щи бога́тство милосе́рдия неоску́дное, всем конце́м земли́ простира́еши ру́ку по́мощи, Влады́чице: боля́щим исцеле́ние, стра́ждущим осла́бу, слепы́м прозре́ние и всем вся по коего́ждо потре́бе подае́ши, благода́рне вопию́щим: Ра́дуйся, Правосла́вия несокруши́мая кре́посте и огра́до; ра́дуйся, святы́х хра́мов и олтаре́й перве́йшее украше́ние. Ра́дуйся, благоче́стия верне́йшее огражде́ние; ра́дуйся, благосе́рдых градоправи́телей неусыпа́ющая Споспе́шнице. Ра́дуйся, непобеди́мая Воево́до вожде́й и во́инств христиа́нских; ра́дуйся, свято́е зерца́ло пра́вды судия́м немздоприи́мным. Ра́дуйся, соверше́нный ра́зуме наста́вников и детоводи́телей; ра́дуйся, благослове́ние домо́в и семе́йств благочести́вых. Ра́дуйся, Ра́досте на́ша, покры́й нас от вся́кого зла честны́м Твои́м омофо́ром.
Кондак 4
Бу́рею мно́гих бед одержи́мым нам помога́еши, Влады́чице: стои́ши бо пред лице́м олтаря́ Госпо́дня воздви́гши ру́це Твои́, и мо́лишися, я́ко да на́шу недосто́йную моли́тву при́зрит Госпо́дь, Царь Сла́вы, и послу́шает проше́ния призыва́ющих и́мя Твое́ свято́е, к Сы́ну же Твое́му зову́щих: Аллилу́иа.
Икос 4
Услы́ша Госпо́дь Бог Иису́са Нави́на, моля́щася и повелева́юща со́лнцу ста́ти, до́ндеже отмсти́т враго́м. Слы́шит и Твоя́ ны́не моле́ния Госпо́дь Иису́с, избра́нная пала́то Ду́ха Свята́го. Те́мже и мы, гре́шнии, на Твой наде́ющеся покро́в, Тебе́, я́ко Бо́жией Ма́тери, глаго́лати дерза́ем: Ра́дуйся, от Со́лнца мы́сленнаго озаре́нная и нас све́том незаходи́мым просвеща́ющая; ра́дуйся, сия́нием пречи́стыя души́ Твоея́ всю зе́млю просвети́вшая. Ра́дуйся, чистото́ю телесе́ Твоего́ вся небеса́ возвесели́вшая; ра́дуйся, святы́х оби́телей Христо́вых покро́в и снабде́ние. Ра́дуйся, ве́рных па́стырей Це́ркве бо́дрость и вразумле́ние; ра́дуйся, богобоя́зненных и́ноков и и́нокинь Наста́внице. Ра́дуйся, невозмуща́емое успокое́ние благогове́йных ста́рцев; ра́дуйся, та́йное весе́лие чи́стых дев и вдови́ц. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 5
Богови́дец Моисе́й во ополче́нии иногда́ на Амали́ка, егда́ ру́це воздвиза́ше, Изра́иль одолева́ше, егда́ же ру́це низпуща́ше, тогда́ Амали́к побежда́ше, поддержа́щими же его́ укрепле́н, победи́ врага́. Ты же, о Богома́ти, возде́вши ру́це Твои́ на умоле́ние, а́ще и ники́мже поддержи́ма, всегда́ побежда́еши враги́ христиа́нския и нам щит еси́ непобеди́м, вопию́щим: Аллилу́иа.
Икос 5
Ви́девше Тя святы́х собо́ри на возду́се в це́ркви Влахе́рнстей моле́бнии ру́це к Сы́ну и Бо́гу простира́ющую, ра́достно со арха́нгелы и а́нгелы благода́рную Ти песнь воспе́ша. Мы же, крепча́йшима, па́че Моисе́овых рук, дла́ньма Твои́ма укрепля́еми, уми́льно вопие́м: Ра́дуйся, Ея́же ру́це поддержи́т за всех нас еди́ная Ея́ к нам любы́ и милосе́рдие; ра́дуйся, пред Не́юже врази́ на́ши, ви́димии и неви́димии, стоя́ти не мо́гут. Ра́дуйся, те́мное по́лчище страсте́й и похоте́й на́ших прогоня́ющая; ра́дуйся, Огнь Боже́ственный – Христа́ неопа́льно на руку́ Свое́ю держа́щая и нас, хла́дных, тем воспламеня́ющая. Ра́дуйся, во́инствующих на плоть целому́дрием изря́дное венча́ние; ра́дуйся, подвиза́ющихся в посте́ и безмо́лвии при́сное собесе́дование. Ра́дуйся, изнемога́ющих от уны́ния и печа́ли ско́рая Уте́шительнице; ра́дуйся, благода́тию смире́ния и терпе́ния снабдева́ющая. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 6
Пропове́дник неоскудева́емыя благо́дати и ми́лостей Твои́х яви́ся святы́й Рома́н Сладкопе́вец, егда́ от Тебе́ во сне прия́т сви́ток кни́жный на снеде́ние: тем у́бо умудре́н нача́ разу́мно пе́ти во сла́ву Твою́, святы́м же писа́ти похва́льная, взыва́я с ве́рою: Аллилу́иа.
Икос 6
Возсия́ла еси́ от и́стиннаго Со́лнца пра́вды заря́, Де́во Богоотрокови́це, просвеща́ющая всех прему́дростию Бо́га Сы́на Твоего́ и в позна́ние и́стины приводя́щая зову́щих Ти такова́я: Ра́дуйся, Бо́жию Си́лу и Бо́жию Прему́дрость – Христа́ пло́тию породи́вшая; ра́дуйся, юро́дивую му́дрость ве́ка сего́ посрами́вшая и ослепле́нных е́ю на путь пра́вый наставля́ющая. Ра́дуйся, святы́я ве́ры охране́ние и правосла́вных догма́тов Наста́внице; ра́дуйся, нечести́вых е́ресей и тлетво́рных раско́лов Искорени́тельнице. Ра́дуйся, та́йная и неудо́бь предви́денная вся до́бре ве́дущая и и́мже подоба́ет сказу́ющая; ра́дуйся, лжи́вых прови́дцев и су́етная гада́ния посрамля́ющая. Ра́дуйся, в час недоуме́ний мысль бла́гу на се́рдце полага́ющая; ра́дуйся, от па́губных начина́ний и несмы́сленных пожела́ний воспяща́ющая1. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 7
Хотя́й долготерпели́вый Всеви́дец Госпо́дь яви́ти Своего́ человеколю́бия неизсле́димую щедро́т бе́здну, избра́ Тебе́ еди́ну в Ма́терь Себе́ и сотвори́ Тя лю́дем непреодоле́нное защище́ние: да а́ще кто от них и пра́ведным судо́м Бо́жиим осужде́ния досто́ин яви́тся, Твои́м оба́че держа́вным покро́вом сохраня́ется на покая́ние, зовы́й: Аллилу́иа.
Икос 7
Ди́вная показа́л еси́ дела́ Твоя́ в Пречи́стей Ма́тери Твое́й, Го́споди, егда́ пречу́дный омофо́р в руце́ Ея́ светя́щийся па́че луч со́лнечных яви́ся, и́мже покрыва́ше лю́ди, су́щия в це́ркви Влахе́рнстей. О такове́м у́бо зна́мении милосе́рдаго Ея́ заступле́ния услы́шавше, у́жасом и ра́достию одержи́ми, вси глаго́лаху: Ра́дуйся, нерукотворе́нный омофо́р, а́ки о́блак, над всем ми́ром распросте́ршая; ра́дуйся, преве́чнаго Архиере́я, Сы́на Своего́, зна́мение на руце́ Свое́й держа́щая. Ра́дуйся, но́вую ми́лость и но́вую благода́ть сим в Це́ркви Правосла́вней явля́ющая; ра́дуйся, сто́лпе о́блачный от искуше́ний и собла́знов ми́ра всех нас покрыва́ющий. Ра́дуйся, сто́лпе о́гненный, среди́ мглы греха́ всем нам путь спасе́ния показу́ющий; ра́дуйся, я́вных благоче́стия подви́жников я́вное укрепле́ние. Ра́дуйся, та́йных среди́ ми́ра рабо́в Бо́жиих та́йное вразумле́ние; ра́дуйся, и мене́, обнаже́ннаго до́брых дел, не оставля́ющая Свои́м покро́вом и благода́тию. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 8
Ди́вно Тя от небе́с во Влахе́рнстей це́ркви я́вльшуюся а́нгели воспе́ша, апо́столи просла́виша, лик святи́телей и преподо́бных и жен святы́х сосло́вие восхвали́ша, Предте́ча с Богосло́вом поклони́шася, лю́дие же, су́щии в це́ркви, с весе́лием вопия́ху: Аллилу́иа.
Икос 8
Все́ми вы́шними и ни́жними влады́чествуя Госпо́дь, узре́в Тя в це́ркви Ма́терь Свою́ стоя́щу и со умиле́нием к Нему́ моля́щуся, рече́: Проси́, Ма́ти Моя́, зане́ не отвращу́ся Тебе́, но испо́лню вся проше́ния Твоя́ и благода́рственная си́це Тебе́ всех пе́ти научу́: Ра́дуйся, ковче́же заве́та, в не́мже храни́тся освяще́ние всего́ ро́да челове́ческаго; ра́дуйся, ста́мно2 пресвята́я, в не́йже а́лчущим пра́вды блюде́тся Хлеб жи́зни ве́чныя. Ра́дуйся, сосу́де всезлаты́й, в не́мже угото́вася нас ра́ди плоть и кровь Боже́ственнаго А́гнца; ра́дуйся, оста́вленных врача́ми на свои́ всемо́щныя ру́це прие́млющая. Ра́дуйся, рассла́бленных те́лом, но не ду́хом и ве́рою, со одра́ боле́зни воздвиза́ющая; ра́дуйся, погубля́ющим от неду́га ум но́вый и лу́чший смысл подаю́щая. Ра́дуйся, на стро́потнем пути́ греха́ и страсте́й нас прему́дре запина́ющая; ра́дуйся, жесто́кость нераска́яннаго се́рдца на́шего умиля́ющая. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 9
Все естество́ а́нгельское похва́льная прино́сит Тебе́, и́стинней Бо́жией Ма́тери и Засту́пнице всех притека́ющих к Тебе́, ве́дуще, я́ко несокруши́мым покро́вом Твои́м пра́ведных возвеселя́еши, гре́шных заступа́еши, бе́дствующих избавля́еши и мо́лишися о всех ве́рных, зову́щих: Аллилу́иа.
Икос 9
Вети́и многовеща́ннии, я́ко ры́бы безгла́снии, недоуме́ют, ка́ко восхвали́ти по достоя́нию вели́кий всечестна́го Покро́ва Твоего́ пра́здник: вся бо о Тебе́ от них глаго́лемая не суть дово́льна к еди́ному исчисле́нию щедро́т Твои́х. Мы же, Твоя́ неисче́тная благодея́ния ви́дяще, с весе́лием взыва́ем: Ра́дуйся, от я́звы и всегуби́тельства сме́ртнаго нас соблюда́ющая; ра́дуйся, от внеза́пнаго колеба́ния земли́ гра́ды и ве́си сохраня́ющая. Ра́дуйся, от разлия́ния вод и потопле́ния руко́ю кре́пкою возводя́щая; ра́дуйся, от запале́ния о́гненнаго росо́ю моли́тв Твои́х избавля́ющая. Ра́дуйся, от гла́да душе́внаго и теле́снаго Хле́бом жи́зни снабдева́ющая; ра́дуйся, уда́ры мо́лнии и гро́ма от главы́ на́шея отводя́щая. Ра́дуйся, от наше́ствия иноплеме́нник и та́йных уби́йц спаса́ющая; ра́дуйся, от дома́шния бра́ни и вражды́ единокро́вных ми́ром и любо́вию огражда́ющая. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 10
Спасти́ хотя́й род челове́ческий от пре́лести вра́жия Человеколю́бец Госпо́дь Тебе́, Ма́терь Свою́, дарова́ земны́м нам в по́мощь, покро́в и защи́ту, да бу́деши печа́льным утеше́ние, скорбя́щим ра́дование, оби́димым Засту́пница и да всех из глубины́ грехо́вныя воздви́гнеши, пою́щих: Аллилу́иа.
Икос 10
«Царю́ Небе́сный, – глаго́лаше в моли́тве на возду́се со а́нгелы стоя́щая всенепоро́чная Цари́ца, – приими́ вся́каго челове́ка, моля́щася к Тебе́ и призыва́юща и́мя Мое́ на по́мощь, да не отъи́дет от ли́ка Моего́ тощ и неуслы́шан». Сию́ всеблагу́ю моли́тву слы́шавше, собо́ри святы́х благода́рно возопи́ша: Ра́дуйся, чи́стых рука́ми и се́рдцем земледе́льцев благослове́нными плода́ми венча́ющая; ра́дуйся, по́моще и пра́ведное мздовоздая́ние всем пра́во ку́плю де́ющим. Ра́дуйся, клятвопреступле́ний и непра́ведных стяжа́ний всенаро́дное обличе́ние; ра́дуйся, бе́дствующим в пути́, на су́ше и вода́х внеза́пное вспоможе́ние. Ра́дуйся, безча́дных роди́телей плода́ми ве́ры и ду́ха веселя́щая; ра́дуйся, безма́терних сиро́т незри́мая Воспита́тельнице. Ра́дуйся, кре́пкая Засту́пнице су́щих в плену́ и изгна́нии; ра́дуйся, неусыпа́ющая Попечи́тельнице во у́зах и темни́це седя́щих. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 11
Пе́ние всеумиле́нное слы́шаще и те́плей Твое́й моли́тве о нас вне́млюще, про́сим Тебе́, Де́во Богоро́дице, не пре́зри гла́са рабо́в Твои́х: к Тебе́ бо в напа́стех и ско́рбех прибега́ем и пред Тобо́ю в беда́х на́ших сле́зы пролива́ем, зову́ще: Аллилу́иа.
Икос 11
Я́ко светоприе́мную свещу́, в моли́тве горя́щую, ви́дящи Тя на возду́се Влахе́рнская це́рковь, согла́сно со мно́жеством люде́й, в ней бы́вших, возглаша́ше: «Отку́ду мне сие́, да прии́де Ма́ти Го́спода моего́ ко мне?» Святы́й же Андре́й со Епифа́нием те́пле моля́хуся к Тебе́, зову́ще: Ра́дуйся, всех даро́в духо́вных и теле́сных незави́стная Пода́тельнице; ра́дуйся, полага́ющих нача́ло покая́ния гре́шников ве́рная Предста́тельнице. Ра́дуйся, борю́щихся со страстьми́ и прило́гами вра́жиими всегда́шняя Спобо́рнице; ра́дуйся, незри́мое укроще́ние влады́к жесто́ких и зверонра́вных. Ра́дуйся, та́йный поко́е и отра́до рабо́в кро́тких и стра́ждущих; ра́дуйся, всежела́нное соверше́ние благи́х супру́жеств. Ра́дуйся, ма́терей детородя́щих ско́рое и безболе́зненное разреше́ние; ра́дуйся, в час кончи́ны еди́ная всем нам Помо́щнице. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 12
Благода́ть Боже́ственную испроси́ нам у Сы́на Твоего́ и Бо́га, простри́ нам ру́ку по́мощи, отжени́ от нас вся́каго врага́ и супоста́та и умири́ на́шу жизнь, да не поги́бнем лю́те без покая́ния, но приими́ нас в ве́чныя кро́вы, Покрови́тельнице на́ша, да ра́дующеся Тебе́ зове́м: Аллилу́иа.
Икос 12
Пою́ще Твой держа́вный покро́в, хва́лим Тя вси, я́ко тве́рдую Предста́тельницу на́шу, и покланя́емся Тебе́, о нас моля́щейся: ве́руем бо и наде́емся, я́ко испро́сиши у Сы́на Твоего́ и Бо́га блага́я ве́чная и вре́менная всем с любо́вию вопию́щим Тебе́ си́це: Ра́дуйся, всей вселе́нней кре́пкое заступле́ние; ра́дуйся, всех стихи́й земны́х и небе́сных освяще́ние. Ра́дуйся, всех време́н го́да благослове́ние; ра́дуйся, всех наве́тов и искуше́ний, от ми́ра, пло́ти и диа́вола находя́щих, попра́ние. Ра́дуйся, неча́емое примире́ние ожесточе́нно вражду́ющих; ра́дуйся, недове́домое исправле́ние нераска́янных гре́шников. Ра́дуйся, не отверга́ющая все́ми презре́нных и отве́рженных; ра́дуйся, сами́х отча́янных от ро́ва поги́бели исхища́ющая. Ра́дуйся, Ра́досте на́ша, покры́й нас от вся́каго зла честны́м Твои́м омофо́ром.
Кондак 13
О Всепе́тая Ма́ти, Пречи́стая Госпоже́, Де́во Богоро́дице! К Тебе́ возвожду́ душе́вныя и теле́сныя о́чи, к Тебе́ простира́ю разсла́бленныя ру́це и из глубины́ се́рдца вопию́: при́зри на ве́ру и смире́ние души́ моея́, покры́й мя всемо́щным омофо́ром Твои́м, да изба́влюся от всех бед и напа́стей, и в час кончи́ны моея́, о Всеблага́я, предста́ни мне и угото́ваннаго ра́ди грехо́в мои́х изба́ви муче́ния, да вы́ну покланя́яся зову́: Аллилу́иа.
Этот кондак читается трижды, затем 1-й икос «Арха́нгел и а́нгел мно́жество…» и 1-й кондак «Избра́нней Предве́чным Царе́м…»
Молитва3
О Пресвята́я Де́во, Ма́ти Го́спода вы́шних сил, небесе́ и земли́ Цари́це, гра́да и страны́ на́шея всемо́щная Засту́пнице! Прими́ хвале́бноблагода́рственное пе́ние сие́ от нас, недосто́йных раб Твои́х, и вознеси́ моли́твы на́ша ко Престо́лу Бо́га Сы́на Твоего́, да ми́лостив бу́дет непра́вдам на́шим и проба́вит благода́ть чту́щим всечестно́е и́мя Твое́ и с ве́рою и любо́вию покланя́ющимся чудотво́рному о́бразу Твоему́. Не́смы бо досто́йны от Него́ поми́ловании бы́ти, а́ще не Ты уми́лостивиши Его́ о нас, Влады́чице, я́ко вся Тебе́ от Него́ возмо́жна суть. Сего́ ра́ди к Тебе́ прибе́гаем, я́ко к несомне́нней и ско́рой Засту́пнице на́шей: услы́ши нас моля́щихся Тебе́, осени́ нас вседержа́вным покро́вом Твои́м и испроси́ у Бо́га Сы́на Твоего́ па́стырям на́шим ре́вность и бде́ние о душа́х, градоправи́телем му́дрость и си́лу, судия́м пра́вду и нелицепри́ятие, наста́вникам ра́зум и смиренному́дрие, супру́гам любо́вь и согла́сие, ча́дам послуша́ние, оби́димым терпе́ние, оби́дящим страх Бо́жий, скорбя́щим благоду́шие ра́дующимся воздержа́ние: всем же нам дух ра́зума и благоче́стия, дух милосе́рдия и кро́тости, дух чистоты́ и пра́вды. Ей, Госпоже́ Пресвята́я, умилосе́рдися на не́мощные лю́ди Твоя́; разсе́янные собери́, заблу́дшия на путь пра́вый наста́ви, в заклю́чении во у́зах находя́щихся и Тя призыва́ющих ско́ро посети́ и при́зри на всех нас призре́нием ми́лостивого твоего́ заступле́ния, воздви́гни нас из глубины́ грехо́вныя и просвети́ серде́чныя о́чи на́ша ко зре́нию спасе́ния; ми́лостива нам бу́ди зде и та́мо, в стране́ земна́го прише́льствия, и на Стра́шнем Суде́ Сы́на Твоего́. Ты бо еси́, Госпоже́ сла́ва небе́сных и упова́ние земны́х, Ты по Бо́зе на́ша наде́жда и Засту́пница всех притека́ющих к Тебе́ с ве́рою. К Тебе́ у́бо мо́лимся и Тебе́, я́ко Всемогу́щей Помо́щнице, са́ми себе́ и друг дру́га и весь живо́т наш предае́м, ны́не и при́сно и во ве́ки веко́в. Ами́нь.
Акафист
Пресвятой Богородице в честь иконы Ея Боголюбской
(празднование 18 июня/1 июля)
Кондак 1
Взбра́нней Воево́де, Боголюби́вей Цари́це, превы́сшей вся́каго созда́ния, Де́ве и Ма́тери Христа́ Бо́га, похва́льная воспису́ем Ти раби́ Твои́, Богоро́дице! Ты же, я́ко Боголюби́вая и Всеми́лостивая Ма́ти, благоизво́лившая яви́ти пресве́тлый Свой лик благове́рному на́шему кня́зю Андре́ю, от бед и скорбе́й сохрани́ ны и храм сей, да зове́м Ти: Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Икос 1
А́нгелов превы́сшую вся Небе́сныя Си́лы велича́ют Тя, Богоро́дицу Цари́цу, мы же гре́шнии на земли́, чу́дному Бо́жию о Тебе́ смотре́нию дивя́щеся, все́ю душе́ю, се́рдцем и устна́ми дерза́ем глаго́лати: Ра́дуйся, благослове́нная в жена́х Де́во Благода́тная; ра́дуйся, Всевы́шняго Ма́ти, Ду́ха Свята́го пребыва́ние. Ра́дуйся, Цари́це небесе́ и земли́ и всех Небе́сных Сил вы́сшая; ра́дуйся, а́нгелы чти́мая, от серафи́м воспева́емая. Ра́дуйся благословля́емая на небеси́ и сла́вимая на земли́; ра́дуйся, вои́стину Присноблаже́нная и Пренепоро́чная. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 2
Ви́дящи Премилосе́рдная Ма́терь Бо́жия земно́е ско́рбное житие́ на́ше, не́мощи и боле́зни, благоизво́ли яви́ти чу́до, избра́в сосу́д благода́ти и ми́лостей Свои́х к нам, благочести́ваго кня́зя Андре́я. Оба́че и мы с ра́достию несказа́нною припа́даем к Тебе́, Влады́чице, и из глубины́ души́ благодари́м Тя, на́шу ди́вную Засту́пницу, воспева́юще Бо́гу: Аллилу́иа.
Икос 2
Разуме́ти хотя́ чу́до, явле́нное ми́лостию Твое́ю, Пресвята́я Богоро́дице, егда́ ко́ни, ве́зшии святы́й о́браз, ста́ша, и лю́дие к ше́ствию подви́гнути их не возмого́ша, благове́рный князь Андре́й нача́т со слеза́ми моли́тися к Тебе́, Влады́чице, да пока́жеши, Пречи́стая, во́лю святу́ю Свою́; Ты же в виде́нии благоволи́ла еси́ я́же и мы, чу́до сие́ воспомина́юще, прекло́ньше коле́на, взыва́ем си́це: Ра́дуйся, просла́вившая ме́сто оби́тели Твоея́ ди́вным чудоде́йствием и в сем ми́лость преизоби́льную нам показа́вшая; ра́дуйся, страну́ Влади́мирскую све́том Свои́м озари́вшая и лучи́ све́та на всех нас простира́ющая. Ра́дуйся, Всеблага́я на́ша Наста́внице, любо́вию нас привлека́ющая; ра́дуйся, Охрани́тельнице на́ша от бед и боле́зней. Ра́дуйся, у Го́спода спасе́ния на́шего Хода́таице, Цари́це на́ша Небе́сная; ра́дуйся, за вся благодея́ния Твоя́ благодаре́нию нас науча́ющая. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 3
Си́ла Вы́шняго осеня́ет всех, с ве́рою и благогове́нием притека́ющих к Тебе́, Пречи́стая Госпоже́ Богоро́дице, и упова́ющих на Твою́ ми́лость, поне́же вся́кое благо́е проше́ние прие́млеши те́пле. Благове́рный князь моля́ше Тя, Влады́чице, яви́ти во́лю Твою́, преиспо́лнився тре́пета пред та́инством Твоего́ произволе́ния. Та́кожде и мы к Тебе́, Пречи́стая, прибега́ем, умиле́нно вопию́ще: Всеми́лостивая Покрови́тельнице на́ша, научи́ и нас прославля́ти всечестно́е и всехва́льное и́мя Твое́ и досто́йно воспева́ти Бо́гу: Аллилу́иа.
Икос 3
Име́яй на пути́, я́ко боготе́чную звезду́, честны́й о́браз Твой, Влады́чице, благове́рный князь в приле́жней моли́тве свое́й пред чудотво́рною Твое́ю ико́ною сподо́бися я́ве узре́ти Тя, Цари́цу Небе́сную, те́плое хода́тайство Твое́ Бо́гу принося́щую о ме́сте явле́ния Твоего́ и о всем ми́ре. О Бо́жия Ма́ти, Пречи́стая Богоро́дице! Со умиле́нием припа́даем к Тебе́ и, бога́тыя Твоея́ ми́лости ожида́юще, уми́льно вопие́м Ти: Ра́дуйся, Ра́досте на́ша и кре́пкая Засту́пнице; ра́дуйся, Покро́ве наш и на́ше Утеше́ние. Ра́дуйся, Охрани́тельнице на́ша и на́ше Упова́ние; ра́дуйся, Отра́до на́ша и ди́вное о нас попече́ние. Ра́дуйся Похвало́ на́ша, чудесы́ нас удивля́ющая; ра́дуйся, Прибе́жище на́ше и зало́г ве́чнаго спасе́ния. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 4
Недоумева́ет ум наш, ка́ко досто́йно есть восхвали́ти Тя и ди́вное явле́ние Твое́, Пресвята́я Влады́чице: я́ко со́лнце лучи́ испуща́ющи, предста́ла еси́ моля́щемуся кня́зю и та́ко рекла́ еси́: «Не хощу́, да о́браз Мой несе́ши в Росто́в, но во Влади́мире поста́ви его́; на сем ме́сте во и́мя Моего́ Рождества́ це́рковь воздви́гни и обита́лище и́ноком соста́ви», и, возде́вши Свои́ боже́ственнеи ру́це ко Влады́чнему о́бразу, скры́ся от духо́вных оче́с его́. Преклоня́ем и мы коле́на пред Тобо́ю, Боголюби́вая Ма́ти, и Твоя́ чу́дная явле́ния и веле́ния разуме́юще из глубины́ души́ воспева́ем Бо́гу: Аллилу́иа.
Икос 4
Слы́ша Госпо́дь моле́ния Твоя́, Богоизбра́нная Цари́це Небе́сная, обеща́ вы́ну испо́лнити, я́ко Преблаги́я Ма́тере, проше́ния Твоя́. Ты же, о Влады́чице, тогда́ рекла́ еси́ ко Го́споду усты́ Свои́ми: «Влады́ко Многоми́лостиве, Го́споди, Иису́се Христе́, Сы́не и Бо́же Мой, молю́ Тя, да пребу́дет Боже́ственная благода́ть на лю́дех Твои́х, и светоза́рный луч сла́вы Твоея́ да нисхо́дит всегда́ на ме́сто сие́, Мно́ю избра́нное». И́стинно испове́дуем, о Пречи́стая, я́ко ско́ро помога́еши с ве́рою к Тебе́ прибега́ющим, и, со умиле́нием воспева́юще Тебе́, зове́м си́це: Ра́дуйся, Моли́твеннице на́ша пред Го́сподем и Сы́ном Твои́м; ра́дуйся, Засту́пнице всего́ ро́да челове́ческаго и Защи́тнице наро́да правосла́внаго. Ра́дуйся, Ма́тернюю любо́вь Твою́ всегда́ нам явля́ющая и вся блага́я нам да́рующая; ра́дуйся, ра́дости нам, благода́ти же и сла́вы ве́чная Хода́таице, ди́вная на́ша Уте́шительнице. Ра́дуйся, бытие́ оби́тели и ниспосла́ние на ню благода́ти предвозвести́вшая; ра́дуйся, в па́мять Твоего́ явле́ния храм во сла́ву Рождества́ Твоего́ устро́ити указа́вшая и та́мо Це́ркви Христо́вой ди́вное украше́ние яви́вшая. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 5
Я́ко лучеза́рную звезду́, в преде́лах Влади́мирских явле́нную, узре́ князь Андре́й пресве́тлый о́браз Твой, Влады́чице, и в явле́нии сем уразуме́в зна́мение ве́лия попече́ния Бо́жия о ме́сте явле́ния Твоего́, даде́ ему́ и́мя Боголюби́вое. О Цари́це и Влады́чице! Освети́ и нас све́том Твои́м небе́сным, сохраня́ющи нас под кро́вом Твои́м благи́м, услы́ши всеумиле́нныя моли́твы восхваля́ющих Тя и воспева́ющих Бо́гу: Аллилу́иа.
Икос 5
Ви́дение чу́дное Богома́тере и святы́я словеса́ Ея́ прие́мля с ра́достным тре́петом, благове́рный князь умиле́нно со слеза́ми паде́ на зе́млю и сла́достно возблагодари́ Всевы́шняго, я́ко сподо́бися узре́ти Тя, Пресвяту́ю Богоро́дицу. Посе́м ускори́ це́рковь заложи́ти, иде́же ны́не Боголюби́вая оби́тель, и́менем Твои́м красу́ющися, мо́лится за весь мир пред пречи́стым Твои́м о́бразом. Созерца́юще в таково́м собы́тии зна́мение благода́ти, дерза́ем воспева́ти си́це: Ра́дуйся, Ми́лостивая, я́ко устро́ила еси́ ти́хое приста́нище и́щущим спасе́ния; ра́дуйся, Пресве́тлая, я́ко свет подава́еши всем хотя́щим жи́ти в преподо́бии и тем показу́еши пра́выя стези́ к Ца́рствию Небе́сному. Ра́дуйся, те́плая Хода́таице о живу́щих в оби́телех Твои́х, ми́лость Свою́ вы́ну им обеща́вшая; ра́дуйся, я́ко в труде́х и́ноческих им всегда́ помога́еши и к трудолю́бию подвиза́еши. Ра́дуйся, я́ко в ке́ллиях мона́шеских на моли́тву вразумля́еши и к доброде́тельному житию́ ре́вностно возбужда́еши; ра́дуйся, Храни́тельнице ди́вная оби́телей святы́х, я́ко Твое́ю благода́тною си́лою о́ныя зи́ждятся и преспева́ют в благоче́стии. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 6
Пропове́дует вся земля́ Росси́йская бога́тыя ми́лости Твоя́, Влады́чице, и ди́вное благода́тное кня́зя Андре́я вразумле́ние. Сему́ после́дуя, благове́рный князь повеле́ о́браз написа́ти тем подо́бием, я́коже ему́ яви́ся Пречи́стая, и, обре́т святу́ю ико́ну, поклони́ся, ра́достно со слеза́ми благодаря́ Бо́га и ско́рую на́шу Помо́щницу, взыва́я: Аллилу́иа.
Икос 6
Возсия́ благода́ть неизрече́нная от цельбоно́сныя ико́ны Твоея́, Пресвята́я и Боголюби́вая Ма́ти. Слы́шим и ви́дим вели́чие чуде́с, от нея́ быва́емое, со удивле́нием взира́ем на сию́ ико́ну, я́ко на пресве́тлое лице́ Само́й Пречи́стой Де́вы. О Госпоже́, Цари́це и Влады́чице! Ты вы́ну воздвиза́еши ру́це Твои́ на моле́ние за нас пред Сы́ном Твои́м, не пре́зри и вопию́щих Ти похва́льная сия́: Ра́дуйся, во утеше́ние нам дарова́вшая о́браз Твой чудотво́рный; ра́дуйся, но́вую ми́лость и но́вую благода́ть сим в Це́ркви явля́ющая и тем путь спасе́ния показу́ющая. Ра́дуйся, Покрови́тельнице на́ша, от бед нас спаса́ющая и в ско́рбех бы́строе облегче́ние нам посыла́ющая; ра́дуйся, сострада́тельнейшая к боле́знем на́шим, ско́рую по́мощь нам подаю́щая. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 7
Хотя́ благове́рный князь досто́йно почти́ти пресвяту́ю во́лю Твою́, Влады́чице, собра́ архиере́и, свяще́нники и люде́й мно́жество, да ублажа́т Тя хвале́бно собо́ром. О чу́днаго торжества́! О прему́дрости суде́б Твои́х, Влады́чице! Пресла́вно прено́сится чудотво́рная Твоя́ ико́на в ди́вный храм всечестна́го Рождества́ Твоего́. Чудоде́йствием прославля́ется це́рковь Твоя́, о Госпоже́ Богоро́дице, и вси предстоя́щии, ра́дости и умиле́ния испо́лнении, прекло́ньше коле́на, целу́ют Твой пречи́стый о́браз и взыва́ют: О Ма́ти Боголюби́вая, осени́ всеси́льною Твое́ю десни́цею и нас, воспева́ющих Бо́гу: Аллилу́иа.
Икос 7
Ди́вна дела́ Твоя́, Влады́чице! Вси лю́дие, здра́вии и боля́щии, бога́тии и ни́щии, вси прибега́ем к Тебе́, сострада́тельнейшей Ма́тери на́шей. Не отри́ни нас от лица́ Твоего́, бу́ди ми́лостива к нам, недосто́йным рабо́м Твои́м, во всех путе́х жи́зни на́шея, защити́ и поми́луй от всея́ души́ любо́вию вопию́щих Тебе́ такова́я: Ра́дуйся, ненаде́ющихся наде́яние и печа́льных утеше́ние; ра́дуйся, о скорбя́щих попече́ние и бе́дствующим по́моще. Ра́дуйся, а́лчущих Корми́тельнице и ни́щих оде́яние; ра́дуйся, убо́гих Засту́пнице и боля́щих исцеле́ние. Ра́дуйся, ста́рцев Покрови́тельнице и ю́ных Воспита́тельнице; ра́дуйся, вражду́ющих примире́ние и оби́димых Защи́тнице. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 8
Ди́вное чу́до пренесе́ния пресла́вныя ико́ны Твоея́, Влады́чице, торже́ственно вси че́ствуем и на вся́кое ле́то в сей све́тлый пра́здник благода́рне воспомина́ем вся неизче́тная благодея́ния чуде́с, Тобо́ю, Пречи́стая, от ико́ны ди́вно источа́емых; и тя, уго́дниче Бо́жий Лео́нтие, в по́мощь призыва́ем, чту́ще с любо́вию честну́ю па́мять твою́, да моли́твами твои́ми сподо́бимся у Пречи́стыя обрести́ благода́ть, еще́ же непреста́нно воспева́ти Го́споду: Аллилу́иа.
Икос 8
Все вели́чие чуде́с Твои́х, Пречи́стая, несть исчи́слити возмо́жно, егда́ безбо́жный царь Баты́й, разоря́я гра́ды и ве́си и хра́мы сожига́я, со мно́гою ра́тию прибли́зися и ко святе́й оби́тели Твое́й, Пречи́стая, вни́де в це́рковь и, обре́т чудотво́рную ико́ну, де́рзостно положи́ ру́ку на драги́я ри́зы, храм со всем бога́тством огню́ предаде́, то́чию еди́н о́браз Твой, Влады́чице, цел обре́теся и ничи́мже поврежде́н бысть. О ве́лие чу́до! О, коль ди́вны зна́мения благода́ти явля́еши нам, Пречи́стая! Кто не ублажи́т Тя? Кто не воспое́т Твоя́ сла́вная чудеса́? И мы, гре́шнии, со умиле́нием взира́юще на святу́ю ико́ну Твою́, толь чуде́сно от поги́бельнаго пла́мене сохрани́вшуюся, со слеза́ми взыва́ем си́це: Ра́дуйся, я́ко купина́, огне́м горе́вшая и неопа́льна пребы́вшая; ра́дуйся, я́ко благода́ть Тебе́ даде́ся си́лу о́гненную угаша́ти. Ра́дуйся, в годи́ну напа́стей и испыта́ний оста́вльшая нам святу́ю ико́ну Свою́ во утеше́ние; ра́дуйся, я́ко благосты́нею Свое́ю угаша́еши в нас огнь нече́стия пла́менем огня́ Боже́ственнаго. Ра́дуйся, просла́вившая чудесы́ ико́ну Твою́; ра́дуйся, я́ко моли́твою и лобыза́нием ико́ны Твоея́ вси мы прие́млем благода́тное утеше́ние. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 9
Все упова́ние возлага́ем на Твою́ бла́гость, Пресвята́я Влады́чице! Милосе́рдию Твоему́ несть конца́, вели́чие же Твое́ кто испове́сть? Предстоя́щи с мольбо́ю у Престо́ла Всевы́шняго, коль мно́гое мно́жество чуде́с явля́ла еси́ нам, Пречи́стая, коль ди́вно спасла́ еси́ сла́вный град Москву́ от гро́знаго врага́ Тамерла́на, коль чу́дно объя́т его́ вели́кий страх прише́ствием Твои́м в ма́терь ру́сских градо́в и пону́ди а́бие отступи́ти со всем во́инством. Не умолчи́м никогда́, Засту́пнице на́ша Пресла́вная, о всех Твои́х благодея́ниих, да не бу́дет под спу́дом свет чу́дес Твои́х. И ны́не, предстоя́ще пред пречи́стым Твои́м о́бразом и моля́щеся умиле́нною душе́ю и сокруше́нным се́рдцем, взыва́ем Бо́гу: Аллилу́иа.
Икос 9
Вети́и многовеща́ннии не довле́ют по достоя́нию воспе́ти хвалу́ и благодаре́ние Пречи́стей, ка́ко ца́рственный град сохрани́ от тата́рских по́лчищ. Егда́ вся рать вра́жия отступа́ше от преде́л Моско́вских, царь Иоа́нн со ско́рбию и слеза́ми отпусти́ чудотво́рный о́браз Твой, Боголюби́вая Влады́чице, в избра́нную оби́тель Твою́, иде́же со умиле́нием и ра́достию неизрече́нною срето́ша его́ лю́дие, и от ма́ла до вели́ка, вси, прекло́ньше коле́на, ублажа́ху Тя, Пречи́стая. И мы, сея́ ра́дости мы́сленне причаща́ющеся, Цари́це Небе́сней вопие́м благода́рне: Ра́дуйся, премилосе́рдая Уте́шительнице на́ша, святу́ю ико́ну да́ти нам изво́лившая; ра́дуйся, от наше́ствия враго́в иноплеме́нных нас ди́вно спа́сшая. Ра́дуйся, несокруши́мый щи́те царе́й на́ших; ра́дуйся, оте́чества на́шего благонаде́жное утвержде́ние. Ра́дуйся, во́инства кре́пкая защи́то, от меча́ вра́жия сохраняю́щая; ра́дуйся, от разоре́ния, пле́на и лю́тыя сме́рти свято́ю десни́цею Твое́ю всех упова́ющих на Тя избавля́ющая. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 10
Спасти́ хотя́ свою́ ду́шу, благочести́вый царь Фео́дор, любо́вию боже́ственною разжига́ем, до́бре подвиза́ся, пребыва́я в посте́ и моли́тве, и, вельми́ лю́бяще Боголюби́вую оби́тель, ча́сто ю́ посеща́ше. Еди́ножды же с те́плою моли́твою пред чудотво́рною Твое́ю ико́ною, Боголюби́вая Ма́ти, от усе́рдия своего́ в дар Тебе́ принесе́ носи́мый на пе́рсех свои́х честны́й крест, ка́меньми драги́ми укра́шенный. Взира́юще на сие́ ди́вное украше́ние ико́ны Твоея́, о Пречи́стая, ра́дуемся вси духо́вно о сем, ка́ко Тя, Цари́цу и Влады́чицу, сла́вят и чтут вси ве́рнии, и моля́щеся вопие́м Бо́гу: Аллилу́иа.
Икос 10
Стена́, огражда́ющая ны от вся́ких боле́зней, быва́еши Пресвята́я Богоро́дице, егда́ со умиле́нною моли́твою призыва́ем в помо́щь на́шу Твое́ Ма́тернее милосе́рдие. А́ще бо Ты не бы предстоя́ла, Боголюби́вая Ма́ти, моля́щи о нас, кто бы нас изба́вил от смертоно́сных ран и язв всегуби́тельных! Со умиле́нием созерца́ем, ка́ко на пути́ благода́тнаго ше́ствия Твоего́ вси боля́щии чуде́сно исцеля́хуся и стру́пи на телесе́х во мгнове́ние о́ка врачева́хуся. Те́мже и мы, припа́дающе к цельбоно́сней ико́не Твое́й, мо́лим Тя, Влады́чице: не оста́ви ны ми́лостию Твое́ю пребога́тою, изба́ви ны от вся́ких боле́зней, наипа́че же от смертоно́сныя я́звы и па́губы. О Пресвята́я Богоро́дице! Благоспе́шно спаси́ нас и поми́луй с ве́рою и любовию вопию́щих Ти из глубины́ души́: Ра́дуйся, страны́ на́шея правосла́вныя ди́вная Покрови́тельнице, мно́гажды от бед и напа́стей ю́ избавля́вшая; ра́дуйся, страда́льцев благода́тным утеше́нием венча́ющая и разсла́бленным ско́рое возставле́ние даю́щая. Ра́дуйся, слепы́м прозре́ние и хромы́м от неду́га их ди́вное избавле́ние дарова́вшая; ра́дуйся, пораже́нных разли́чными неду́гами и боле́зньми чуде́сно исцеля́ющая. Ра́дуйся, скорбя́щих роди́телей в лише́нии чад их утеша́ющая благода́тною Твое́ю по́мощию; ра́дуйся, Цели́тельнице на́ша в страда́ниих теле́сных и блага́я Уте́шительнице в печа́лех на́ших душе́вных. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 11
Пе́ние благода́рственное всеумиле́нно прино́сит Тебе́, Боголюби́вая Ма́ти, вся страна́ Росси́йская за чу́дное избавле́ние от смертоно́сныя я́звы, толь ги́бельно ю́ порази́вшия. Све́тлии дни ди́вных исцеле́ний наче́ртаны на сердца́х ве́рующих, и моле́ния те́плыя возно́сятся на вся́кое ле́то в па́мять сего́ ра́достнаго торжества́, егда́ свята́я ико́на Твоя́, Влады́чице, с пе́нии духо́вными прино́сится в сла́вный град Влади́мир. Красу́йся и лику́й, благослове́нный гра́де! Торжеству́йте, правове́рнии, зря́ще несо́мую ико́ну Влады́чицы, источа́ющую неизче́тныя исцеле́ния всем притека́ющым к ней с ве́рою и любо́вию! Преклоня́ем и мы коле́на пред Тобо́ю, Пресвята́я Богоро́дице, велича́ем Тя и мо́лим: приими́ ми́лостивно и от нас же́ртву хвалы́ и прославле́ния, приноси́мую Тебе́ от недосто́йных раб Твои́х, вопию́щих Бо́гу: Аллилу́иа.
Икос 11
Светоза́рную ико́ну Твою́, Боголюби́вая Ма́ти, с благогове́нием зрим в боже́ственных хра́мех Твои́х, ра́дующеся. Кто не прибега́ше к Тебе́, Влады́чице? Кто не покланя́шеся, кто не лобыза́ше Твоя́ пречи́стыя стопы́? Кто не умоля́ше Тя, Засту́пницу на́шу? О Пресвята́я Де́во, приими́ ве́ру и усе́рдие на́ше, напра́ви путь наш на стези́ и́стины, умоли́ Го́спода и Сы́на Твоего́, да спасе́т нас, и́миже весть судьба́ми, да не поги́бнем в нераска́янии о на́ших грехопаде́ниих, и услы́ши моле́ния к Тебе́ взыва́ющих: Ра́дуйся, Благода́тная, все́ми доброде́тельми преукра́шенная, Свое́ю благода́тию нас не оставля́ющая; ра́дуйся, Храни́тельнице на́ша, в час сме́ртный тьму вра́жию отгоня́ющая и по сме́рти нас упокоева́ющая. Ра́дуйся, Ми́лостивая, ми́лость Свою́ нам явля́ющая в день испыта́ния, во́ньже откры́ются дела́ на́ша, до́брая же и зла́я; ра́дуйся, Милосе́рдая, заступле́ние нам посыла́ющая и тем в бу́дущем ве́чныя ра́дости сподобля́ющая. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 12
Благода́тию Боже́ственною осеня́ема, свята́го Иоа́нна Предте́чу с ли́ки арха́нгел зрим стоя́щия о́крест Пречи́стыя Ма́тере Боголюби́выя, вку́пе же ублажа́ем и тя, уго́дниче Бо́жий. Помози́ нам, немощны́м, име́ти веру непоколеби́му, ум чист, си́лы и произволе́ние освяща́ти ду́ши на́ша посто́м и моли́твою и вы́ну полага́ти хране́ние усто́м на́шим, да моли́твами Влады́чицы и твои́ми сподо́бимся досто́йно воспе́ти Бо́гу на́шему: Аллилу́иа.
Икос 12
Пою́ще неисче́тная зна́мения и чудеса́ Твоя́, Пресвята́я Богоро́дице, умиле́нно припа́даем к пречи́стому о́бразу Твоему́, Боголюби́вая Ма́ти, лобыза́юще его́ со стра́хом и тре́петом, хва́лим Тя я́ко неисчерпа́емый исто́чник благода́ти, и мо́лим: бу́ди Хода́таица о нас, воздви́гни ру́це к Сы́ну Твоему́, да вы́ну в жи́зни сей и в бу́дущей милосе́рдие Его́ неотсту́пно бу́дет от нас, взыва́ющих Тебе́: Ра́дуйся, Присноблаже́нная, па́че земноро́дных ве́дущая блаже́нство пребыва́ти с Бо́гом; ра́дуйся, и нас прича́стники сего́ блаже́нства соде́ловающая. Ра́дуйся, Пренепоро́чная Де́во, всеце́ло стяжа́вшая чистоту́, смире́ние и непоро́чность; ра́дуйся, да́рующая нам блага́я сия́, да бу́дем уго́дны Тебе́ и Бо́гу. Ра́дуйся, Всеми́лостивая Цари́це, простира́ющая на нас, гре́шных, ми́лость Свою́ во вся́кое вре́мя живота́ на́шего; ра́дуйся, чадолюби́вая Ма́ти, да́рующая нам Свое́ Ма́тернее заступле́ние в час сме́рти. Ра́дуйся, Боголюби́вая Цари́це Богоро́дице, Наде́ждо и Прибе́жище на́ше.
Кондак 13
О Ма́ти Боголюби́вая, Цари́це Небе́сная, Всемо́щная на́ша Предста́тельнице! Ма́лыя сия́ услы́шавши смире́нныя мольбы́ на́ша, при́зри на ны ми́лостивым Твои́м о́ком; бу́ди нам ско́рая Засту́пница в день кончи́ны на́шея и в час сме́ртный яви́ся нам Сама́, Пречи́стая, простира́ющи ру́ку по́мощи, отгоня́ющи духо́в зло́бы, и́щущих поглоти́ти ду́шу на́шу при разлуче́нии от те́ла, и сподо́би нас в бу́дущей жи́зни в весе́лии и ра́довании возвели́чити и просла́вити Тя, я́ко Преблагу́ю Покрови́тельницу на́шу, да спасе́ннии Тобо́ю, в безконе́чнем ве́це вопие́м Бо́гу: Аллилу́иа.
Этот кондак читается трижды, затем 1-й икос: «А́нгелов превы́сшую…» и 1-й кондак: «Взбра́нной Воево́де…»
Молитва
О Пречи́стая Госпоже́ Богоро́дице, Ма́ти Боголюби́вая, наде́ждо на́шего спасе́ния! Воззри́ ми́лостивно на предстоя́щия с ве́рою и любо́вию и покланя́ющияся пречи́стому о́бразу Твоему́, приими́ на́ше хвале́бное пе́ние сие́ и проле́й те́плую Твою́ моли́тву о нас, гре́шных, ко Го́споду, да, презре́в вся на́ша согреше́ния, спасе́т и поми́лует нас. О Преди́вная Влады́чице! Покажи́ на нас чу́дныя ми́лости Твоя́: изба́ви нас от вся́кия ско́рби, наста́ви на путь вся́кия доброде́тели и благосты́ни, спаси́ от искуше́ний, бед и боле́зней, изми́ от нас оклевета́ния и ссо́ры, сохрани́ от молниено́снаго гро́ма, от запале́ния о́гненнаго, от гла́да, тру́са, пото́па и смертоно́сныя я́звы, пода́й нам Свою́ ми́лостивую по́мощь на пути́, в мо́ри и на су́ше, да не поги́бнем лю́те. О Всеми́лостивая Боголюби́вая Ма́ти, с тве́рдым упова́нием возсыла́ем к Тебе́ на́шу убо́гую моли́тву! Не отри́ни на́ших слез и воздыха́ний, не забу́ди нас во вся дни живота́ на́шего, но всегда́ пребыва́й с на́ми и Твои́м заступле́нием и хода́тайством у Го́спода пода́ждь нам отра́ду, утеше́ние, защи́ту и по́мощь, да вы́ну сла́вим и велича́ем преблагослове́нное и всепе́тое и́мя Твое́. Ами́нь.
О чу́дная и вы́сшая всех тва́рей Цари́це Богоро́дице, Небе́снаго Царя́ Христа́ Бо́га на́шего Ма́ти! Услы́ши нас, гре́шных и недосто́йных раб Твои́х, в час сей моля́щихся и припа́дающих к Тебе́ с воздыха́нием и слеза́ми и уми́льно глаго́лющих: изведи́ нас от ро́ва страсте́й, Влады́чице; изба́ви нас от вся́кия ско́рби и печа́ли; огради́ от вся́кия напа́сти и злых клеве́т, от непра́веднаго и лю́таго наве́та вра́жия. Мо́жеши бо, о Благода́тная Ма́терь на́ша, не то́чию от вся́каго зла сохрани́ти лю́ди Твоя́, но и вся́ким благодея́нием снабди́ти и спасти́; ра́зве Тебе́ ины́я Предста́тельницы в беда́х и обстоя́ниих и те́плыя Хода́таицы о нас, гре́шных, не и́мамы к Сы́ну Твоему́, Христу́ Бо́гу на́шему, Его́же умоли́, Влады́чице, да, спасе́ннии Тобо́ю, сла́вим и в бу́дущем ве́це всесвято́е и́мя Сы́на Твоего́ и Бо́га на́шего, ку́пно со Отце́м и Святы́м Ду́хом, ны́не и в безконе́чныя ве́ки. Ами́нь.
Акафист
Пресвятой Богородице в честь икон Ея «Взыскание погибших» и «Всех скорбящих Радость»
(празднование иконам: «Взыскание погибших» – 5/18 февраля, «Всех скорбящих Радость» – 24 октября/6 ноября)
Кондак 1
Взбра́нной Воево́де победи́тельная, я́ко изба́вльшеся от ве́чныя сме́рти благода́тию от Тебе́ ро́ждшагося Христа́ Бо́га на́шего и Твои́м Ма́терним пред Ним хода́тайством, благода́рственная воспису́ем Ти, раби́ Твои́: я́ко иму́щая держа́ву непобеди́мую, от вся́ких нас бед и ско́рбных обстоя́ний свободи́, зову́щих: Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Икос 1
А́нгел предста́тель по́слан бы́сть с небесе́ рещи́ Богоро́дице: ра́дуйся, Благослове́нная в жена́х, предрече́нная Ма́ти Христа́, Сы́на Бо́жия. Те́мже и мы, грехми́ обремене́ннии, наде́жду спасе́ния в Тебе́ улучи́вше, уми́льно взыва́ем Ти: Ра́дуйся, Бо́жие ко гре́шным благоволе́ние; ра́дуйся, ка́ющихся пред Го́сподем Бо́гом кре́пкое заступле́ние. Ра́дуйся, па́дшаго Ада́ма воззва́ние; ра́дуйся, слез Е́виных избавле́ние. Ра́дуйся, грехо́вную отъе́млющая скве́рну; ра́дуйся, ба́не, омыва́ющая со́весть. Ра́дуйся, ро́ждшая Изба́вителя, беззако́ния на́ша ми́лостиво очища́ющаго; ра́дуйся, всечу́дное всех к Бо́гу примире́ние. Ра́дуйся, мо́сте, вои́стину преводя́й нас от сме́рти к животу́; ра́дуйся, мир от пото́па грехо́внаго спа́сшая. Ра́дуйся, ле́ствице небе́сная, Е́юже Госпо́дь к нам сни́де; ра́дуйся, вина́ всех обоже́ния. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 2
Ви́дяще то́ки чуде́с, излива́емыя от святы́я Твоея́ ико́ны, Блага́я Богороди́тельнице, и разуме́юще, я́ко Ты еси́ моля́щихся Блага́я Помо́щница, оби́димых Засту́пница, ненаде́ющихся наде́жда, печа́льных утеше́ние, поги́бших взыска́ние, а́лчущих корми́тельница, наги́х оде́яние, де́вственных целому́дрие, стра́нных наста́вница, тружда́ющихся по́мощь, слепы́х прозре́ние, глухи́х благослы́шание, больны́х исцеле́ние, благода́рственне вопие́м о Тебе́ Бо́гу: Аллилу́иа.
Икос 2
Та́йну Твоего́, Богоро́дице, заступле́ния люде́й, в ско́рби погиба́ющих, уразуме́ти хотя́ще, к Тебе́ прибега́ем, о Ма́ти и Де́во. Ты же, я́ко Блага́я, научи́ ны разуме́ти в защище́нии Блага́го Сы́на Твоего́ милосе́рдое промышле́ние о спасе́нии душ на́ших и очище́ние мно́гих согреше́ний, да взыва́ем Ти ра́достно: Ра́дуйся, обурева́емых ти́хое приста́нище; ра́дуйся, сумня́щихся изве́стное утвержде́ние. Ра́дуйся, еди́на Ма́ти милосе́рдия; ра́дуйся, ско́рая Помо́щнице су́щим в беда́х и напа́стех. Ра́дуйся, скорбьми́ грехи́ на́ша очища́ющая; ра́дуйся, печа́лию на́ши не́мощи душе́вныя врачу́ющая. Ра́дуйся, су́етныя ра́дости презира́ти нас науча́ющая; ра́дуйся, к вы́шнему ми́ру ум наш возводя́щая. Ра́дуйся, от любве́ земны́я к небе́сней Бо́жией любви́ нас привлека́ющая; ра́дуйся, в са́мых страда́ниих на́ших утеше́ние и благода́тную жизнь нам подаю́щая. Ра́дуйся, обетова́ние благ ве́чных; ра́дуйся, Хода́таице ве́чныя ра́дости. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 3
Си́лою свы́ше укрепи́ мя, Блага́я Влады́чице, неду́гующа те́лом и душе́ю, и посеще́ния Твоего́ сподо́би и промышле́ния, мрак уны́ния и ско́рби, облежа́щии мя, отгоня́ющи, да, спаса́емый Тобо́ю, при́сно воспою́ Бо́гу: Аллилу́иа.
Икос 3
Иму́ще бога́тство милосе́рдия неизрече́нное, всем скорбя́щим ру́ку по́мощи простира́еши, неду́ги врачу́ющи, стра́сти исцеля́ющи. Не пре́зри и мене́, Блага́я Влады́чице, на одре́ не́мощи моея́ низлежа́ща и вопию́ща Ти: Ра́дуйся, ми́лости сокро́вище многоце́нное; ра́дуйся, отча́янных еди́на наде́ждо. Ра́дуйся, те́ла моего́ врачева́ние; ра́дуйся, души́ моея́ спасе́ние. Ра́дуйся, тве́рдая кре́посте немощны́х; ра́дуйся, изнемога́ющих Засту́пнице и укрепле́ние. Ра́дуйся, гнев Бо́жий Твои́м моле́нием ско́ро утоля́ющая; ра́дуйся, стра́сти на́ша си́лою моли́тв Твои́х укроща́ющая. Ра́дуйся, слепы́х зре́ние, глухи́х слы́шание; ра́дуйся, хромы́х хожде́ние, немы́х глаго́лание. Ра́дуйся, боля́щих благонаде́жное посеще́ние; ра́дуйся, я́ко Тобо́ю, по ме́ре ве́ры, подаю́тся благода́тная исцеле́ния всем немощству́ющим. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 4
Бу́ря мно́гих бед и напа́стей обдержи́т мя, и волне́ния уже́ не терплю́. Ты же, я́ко Ми́лостивая Ма́ти Спа́са моего́ и Бо́га, воздви́гни ру́це к Сы́ну Твоему́, моля́щи Его́, да при́зрит на лю́тую скорбь се́рдца моего́ и воздви́гнет мя из пучи́ны отча́яния, вопию́щаго Ему́: Аллилу́иа.
Икос 4
Слы́шащи, Пресвята́я Де́во и Ма́ти, Симео́на пра́веднаго прорече́ние: Тебе́ же Само́й ду́шу про́йдет ору́жие, слага́ла еси́ в се́рдце Твое́м вся глаго́лы сия́, разумева́ющи, я́ко ра́дость ма́терняго се́рдца о ча́дех мно́гих печа́лей в ми́ре сем быва́ет прича́стна. Те́мже, я́ко искуше́нней по вся́ческим и спострада́ти ма́терней ско́рби могу́щей, взыва́ем Ти: Ра́дуйся, ра́дость ми́ру – Христа́ Спаси́теля ро́ждшая; ра́дуйся, мир от скорбе́й избавля́ющая. Ра́дуйся, поноше́ние Сы́на Твоего́ терпе́вшая; ра́дуйся, страда́нием Его́ спострада́вшая. Ра́дуйся, ско́рбных матере́й утеше́ние; ра́дуйся, чад их благода́тное охране́ние. Ра́дуйся, в беда́х ско́рое нам заступле́ние; ра́дуйся, заблу́ждших исправле́ние. Ра́дуйся, младе́нцев пита́ние; ра́дуйся, ю́ных наставле́ние. Ра́дуйся, Ма́ти сиро́тствующих; ра́дуйся, вдов заступле́ние. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 5
Богото́чную кровь Сы́на Твоего́ на кресте́ за спасе́ние на́ше излива́емую зря́щи, я́ко Раба́ Госпо́дня, повину́ющися во́ли Отца́, И́же на небесе́х, нам о́браз злострада́ния и терпе́ния яви́ла еси́, да и мы, в пещи́ искуше́ний и бед су́щии, вопие́м смире́нно Бо́гу: Аллилу́иа.
Икос 5
Ви́дя Тя Сын Твой и Бог, при кресте́ стоя́щую с возлю́бленным ученико́м и се́рдцем Ему́ сраспина́ющуюся, глаго́лаше: «Же́но, се, сын Твой», и ученику́: «Се, Ма́ти твоя́», всыновля́я Тебе́ вся ве́рующия в Него́. Мы же, я́ко о́бщницы ско́рби и страда́ний Сы́на Твоего́, имею́ще в Тебе́ Благу́ю Ма́терь, на Тя все упова́ние в ско́рби возлага́юще, вопие́м Ти: Ра́дуйся, Ма́ти ро́да христиа́нскаго; ра́дуйся, усынови́вшая нас при кресте́ Сы́на Твоего́. Ра́дуйся, Бо́га с челове́ки соедини́вшая; ра́дуйся, ве́рных Го́сподеви сочета́вшая. Ра́дуйся, А́гнице, ро́ждшая А́гнца, взе́мшаго грехи́ ми́ра; ра́дуйся, ча́ше, че́рплющая нам ра́дость от Исто́чника безсме́ртия. Ра́дуйся, Спору́чнице спасе́ния гре́шных; ра́дуйся, Взыска́ние поги́бших. Ра́дуйся, неча́янная гре́шных Ра́досте; ра́дуйся, па́дших возста́ние. Ра́дуйся, Цели́тельнице всех не́мощей; ра́дуйся, утоле́ние вся́кия печа́ли. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 6
Пропове́дуют ми́лости Твоя́, Богома́ти, вси концы́ вселе́нныя и́бо честны́м покро́вом Твои́м покрыва́еши весь род христиа́нский, о нем же при́сно мо́лишися Христу́ Спаси́телю на́шему и избавля́еши от всех бед благонра́вныя и богобоя́щияся лю́ди Твоя́, ве́рно вопию́щия Бо́гу: Аллилу́иа.
Икос 6
Возсия́ благода́ть светоза́рная от пречу́дныя ико́ны Твоея́, Богома́ти, пред не́ю же со слеза́ми припа́дающе, мо́лим Ти ся: отжени́ о́блак наше́дших на ны искуше́ний, да вопие́м Ти ра́достно: Ра́дуйся, принося́щая к Сы́ну Твоему́ и Бо́гу моле́ния ве́рных; ра́дуйся, и Сама́ у Престо́ла Сы́на Твоего́ при́сно моля́щаяся о нас. Ра́дуйся, Предста́тельнице к Бо́гу, мир от бед спаса́ющая; ра́дуйся, Засту́пнице ро́да христиа́нскаго, от Бо́га нам дарова́нная. Ра́дуйся, дре́во благосенноли́ственное, и́мже покрыва́ются мно́зи; ра́дуйся, дре́во светлоплодови́тое, и́мже пита́ются ве́рнии. Ра́дуйся, покро́ве ми́ру, ши́рший о́блака; ра́дуйся, земле́ обетова́ния, из нея́же тече́т мед и млеко́. Ра́дуйся, ни́во, растя́щая оби́лие щедро́т; ра́дуйся, Пода́тельнице вся́кия бла́гости. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 7
Хотя́щи яви́ти то́ки чуде́с от святы́я ико́ны Твоея́ «Взыска́ние поги́бших», повеле́ла еси́, Влады́чице, в поги́бели и печа́ли су́щим моле́бная пе́ния пред то́ю соверша́ти и получи́вшим исцеле́ние – пропове́дати ми́лости, ра́ди тоя́ ико́ны явле́нныя, да не сокры́т бу́дет исто́чник благода́тных врачева́ний всем тре́бующим. Те́мже и мы не таи́м Твои́х благодея́ний, но благода́рственно прославля́юще Бо́га, вопие́м Ему́: Аллилу́иа.
Икос 7
Но́вая купе́ль Силоа́мская па́че о́ныя дре́вния яви́ся, Пречи́стая Влады́чице, храм Твой, в не́мже поклоня́емся чудотво́рней ико́не Твое́й: и́бо не еди́ною в ле́то и то́кмо пе́рвее входя́щим здра́вие те́ла подае́ши, но вся́кий неду́г и вся́кую я́зву душе́вную и теле́сную врачу́еши с ве́рою и любо́вию к Тебе́ прибега́ющих. Сего́ ра́ди вопие́м Ти: Ра́дуйся, купе́ль, в не́йже вся ско́рби на́ша погружа́ются; ра́дуйся, ча́ше, е́юже ра́дость и спасе́ние восприе́млем. Ра́дуйся, ка́меню, напая́ющий жа́ждущия жи́зни; ра́дуйся, дре́во, услажда́ющее сла́ныя во́ды жите́йскаго мо́ря. Ра́дуйся, животво́рныя воды́ неистощи́мый исто́чниче; ра́дуйся, ба́не, омыва́ющая грехо́вную скве́рну. Ра́дуйся, скорбе́й на́ших услажде́ние; ра́дуйся, печа́лей на́ших утоле́ние. Ра́дуйся, де́монов попра́ние; ра́дуйся, враго́в посрамле́ние. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 8
Стра́нники и прише́льцы вси есмы́ на земли́ сей, по глаго́лу апо́столову: беды́ от враго́в, беды́ от сро́дник, беды́ от лжебра́тии терпя́ще в лише́ниих мно́гих и ско́рбех. Ты же, Влады́чице, я́ко Блага́я Путеводи́тельница, наста́ви нас к ти́хому приста́нищу и моли́ Сы́на Твоего́ проще́нию прегреше́ний нам пре́жде конца́ дарова́тися, да при́сно вопие́м Бо́гу: Аллилу́иа.
Икос 8
Все житие́ на́ше на земли́ боле́зненно и печа́ли испо́лнено от клеветы́, досажде́ния, укоре́ния и ины́х многови́дных бед и напа́стей, немощству́ет бо те́ло, изнемога́ет и дух наш. К Тебе́ у́бо прибега́ем, Богома́ти, пред пречи́стою ико́ною Твое́ю припа́дающе, испо́лни ра́дости и весе́лия ско́рбная сердца́ на́ша, да вопие́м Ти: Ра́дуйся, Путеводи́тельнице, к небе́сному оте́честву нас руководя́щая; ра́дуйся, Цари́це не́ба и земли́, врата́ ра́йская нам отверза́ющая. Ра́дуйся, Ми́лостивная, нас ми́лующая; ра́дуйся, Домострои́тельнице, житие́ на́ше до́бре устроя́ющая. Ра́дуйся, руно́ ороше́нное, е́же Гедео́н предви́де; ра́дуйся, блаже́нное чре́во, невмести́маго все́ми Бо́га вмести́вшее. Ра́дуйся, Неопали́мая Купино́; ра́дуйся, Неруши́мая Стено́. Ра́дуйся, Живоно́сный Исто́чниче; ра́дуйся, Цве́те Неувяда́емый. Ра́дуйся, Умягче́ние серде́ц злых; ра́дуйся, Умиле́ние благи́х. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 9
Вся́кая жите́йская в ми́ре сем сла́дость печа́ли быва́ет прича́стна: сла́ва не стои́т, бога́тство мимотече́т, ле́пота и здра́вие увяда́ют, дру́зи и и́скреннии сме́ртию отъе́млются. Услади́ у́бо на́ша ско́рби, бла́гих Вино́вная, Твою́ нетле́нную даю́щи ра́дость нам, вопию́щим Бо́гу: Аллилу́иа.
Икос 9
Вети́и многовеща́ннии недоуме́ют, ки́ими словесы́ скорбя́щия и погиба́ющия утеша́ти, но Сама́, Влады́чице, возглаго́ли сердца́м на́шим утеше́ние, благода́ти Твоея́ луча́ми о́блак ско́рби на́шея и мрак уны́ния разгоня́ющи, да взыва́ем Ти: Ра́дуйся, обра́довавшая наде́янием на Тя всех христиа́н; ра́дуйся, ра́досте и умире́ние ми́ру. Ра́дуйся, Пода́тельнице Боже́ственныя бла́гости; ра́дуйся, наде́ждо благ ве́чных. Ра́дуйся, кораблю́ хотя́щих спасти́ся; ра́дуйся, приста́нище жите́йских пла́ваний. Ра́дуйся, ве́рная Храни́тельнице упова́ющих на Тя по Бо́зе; ра́дуйся, оде́ждо наги́х дерзнове́ния. Ра́дуйся, Храни́тельнице всех и утвержде́ние; ра́дуйся, всех ве́рных огражде́ние и свяще́нное прибе́жище. Ра́дуйся, по́моще ве́рно моля́щихся Тебе́; ра́дуйся, све́тлое благода́ти позна́ние. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 10
Спасти́ хотя́й род челове́ческий от ве́чныя му́ки и непрестаю́щия ско́рби, Человеколю́бец Госпо́дь в присноде́вственную утро́бу Твою́ всели́ся, и Тебе́, Ма́терь Свою́, дарова́ погиба́ющим в по́мощь, покро́в и защище́ние, да бу́деши печа́льным утеше́ние, поги́бшим взыска́ние, скорбя́щим ра́дование, отча́янным наде́жда, ве́чныя му́ки Свои́м хода́тайством избавля́ющая и к небе́сному весе́лию приводя́щая всех, ве́рно вопию́щих Сы́ну Твоему́ и Бо́гу на́шему: Аллилу́иа.
Икос 10
Стена́ еси́ де́вам, Богоро́дице Де́во, и всем к Твоему́ покро́ву прибега́ющим. Те́мже мо́лим Тя: заступи́, покры́й и соблюди́ всех погиба́ющих и безпо́мощных от искуше́ний, озлобле́ний и бед, Тебе́ с любо́вию взыва́ющих: Ра́дуйся, сто́лпе де́вства; ра́дуйся, чистоты́ и целому́дрия сосу́де избра́нный. Ра́дуйся, вои́нствующим на плоть целому́дрием изря́дное венча́ние; ра́дуйся, во и́ночестве благоскорбя́щим Пода́тельнице ве́чнаго ра́дования. Ра́дуйся, пла́мень страсте́й изменя́ющая; ра́дуйся, мрак искуше́ний прогоня́ющая. Ра́дуйся, Наста́внице целому́дрия; ра́дуйся, чистоты́ огражде́ние. Ра́дуйся, челове́ков исправле́ние; ра́дуйся, Е́юже от паде́ния на́шего возста́хом. Ра́дуйся, тве́рдое ве́ры утвержде́ние; ра́дуйся, прия́тное моли́твы кади́ло. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 11
Пе́ние всеумиле́нное прино́сим Ти раби́ Твои́, Богоро́дице, я́ко всеси́льней Засту́пнице ро́да на́шего: утоли́ боле́зни к Тебе́ прибега́ющих, укроти́ гнев Бо́жий, пра́ведно на ны дви́жимый грех ра́ди на́ших, изба́ви нас от вся́кия лю́тыя ско́рби и поги́бели, вопию́щих о Тебе́ Бо́гу: Аллилу́иа.
Икос 11
Светоприе́мная свеща́, у́глем благода́ти Бо́жия возжже́нная, яви́ся нам пречестна́я ико́на Твоя́, Влады́чице, на освяще́ние на́ше и утеше́ние. Мы же, любо́вию чту́ще и с ве́рою припа́дающе к ней, вопие́м Ти: Ра́дуйся, си́льным Твои́м заступле́нием от всех бед нас избавля́ющая; ра́дуйся, от тру́са и пото́па нас защища́ющая. Ра́дуйся, от гла́да душе́внаго и теле́снаго нас снабдева́ющая; ра́дуйся, огнь росо́ю моли́тв Твои́х угаша́ющая. Ра́дуйся, от сме́ртнаго губи́тельства нас спаса́ющая; ра́дуйся, в бране́х кре́пкая Помо́щнице. Ра́дуйся, от наше́ствия иноплеме́нных нас огражда́ющая; ра́дуйся, от междоусо́бныя бра́ни охраня́ющая. Ра́дуйся, пла́вающих ле́гкое по вода́м прехожде́ние; ра́дуйся, путеше́ствующих до́брая Води́тельнице. Ра́дуйся, пле́нных свобожде́ние; ра́дуйся, от належа́щаго пра́веднаго преще́ния Бо́жия ско́рое избавле́ние. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 12
Благода́ти зало́г восхоте́вши да́ти ро́ду на́шему, цельбоно́сную ико́ну Твою́ яви́ла еси́ нам, Богома́ти, от нея́же то́ки чуде́с с ве́рою приходя́щим источа́ются, неду́зи врачу́ются и ско́рби утоля́ются. Сего́ ра́ди ра́достно о Тебе́ вопие́м Бо́гу: Аллилу́иа.
Икос 12
Пою́ще Твоя́ ми́лости и чудеса́, Богороди́тельнице, хва́лим Тя вси, я́ко тве́рдую Предста́тельницу на́шу, и со умиле́нием поклоня́емся Тебе́, моля́щейся о нас, и про́сим: воздви́гни ру́це к Сы́ну Твоему́, да в сей жи́зни и по сме́рти на́шей милосе́рдие Его́ неотсту́пно бу́дет о нас, взыва́ющих Ти: Ра́дуйся, непосты́дное на́ше упова́ние в житии́ и по преставле́нии на́шем; ра́дуйся, упова́ющим на Тя ми́рен коне́ц жития́ сего́ подаю́щая. Ра́дуйся, в день су́дный на́ша наде́ждо и защище́ние; ра́дуйся, Судии́ Пра́веднаго умоле́ние. Ра́дуйся, гее́нны ве́чныя избавле́ние; ра́дуйся, наде́ждо ве́чнаго спасе́ния. Ра́дуйся, ключу́ Ца́рствия Христо́ва; ра́дуйся, две́ре ра́йская. Ра́дуйся, мо́сте, к небесе́м преводя́й; ра́дуйся, всех ка́ющихся гре́шников прибе́жище и Блага́я Засту́пнице. Ра́дуйся, а́нгелов ра́досте; ра́дуйся, всех пра́ведных сла́во и утеше́ние. Ра́дуйся, Благода́тная Богоро́дице Де́во, поги́бших Взыска́ние и всех скорбя́щих Ра́досте.
Кондак 13
О Всепе́тая Богообра́дованная Ма́ти, ро́ждшая на ра́дость не́бу и земли́ Царя́ Христа́, Бо́га на́шего! Услы́ши глас скорбя́щих раб Твои́х и, прие́мши сие́ ма́лое моле́ние на́ше, изба́ви нас от вся́ких бед, скорбе́й и напа́стей: неду́ги на́ша исцели́, клеветы́ потреби́, вся́ку зло́бу и вражду́ отжени́ от нас и бу́дущия изми́ му́ки о Тебе́ вопию́щих: Аллилу́иа.
Этот кондак читается трижды, затем 1-й икос «А́нгел предста́тель…» и 1-й кондак «Взбра́нней Воево́де…»
Молитвы
О Пресвята́я и Преблагослове́нная Де́во, Влады́чице Богоро́дице! При́зри ми́лостивным Твои́м о́ком на нас, предстоя́щих пред свято́ю ико́ною Твое́ю и со умиле́нием моля́щихся Тебе́; воздви́гни нас из глубины́ грехо́вныя, просвети́ ум наш, омраче́нный страстьми́, и уврачу́й я́звы душ и теле́с на́ших. Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице. Ты ве́си вся не́мощи и согреше́ния на́ша, к Тебе́ прибега́ем и вопие́м: не оста́ви нас Твое́ю небе́сною по́мощию, но предста́ни нам при́сно и Твои́м неизрече́нным милосе́рдием и щедро́тами спаси́ и поми́луй нас, погиба́ющих. Да́руй нам исправле́ние грехо́вныя жи́зни на́шея и изба́ви нас от скорбе́й, бед и боле́зней, от внеза́пныя сме́рти, а́да и ве́чныя му́ки. Ты бо, Цари́це и Влады́чице, ско́рая Помо́щница и Засту́пница еси́ всем притека́ющим к Тебе́ и кре́пкое прибе́жище гре́шников ка́ющихся. Пода́ждь у́бо нам, Преблага́я и Всенепоро́чная Де́во, христиа́нский коне́ц жития́ на́шего ми́рен и непосты́ден и сподо́би нас Твои́м хода́тайством всели́тися в оби́телях небе́сных, иде́же непреста́нный глас пра́зднующих ра́достию сла́вит Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Засту́пница усе́рдная, Благоутро́бная Го́спода Ма́ти, к Тебе́ прибега́ю аз, окая́нный и па́че всех челове́к гре́шнейший; вонми́ гла́су моле́ния моего́, вопль мой и стена́ние услы́ши, я́ко беззако́ния моя́ превзыдо́ша главу́ мою́, и аз, я́коже кора́бль в пучи́не, погружа́юся в мо́ре грехо́в мои́х. Но Ты, Всеблага́я и Милосе́рдная Влады́чице, не пре́зри мене́, отча́яннаго и во гресе́х погиба́ющаго, поми́луй мя, ка́ющагося в злых де́лех мои́х, и обрати́ на путь пра́вый заблу́дшую окая́нную ду́шу мою́. На Тебе́, Влады́чице моя́ Богоро́дице, возлага́ю все упова́ние мое́. Ты, Ма́ти Бо́жия, сохрани́ и соблюди́ мя под кро́вом Твои́м, ны́не и при́сно и во ве́ки веко́в. Ами́нь.
О Пресвята́я Влады́чице и Богоро́дице, вы́сшая херуви́м и честне́йшая серафи́м, Богоизбра́нная Отрокови́це, поги́бших Взыска́ние и всех скорбя́щих Ра́досте! Пода́ждь утеше́ние и нам, в поги́бели и ско́рби су́щим, ра́зве бо Тебе́ ино́го прибе́жища и по́мощи не и́мамы. Ты еди́на еси́ ра́дости на́шея Хода́таица, и я́ко Ма́терь Бо́жия и Ма́ти милосе́рдия, предстоя́щи у Престо́ла Пресвяты́я Тро́ицы, мо́жеши нам помощи́, никто́же бо притека́яй к Тебе́ посра́млен отхо́дит. Услы́ши у́бо и нас ны́не, в день поги́бели и печа́ли пред Твое́ю ико́ною припа́дающих и со слеза́ми Тебе́ моля́щихся: отжени́ от нас належа́щия на нас ско́рби и бе́ды в сей вре́менней жи́зни, не лише́ны же сотвори́ Твои́м всеси́льным хода́тайством и ве́чныя несконча́емая ра́дости в Ца́рствии Сы́на и Бо́га на́шего. Ами́нь.
Акафист
Пресвятой Богородице в честь иконы Ея Владимирской
(празднование 21 мая/3 июня, 23 июня/6 июля и 26 августа/8 сентября)
Кондак 1
Взбра́нной Воево́де, Засту́пнице на́шей, взира́юще на первопи́санный о́браз Твой, хвале́бное пе́ние воспева́ем Ти раби́ Твои́, Богома́ти. Ты же, я́ко иму́щая держа́ву непобеди́мую, сохрани́ и спаси́ благода́рне Тебе́ вопию́щия: Ра́дуйся, Пречи́стая, от ико́ны Твоея́ ми́лости нам источа́ющая.
Икос 1
А́нгельския си́лы на небеси́ немо́лчно воспева́ют Тя, Пречи́стая, зря́ще сла́ву Пребоже́ственную, е́юже Сын Твой просла́ви Тя; но и нас, земны́х, не оста́вила еси́, я́ко не́кую лучу́, ниспосла́вши нам ико́ну Твою́, святы́м Луко́ю первопи́санную. О ней бо не́когда изрекла́ еси́: «С сим о́бразом благода́ть Моя́ и си́ла да пребу́дут». Те́мже ве́рнии раби́ Твои́, по вся дни и на вся́цем ме́сте сбытие́ слове́с Твои́х зря́ще, ко о́бразу Твоему́ цельбоно́сному притека́ем и, я́ко же Саме́й Ти, с на́ми су́щей, вопие́м: Ра́дуйся, а́нгелов Цари́це; ра́дуйся, всего́ ми́ра Влады́чице. Ра́дуйся, на небеси́ при́сно сла́вимая; ра́дуйся, и на земли́ велича́емая. Ра́дуйся, благода́ть Твою́ ико́не Твое́й сей дарова́вшая; ра́дуйся, на спасе́ние чело́веков ту́ю поста́вившая. Ра́дуйся, Бо́жия бла́гости ско́рая Пода́тельнице; ра́дуйся, моле́ний на́ших усе́рдная Послу́шнице. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 2
Ви́дя чуде́с мно́жество, от принесе́нныя в Вышгра́д святы́я ико́ны Твоея́ быва́емое, благове́рный князь Андре́й возгоре́ся ду́хом и умоля́ше Тя, да ска́жеши святу́ю во́лю Твою́ и да благослови́ши его́ в преде́лы Росто́вския отъити́. Те́мже, улучи́в жела́емое и ико́ну Твою́ взем, идя́ше в путь свой, ра́дуяся и поя́ Бо́гу: Аллилу́иа.
Икос 2
Разуме́ша вси лю́дие ди́вное ше́ствие Твое́, Цари́це Небе́сная, от Ки́ева в зе́млю Росто́вскую, боля́щии бо исцеля́хуся и и́на зна́мения и чудеса́ быва́ху всем с ве́рою притека́ющим ко о́бразу Твоему́. Сего́ ра́ди воспе́ша Тебе́: Ра́дуйся, чудесы́ ше́ствие ико́ны Твоея́ зна́менавшая; ра́дуйся, мно́ги немощны́я исцели́вшая. Ра́дуйся, воздыха́ния на́ша не отверга́ющая; ра́дуйся, недосто́йныя моли́твы на́ша прие́млющая. Ра́дуйся, Ма́терния щедро́ты Твоя́ на нас излива́ющая; ра́дуйся, ико́ною Твое́ю нам благоде́ющая. Ра́дуйся, во обстоя́нии су́щим ско́рую по́мощь да́рующая; ра́дуйся, отча́янным наде́жду возвраща́ющая. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 3
Си́лою Твое́ю огражда́ем, благове́рный князь Андре́й преде́л Владими́рских дости́же и зде благу́ю во́лю Твою́, Влады́чице, позна́. В нощне́м бо виде́нии тому́ я́вльшися, повеле́ла еси́ от ме́ста сего́ не отходи́ти и чудотво́рную ико́ну Твою́ зде, во гра́де Влади́мире, поста́вити, да бу́дет Се́верней стране́ на́шей в благослове́ние и лю́дем Твои́м в покро́в, вопию́щим Бо́гу: Аллилу́иа.
Икос 3
Име́я в себе́ благода́тное сокро́вище – ико́ну Твою́ Влади́мирскую, преуспева́ше от си́лы в си́лу Оте́чество на́ше. Во дни бо обстоя́ний и напа́стей не оста́вила еси́ род наш, Влады́чице, и во благовре́мении близ была́ еси́, всеси́льным предста́тельством Твои́м ве́рныя лю́ди Твоя́ заступа́ющи, пою́щия Ти: Ра́дуйся, гнев Бо́жий, пра́ведно на ны дви́жимый, утоля́ющая; ра́дуйся, на ми́лость к нам, гре́шным, Го́спода преклоня́ющая. Ра́дуйся, я́ко смире́нным мольба́м рабо́в Твои́х вне́млеши; ра́дуйся, я́ко утеше́ние Твое́ нам пода́ти поспеша́еши. Ра́дуйся, я́ко ико́ною Твое́ю от вся́ких нас бед огражда́еши; ра́дуйся, я́ко то́ю ко́зни вра́жия разруша́еши. Ра́дуйся, в час ско́рби лю́ди Твоя́ укрепля́ющая; ра́дуйся, ти́хое и безмяте́жное жити́е тем да́рующая. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 4
Бу́рю помышле́ний сумни́тельных про́йде благове́рный князь Андре́й, от мно́жества враго́в не́когда обстои́мь; Ты же, Всепе́тая, ди́вным от ико́ны Твоея́ зна́мением сла́вную побе́ду тому́ предвозвести́ла еси́. Те́мже ве́рою обнови́вся и о и́мени Твое́м дерза́я, воспе́ Бо́гу: Аллилу́иа.
Икос 4
Слы́шавше мяте́жницы убие́ние благове́рнаго кня́зя Андре́я, град Влади́мир расхи́тити устреми́шася, но ико́ну Твою́ чудотво́рную, на сто́гна гра́да изнесе́нную, внеза́пу узре́вше, умили́шася се́рдцем и на коле́на па́дше во гресе́ свое́м пока́яшася. Благочести́вии же лю́дие, таково́му от ико́ны Твоея́ благода́тному явле́нию ра́дующеся, песнь благода́рственную воспе́ша Тебе́: Ра́дуйся, междоусо́бных бра́ней утоле́ние; ра́дуйся, ожесте́вших серде́ц умягче́ние. Ра́дуйся, я́ко заблу́ждшия на путь пра́вый возвраща́еши; ра́дуйся, я́ко от собла́знов су́етных нас огражда́еши. Ра́дуйся, па́губы вседуше́вныя низлага́ющая; ра́дуйся, душевре́дная науче́ния облича́ющая. Ра́дуйся, к Ца́рствию Небе́сному путь невозбра́нный нам указу́ющая; ра́дуйся, мир ве́чный и ра́дость нам подаю́щая. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 5
Боготе́чная звезда́ отце́м на́шим бысть ико́на Твоя́, Влады́чице, ея́же све́том ведо́ми, мно́гажды побежда́ху ца́рствия, возмога́ху от не́мощи, обраща́ху в бе́гство полки́ чужди́х и путь к земно́му преуспе́янию и небе́сному спасе́нию обрета́ху. Сего́ ра́ди по до́лгу сла́вит Тя земля́ Росси́йская, пою́щи Бо́гу: Аллилу́иа.
Икос 5
Ви́девше не́когда лю́дие влади́мирстии в чу́днем виде́нии град свой на возду́се вознесе́н и ико́ну Твою́ верху́ его́, я́коже со́лнце, сия́ющу, со умиле́нием разуме́ша, Влады́чице, неотсту́пный покро́в Твой гра́ду их и, Твое́ ми́лостивое промышле́ние о них сла́вяще, воспе́ша Ти: Ра́дуйся, Ма́ти милосе́рдия; ра́дуйся, Исто́чниче чуде́с. Ра́дуйся, бо́драя на́ша Храни́тельнице; ра́дуйся, гра́ду на́шему Покро́ве. Ра́дуйся, горе́ к небе́сным сокро́вищем ум наш возводя́щая; ра́дуйся, любо́вь к Бо́гу в сердца́х ве́рных насажда́ющая. Ра́дуйся, малове́рныя вразумля́ющая; ра́дуйся, неве́рных смы́слы просвеща́ющая. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 6
Пропове́дник неизрече́нных чуде́с Твои́х, Влады́чице, яви́ся собо́рный храм Твой во гра́де Влади́мире, свято́ю ико́ною Твое́ю украше́нный. Попуще́нием бо Бо́жиим все благоле́пие его́ не́когда во огни́ поги́бе, ико́на же свята́я Твоя́, я́ко же купина́ неопали́ма пребы́сть, да и ви́девше и осяза́вше прису́тствие Твое́, ве́рнии воспою́т: Аллилу́иа.
Икос 6
Возсия́ па́ки свет ико́ны Твоея́, Богоро́дице, во дни лю́таго наше́ствия Баты́ева. А́ще бо нечести́вии ага́ряне и пожго́ша огне́м собо́рный храм Твой и святи́теля Влади́мирскаго и лю́ди, моля́щияся в це́ркви, умертви́ша и вся коне́чному истребле́нию преда́ша, оба́че ико́на Твоя́ и па́ки неврежде́на обре́теся, подвиза́ющи пе́ти Тебе́: Ра́дуйся, Купино́ Неопали́мая; ра́дуйся, Сокро́вище неиждива́емое. Ра́дуйся, Стено́ несокруши́мая; ра́дуйся, Прибе́жище всем упова́ющим на Тя. Ра́дуйся, ико́ну Твою́ и во пла́мени це́лу сохрани́вшая; ра́дуйся, нам во утеше́ние и спасе́ние ту́ю оста́вившая. Ра́дуйся, Ты бо еси́ на́ше защище́ние; ра́дуйся, Ты бо еси́ всех благочести́вых непреста́нное ра́дование. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 7
Хотя́ вели́кий князь Васи́лий защище́ние стяжа́ти сто́льному гра́ду своему́, повеле́ Влади́мирскую ико́ну Твою́ в Москву́ пренести́. И во сре́тение ея́ усе́рдно исше́дше князь и святи́тель Моско́вский Киприа́н со освяще́нным Собо́ром и всем мно́жеством люде́й, до земли́ пред не́ю поклони́шася, я́коже бо Самую́ Тя, Пречи́стая, к ним приходя́щую срета́ху, зову́ще Тебе́: «О Ма́ти Бо́жия, спаси́ зе́млю Ру́сскую», вку́пе же и пою́ще Бо́гу: Аллилу́иа.
Икос 7
Но́вое зна́мение сотвори́ла еси́, Пренепоро́чная, в день праздно́вания сре́тения ико́ны Твоея́ Влади́мирския в Москве́: в гро́зном бо виде́нии, я́ко всемогу́щая Цари́ца, мно́жеством во́инств небе́сных обстои́ма, со святи́тели Моско́вскими яви́лася еси́ нечести́вому ага́рянскому ха́ну и от преде́л земли́ Ру́сския отъи́ти повеле́ла еси́. Тогда́ ве́рнии лю́дие Твои́, врага́ ви́девше посра́млена и бежа́ща, с весе́лием поя́ху Тебе́: Ра́дуйся, побе́до непобеди́мая; ра́дуйся, Цари́це Небе́сных Сил. Ра́дуйся, врага́ гро́зное посрамле́ние; ра́дуйся, рабо́в Твои́х Ра́досте неча́янная. Ра́дуйся, наде́ждо всех лише́нных наде́жды; ра́дуйся, спасе́ние во дно а́дово нисше́дших. Ра́дуйся, прише́ствием ико́ны Твоея́ Москву́ возвесели́вшая; ра́дуйся, заступле́нием Твои́м и град Влади́мир не оста́вившая. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 8
Стра́нную побе́ду всеси́льною по́мощию Твое́ю, Влады́чице, без бра́ни соверши́вшуюся, и до ны́не Це́рковь Правосла́вная све́тло прославля́ет, Сре́тение ико́ны Твоея́ Влади́мирския пра́зднующи и вся ве́рная ча́да Своя́ созыва́ющи ми́лости Твоя́ благода́рне испове́дати, Сы́ну же Твоему́ и Бо́гу пе́ти: Аллилу́иа.
Икос 8
Всю Тя Бог освяти́, Пренепоро́чная, и я́ко Ма́терь Свою́ в гото́вое прибе́жище и те́плый покро́в всем нам дарова́. Те́мже от ме́ньших земли́ и незна́емых возвели́чися благослове́нный Тобо́ю град Москва́, благоче́стно ико́ну Твою́ почита́яй; вся бо племена́ ру́сская воеди́но собра́ и о́бласть свою́ над окре́стными язы́ки от мо́ря и до мо́ря и да́же до коне́ц земли́ распростре́, всем ве́ру Христо́ву возвеща́яй, Тебе́ же вопия́: Ра́дуйся, земли́ на́шея забра́ло; ра́дуйся, Це́ркве утвержде́ние. Ра́дуйся, моли́твенников на́ших похвало́. Ра́дуйся, люде́й Твои́х спасе́ние; ра́дуйся, враги́ на́ша устраша́ющая. Ра́дуйся, полки́ чужди́х дале́че отгоня́ющая. Ра́дуйся, я́ко Тобо́ю Русь Правосла́вная содержи́тся; ра́дуйся, я́ко Тобо́ю род христиа́нский хва́лится. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 9
Вся́кое естество́ а́нгельское восхваля́ет Тя, Богороди́тельнице, у Престо́ла Сы́на Твоего́ предстоя́щую и за страну́ на́шу и вся христиа́ны моля́щуюся. Мы же, лю́дие Твои́, моли́тв Твои́х де́йство разумева́юще, к чудотво́рней ико́не Твое́й с любо́вию притека́ем и Бо́гу приле́жно вопие́м: Аллилу́иа.
Икос 9
Вети́й земны́х худо́жество не довле́ет по достоя́нию благохвали́ти Тя, Пресвята́я Всенепоро́чная, и ико́ны Твоея́ чудеса́ исчи́слити, и́миже Це́рковь Правосла́вная велича́ется, гра́ды на́ша утвержда́ются и вси христиа́не боже́ственне веселя́тся. Те́мже за премно́гую любо́вь Твою́ к нам и вся ми́лости Твоя́ приими́ от нас сие́ хвале́бное пе́ние: Ра́дуйся, Собо́ром святы́х, в стра́не на́шей просия́вших, окружа́емая и сла́вимая; ра́дуйся, предста́телей на́ших, чудотво́рцев росси́йских, моле́ния прие́млющая. Ра́дуйся, хода́тайством Твои́м о нас Бо́га умилостивля́ющая; ра́дуйся, честны́м покро́вом Твои́м нас при́сно осеня́ющая. Ра́дуйся, страны́ на́шея пресла́вная Защи́тнице; ра́дуйся, призыва́ющим Тя ско́рая Помо́щнице. Ра́дуйся, тружда́ющихся благода́тное укрепле́ние; ра́дуйся, ка́ющихся гре́шников несумне́нное спасе́ние. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 10
Спасе́ния и́щуще, к Тебе́ прибега́ем, Милосе́рдная Ма́ти, и, чудотво́рную Твою́ ико́ну ны́не обстоя́ще, вся ми́лости Твоя́, то́ю отце́м на́шим явле́нныя, с любо́вию воспомина́ем. Да не тще́тна бу́дет, Влады́чице, и на́ша наде́жда на Тя, на не́мощь на́шу умилосе́рдися и спаси́ вопию́щия Бо́гу: Аллилу́иа.
Икос 10
Стена́ еси́ и заступле́ние всем с ве́рою прибега́ющим к Тебе́, Всеблаже́нная Отрокови́це, всегда́ бо ми́лости Твоя́ ро́ду христиа́нскому явля́ла еси́ и отце́м на́шим многоча́стне и многообра́зне благоде́яла еси́, от наше́ствия иноплеме́нных и от вся́кия беды́ и ну́жды тех избавля́ющи. Не оскуде́й и ны́не, Влады́чице, утоля́ющи лю́тыя на ны возста́ния грехо́вныя и о́блак искуше́ний отжени́, Тебе́ бо навыко́хом пе́ти: Ра́дуйся, Ма́ти Бо́жия, ма́тернюю любо́вь к нам, гре́шным, простира́ющая; ра́дуйся, си́лою Твое́ю на́шу не́мощь восполня́ющая. Ра́дуйся, милосе́рдие Бо́жие разуме́ти нас науча́ющая; ра́дуйся, к дело́м милосе́рдия и нас возбужда́ющая. Ра́дуйся, страх Бо́жий в сердца́ ве́рных влага́ющая; ра́дуйся, гре́шники к покая́нию призыва́ющая. Ра́дуйся, невнима́нию на́шему долготерпя́щая; ра́дуйся, от сна ле́ности нас возставля́ющая. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 11
Пе́ние похва́льное воспе́ша моско́встии лю́дие, спасе́ние Твое́ не́когда улучи́вше: верху́ бо я́вльшися, светоза́рною оде́ждою оде́яна, храм Твой и град Москву́ от запале́ния о́гненнаго ри́зою Твое́ю защити́ла еси́. Неотсту́пна пребу́ди, Всемо́щная, от ме́ста сего́ и ны́не и нам избавле́ние Твое́ ви́дети да́руй, да веселя́щеся воспое́м: Аллилу́иа.
Икос 11
Свет ра́дости возсия́ла еси́, Влады́чице, и во дни ты́я, егда́ смотре́нием Бо́жиим дре́вняя красота́ церко́вная к нам па́ки возврати́ся и Свяще́нный Собо́р гра́ду Москве́ Патриа́рха, всей же стране́ на́шей еди́наго па́стыря и моли́твенника утверди́. Ты же, Пречи́стая, от ико́ны Твоея́ Владими́рския жре́бий первосвяти́тельства сего́ избра́ннику Твоему́ дарова́ла еси́, да расточе́нныя о́вцы слове́снаго ста́да Це́ркве Росси́йския па́ки воеди́но собере́т. Сего́ ра́ди вопие́м Тебе́: Ра́дуйся, скорбя́щих ра́досте; ра́дуйся, обурева́емых приста́нище. Ра́дуйся, в напа́стех нас не оста́вившая; ра́дуйся, во уничиже́нии на́шем свет наде́жды нам возсия́вшая. Ра́дуйся, на смире́нныя призре́вшая; ра́дуйся, низше́дшия возвели́чившая. Ра́дуйся, Це́ркве на́шея похвало́; ра́дуйся люде́й Твои́х весе́лие. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 12
Благода́ть Твою́ не отыми́ от нас, ми́лости Исто́чниче, я́коже во дни лихоле́тия святи́телей на́ших И́ова и Ермоге́на услы́шала еси́ и зе́млю Ру́сскую от коне́чного расхище́ния, правосла́вную же ве́ру в ней от истребле́ния спасла́ еси́, да изба́вленнии Тобо́ю Бо́гу воспое́м: Аллилу́иа.
Икос 12
Пою́ще неисче́тныя ми́лости Твоя́, от лет дре́вних ро́ду на́шему явле́нныя и доны́не не оскудева́ющия, хва́лим Тя, Пречи́стая, я́ко неусы́пную Храни́тельницу на́шу и заступле́ние, и ма́тернюю любо́вь Твою́ к ста́ду Сы́на Твоего́ ве́дуще, со дерзнове́нием, а́ще и раби́ неключи́ми есмы́, вопие́м Тебе́: Ра́дуйся, Русь Правосла́вную возлюби́вшая; ра́дуйся, ве́ру и́стинную в ней утверди́вшая. Ра́дуйся, отцы́ на́ша во благоче́стии сохрани́вшая; ра́дуйся, и на́ше неможе́ние не отри́нувшая. Ра́дуйся, утвержде́ние на́ше незы́блемое; ра́дуйся, наде́ждо на́ша непосты́дная. Ра́дуйся, Моли́твеннице на́ша те́плая; ра́дуйся, Засту́пнице усе́рдная. Ра́дуйся, Пречи́стая, от ико́ны Твоея́ ми́лости нам источа́ющая.
Кондак 13
О Всепе́тая Ма́ти, Засту́пнице Всеми́лостивая, Де́во Богоро́дице, обы́чным Твои́м милосе́рдием ма́лое моле́ние сие́ на́ше прие́млющи, я́коже дре́вле, та́ко и ны́не поми́луй зе́млю на́шу Ру́сскую и от вся́ких бед рабы́ Твоя́ изба́ви, о Тебе́ вопию́щия: Аллилу́иа.
Этот кондак читается трижды, затем 1-й икос «А́нгельския си́лы…» и 1-й кондак «Взбра́нной Воево́де…»
Молитвы
О Пресвята́я Госпоже́ Влады́чице Богоро́дице, вы́шши еси́ всех а́нгел и арха́нгел, и всея́ тва́ри честне́йши, Помо́щнице еси́ оби́димых, ненаде́ющихся наде́яние, убо́гих Засту́пнице, печа́льных утеше́ние, а́лчущих Корми́тельнице, наги́х оде́яние, больны́х исцеле́ние, гре́шных спасе́ние, христиа́н всех поможе́ние и заступле́ние.
О Всеми́лостивая Госпоже́, Де́во Богоро́дице Влады́чице, ми́лостию Твое́ю спаси́ и поми́луй святе́йшия патриа́рхи правосла́вныя, преосвяще́нныя митрополи́ты, архиепи́скопы и епи́скопы и весь свяще́ннический и и́ноческий чин, и вся правосла́вныя христиа́ны ри́зою Твое́ю честно́ю защити́; и умоли́, Госпоже́, из Тебе́ без се́мене воплоти́вшагося Христа́ Бо́га на́шего, да препоя́шет нас си́лою Свое́ю свы́ше, на неви́димыя и ви́димыя враги́ на́ша.
О Всеми́лостивая Госпоже́ Влады́чице Богоро́дице! Воздви́гни нас из глубины́ грехо́вныя и изба́ви нас от гла́да, губи́тельства, от тру́са и пото́па, от огня́ и ме́ча, от нахожде́ния иноплеме́нных и междоусо́бныя бра́ни, и от напра́сныя сме́рти, и от нападе́ния вра́жия, и от тлетво́рных ветр, и от смертоно́сныя я́звы, и от вся́каго зла. Пода́ждь, Госпоже́, мир и здра́вие рабо́м Твои́м, всем правосла́вным христиа́ном, и просвети́ им ум, и о́чи серде́чнии, е́же ко спасе́нию; и сподо́би ны, гре́шныя рабы́ Твоя́, Ца́рствия Сы́на Твоего́, Христа́ Бо́га на́шего; я́ко держа́ва Е́го благослове́на и препросла́влена, со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
Акафист
Пресвятой Богородице в честь иконы Ея «Всецарица»
(празднование 18/31 августа)
Кондак 1
Новоя́вленней Твое́й ико́не предстоя́ще ве́рнии уми́льно, воспева́ем Ти, Всецари́це, раби́ Твои́; низпосли́ цельбы́ к Тебе́ притека́ющим, да вси ра́достно зове́м Ти: Ра́дуйся, Всецари́це, неду́ги на́ша благода́тию исцеля́ющая.
Икос 1
А́нгел предста́тель с небесе́ сшед, рече́ Всецари́це: ра́дуйся! И боговеща́нным гла́сом воплоща́ема Тя зря, Го́споди, возопи́ к Ней такова́я: Ра́дуйся, глави́зно на́шего спасе́ния; ра́дуйся, исполне́ние Зижди́телева смотре́ния. Ра́дуйся, яко Тобо́ю Бог воплоти́ся; ра́дуйся, яко Неви́димый в Тебе́ изобрази́ся. Ра́дуйся, Ми́лость ми́ра внутрь прия́вшая; ра́дуйся, одея́ние пло́ти Сло́ву истка́вшая. Ра́дуйся, уму́ непости́жная го́рняя сла́во; ра́дуйся, сердца́ оживи́вшая небе́сная ма́нно. Ра́дуйся, звездо́, благода́ти сия́ние; ра́дуйся, исто́чниче, живы́я воды́ излия́ние. Ра́дуйся, Богоро́дице, в жена́х благослове́нная; ра́дуйся, ро́ждшая Спа́са Де́во нетле́нная. Ра́дуйся, Всецари́це, неду́ги на́ша благода́тию исцеля́ющая.
Кондак 2
Безнача́льное Сло́во Отроча́ мла́до Тобо́ю бысть, исцеле́ния подая́ Тя, Де́во, чту́щим и неизрече́нное Его́ рождество́ воспева́ющим: Аллилу́иа.
Икос 2
Ра́зум недоразумева́емый разуме́ти Де́ва и́щущи, возопи́ к служа́щему: «Я́ко Отрокови́ца чи́стая, ка́ко бу́ду Вы́шняго Ма́ти, изъясни́ Ми?» К Ней же Гаврии́л рече́ со стра́хом, зовы́й такова́я: Ра́дуйся, Сове́та Вы́шняго избра́ннице; ра́дуйся, гла́са моля́щихся скоропослу́шнице. Ра́дуйся, сокро́вище Христо́ва ми́ра; ра́дуйся, люде́й Твои́х наде́ждо и си́ло. Ра́дуйся, ра́ковыя я́звы ди́вная губи́тельнице; ра́дуйся, про́чих боле́зней исцели́тельнице. Ра́дуйся, еди́ное ми́ру заступле́ние; ра́дуйся, ве́рное в ско́рбех избавле́ние. Ра́дуйся, плач и сле́зы при́сно утоля́ющая; ра́дуйся, спасе́ния вхо́ды всем отверза́ющая. Ра́дуйся, держа́вный покро́ве Афо́н населя́ющих; ра́дуйся, же́зле мона́хов и миря́н. Ра́дуйся, Всецари́це, неду́ги на́ша благода́тию исцеля́ющая.
Кондак 3
Си́ла Вы́шняго осени́вши Тя, Отрокови́це, плоть прия́т неизрече́нно, показа́ Тя село́ сла́дкое хотя́щим жа́ти спасе́ние и пою́щим: Аллилу́иа.
Икос 3
Просла́вися ди́вно свята́я ико́на Твоя́, «Всецари́ца» имену́емая, егда́ цельбоно́сно яви́ся Твое́, Богома́ти, изображе́ние; вопию́щим же пред ним с ве́рою исцеле́ния подае́ши, да умножа́ются пе́сни сицевы́я: Ра́дуйся, Ма́ти незаходи́маго Све́та; ра́дуйся, претерпе́вших до конца́ побе́до. Ра́дуйся, в боле́знех и скорбе́х су́щим врачева́ние; ра́дуйся, си́рот и вдови́ц неруши́мая стено́. Ра́дуйся, две́ри ра́йския отверза́ющая; ра́дуйся, тружда́ющихся и обремене́нных заступа́ющая. Ра́дуйся, о спасе́нии ве́рных хода́таице; ра́дуйся, за род челове́ческий моли́твеннице. Ра́дуйся, ле́ствице небе́сная, возводя́щая от земли́ к небеси́; ра́дуйся, водо́ жива́я, омыва́ющая сме́ртныя грехи́. Ра́дуйся, а́гнице, сердца́ незлоби́вых храня́щая; ра́дуйся, покро́ве, чад Це́ркве осеня́ющий. Ра́дуйся, Всецари́це, неду́ги на́ша благода́тию исцеля́ющая.
Кондак 4
Живо́т ми́рови да́руя, Влады́ка ми́ра всели́ся во утро́бу Твою́ неискусому́жно, Ма́терь ве́рных Тя показа́в, в ми́ре тех воспева́ти призва́: Аллилу́иа.
Икос 4
Пресла́вная соде́яшася о Тебе́, гра́де Бо́жий, исцеле́нием, быва́ющим от святы́я ико́ны Твоея́; сего́ ра́ди цельбоно́сныя струи́ врачева́ний прие́млюще, благода́рственно, о Всецари́це, вопие́м: Ра́дуйся, сна́добие, боль утоля́ющее; ра́дуйся, прохла́до, жар неду́жных остужа́ющая. Ра́дуйся, прижига́ющая ра́ковыя я́звы а́ки пла́менем; ра́дуйся, подыма́ющая со одра́ оста́вленных врачми́. Ра́дуйся, лик Свой пречи́стый избра́нным явля́ющая; ра́дуйся, от грехо́вных уз разреша́ющая. Ра́дуйся, я́ко Тобо́ю избавле́ние от сме́рти дарова́ся; ра́дуйся, я́ко Тобо́ю безсче́тный сонм ве́рных оправда́ся. Ра́дуйся, высото́, челове́ческими по́мыслы неизсле́дованная; ра́дуйся, глубино́, еди́ным Сло́вом изве́данная. Ра́дуйся, проро́чествие пре́жде Тебе́ бы́вших патриа́рхов; ра́дуйся, наста́внице Тебе́ моли́вшихся иера́рхов. Ра́дуйся, Всецари́це, неду́ги на́ша благода́тию исцеля́ющая.
Кондак 5
Пречи́стый Храм Спа́сов позна́хом Тя, Отроковице; к Тебе́ припа́даем, Чи́стая, да нас соде́лаеши хра́мы Божества́, вопию́щих Ему́: Аллилу́иа.
Икос 5
Ви́деша чи́ни а́нгельстии на руку́ Твое́ю Созда́вшаго руко́ю челове́ки, и я́ко Влады́чицу разумева́юще Тя еди́ну, а́ще и Рабо́ю Себе́ нарекла́ еси́, потща́шася пе́сньми послужи́ти Ти, Благослове́нней, сицевы́ми: Ра́дуйся, Бо́гом поста́вленная превы́ше Небе́сных Сил; ра́дуйся, чуде́сными исцеле́ньми исполня́ющая мир. Ра́дуйся, хвалу́ и сла́ву от небе́с слы́шащая; ра́дуйся, благодаре́ние от земли́ прие́млющая. Ра́дуйся, я́ко се́мя тли в сердца́х потреби́ла еси́; ра́дуйся, я́ко ко́зней диа́вольских яре́м сокруши́ла еси́. Ра́дуйся, юдо́ль плаче́вную испо́лнившая ра́достию; ра́дуйся, ско́рби изменя́ющая в небе́сную сла́дость. Ра́дуйся, благоуха́ние Бо́гу прия́тное; ра́дуйся, ка́ющихся гре́шников весе́лие изря́дное. Ра́дуйся, броне́ пра́вды от искуше́ний; ра́дуйся, щи́те огражде́ния от вражды́ и нестрое́ний. Ра́дуйся, Всецари́це, неду́ги на́ша благода́тию исцеля́ющая.
Кондак 6
Пропове́днцы богоглаго́ливии, Спа́совы ученицы́, предста́ша Ти, Де́во, чу́дно, егда́ от земли́ к небеси́ восходи́ла еси́, да еди́ным се́рдцем и усты́ воспою́т Бо́гови: Аллилу́иа.
Икос 6
Возсия́ ди́вно благода́ть от ико́ны Твоея́, Всецари́це, егда́ ю́ноша, уче́ньми сатани́нскими омраче́нный, пред не́ю паде́ и недвижи́м бысть; па́че ча́яния же от уз мра́чных свобожде́нный, со стра́хом и ра́достию взыва́ше Ти си́це: Ра́дуйся, исправле́ние нечести́ваго жития́; ра́дуйся, утеше́ние стра́ждущих лю́те. Ра́дуйся, бесо́вских по́лчищ от Це́ркве отгна́ние; ра́дуйся, мглы грехо́вныя разсе́яние. Ра́дуйся, ко́зней неви́димых упраздне́ние; ра́дуйся, де́монских чар всемо́щное одоле́ние. Ра́дуйся, свети́льниче, прельще́нных наставля́яй; ра́дуйся, о́блаче, неви́нных от зла покрыва́яй. Ра́дуйся, хо́лме, небе́сною ма́нною пита́ющий; ра́дуйся, доли́но, смире́нием Христо́вым насыща́ющая. Ра́дуйся, ка́меню Небе́снаго Ца́рствия; ра́дуйся, зерца́ло преве́чнаго Све́та. Ра́дуйся, Всецари́це, неду́ги на́ша благода́тию исцеля́ющая.
Кондак 7
Хотя́ да́ти Себе́ в снедь ве́рным, Христе́ Бо́же, благоволи́л еси́ от Де́вы воплоти́тися, да прие́млюще Пречи́стое Те́ло и Кровь Твою́, позна́ют Тя Бо́га соверше́ннаго; те́мже дивя́щеся неизрече́нней прему́дрости сей зове́м: Аллилу́иа.
Икос 7
Но́вое показа́ та́инство я́влься Зижди́тель, со ученики́ сверши́вый Та́йную Свою́ Ве́черю; мы же, моля́ще Всецар€ицу удосто́ити нас Боже́ственныя святы́ни, воспису́ем Ей сицева́я: Ра́дуйся, пода́тельнице небе́снаго хле́ба; ра́дуйся, роди́тельнице ве́чнаго живота́. Ра́дуйся, ча́ше, Христу́ приобща́ющая; ра́дуйся, ду́шу и те́ло с Бо́гом сочетава́ющая. Ра́дуйся, лжи́це зла́тая, испо́лнь Боже́ственных Та́ин; ра́дуйся, дра́гий киво́те, вмести́лище вели́кия святы́ни. Ра́дуйся, пе́рсте, на святу́ю Евхари́стию указу́яй; ра́дуйся, трапе́зо, предлага́ющая нам пи́щу святу́ю. Ра́дуйся, досто́йных прича́стников одесну́ю поставля́ющая; ра́дуйся, ревни́телей Боже́ственныя литурги́и от а́да избавля́ющая. Ра́дуйся, приводя́щая сме́ртных к исто́чнику безсме́ртия; ра́дуйся, огражда́ющая чад Своих ми́ром и кре́постию. Ра́дуйся, Всецари́це, неду́ги на́ша благода́тию исцеля́ющая.
Кондак 8
Стра́нное рождество́ ви́девше, жите́йское вся́кое отло́жше попече́ние, горе́ име́им сердца́; на сие́ бо Вы́шний яви́ся, во е́же привлещи́ Тому́ вопию́щия: Аллилу́иа.
Икос 8
Неотсту́пно в не́драх Оте́ческих пребыва́я, Сло́во неопи́санное на земли́ плоть бысть; Бог Ве́лий сотвори́ вели́чие Де́ве и призре́ на смире́ние Рабы́ Своея́, слы́шащия сицева́я: Ра́дуйся, невмести́маго Бо́га вмести́вшая; ра́дуйся, надми́рнаго Творца́ ми́ру яви́вшая. Ра́дуйся, я́ко сокруши́ся сме́рти держа́ва; ра́дуйся, я́ко исцели́ся Ада́мова ра́на. Ра́дуйся, пла́стырю, стру́пы душе́вныя заживля́яй; ра́дуйся, еле́е, я́звы теле́сныя умаща́яй. Ра́дуйся, утоле́ние боле́зней ражда́ющих; ра́дуйся, облегче́ние мук умира́ющих. Ра́дуйся, нане́сшая пораже́ние а́ду; ра́дуйся, притупи́вшая сме́рти жа́ло. Ра́дуйся, ча́яние всео́бщаго воскресе́ния; ра́дуйся, правосла́вных несумне́нное спасе́ние. Ра́дуйся, Всецари́це, неду́ги на́ша благода́тию исцеля́ющая.
Кондак 9
Вся́кое естество́ а́нгельское и челове́ческое удиви́ся вели́чию непостижи́маго Твоего́ воплоще́ния, Сло́ве; недоумева́юще же о сей ве́лией та́йне благоче́стия, со стра́хом и тре́петом благода́рственно зове́м Ти: Аллилу́иа.
Икос 9
Многоразли́чными неду́ги одержи́мии, о Всецари́це, от святы́я ико́ны Твоея́ па́че ча́яния исцеле́ния получа́ют, да прие́мше ве́рою благода́ть, велегла́сно взыва́ют Ти: Ра́дуйся, здра́вых чад при́сное сохране́ние; ра́дуйся, боля́щих ко здра́вию преложе́ние. Ра́дуйся, дете́й неду́гующих исцеле́ние; ра́дуйся, ю́ных страда́льцев Ма́ти. Ра́дуйся, воста́ние на одр боле́зни пове́рженных; ра́дуйся, отра́до стра́хом сме́ртным одержи́мых. Ра́дуйся, вне́млющая челове́ков рыда́ниям; ра́дуйся, призрева́ющая на на́ша стена́ния. Ра́дуйся, бо́лей земны́х небе́сною ра́достию растворе́ние; ра́дуйся, лю́те обурева́емых пачеесте́ственное терпе́ние. Ра́дуйся, я́ко уготовля́еши пла́чущим ра́дость; ра́дуйся, я́ко снабдева́еши кро́тких крило́ма моли́твы. Ра́дуйся, Всецари́це, неду́ги на́ша благода́тию исцеля́ющая.
Кондак 10
Спасти́ хотя́ Зижди́тель истле́вшее грехо́м челове́ческое естество́, сни́де на Тя, я́ко дождь на руно́, и купину́ Тя соде́лав неопали́мую, Бог сый бысть челове́к, да воспева́ем Ему́: Аллилу́иа.
Икос 10
Стена́ еси́ де́вам, Отрокови́це чи́стая, и всем о чистоте́ радя́щим: в Тя бо всели́ся Бог, очища́яй разу́мная созда́ния Своя́, да избы́вше вся́кия скве́рны, предлага́ем Ти сицева́я: Ра́дуйся, молча́ния взыску́ющих собеседнице; ра́дуйся, ве́нче храня́щих де́вство. Ра́дуйся, нача́ло и коне́ц духо́внаго соверше́ния; ра́дуйся, храни́лище Боже́ственнаго Открове́ния. Ра́дуйся, Тро́ическаго Сове́та таи́ннице; ра́дуйся, спасе́ния челове́ков вино́внице. Ра́дуйся, верши́но, го́рдым умо́м непристу́пная; ра́дуйся, убе́жище, смире́нным сердца́м досту́пное. Ра́дуйся, Чи́стая, небесе́ чисте́йшая; ра́дуйся, херу́вимов и серафи́мов честне́йшая. Ра́дуйся, обра́дованная, я́ко прия́ла еси́ от арха́нгела ра́дование; ра́дуйся, уте́шенная, я́ко ру́це Твои́ осяза́сте воскре́сшаго Христа́. Ра́дуйся, Всецари́це, неду́ги на́ша благода́тию исцеля́ющая.
Кондак 11
Пе́ние тща́щеся разу́мное Спа́су приноси́ти, всегда́ неключи́ми, Влады́чице, остае́мся раби́ Твои́; кто бо мо́жет досто́йно воспе́ти Бо́га, Его́же и́мя я́ко ми́ро излия́нное; сего́ ра́ди вопие́м Ему́: Аллилу́иа.
Икос 11
Свет ве́лий возсия́в во тьме седя́щим, посети́ нас Восто́к свы́ше, Сын и Бог Твой, о Де́во; Тя соде́лав свеще́ю на све́щнице, светоно́сным ча́дом церко́вным наказу́ет приноси́ти Ти сицева́я: Ра́дуйся, заре́ У́мнаго Солнца; ра́дуйся, вмести́лище Боже́ственнаго Огня́. Ра́дуйся, све́те, я́ко одея́ние святы́х сотка́ла еси́; ра́дуйся, свеще́, я́ко тьму бесо́вскую отгна́ла еси́. Ра́дуйся, ко́сных умо́в просвеще́ние; ра́дуйся, гре́шных серде́ц озаре́ние. Ра́дуйся, десни́це, из мо́ря су́етствий изводя́щая; ра́дуйся, луче́, путеводя́щая к Ца́рствию спаса́ющихся. Ра́дуйся, мо́лние, нераска́янных поража́ющая; ра́дуйся, гро́ме, губи́телей устраша́ющий. Ра́дуйся, омраче́нныя со́вести просветле́ние; ра́дуйся, Бо́жия Су́да умилостивление. Ра́дуйся, Всеца́рице, неду́ги на́ша благода́тию исцеля́ющая.
Кондак 12
Благода́ть да́ти восхоте́в, Зако́на Ве́тхаго пода́тель Заве́т Но́вый нам дарова́; мы же, благода́ть прии́мше, не де́лы зако́на, но еди́ною ве́рою спасе́ние улучи́вше, воспису́ем вси: Аллилу́иа.
Икос 12
Пою́ще Твое́ рождество́, Богома́ти, я́коже дре́вле Изра́иль в кимва́лех сено́вную ски́нию воспева́ше, та́ко мы ны́не Тя, ски́нию и́стинну, доброде́тельми просла́вляем, да слы́шиши от всех сицева́я: Ра́дуйся, пе́сне, воспева́емая горе́; ра́дуйся, псалме́, слы́шимый ни́зу. Ра́дуйся, Еди́ному Бо́гу досто́йно послужи́вшая; ра́дуйся, Боже́ственней Тро́ице смире́нием угоди́вшая. Ра́дуйся, ве́ки нося́щаго носи́вшая в Себе́; ра́дуйся, престо́ле содержа́щаго Вселе́нную в руце́. Ра́дуйся, та́йно неизрече́нная веко́в и време́н; ра́дуйся, упова́ние тве́рдое наро́дов и племе́н. Ра́дуйся, серде́чное ра́дование иере́ев благогове́йных; ра́дуйся, бы́строе слы́шание моли́тв церко́вных и келе́йных. Ра́дуйся, прему́дрости до́ме богозда́нный; ра́дуйся, ми́лости сосу́де, Бо́гом избра́нный. Ра́дуйся, Всецари́це, неду́ги на́ша благода́тию исцеля́ющая.
Кондак 13
О Всецари́це Ма́ти, ро́ждшая всех святы́х Святе́йшее Сло́во, ны́нешнее на́ше прие́мши песнопе́ние, от вся́кия сме́ртныя боле́зни исцели́ ны и бу́дущаго изба́ви осужде́ния вопию́щих: Аллилу́иа.
Этот кондак читается трижды, затем 1-й икос «А́нгел предста́тель…» и 1-й кондак «Новоя́вленней Твое́й…»
Молитва
О Пречи́стая Богома́ти, Всецари́це! Услы́ши многоболе́зненное воздыха́ние на́ше пред чудотво́рною ико́ною Твое́ю, из уде́ла Афо́нскаго в Росси́ю принесе́нною, при́зри на чад Твои́х, неисце́льными неду́ги стра́ждущих, ко свято́му о́бразу Твоему́ с ве́рою припа́дающих! Я́коже пти́ца крило́ма покрыва́ет птенцы́ своя́, та́ко и Ты ны́не, при́сно жи́ва су́щи, покры́й нас многоцеле́бным Твои́м омофо́ром. Та́мо, иде́же наде́жда исчеза́ет, несумне́нною наде́ждою бу́ди. Та́мо, иде́же лю́тыя ско́рби превозмога́ют, терпе́нием и осла́бою яви́ся. Та́мо, иде́же мрак отча́яния в ду́ши всели́ся, да возсия́ет неизрече́нный свет Божества́! Малоду́шныя уте́ши, немощны́я укрепи́, ожесточе́нным сердца́м умягче́ние и просвеще́ние да́руй. Исцели́ боля́щия лю́ди Твоя́, о всеми́лостивая Цари́це! Ум и ру́ки врачу́ющих нас благослови́, да послу́жат ору́дием Всемо́щнаго Врача́, Христа́ Спа́са на́шего. Я́ко живе́й Ти су́щей с на́ми мо́лимся пред ико́ною Твое́ю, о Влады́чице! Простри́ ру́це Твои́, испо́лненныя исцеле́ния и врачбы́, Ра́досте скорбя́щих, в печа́лех Утеше́ние, да чудотво́рную по́мощь ско́ро получи́вше, прославля́ем Живонача́льную и Неразде́льную Тро́ицу, Отца́ и Сы́на и Свята́го Ду́ха во ве́ки веко́в. Ами́нь.
Акафист
Пресвятой Богородице в честь иконы Ея Донской
(празднование 19 августа/1 сентября)
Кондак 1
Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́, Богоро́дице, но, я́ко иму́щая держа́ву непобеди́мую, от вся́ких нас бед свободи́, да зове́м Ти: Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Икос 1
Арха́нгела благове́стие слы́шавши, Пречи́стая соизво́ли во́ле Го́спода Своего́ и со смире́нием се́рдца отвеща́: «Се, Раба́ Госпо́дня, бу́ди Мне по глаго́лу твоему́». Мы же, дивя́щеся, ка́ко Сын Бо́жий Сын Де́вы быва́ет, со Гаврии́лом Благода́тную пе́сньми почти́м: Ра́дуйся, Отрокови́це, от всех родо́в Богоизбра́нная; ра́дуйся, ски́ние, Ду́хом Святы́м осене́нная. Ра́дуйся, живоно́сная оби́тель Све́та Боже́ственнаго; ра́дуйся, Ма́ти Бо́жия, Спа́са ми́ру ро́ждшая. Ра́дуйся, я́ко Тобо́ю, Благода́тная, Неви́димый нам ви́дим бысть; ра́дуйся, Всепе́тая, я́ко сотвори́ Ти вели́чие Си́льный. Ра́дуйся, я́ко прославле́нием ико́н Твои́х вели́чие сие́ возвеща́ется; ра́дуйся, благода́ть и ми́лость чудотво́рными ико́нами Твои́ми нам явля́ющая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 2
Ви́дяще Тя, Богоро́дице, во объя́тиях Младе́нца Христа́ держа́щую и главо́ю к пречи́стому ли́ку Его́ кро́тце прини́кшую, разумева́ем Боже́ственную любо́вь Твою́ и непреста́нное о ми́ре хода́тайство. В шу́йце же де́ржиши плат чи́стый, е́же сле́зы пла́чущих ско́ро осуша́ти, да никто́же от Тебе́ неуте́шен изы́дет. Ве́руем, я́ко и́маши ве́лие дерзнове́ние ко благосе́рдию Влады́ки, и Бо́гу, да́вшему нам Тебе́, Благу́ю Засту́пницу, благода́рственно пои́м: Аллилу́иа.
Икос 2
Ра́зум немощны́й не мо́жет пости́гнути глубину́ смире́ннаго служе́ния Твоего́, Госпоже́, на земли́ Искупи́телю на́шему, не име́вшему, где главу́ подклони́ти. Во дни уничиже́ния и страда́ния Сы́на Твоего́, Богома́ти, ору́жие сме́ртное прохожда́ше се́рдце Твое́. Сего́ ра́ди се́рдцем соболе́знующе, глаго́лем Ти такова́я: Ра́дуйся, незлоби́вая А́гнице, верте́п и я́сли смире́нно прия́вшая; ра́дуйся, Богоприи́мца Симео́на ско́рбное прорече́ние в се́рдце начерта́вшая. Ра́дуйся, поноше́нию Сы́на Бо́жия сострада́вшая; ра́дуйся, кре́стный путь Его́ слеза́ми ороси́вшая. Ра́дуйся, му́ки Его́ кре́стныя се́рдцем раздели́вшая; ра́дуйся, кресту́ предстоя́нием послуша́ние во́ле Отца́ яви́вшая. Ра́дуйся, гро́бу Сы́на Твоего́ благосе́рдый плач прине́сшая; ра́дуйся, Воскресе́нием Его́ обра́дованная. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 3
Си́ла Вы́шняго соде́ла Тя, Благода́тная, исто́чник неоскудева́ющ утеше́ния бе́дствующим. Мно́ги бо ско́рби претерпе́вши, мо́жеши и искуша́емым помощи́. Лю́дем росси́йским, лю́те стра́ждущим от наше́ствия ага́рян, благоволи́ла еси́ яви́ти о́браз Твой в струя́х реки́ До́на в зна́мение ми́лости Твоея́ ко Оте́честву на́шему, в защи́ту от враг ви́димых и неви́димых, тех же по́мощию Бо́жиею побежда́юще, Спаси́телю Бо́гу пои́м: Аллилу́иа.
Икос 3
Иму́ще Тя пе́рвую подвигополо́жницу, ше́ствующую по стопа́м Влады́ки Христа́, му́жества исполня́хуся первосвяти́телие Моско́встии и подви́жницы благоче́стия Росси́йстии, бе́ды и на́пасти претерпева́юще, уча́ще лю́ди ду́хом Го́сподеви рабо́тати, и́бо си́ла Бо́жия в не́мощи соверша́ется. Мы же, ви́дяще ве́ру оте́ц на́ших и явле́ние благода́ти, нра́вы злы́я в до́брыя претвори́вшия, досто́йно Тя, Наста́вницу ве́рных, ублажа́ем: Ра́дуйся, насажде́ние ве́ры и благоче́стия; ра́дуйся, о́бразе несокруши́маго скорбе́й терпе́ния. Ра́дуйся, до́блести и ве́ры бога́тство неистощи́мое; ра́дуйся, ду́ха уны́ния и боя́зни отгна́ние. Ра́дуйся, ду́ха ра́зума и кре́пости стяжа́ние; ра́дуйся, святы́х печа́льников земли́ Росси́йстей возрасти́вшая. Ра́дуйся, в струя́х Донски́х чу́дно ико́ну Твою́ яви́вшая; ра́дуйся, ре́ки слез наро́дных е́ю изсуши́вшая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 4
Бу́ря превели́каго наше́ствия ага́рянскаго потрясе́ зе́млю Ру́сскую, но не возмо́же угаси́ти пла́мень ве́ры в покро́в Твой, Богома́ти Пречи́стая. Вели́кий печа́льник наш преподо́бный Се́ргий, призва́в на по́мощь Святу́ю Тро́ицу и Тя, Влады́чице, со упова́нием благослови́ вели́каго кня́зя Дими́трия с дружи́ною похо́д проти́ву ага́рян и прорече́ ему́: «Победи́ши враги́ твоя́», те́мже научи́ всех пе́ти Всеси́льному Бо́гу, в Тро́ице сла́вимому: Аллилу́иа.
Икос 4
Ви́дя ико́ну Богома́тере, на по́ле бра́ни от Донски́х преде́л прише́дшую, и прия́в от рук и́ноков посла́ние Се́ргия преподо́бнаго с напу́тием: «Да помо́жет ти Бог и Свята́я Богоро́дица», возра́довася князь Дими́трий, я́ко Сама́ Влады́чица гряде́т на супоста́ты, и, воспря́нув ду́хом, с наде́ждею поведе́ во́ины своя́ на тьмочи́сленныя по́лчища и побе́ду одержа́. Ико́на же Твоя́, Влады́чице, молниено́сным блиста́нием зра́ка Твоего́ враги́ устраша́ющи, зало́г побе́ды явля́ше. Сего́ ра́ди благода́рственно и ра́достно пое́м Ти похва́льная сия́: Ра́дуйся, в явле́нии ико́ны Твоея́ луча́ми Со́лнца пра́вды ве́рных осия́вшая; ра́дуйся, небе́сная Воево́до, Ма́ти Го́спода сил. Ра́дуйся, во́инови́ноков на по́двиг ра́тный избра́вшая и укрепи́вшая; ра́дуйся, Оте́чество на́ше от и́га ага́рянскаго свободи́вшая. Ра́дуйся, во́ином му́жества неодоли́маго дарова́ние; ра́дуйся, врага́ иско́ннаго гро́зное низверже́ние. Ра́дуйся, пресла́вную побе́ду правосла́вно Тя чту́щим дарова́вшая; ра́дуйся, земли́ Ру́сския от ве́ка покро́в и помо́щнице. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 5
Богоявле́нною звездо́ю возсия́ ико́на Твоя́ пресве́тлая, озаря́ющи у́тро бра́ни и возвеща́ющи благослове́ние Бо́жие ратобо́рцем, на брань жесто́кую с ага́ряны подви́гшимся. Весь день той предстоя́ще Се́ргий преподо́бный с бра́тиею неотсту́пно престо́лу Святы́я Тро́ицы. Ве́черу уже́ бы́вшу, побе́ду ста́рец ду́хом позна́в, о сем ра́достно провозгласи́ и благода́рственное пе́ние соверши́ Всеще́дрому Бо́гу, призыва́я и нас велегла́сно воспе́ти Ему́: Аллилу́иа.
Икос 5
Ви́дя оча́ми ве́ры тече́ние би́твы и моли́твою ратобо́рцы укрепля́я поиме́нно помина́ше преподо́бный Се́ргий вожди́ и во́ины убие́нныя. Мы же, иму́ще заве́т его́ па́мять о такове́х осо́бо твори́ти и ви́дяще си́лу моли́твы, побе́ду ору́жию принося́щия, из глубины́ се́рдца воззове́м Бо́жией Ма́тери, всемо́щней покрови́тельнице ду́шу свою́ полага́ющих за дру́ги своя́: Ра́дуйся, во́инов непреобори́мая спобо́рнице; ра́дуйся, меч гне́ва Бо́жия сме́лым вруча́ющая. Ра́дуйся, из те́рния злострада́ний вене́ц побе́ды соплета́ющая; ра́дуйся, во бра́нех си́лу ду́ха да́же до по́двига возвыша́ющая. Ра́дуйся, боля́щих и ра́нами уя́звленных не оставля́ющая; ра́дуйся, убие́нных на по́ле бра́ни к ве́чному поко́ю управля́ющая. Ра́дуйся, роди́телей и вдови́ц скорбя́щих благода́тное утеше́ние; ра́дуйся, Воево́до изря́дная, иму́щая держа́ву непобеди́мую. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 6
Провозве́стник спасе́ния Москвы́ от внеза́пного наше́ствия ага́рянскаго яви́ся о́браз Твой, Засту́пнице ско́рая. Неприя́телем во град вни́ти уже́ гото́вым, с ве́рою и сле́зным моле́нием обнесо́ша его́ лю́дие по стена́м и сто́гнам гра́да и поста́виша посреде́ во́ев в похо́дной це́рковице Се́ргия преподо́бнаго, и, в моли́тве прилежа́ще, усе́рдно взыва́ху Всеми́лостивому Спа́су: Аллилу́иа.
Икос 6
Возсия́вшу со́лнцу, узре́ша стрегу́щии во́ини, я́ко опусте́ стан ага́рян: но́щию страх внеза́пу нападе́ на ня от не́кия ве́лия си́лы и, смути́вшеся, бежа́ша неудержи́мо да́же за преде́лы Росси́йския и вси изгибо́ша. О преди́вная Засту́пнице на́ша! Твои́ми моли́твами ско́рое избавле́ние сие́ бысть. Да испо́лнится же дре́вний храм сей, возвы́сивыйся на ме́сте, иде́же стоя́ше чудотво́рный о́браз Донски́й, гла́са хвалы́ сея́: Ра́дуйся, гра́да Москвы́ стра́же неусыпа́ющий; ра́дуйся, миротво́рца кня́зя Дании́ла нача́ло вели́чию Москвы́ положи́ти сподо́бившая. Ра́дуйся, моли́твами святи́телей и Се́ргия преподо́бнаго град наш огражда́ющая; ра́дуйся, в день ско́рби плач ве́рных в ра́дость претворя́ющая. Ра́дуйся, кова́рнаго врага́ внеза́пным бе́гством истреби́вшая; ра́дуйся, упова́ние на по́мощь Твою́ не посрами́вшая. Ра́дуйся, свеще́ неугаси́мая, ве́ры огнь воспламеня́ющая; ра́дуйся, Благода́тная, я́ко Тобо́ю с на́ми Бог. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 7
Восхоте́вши огради́ти Русь правосла́вную, держа́вная Покрови́тельнице на́ша, мно́гажды ко́зни ага́рян и про́чих иноплеме́нник разоря́ше, преде́лы страны́ на́шея храня́щи, и побе́ды оби́льныя да́же без кро́ве подава́ше. Егда́ же Вели́кую и Ма́лую Росси́ю воссоедини́тися благослови́ла еси́, тем си́лу Оте́чества в едине́нии наро́да на́шего, в сою́зе любве́ утверди́ла еси́. Благоволи́, о Ма́ти Бо́жия, в ми́ре глубо́це вселе́нную сохрани́ти, Тебе́ бо даде́ся благода́ть всеми́рнаго заступле́ния пред Влады́кою всех, Его́же во́инства небе́сная сла́вят, пою́ще Ему́: Аллилу́иа.
Икос 7
Но́ваго стра́жа неусы́пнаго гра́да Москвы́ досто́йно почти́ти хотя́ще, собо́рный храм лю́дие благочести́вии в Донсте́й оби́тели сооруди́ша и на стена́х хра́ма воздвиго́ша изображе́ние ико́ны Твоея́, Богома́ти, в боже́ственное огражде́ние страны́ на́шея, я́ко да отъи́нуде находя́щии врази́ отраже́ни бу́дут неотсту́пными моли́твами Твои́ми. Тебе́ же, я́ко су́щей с на́ми, со упова́нием глаго́лем: Ра́дуйся, Бо́га жива́го Хра́ме одушевле́нный; ра́дуйся, Боголюби́вая, страну́ Росси́йскую достоя́нием Свои́м избра́вшая. Ра́дуйся, нощны́х бде́ний и пе́ний моле́бных ско́рое слы́шание; ра́дуйся, ико́ну Твою́, я́ко зна́мя побе́д неотъе́млемое, дарова́вшая. Ра́дуйся, прекраще́нием бра́ней мир и ра́дость принося́щая; ра́дуйся, до́брое приста́нище душа́м, и́щущим спасе́ния. Ра́дуйся, Ма́ти ми́ра, смяте́ний во́лны укроща́ющая; ра́дуйся, гра́да Москвы́ и страны́ на́шея всемо́щная Предста́тельнице. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 8
Рассе́яшася ту́чи напа́стей моли́твами Твои́ми, Засту́пнице Всеблага́я, те́плая заря́ покая́ния, восходя́щи, предваря́ет то́ки благода́ти, призыва́ющи к по́двигу: ве́ровати пра́во и жи́ти свя́то. Простри́ же покро́в Твой, о Благода́тная Ма́ти, на всех гряду́щих терни́стым, но вожделе́нным путе́м Христо́вых за́поведей, да вси позна́ют, я́ко с на́ми Бог, Ему́же пое́м: Аллилу́иа.
Икос 8
Весь мир зле стра́ждет грех ра́ди челове́ческих, во зло его́ поверга́ющих. В Тебе́, Ма́ти ро́да христиа́нскаго, нача́ло о́бщаго избавле́ния, исполне́ние вся́кия доброде́тели. Яви́ же нам, Богому́драя Де́во, в Ева́нгелии Сы́на Твоего́ свет боже́ственный, да, отве́ргше го́речь греха́, сла́дость благоче́стия обря́щем, взыва́юще Ти сицева́я: Ра́дуйся, благода́ти Живоно́сный Исто́чниче; ра́дуйся, Е́юже ми́ра всего́ ди́вное преображе́ние. Ра́дуйся, Всеблаже́нная, ходя́щая в зако́не Госпо́дни непоро́чно; ра́дуйся, слеза́ми покая́ния ороша́ющая нас благода́тно. Ра́дуйся, моли́тве серде́чней науча́ющая; ра́дуйся, по́двигу поста́ вспомоществу́ющая. Ра́дуйся, грехо́вныя по́мыслы вла́стно отгоня́ющая; ра́дуйся, братолю́бием те́мную зло́бу побежда́ти повелева́ющая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 9
Всех немощны́х кре́посте, печа́льных утеше́ние, стра́ждущих посеще́ние, ве́рных дерзнове́ние Ты еси́, Пречи́стая Влады́чице Богоро́дице; всех притека́ющих под сень Креста́ Госпо́дня ко спасе́нию приво́диши, да после́дуют Искупи́телю Бо́гу, пою́ще песнь: Аллилу́иа.
Икос 9
Вети́и многовеща́ннии не мо́гут исчести́, Человеколюби́вая Ма́ти, бе́здну щедро́т Твои́х, на злостра́ждущия и беспо́мощныя излива́емых. И мы, сла́дость утеше́ния в ну́ждах позна́вше, благословля́ем Тя с ве́рою и че́ствуем с любо́вию, моле́ния вознося́ще пред о́бразом Твои́м сицева́я: Ра́дуйся, безмо́лвие ди́вное в ско́рбех земны́х показа́вшая; ра́дуйся, скорбя́щих и пла́чущих отра́до и утеше́ние. Ра́дуйся, боля́щих милосе́рдая цели́тельнице; ра́дуйся, долгонеду́жных сла́дости ра́йския та́йное приобще́ние. Ра́дуйся, стра́ждущих любо́вию бли́жних окружа́ющая; ра́дуйся, вдов и сиро́т незри́мая пита́тельнице. Ра́дуйся, я́ко па́че же́мчуга слеза́ми ра́дости ико́на Твоя́ украша́ется; ра́дуйся, Оте́честву на́шему побе́ды оби́льныя да́рующая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 10
Спасти́ хотя́ мир, Сын Бо́жий из Тебе́, Де́во, пло́тию облече́ся, и благода́тию Его́ па́дшее естество́ челове́ческое, грехо́м оскверне́нное, очище́ние и спасе́ние прие́млет. Ди́вное Бо́жие смотре́ние о нас Тобо́ю, Де́во, соде́йствием Свята́го Ду́ха исполня́ется. Я́ко Ты еси́ вои́стину поги́бших взыска́ние и нераска́янных гре́шников к покая́нию те́плому увеща́ние, и Тобо́ю от отча́яния грехо́внаго избавля́еми, дерза́ем с весе́лием пе́ти Искупи́телю Бо́гу: Аллилу́иа.
Икос 10
Стена́ еси́ несокруши́мая Це́ркве Христо́вы, Всенепоро́чная Де́во, ве́рныя бо во искуше́ниих укрепля́еши и ми́ром и любо́вию огражда́еши. Сего́ ра́ди и воздыха́ния моли́твенная не умолка́ют зову́щих Ти: Ра́дуйся, от купе́ли креще́ния блага́я восприе́мнице; ра́дуйся, супру́гов благослове́нною любо́вию венча́ние. Ра́дуйся, ма́терем многотру́дным изря́дная помо́щнице; ра́дуйся, чад непоко́ривых тве́рдая наста́внице. Ра́дуйся, в сиро́тстве ди́вное утеше́ние; ра́дуйся, вражду́ющих неча́емое примире́ние. Ра́дуйся, беззако́ннующих све́том пра́вды облича́ющая; ра́дуйся, грехи́ на́ша в мо́ри милосе́рдия растворя́ющая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 11
Пе́ние всеумиле́нное прино́сим Ти, вмести́вшей Ипоста́сное Сло́во Бо́жие. А́гнец Бо́жий сый, взе́мляй грех ми́ра, Той закала́ется е́же да́тися во вкуше́ние ве́рным. Сподо́би же нас, Ма́ти Бо́жия, досто́йно причаща́тися Пречи́стых Те́ла и Кро́ве Его́, да, спасе́ние улучи́вше, воспое́м Жизнода́вцу Бо́гу: Аллилу́иа.
Икос 11
Дщи Отца́ Небе́снаго, Ма́ти Сы́на Бо́жия, Неве́сто Ду́ха Свята́го, неисчерпа́емое мо́ре даро́в Боже́ственных Ты еси́, Всесвята́я Де́во. Умоли́ Человеколю́бца Го́спода откры́ти нам исто́чник всеоживля́ющия благода́ти, да очище́нным се́рдцем потщи́мся возрасти́ти плоды́ Ду́ха, в ра́дости и весе́лии зову́ще Ти: Ра́дуйся, плодо́в Ду́ха Свята́го всеце́лое стяжа́ние; ра́дуйся, ра́достию духо́вною насыще́ние пречу́дное. Ра́дуйся, ми́ра непоколеби́маго дарова́ние благонаде́жное; ра́дуйся, бла́гости любвеоби́льныя исполне́ние. Ра́дуйся, милосе́рдия о Христе́ насажде́ние неувяда́емое; ра́дуйся, ве́ры живы́я утвержде́ние несокруши́мое. Ра́дуйся, кро́тости незлоби́выя наста́внице несравне́нная; ра́дуйся, средосте́ние вражды́ разруши́вшая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 12
Благода́тную по́мощь мно́гажды явля́ла еси́, Цари́це Небе́сная, чрез чудотво́рный о́браз Твой Донски́й, егда́ смерть вско́ре предстоя́ше лю́дем. Сего́ ра́ди на обра́тней стране́ ико́ны сея́ дре́вния изображено́ есть и всечестно́е Успе́ние Твое́, да всяк, подвиза́ющийся во сла́ву Бо́га и на бла́го бли́жняго, не убои́тся сме́рти, но, взира́я, ка́ко Твоя́ душа́ прие́млется в ру́це Бо́га жива́го, с наде́ждею предае́т себе́ в час сме́ртный Судии́ всех Бо́гу, вопия́ Ему́: Аллилу́иа.
Икос 12
Пою́ще Тя, в моли́твах неусыпа́ющую Богоро́дицу, Святе́й Тро́ице предстоя́щую, вопие́м Ти: пробуди́ нас све́том живоно́снаго успе́ния Твоего́ от смертоно́снаго сна нераде́ния о спасе́нии души́ и испроси́ нам с Го́сподом примире́ния. Егда́ же приспе́ет жа́тва сме́ртная житию́ на́шему, огради́ нас всеси́льным предста́тельством Твои́м от духо́в зло́бы, да, Тобо́ю води́ми, дости́гнем Ца́рствия Небе́снаго, иде́же незаходи́мое Со́лнце пра́вды невече́рний свет сла́вы Боже́ственныя излива́ет. О Всесвята́я Де́во, от херуви́м воспева́емая, приими́ от нас, недосто́йных, похвалы́ сия́: Ра́дуйся, обра́дованная, во успе́нии Твое́м нас не оставля́ющая; ра́дуйся, Ма́ти Всепе́тая, одесну́ю Бо́га предстоя́щая. Ра́дуйся, го́рняго ми́ра боголе́пная красото́; ра́дуйся, кла́дезю богомы́слия неисчерпа́емый. Ра́дуйся, любве́ Боже́ственныя свети́льниче неугаса́емый; ра́дуйся, грехо́вных уз ско́рая реши́тельнице. Ра́дуйся, возду́шных мыта́рств прохожде́ние неоску́дное; ра́дуйся, Блага́я Врата́рнице, две́ри ра́йския ве́рным отверза́ющая. Ра́дуйся, Влады́чице, ико́ною Твое́ю Донско́ю в напа́стех нам помога́ющая.
Кондак 13
О Всеми́лостивая Влады́чице Богоро́дице, Росси́йския страны́ ди́вная Засту́пнице, оби́димых прибе́жище, гре́шных спасе́ние! Оте́чество на́ше от враг защити́, вселе́нную всю ми́ром благослови́, ве́ру правосла́вную укрепи́, ско́рби и крест со упова́нием понести́ помози́, в любви́ и согла́сии всех нас соблюди́ и в ра́дость Го́спода вни́ти сподо́би пою́щих Ему́: Аллилу́иа.
Этот кондак читается трижды, затем 1-й икос «Арха́нгела благовестие…» и 1-й кондак «Взбранной Воеводе…»
Молитва
О Пресвята́я Влады́чице Де́во Богоро́дице, Засту́пнице на́ша блага́я и ско́рая! Воспева́ем Ти вси благода́рственная за чу́дная дела́ Твоя́. Песносло́вим от лет дре́вних неотъе́млемое заступле́ние Твое́ гра́ду Москве и стране́ на́шей, чудотво́рным о́бразом Твои́м Донски́м всегда́ явля́емое: в бе́гство обраща́ются полки́ чужди́х, гра́ды и ве́си невреди́ми сохраня́ются, лю́дие же от лю́тыя сме́рти избавля́ются. Осуша́ются о́чи слезя́щия, умолка́ют стена́ния ве́рных, плач в ра́дость о́бщую претворя́ется. Бу́ди и нам, Пречи́стая Богоро́дице, утеше́ние в бе́дствиях, возрожде́ние наде́жды, о́браз му́жества, исто́чник ми́лости и в ско́рбных обстоя́ниях неистощи́мое терпе́ние нам да́руй. Пода́ждь коему́ждо по проше́нию и ну́жде его́: младе́нцы воспита́й, ю́ныя уцелому́дри и стра́ху Бо́жию научи́, уныва́ющия обо́дри и не́мощную ста́рость поддержи́. Посети́ в боле́знех и печа́лех су́щия, злы́я сердца́ умягчи́, братолю́бие укрепи́, ми́ра и любви́ всех нас испо́лни. Примири́, Благосе́рдая Ма́ти, вражду́ющия и оправда́й оклевета́нныя. Истреби́ поро́ки, да не восхо́дят грехи́ на́ша пред Судие́ю вся́ческих, да не пости́гнет нас пра́ведный гнев Бо́жий. Твои́ми моли́твами, всемо́щным Твои́м покро́вом огради́ нас от наше́ствий вра́жиих, от гла́да, губи́тельства, огня́, меча́ и вся́каго ина́го злострада́ния. Упова́ем моли́твами Твои́ми получи́ти от Всевы́шняго Бо́га грехо́в проще́ние и изглажде́ние и с Бо́гом примире́ние. Умоли́ стяжа́ти нам Ца́рствие Небе́сное и по сконча́нии жи́зни на́шея одесну́ю Престо́ла Бо́жия ста́ти, иде́же Ты, о Всепе́тая Де́во, Святе́й Тро́ице в ве́чней сла́ве предстои́ши. Удосто́й и нас с ли́ки а́нгелов и святы́х та́мо восхвали́ти пречестно́е и́мя Сы́на Твоего́ со Безнача́льным Его́ Отце́м и Всесвяты́м и Благи́м и Животворя́щим Его́ Ду́хом во ве́ки веко́в. Ами́нь.
Акафист
Пресвятой Богородице в честь иконы Ея «Знамение»
(празднование 27 ноября/10 декабря)
Кондак 1
Взбра́нной Воево́де, Влады́чице на́шей Богоро́дице, зна́мением ико́ны Ея́ святы́я ди́вную побе́ду лю́дем Новагра́да дарова́вшей, благода́рственное возглаша́ем пе́ние. Ты же, Всеблага́я Засту́пнице на́ша, я́ко иму́щая держа́ву непобеди́мую, от вся́ких нас бед свободи́ и от враг ви́димых и неви́димых защити́, да зове́м Ти: Ра́дуйся, Влады́чице, зна́мение ми́лости Твоея́ нам явля́ющая.
Икос 1
А́нгелов Цари́це и всея́ тва́ри Влады́чице, Пречи́стая Де́во Богоро́дице, пресла́вным зна́мением ико́ны Твоея́ святы́я всю страну́ Росси́йскую благода́тно озари́ла еси́ и струи́ чуде́с от нея́ источи́ла еси́ ве́рным. Те́мже, со усе́рдием и любо́вию припа́дающе ко пречестно́му Твоему́ о́бразу, со умиле́нием прино́сим Ти благохвале́ния сицева́я: Ра́дуйся, освяще́нное селе́ние Бо́га Сло́ва; ра́дуйся, благода́тию Бо́жиею и нас освяща́ющая. Ра́дуйся, спасе́нию па́дшаго ро́да челове́ческаго непоро́чно послужи́вшая; ра́дуйся, всех Творца́ и Го́спода, Чи́стая, Ду́хом Боже́ственным в ложесна́х заче́нши, без истле́ния роди́вшая. Ра́дуйся, Ма́терним Твои́м попече́нием всех нас объе́млющая; ра́дуйся, в беда́х и напа́стех ско́рая нам Помо́щнице. Ра́дуйся, злы́я стра́сти на́ша неви́димо укроща́ющая; ра́дуйся, в христиа́нских доброде́телех преуспева́ти нам помога́ющая. Ра́дуйся, неду́ги на́ша безме́здно врачу́ющая; ра́дуйся, на стези́ покая́ния нас прему́дро наставля́ющая. Ра́дуйся, Де́во, христиа́н похвало́; ра́дуйся, я́ко блажа́т Тя вси ро́ди. Ра́дуйся, Влады́чице, зна́мение ми́лости Твоея́ нам явля́ющая.
Кондак 2
Ви́дев озлобле́ние Новагра́да, кре́пце вою́емаго от во́ев су́ждальских, святи́тель Христо́в Иоа́нн сле́зно моля́шеся о избавле́нии и спасе́нии гра́да и услы́ша глас свы́ше, да и́дет во храм Преображе́ния Госпо́дня и, взем та́мо ико́ну Пресвяты́я Богоро́дицы, да изнесе́т ю́ на забра́ла гра́да проти́ву по́лчищ, его́ вою́ющих. Таково́е веле́ние Бо́жие услы́шав святи́тель благода́рственно возопи́л Спа́су Христу́: Аллилу́иа.
Икос 2
Разуме́в во́лю Бо́жию во гла́се небе́снем, святи́тель Христо́в Иоа́нн прии́де ко хра́му Преображе́ния Госпо́дня взя́ти ико́ну Богома́тере, и егда́ моля́шеся пред не́ю, подви́жеся ико́на от ме́ста своего́ на ру́це его́ честны́я, и той с пе́нием моле́бным изнесе́ ю́ на забра́ла гра́да, глаго́ля наро́ду: дерза́йте, Ма́ти бо Бо́га на́шего с на́ми есть. Сего́ ра́ди, ви́девше Твое́ к ним благоволе́ние, в прише́ствии чуде́снем ико́ны Твоея́ явле́нное, в пе́снех возглаша́ем благохвале́ния сицева́я: Ра́дуйся, наде́ждо христиа́н ненаде́жных; ра́дуйся, скорбя́щих ра́досте и заступле́ние. Ра́дуйся, безпомо́щным ско́рую по́мощь Твою́ явля́ющая; ра́дуйся, утесня́емым осла́бу и свобо́ду да́рующая. Ра́дуйся, правосла́вным во́ином предводи́тельница к побе́дам; ра́дуйся, ра́тей неприя́тельских всекре́пкое низложе́ние. Ра́дуйся, вели́кий Новгра́д благоволе́нием Твои́м осени́вшая; ра́дуйся, на забра́ла его́, я́ко Взбра́нная Воево́да, во ико́не Твое́й прише́дшая. Ра́дуйся, ненака́занных ми́лостивая наказа́тельнице; ра́дуйся, неразу́мных прему́драя вразуми́тельнице. Ра́дуйся, оби́дящих всегро́зная устраши́тельнице; ра́дуйся, оби́димых всеблага́я засту́пнице. Ра́дуйся, Влады́чице, зна́мение ми́лости Твоея́ нам явля́ющая.
Кондак 3
Си́лою Бо́жиею укрепле́н, святи́тель Христо́в Иоа́нн вознесе́ святу́ю ико́ну Твою́, Влады́чице Богоро́дице, посреде́ са́мыя бра́ни, иде́же стре́лы от сопроти́вных, я́ко дождь, па́даху, и еди́на от них честны́й лик Твой на ико́не устрели́; а́бие же ико́на Твоя́ лик свой от полко́в вражде́бных отврати́ и сле́зы от оче́с источи́, и́хже собира́я в фело́нь свою́, святи́тель Христо́в Иоа́нн наро́дом дерза́ти повеле́, они́ же, я́ко кре́пка не́коего храни́теля и́муще, на сопроти́вныя устреми́шася и до конца́ победи́ша тех, зову́ще Го́споду сил: Аллилу́иа.
Икос 3
Име́яше Тя вои́стину вели́кий Новгра́д Вои́тельницу держа́вную, Богороди́тельнице Всеблага́я, егда́, па́че наде́яния, зна́мением ико́ны Твоея́ святы́я победи́ти си́льныя полки́ сопроти́вных лю́дем Новагра́да помогла́ еси́. Те́мже, пе́ние побе́дное Тебе́ принося́ще, взыва́ем си́це: Ра́дуйся, умире́ние ми́ру святы́м рождество́м Твои́м прине́сшая; ра́дуйся, средосте́ние вражды́ дре́вния разруши́вшая. Ра́дуйся, непра́ведно вражду́ющия наказу́ющая; ра́дуйся, зна́меньми и чудесы́ Твои́ми христолюби́выя лю́ди утеша́ющая. Ра́дуйся, от стрелы́ вра́жия я́зву на лицы́ ико́ны Твоея́ прие́мшая; ра́дуйся, сле́зы благода́тныя от нея́ ди́вно источи́вшая. Ра́дуйся, во́и сопроти́вных слепото́ю и бе́гством порази́вшая; ра́дуйся, полки́ кре́пкия безси́льны соде́лавшая. Ра́дуйся, во бра́нех кре́пкая помо́щнице; ра́дуйся, враго́в посрамле́ние. Ра́дуйся, лю́ди Твоя́ ди́вною побе́дою увенча́вшая; ра́дуйся, непобеди́мая Воево́до вожде́й и во́инств христиа́нских. Ра́дуйся, Влады́чице, зна́мение ми́лости Твоея́ нам явля́ющая.
Кондак 4
Бу́ря недоуме́ния смуща́ет ми ум: ка́ко возмогу́ недосто́йными усты́ воспе́ти чудеса́ Твоя́, Богома́ти Влады́чице, я́же свято́ю ико́ною зна́мения Твоего́ в Новегра́де яви́ла еси́, дарова́в ю́ в по́мощь и заступле́ние всем правосла́вным лю́дем от враг ви́димых и неви́димых? Те́мже, велича́юще неизче́тныя ми́лости Твоя́ к нам, смиренному́дренне воспева́ем просла́вльшему Тя Сы́ну Твоему́ и Бо́гу: Аллилу́иа.
Икос 4
Слы́шавше о ди́внем чудеси́ святы́я ико́ны зна́мения Твоего́ в Новегра́де, Пречи́стая Де́во, ка́ко лю́дие новогра́дстии, иму́ще сию́, си́лою Твое́ю и посо́бием Боже́ственнаго зра́ка Твоего́ пресла́вное одоле́ние на сопроти́вныя показа́ша, со благогове́нием и ра́достию поклоня́емся сему́ чу́дному о́бразу Твоему́ и хвале́бне зове́м Ти: Ра́дуйся, Неве́сто Отца́ Безнача́льнаго; ра́дуйся, неискусобра́чная Роди́тельнице Преве́чнаго Сло́ва. Ра́дуйся, селе́ние прекра́сное Ду́ха Свята́го; ра́дуйся, Живонача́льныя и Единосу́щныя Тро́ицы благода́тию осене́нная. Ра́дуйся, дре́вле проро́ки многообра́зне предрече́нная; ра́дуйся, а́нгельския собо́ры чистото́ю Твое́ю превозше́дшая. Ра́дуйся, челове́ческаго ро́да возвыше́ние; ра́дуйся, па́дших сыно́в Ада́млих благода́тное возста́ние. Ра́дуйся, я́ко из Тебе́ в плоть облече́ся Одева́яй не́бо о́блаки; ра́дуйся, я́ко млеко́м Твои́м пита́ла еси́ Пита́теля вселе́нныя. Ра́дуйся, Всеблагослове́нная Богоро́дице, Чи́стая Присноде́во; ра́дуйся, ра́досте на́ша и спасе́ние душ на́ших. Ра́дуйся, засту́пнице на́ша, от Бо́га нам дарова́нная; ра́дуйся, всех ве́рных огражде́ние и свяще́нное прибе́жище. Ра́дуйся, Влады́чице, зна́мение ми́лости Твоея́ нам явля́ющая.
Кондак 5
Богосве́тлая звезда́ – ико́на зна́мения Твоего́, Богоро́дице Де́во, вели́кий Новгра́д сия́нием мно́гих чуде́с духо́вно просвети́, неоску́дно источа́ющи благода́тныя исцеле́ния всем ве́рным, со усе́рдием к ней притека́ющим. Не лиши́ и нас благода́тнаго Твоего́ озаре́ния и милосе́рдных щедро́т Твои́х боголе́пным поклоне́нием че́ствующих чудотво́рную ико́ну Твою́, да благода́рственно воспева́ем Бо́гу: Аллилу́иа.
Икос 5
Ви́девше чудеса́ пресла́вная, от ико́ны зна́мения Твоего́ бы́вшая, Влады́чице Преблага́я, лю́дие Новагра́да со усе́рдием к ней притека́ху и в неду́зех свои́х исцеле́ния благода́тная от нея́ прие́мляху. К не́йже ны́не приходя́ще, поклоня́емся, и че́ствуем, и от жела́ния се́рдца целу́ем, исцеле́ний благода́ть почерпа́юще, и неду́г теле́сных, и душе́вных страсте́й свобожда́емся, зову́ще Ти и глаго́люще: Ра́дуйся, скорбя́щих ра́досте и оби́димых засту́пнице; ра́дуйся, печа́льных утеше́ние и бе́дствующих помо́щнице. Ра́дуйся, боля́щих немздоприи́мная Цели́тельнице; ра́дуйся, ни́щих и убо́гих некрадо́мое бога́тство. Ра́дуйся, терпели́вых страда́льцев дара́ми благода́тными ущедря́ющая; ра́дуйся, отча́янных и безнаде́жных от ро́ва поги́бели избавля́ющая. Ра́дуйся, вдови́ц и си́рых благосе́рдая попечи́тельнице; ра́дуйся, целому́дрия и воздержа́ния ю́ных наста́внице. Ра́дуйся, ста́рцев благогове́йных сла́дкое успокое́ние; ра́дуйся, ста́риц боголюби́вых ти́хое прибе́жище. Ра́дуйся, ка́ющихся гре́шников ве́рная спору́чнице; ра́дуйся, даро́в духо́вных ще́драя пода́тельнице. Ра́дуйся, Влады́чице, зна́мение ми́лости Твоея́ нам явля́ющая.
Кондак 6
Пропове́дует Новгра́д пресла́вное заступле́ние Твое́, Пречи́стая Влады́чице, ка́ко во дни наше́ствия враго́в си́льных и вооруже́нных от святы́я ико́ны зна́мения Твоего́ по́мощь Твою́ благода́тную лю́дем Твои́м дарова́ла еси́, вражде́бныя полки́ со студо́м вспять обрати́ла еси́, град же Твой цел и невреди́м от них сохра́ньши, да вси пою́т Спаси́телю Бо́гу: Аллилу́иа.
Икос 6
Возсия́ла еси́ луча́ми вели́ких чуде́с в Новегра́де, Богоро́дице Де́во, и ико́ну зна́мения Твоего́ благода́тным источе́нием слез ди́вно просла́вила еси́, неизче́тныя ми́лости от нея́ ще́дро подава́ющи всем скорбя́щим и обремене́нным. Посети́ у́бо и ду́ши на́ша, неду́гующия страстьми́ грехо́вными, Госпоже́ Всеблага́я, и бу́ди нам помо́щница во спасе́ние, да благода́рственно Тебе́ зове́м: Ра́дуйся, моли́твеннице благоприя́тная за нас к Бо́гу; ра́дуйся, предста́тельнице всемо́щная, гнев Бо́жий на ми́лость прелага́ющая. Ра́дуйся, ру́це Твои́ богоно́сне на умоле́ние ко Творцу́ вы́ну простира́ющая; ра́дуйся, я́ко Ма́ти Сы́на, Судию́ Пра́веднаго о всем ми́ре умоля́ющая. Ра́дуйся, покро́вом Ма́терняго Твоего́ заступле́ния всех нас покрыва́ющая. Ра́дуйся, су́щих в беда́х и ско́рбех благода́тию смире́ния и терпе́ния снабдева́ющая. Ра́дуйся, стра́ждущия и безпомо́щныя неви́димо укрепля́ющая; ра́дуйся, боля́щия и безнаде́жныя от одра́ боле́зни возставля́ющая. Ра́дуйся, ве́рою моля́щимся Тебе́ вели́кия ми́лости явля́ющая; ра́дуйся, во благи́х проше́ния на́ша ди́вно исполня́ющая. Ра́дуйся, струи́ благода́тных исцеле́ний оби́льно нам источа́ющая; ра́дуйся, всем вся поле́зная да́рующая. Ра́дуйся, Влады́чице, зна́мение ми́лости Твоея́ нам явля́ющая.
Кондак 7
Хотя́щи яви́ти, Влады́чице, не то́кмо Вели́кому Новугра́ду, но и всему́ правосла́вному Росси́йскому жи́тельству пресла́вныя чудеса́ Твоя́ от ико́ны зна́мения Твоего́, сию́ во мно́гих граде́х, оби́телех и ве́сех от лет дре́вних до дний на́ших ди́вными чудесы́ просла́вила еси́: слепы́м прозре́ние, разсла́бленным укрепле́ние и мно́гим боля́щим исцеле́ние ми́лостивно от нея́ да́рующи и сим подвиза́ющи лю́ди велича́ти Тя, возвели́чившую род наш, и пе́ти Христу́ Бо́гу: Аллилу́иа.
Икос 7
Новгра́д и всю зе́млю Росси́йскую ди́вная ико́на зна́мения Твоего́, Богоро́дице Де́во, чудесы́ благода́тными осия́, ми́лости Твоя́ бога́тыя ве́рным прояви́вши. Сию́ у́бо боголе́пным поклоне́ним че́ствующе, хвале́бне Тебе́, Влады́чице, взыва́ем: Ра́дуйся, скоропредста́тельная помо́щнице усе́рдно к Тебе́ притека́ющих; ра́дуйся, благосе́рдая услы́шательнице моле́ний на́ших. Ра́дуйся, вели́кий Новгра́д благослове́нием Твои́м осени́вшая; ра́дуйся, в преде́лех его́ ико́ну Зна́мения Твоего́ чудесы́ просла́вльшая. Ра́дуйся, дев ликостоя́ния прославле́нием ико́ны Твоея́ духо́вно возвесели́вшая; ра́дуйся, всеси́льными Твои́ми к Бо́гу моли́твами и нас ко блаже́нству ра́йскому возводя́. Ра́дуйся, за всех нас ми́лостивая к Сы́ну Твоему́ и Бо́гу хода́таице; ра́дуйся, веду́щим брань проти́ву ми́ра, пло́ти и диа́вола до́брая споспе́шнице. Ра́дуйся, вся страны́ правосла́вныя покро́вом ми́лости Твоея́ осеня́ющая; ра́дуйся, мно́гих мест и оби́телей сокро́вище исцеле́ний неоску́дное. Ра́дуйся, и́ноков и и́нокинь благоподвиза́ющихся всемо́щная покрови́тельнице; ра́дуйся, и в миру́ благоче́стно живу́щих усе́рдная засту́пнице. Ра́дуйся, Влады́чице, зна́мение ми́лости Твоея́ нам явля́ющая.
Кондак 8
Стра́нствующе в юдо́ли сей земне́й, многоско́рбней и многомяте́жней, го́рняго гра́да – Иерусали́ма Небе́снаго взыску́ем и Тебе́, Влады́чице, мо́лим: путево́дствуй нам по стези́ за́поведий Христо́вых и сохрани́ нас от паде́ний грехо́вных, удиви́ на нас ми́лость Твою́ и осени́ нас Твои́м заступле́нием, да, Твое́ю по́мощию спаса́еми, сподо́бимся ку́пно со все́ми святы́ми воспева́ти: Аллилу́иа.
Икос 8
Всех скорбя́щих уте́шительнице и бе́дствующих Помо́щнице, Всеблага́я Богороди́тельнице, не пре́зри нас, припа́дающих к Тебе́ пред пречи́стым о́бразом Твои́м, но посети́ нас ми́лостивно щедро́тами Твои́ми, и, я́коже дре́вле отце́м на́шим по́мощь Твою́ держа́вную яви́ла еси́, та́ко и нас, смире́нных, не лиши́ Твоего́ заступле́ния во вре́мя благопотре́бно, да не постыди́мся во упова́нии на́шем, е́же по Бо́зе кре́пко на Тя возлага́ем и зове́м Ти: Ра́дуйся, Богосве́тлая свеще́, све́том Христо́вым озаря́ющая ве́рныя ду́ши; ра́дуйся, многоце́нный алава́стр, ми́ром Бо́жия благода́ти умаща́яй боголюби́выя сердца́. Ра́дуйся, у́мнаго Со́лнца Ма́ти, ве́рныя просвеща́ющаго, неве́рныя же помрача́ющаго; ра́дуйся, сла́во небе́сных и упова́ние земны́х. Ра́дуйся, наде́ждо на́ша и засту́пнице всех притека́ющих к Тебе́ с ве́рою; ра́дуйся, лю́бящия и чту́щия Тя от вся́ких бед избавля́ющая. Ра́дуйся, обетова́нии благи́ми ду́ши ве́рных благода́тно веселя́щая; ра́дуйся, де́вственных ли́ков сла́во и похвало́. Ра́дуйся, подви́жников благоче́стия к го́рнему Сио́ну путево́дствующая; ра́дуйся, ве́рных к Небе́сному Иерусали́му приводя́щая. Ра́дуйся, омраче́нныя сердца́ све́том и́стиннаго богове́дения просвеща́ющая; ра́дуйся, и всех нас благода́тными луча́ми вели́кия Своея́ ми́лости покрыва́ющая. Ра́дуйся, Влады́чице, зна́мение ми́лости Твоея́ нам явля́ющая.
Кондак 9
Вси а́нгельския во́инства благогове́йно Тебе́ слу́жат, небесе́ и земли́ Цари́це, челове́ческий же род немо́лчныя хвалы́ Тебе́ прино́сит, го́рних и до́льних Влады́чице, и Твою́ святу́ю ико́ну поклоне́нием досточе́стным почита́ет. Сию́ бо во отра́ду и утеше́ние нам дарова́ла еси́, Всеблага́я, и зна́мения Ма́терния любве́ Твоея́ о́ною нам при́сно явля́еши, да пое́м Тобо́ю благоде́ющему нам Бо́гу: Аллилу́иа.
Икос 9
Вети́и суему́дреннии челове́честии не мо́гут пости́гнути Боже́ственную та́йну присноде́вства Твоего́, Мари́е Богоро́дице, ка́ко в рождестве́ и по рождестве́ ключи́ де́вства Твоего́ це́лы сохрани́ла еси́, а́нгелов и челове́ков удиви́вши. Те́мже Тя благоче́стно Ма́терь и Де́ву испове́дующе, при́сно Тя ублажа́ем и хвале́бно Тебе́ воспева́ем: Ра́дуйся, возвели́чившая род челове́ческий непоро́чною Твое́ю чистото́ю; ра́дуйся, освяти́вшая зе́млю всесвяты́м Твои́м рождество́м. Ра́дуйся, де́вство и рождество́ в Себе́ ди́вно сочета́вшая; ра́дуйся, во обою́ непоро́чно Себе́ сохра́ньшая. Ра́дуйся, ве́лие вселе́нныя чу́до; ра́дуйся, непостижи́мая челове́ческими умы́ та́йно. Ра́дуйся, а́нгельских ли́ков удивле́ние; ра́дуйся, святы́х Бо́жиих уго́дников при́сное ра́дование. Ра́дуйся, ми́ра го́рняго пе́рвейшее украше́ние; ра́дуйся, ми́ра до́льняго благонаде́жное заступле́ние. Ра́дуйся, де́монов низложе́ние; ра́дуйся, а́да попра́ние. Ра́дуйся, Влады́чице, зна́мение ми́лости Твоея́ нам явля́ющая.
Кондак 10
Спаси́теля па́дшему челове́честву родила́ еси́, Пречи́стая Де́во, и Сего́ я́ко Младе́нца во объя́тиих Твои́х носи́ла еси́, Его́же Боже́ственное изображе́ние и на ико́не зна́мения Твоего́ нам явля́еши и мно́гия ми́лости и щедро́ты Твоя́ нам да́руеши. Сего́ ра́ди со благогове́нием и ве́рою че́ствуем о́браз чудотво́рный Твой, Влады́чице, и мо́лимся Тебе́ приле́жно: бу́ди нам покро́в и защи́та в день су́дный, да Твои́м Ма́терним предста́тельством поми́лует нас Судия́ Пра́ведный, Сын Твой и Бог, и сподо́бит нас десна́го стоя́ния и пе́ния Ему́ со избра́нными: Аллилу́иа.
Икос 10
Стена́ необори́мая и исто́чник чуде́с ико́на Твоя́ свята́я яви́ся, Богоро́дице Де́во, не то́кмо вели́кому Новогра́ду, но и всей стране́ Росси́йстей. Сию́, я́ко зна́мение побе́дное, иму́ще, во́инства правосла́вныя враго́в побежда́ют, и святи́телие е́ю благоукраша́ются, и всяк во́зраст ве́рных утеше́ние благода́тное от нея́ прие́млет. Уте́ши и нас Твои́м, Всеми́лостивая Влады́чице, благоволе́нием и ми́лостию, да хвале́бно взыва́ем к Тебе́: Ра́дуйся, кре́пкое на́ше упова́ние; ра́дуйся, несумне́нная на́ша наде́ждо. Ра́дуйся, вели́каго Новагра́да многопе́тая сла́во; ра́дуйся, страны́ на́шея благода́тное огражде́ние. Ра́дуйся, во дни бра́ни победи́тельная на враги́ помо́щнице; ра́дуйся, во дни ми́ра ко благоче́стию до́брая наста́внице. Ра́дуйся, и́ноческих оби́телей покро́в и снабде́ние; ра́дуйся, благочести́вых домо́в и супру́жеств благослове́ние. Ра́дуйся, де́вства и чистоты́ побо́рнице; ра́дуйся, оби́димых и гони́мых предста́тельнице. Ра́дуйся, наги́х оде́яние; ра́дуйся, боля́щих исцеле́ние. Ра́дуйся, Влады́чице, зна́мение ми́лости Твоея́ нам явля́ющая.
Кондак 11
Пе́ние на́ше смире́нное не пре́зри, всеми́лостивая Цари́це, и утро́бу щедро́т Твои́х не затвори́ нам, всеще́драя Влады́чице: се бо, обнища́вше в до́брых де́лех, к сокро́вищнице ми́лости Твоея́, чудотво́рней ико́не Твое́й, со усе́рдием притека́ем, Всеблага́я, и, припа́дающе, мо́лимся: озари́ нас све́том Боже́ственныя благода́ти Твоея́ и научи́ нас ве́рно исполня́ти за́поведи Сы́на Твоего́ и Бо́га, да досто́йно возмо́жем пе́ти Ему́: Аллилу́иа.
Икос 11
Све́та невече́рняго прия́телище, све́тлыми луча́ми чуде́с Твои́х просвеща́еши нас, помраче́нных грехо́вною мгло́ю, Богороди́тельнице пречи́стая, и приво́диши к немо́лчному славосло́вию Твоего́ пресвята́го и́мене. Зна́мением ико́ны Твоея́ святы́я вои́стинну яви́ла еси́ воево́дство Твое́ держа́вное, Госпоже́ Всеблага́я, его́же све́тло пра́зднующе, ра́достно зове́м Ти: Ра́дуйся, возвели́ченная Бо́гом па́че земны́х и небе́сных; ра́дуйся, еди́на Чи́стая и Благослове́нная в жена́х. Ра́дуйся, Цари́це и Влады́чице небесе́ и земли́; ра́дуйся, порфи́ро Царя́ царе́й. Ра́дуйся, черто́же безсе́меннаго уневе́щения; ра́дуйся, глави́зно спасе́ния челове́ческаго. Ра́дуйся, упова́ющия на Тя несрамля́ющая; ра́дуйся, прося́щия Твоея́ святы́я по́мощи от бед избавля́ющая. Ра́дуйся, сто́лпе и утвержде́ние де́вства; ра́дуйся, щи́те и огражде́ние ве́ры правосла́вныя. Ра́дуйся, боголе́пное украше́ние Святы́я Христо́вы Це́ркве; ра́дуйся, покрыва́ющая всех нас Ма́терним Твои́м покро́вом. Ра́дуйся, Влады́чице, зна́мение ми́лости Твоея́ нам явля́ющая.
Кондак 12
Благода́ть и ми́лость свы́ше пода́ждь нам, Влады́чице, от ико́ны Твоея́ святы́я, ю́же в зна́мение заступле́ния Твоего́ нам дарова́ла еси́, чудесы́, от нея́ быва́ющими, правосла́вную ве́ру в нас утвержда́ющи, неве́рие же посрамля́ющи. Те́мже поклоня́емся Тебе́ и мо́лимся: в правосла́вии соблюди́ нас, Всеблага́я, и сподо́би до коне́чнаго дыха́ния на́шего ве́рно пе́ти Бо́гу: Аллилу́иа.
Икос 12
Пою́ще чудеса́ Твоя́ от ико́ны зна́мения Твоего́ явле́нная, Богоро́дице Де́во, хва́лим, сла́вим и велича́ем Тя, честне́йшую вои́стину херуви́м и сла́внейшую без сравне́ния серафи́м. Ты же, Всеблага́я Засту́пнице на́ша, покры́й нас держа́вным Твои́м покро́вом и изба́ви нас от вся́ких бед и искуше́ний вра́жиих, да воспева́ем Тебе́ непреста́нно гла́сом хвале́ния: Ра́дуйся, Богообра́дованная и непоро́чная Присноде́во; ра́дуйся, нетле́нная и неискусобра́чная А́гнца и Па́стыря Ма́ти. Ра́дуйся, увенча́нная диади́мою ца́рскою от Триеди́наго Бо́га; ра́дуйся, святоле́пная и светоно́сная пала́то святы́х Святе́йшаго Сло́ва. Ра́дуйся, одесну́ю стоя́щая Сы́на Твоего́ и Го́спода; ра́дуйся, всегда́ моля́щаяся Ему́ за род христиа́нский. Ра́дуйся, вино́внице благода́тнаго челове́ков обновле́ния; ра́дуйся, ка́ющихся гре́шных к Бо́гу примире́ние. Ра́дуйся, стра́ждущих от бед избавле́ние; ра́дуйся, взыска́ние поги́бших. Ра́дуйся, теле́с на́ших врачева́ние; ра́дуйся, душ на́ших спасе́ние. Ра́дуйся, Влады́чице, зна́мение ми́лости Твоея́ нам явля́ющая.
Кондак 13
О Всепе́тая Ма́ти Сладча́йшаго Спаси́теля на́шего, Го́спода Иису́са Христа́! Ны́нешнее на́ше прие́мши приноше́ние, от вся́кия изба́ви нас напа́сти и ско́рби, и ве́чныя изми́ му́ки всех пред свято́ю ико́ною Твое́ю с ве́рою и любо́вию поклоня́ющихся и о Тебе́ благода́рно зову́щих Бо́гу: Аллилу́иа.
Этот кондак читается трижды, затем 1-й икос «А́нгелов Цари́це…» и 1-й кондак «Взбранной Воеводе…»
Молитва
О Пресвята́я и Преблагослове́нная Ма́ти Сладча́йшаго Го́спода на́шего Иису́са Христа́! Припа́даем и поклоня́емся Тебе́ пред свято́ю чудотво́рною ико́ною Твое́ю, воспомина́юще ди́вное зна́мение Твоего́ заступле́ния, вели́кому Новогра́ду от нея́ явле́нное во дни ра́тнаго на сей град наше́ствия. Смире́нно мо́лим Тя, всеси́льная ро́да на́шего засту́пнице: я́коже дре́вле отце́м на́шим на по́мощь ускори́ла еси́, та́ко и ны́не нас, немощны́х и гре́шных, сподо́би Твоего́ Ма́терняго заступле́ния и благопопече́ния. Спаси́ и сохрани́, Влады́чице, под кро́вом ми́лости Твоея́ Це́рковь Святу́ю, град Твой, всю страну́ на́шу правосла́вную и всех нас, припа́дающих к Тебе́ с ве́рою и любо́вию, умиле́нно прося́щих со слеза́ми Твоего́ заступле́ния. Ей, Госпоже́ Всеми́лостивая! Умилосе́рдися на ны, обурева́емыя грехи́ мно́гими, простри́ ко Христу́ Го́споду богоприи́мныя ру́це Твоя́ и предста́тельствуй за нас пред бла́гостию Его́, прося́щи нам проще́ния прегреше́ний на́ших, благоче́стнаго ми́рнаго жития́, благи́я христиа́нския кончи́ны и до́браго отве́та на Стра́шнем Суде́ Его́, да, спаса́еми всеси́льными Твои́ми к Нему́ моли́твами, блаже́нство ра́йское унасле́дуем и со все́ми святы́ми воспое́м пречестно́е и великоле́пое и́мя Достопоклоня́емыя Тро́ицы, Отца́ и Сы́на и Свята́го Ду́ха, и Твое́ ве́лие к нам милосе́рдие во ве́ки веко́в. Ами́нь.
Акафист
Пресвятой Богородице в честь иконы Ея Иверской
(празднование 12/25 февраля, 13/26 октября 23 апреля/6 мая и во вторник Светлой седмицы)
Кондак 1
Взбра́нной Воево́де, Влады́чице на́шей Богоро́дице, похва́льная пе́ния прино́сим Ти раби́ Твои́, я́ко прише́ствием честна́го о́браза Твоего́ стяжа́вшии щит кре́пкий, сте́ну необори́мую и стра́жа неусы́пна. Ты же, я́ко иму́щая держа́ву непобеди́мую, покры́й и защити́ нас, Влады́чице, от всех враго́в ви́димых и неви́димых и изба́ви от вся́каго вреда́, душе́внаго и теле́снаго, да зове́м Ти: Ра́дуйся, блага́я Врата́рнице, две́ри ра́йския ве́рным отверза́ющая.
Икос 1
А́нгел предста́тель по́слан бысть рещи́ Богоро́дице, егда́ паде́ Ей жре́бий апо́стольскаго служе́ния в земли́ И́верстей: «Не разлуча́йся Иерусали́ма, жре́бий же, Тебе́ па́дший, просвети́тся в после́дния дни, Ты же и́маши потруди́тися в земли́, ю́же Тебе́ Бог изво́лит». Те́мже: Ра́дуйся, Е́юже Ева́нгелие благовести́тся; ра́дуйся, Е́юже и́дольская пре́лесть упраздни́тся. Ра́дуйся, Е́юже власть кня́зя тьмы разруши́тся; ра́дуйся, Е́юже Ца́рство Христо́во утверди́тся. Ра́дуйся, па́дших во тьму идолослуже́ния к све́ту Ева́нгелия воззва́ние; ра́дуйся, от ра́бства диа́волу в свобо́ду сла́вы чад Бо́жиих приведе́ние. Ра́дуйся, гото́вая служи́тельнице Сы́на Своего́ и Бо́га; ра́дуйся, послуша́нием преслуша́ние Е́вы исцеля́ющая. Ра́дуйся, высото́ доброде́телей; ра́дуйся, глубино́ смиренному́дрия. Ра́дуйся, Е́юже неве́рнии познаю́т Творца́; ра́дуйся, Е́юже ве́рнии усыновля́ются Отцу́. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 2
Ви́дящи Свята́я Де́ва ди́вное и но́вое о Себе́ промышле́ние Бо́жие, я́ко раба́ Госпо́дня, при́сно гото́вая твори́ти во́лю Его́, возопи́: Аллилу́иа.
Икос 2
Ра́зум недоразумева́емый глаго́ла а́нгельскаго разу́мен Тебе́, Пречи́стая, творя́ Госпо́дь, упра́ви ше́ствие Твое́ к Горе́ Афо́нстей, иде́же пропове́дася Тобо́ю Ева́нгелие, и та́ко яви́ся жре́бий Твой. Мы же ра́достно вопие́м: Ра́дуйся, освяти́вшая Афо́н Свои́м прише́ствием; ра́дуйся, низложи́вшая та́мо и́долов. Ра́дуйся, насади́вшая та́мо ве́ру и́стинную; ра́дуйся, неве́рие отгна́вшая. Ра́дуйся, в жре́бий Себе́ Го́ру сию́ избра́вшая; ра́дуйся, благода́ть сему́ ме́сту обеща́вшая. Ра́дуйся, ве́рным, живу́щим в ней, пода́тельнице земны́х благ; ра́дуйся, спору́чнице ве́чнаго их спасе́ния. Ра́дуйся, те́плая хода́таице о живу́щих в жре́бии Твое́м; ра́дуйся, всех враго́в их устраше́ние. Ра́дуйся, ми́лость Сы́на Своего́ до сконча́ния ве́ка ме́сту сему́ обеща́вшая; ра́дуйся, благода́ть Его́ неотсту́пною бы́ти предре́кшая. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 3
Си́ла Вы́шняго заступле́нием Богома́тере осени́ Святу́ю Го́ру и удо́лия и де́бри ея́ я́ко село́ простра́нное показа́ всем, в и́ночестей жи́зни хотя́щим жа́ти спасе́ние, внегда́ пе́ти си́це: Аллилу́иа.
Икос 3
Иму́щи промышле́ние о жре́бии Свое́м, лю́дех И́верския земли́, устро́ила еси́ в ме́сте, иде́же Сама́ к Афо́ну приста́ла еси́, оби́тель ро́ду их, в ти́хое приста́нище и́щущим спасе́ния, хотя́щи дарова́ти ей в щит и огражде́ние ико́ну Свою́, да вси взыва́ют: Ра́дуйся, посла́вшая пропове́дницу Ева́нгелия в зе́млю И́верскую; ра́дуйся, обрати́вшая сию́ страну́ от пре́лести и́дольстей к све́ту Христо́ву. Ра́дуйся, о́трасли неувяда́емыя розго́, ди́вную лозу́ Ни́не дарова́вшая; ра́дуйся, от нея́ произрасти́вшая гро́здие чуде́с и благи́я ве́ры. Ра́дуйся, сад духо́вный на Афо́не насади́вшая; ра́дуйся, струю́ из него́ просвеще́ния духо́внаго стране́ И́верстей источи́вшая. Ра́дуйся, Евфи́мия златослове́сная уста́; ра́дуйся, Торни́кия непобеди́мая кре́посте. Ра́дуйся, всех благочести́вых укрепле́ние; ра́дуйся, и́ноков огражде́ние. Ра́дуйся, ти́хое приста́нище и́щущих спасе́ние; ра́дуйся, ве́чный поко́й им уготовля́ющая. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 4
Бу́рю внутрь иму́щи помышле́ний сумни́тельных, честна́я вдови́ца, я́же в Нике́и, смяте́ся, зря́щи копие́м во́ина иконобо́рца прободе́ну святу́ю и чти́мую ико́ну Богома́тере и а́бие источи́вшу кровь, и стра́хом обдержи́ма, да не пору́гана бу́дет свята́я ико́на, с моли́твою слезоточа́щи вве́рже ю в мо́ре. Уви́девши же ю́ пря́мо верху́ воды́ путь творя́щу и теку́щу к за́паду, возопи́ с весе́лием: Аллилу́иа.
Икос 4
Ви́деша и́ноцы Святы́я Горы́ я́вльшийся в мо́ри я́ко пла́мень, я́ко столп о́гнен, его́же верх досяза́ше небеси́, я́ко со́лнце сия́ющее, и в нощи́ притеко́ша к кра́ю мо́ря и, ви́девше святу́ю ико́ну Богома́тере, по мо́рю носи́мую си́лою свы́ше, возопи́ша Благода́тней: Ра́дуйся, купино́, законополо́жником предзри́мая; ра́дуйся, сто́лпе о́гненный, наставля́яй су́щия во тьме. Ра́дуйся, ле́ствице, досяза́ющая до небе́с, е́юже сни́де Бог; ра́дуйся, мо́сте, преводя́й су́щих от земли́ на не́бо. Ра́дуйся, заре́ таи́нственнаго дне; ра́дуйся, Звездо́, явля́ющая Со́лнце. Ра́дуйся, Свет Неизрече́нный роди́вшая; ра́дуйся, е́же ка́ко ни еди́наго же научи́вшая. Ра́дуйся, облече́нная в со́лнце, сия́ющая благода́тию и сла́вою всей вселе́нней; ра́дуйся, мо́лние, ду́ши просвеща́ющая и ве́рных смы́слы озаря́ющая. Ра́дуйся, све́тлосте, во тьме светя́щая; ра́дуйся, я́ко многосве́тлое возсиява́еши просвеще́ние. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 5
Боготе́чную ико́ну Свою́ да́ти хотя́щи И́верстей оби́тели, рекла́ еси́, Богома́ти, преподо́бному Гаврии́лу: «Иди́ с ли́ком и́ноков к бре́гу мо́ря, сни́ди в пучи́ну и приими́ ико́ну Мою́». Он же, ве́рою и любо́вию окриля́емь, по воде́, а́ки по су́ху, ходя́, прия́т ю́ во объя́тия своя́ и дости́г сокро́вища, ины́м недостижи́маго, в достоя́ние и́ноков ро́да своего́ и́верскаго, веселя́ся поя́ше: Аллилу́иа.
Икос 5
Ви́деша и́ноцы и́верстии мно́гажды ико́ну Богома́тере из хра́ма в верху́ врат монасты́рских на сте́ну гра́да незри́мою си́лою изнесе́нную, ужаса́хуся и стоя́ху, зову́ще к Ней такова́я: Ра́дуйся, святу́ю ико́ну да́ти нам изво́лившая; ра́дуйся, покро́в ея́ бы́ти нам обеща́вшая. Ра́дуйся, любо́вь Твою́ к оби́тели на́шей показа́вшая; ра́дуйся, благо́е о ней промышле́ние яви́вшая. Ра́дуйся, по́мощь на́ша в чужде́й стране́; ра́дуйся, в стра́нствии на́шем утеше́ние. Ра́дуйся, Бо́жие к нам благоволе́ние; ра́дуйся, на́ше к Бо́гу дерзнове́ние. Ра́дуйся, слез на́ших избавле́ние; ра́дуйся, си́рых нас защи́тнице. Ра́дуйся, огражде́ние на́ше; ра́дуйся, еди́на ра́досте на́ша. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 6
Пропове́дника творя́щи Гаврии́ла во́ли Своея́, рекла́ еси́ к нему́, Влады́чице: не приидо́х храни́ма бы́ти от вас, но да бу́ду Аз Храни́тельница ва́ша не то́кмо в настоя́щем, но и в бу́дущем ве́це. Се даю́ вам зна́мение: до́ндеже зри́те в монастыре́ ико́ну Мою́, не оскуде́ет вам благода́ть Сы́на Моего́ и ми́лость, да вопию́т Ему́ вси: Аллилу́иа.
Икос 6
Возсия́ ра́дость ве́лия слы́шавшим Твоя́, Богома́ти, обетова́ния, и Тебе́, Небе́сней Врата́рнице, храм на врате́х оби́тели с весе́лием и́ноцы воздвиго́ша и возопи́ша та́ко: Ра́дуйся, храни́тельнице на́ша в настоя́щем ве́це; ра́дуйся, предста́тельнице на́ша в бу́дущем. Ра́дуйся, стра́ху Бо́жию нас науча́ющая; ра́дуйся, на путь доброде́тели наставля́ющая. Ра́дуйся, дерзнове́ние на́ше и наде́ждо; ра́дуйся, упова́ние на́ше и покро́в. Ра́дуйся, благоутро́бие Сы́на Своего́ к нам преклони́вшая; ра́дуйся, благода́ть Его́ неоску́дно пребыва́ти с на́ми возвеща́ющая. Ра́дуйся, святу́ю ико́ну зало́гом ми́лости да́вшая; ра́дуйся, дар чудоде́йствия ей дарова́вшая. Ра́дуйся, прило́г вся́каго зла от оби́тели отража́ющая; ра́дуйся, всему́ благо́му вход отверза́ющая. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 7
Хотя́щу иногда́ злочести́вому Ами́ре оби́тель И́верскую разори́ти и ста́до и́ноков, та́мо собра́нное, разсе́яти, ско́ро позна́ кре́пкое оби́тели заступле́ние от Богома́тере, уви́дев корабли́ своя́ в пучи́не мо́ря погря́зшия и ра́тники изги́бшия. И прише́д со смире́нием, сребро́ и зла́то в оби́тель дая́ше, моли́твы прося́. И́ноцы же, ви́девше сия́, возопи́ша к Бо́гу: Аллилу́иа.
Икос 7
Но́выя и безчи́сленныя чудеса́ показа́ Богома́терь, в оби́тели оскуде́ние вина́, муки́ и еле́я восполня́ющи, бе́сныя исцеля́ющи, хромы́м хожде́ние да́рующи, слепы́м прозре́ние и всяк неду́г врачу́ющи, да, ви́дяще чудеса́ сия́, воспева́ют Тебе́: Ра́дуйся, Взбра́нная Воево́до, враги́ побежда́ющая; ра́дуйся, ско́рая на по́мощь призыва́ющим Тя. Ра́дуйся, не презира́ющая моле́ния на́шего; ра́дуйся, обеща́ния Своего́ не отступа́ющая. Ра́дуйся, скорбь оби́тели в ра́дость претворя́ющая; ра́дуйся, оскуде́ние оби́тели восполня́ющая. Ра́дуйся, слепы́х прозре́ние; ра́дуйся, хромы́х хожде́ние. Ра́дуйся, всех немощны́х цели́тельнице; ра́дуйся, всех ско́рбных уте́шительнице. Ра́дуйся, я́ко не престае́ши промышля́ющи и спаса́ющи нас; ра́дуйся, я́ко от толи́ких бед избавля́еши нас. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 8
Стра́нно покрыва́емую от ико́ны Богома́тере оби́тель И́верскую слы́шав патриа́рх Ни́кон, вожделе́ и Росси́йстей стране́ благода́ти Ея́ стяжа́ти прича́стие; сего́ ра́ди, созда́в оби́тель в честь сла́внаго о́браза, со тща́нием испроси́ изображе́ние чудотво́рнаго о́браза Богома́тере, да, покро́вом Ея́ защища́еми, вопию́т Бо́гу: Аллилу́иа.
Икос 8
Вся су́щи в вы́шних, но и ни́жних не отступа́ющи, благоизво́лила еси, Богома́ти, я́коже дре́вле преподо́бному Анто́нию дарова́ся благослове́ние Горы́ Афо́нския на утвержде́ние оби́тели Пече́рския, дарова́ти и но́вой оби́тели в стране́ Росси́йстей благода́ть Свою́, е́юже благослови́ла еси́ Афо́н, в подо́бии честна́го о́браза Твоего́; те́мже взыва́ем Ти: Ра́дуйся, страны́ Росси́йския покро́ве, ши́рший о́блака; ра́дуйся, правосла́вныя ве́ры в ней огражде́ние и утвержде́ние. Ра́дуйся, Правосла́вныя Це́ркве непоколеби́мый сто́лпе; ра́дуйся, ересе́й и раско́лов обличе́ние. Ра́дуйся, све́тлыми луча́ми чудотво́рных ико́н всю страну́ озаря́ющая; ра́дуйся, дары́ исцеле́ний и ми́лостей от них источа́ющая. Ра́дуйся, враго́в устраше́ние; ра́дуйся, святи́телей весе́лие. Ра́дуйся, иере́ев похвало́; ра́дуйся, и́ноков наста́внице. Ра́дуйся, всего́ ро́да на́шего спасе́ние. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 9
Вся́ко тща́ние иму́ще о написа́нии честна́го о́браза ми́лостивыя Врата́рницы, сонм по́стников и́верских моле́бныя пе́ния соверша́ет; водо́ю от чу́дныя ико́ны омыва́ет дску, на не́йже и́мать изобрази́тися честны́й о́браз, и преподо́бнаго Иа́мвлиха освяща́ет, и́же подвиза́вся в посте́, моли́тве и бде́нии со все́ю бра́тиею, списа́ ва́пы4, свято́ю водо́ю и моща́ми освяще́нными честно́е изображе́ние Богома́тере, вы́ну моля́ся и вопия́ Бо́гу: Аллилу́иа.
Икос 9
Вети́и многовеща́ннии, я́ко ры́бы безгла́сныя, ви́дим о Тебе́, Богоро́дице: недоуме́ют бо, ка́ко по досто́инству похвали́ти вся чудеса́ Твоя́, явле́нная ро́ду на́шему от святы́я Твоея́ ико́ны: еще́ бо на пути́ в Росси́йскую страну́ сия́ чудоде́йствоваше, благочести́вому Ману́илу повелева́я вы́куп да́ти неве́рным, возбраня́ющим ше́ствие святы́я ико́ны в страну́ Ру́сскую, и сугу́бо ему́ по́слежде отда́вши. Мы же, дивя́щеся, ве́рно вопие́м Ти: Ра́дуйся, исто́чниче чуде́с неисчерпа́емый; ра́дуйся, вся́кия ми́лости пода́тельнице. Ра́дуйся, всегда́ те́плая о нас хода́таице к Бо́гу; ра́дуйся, промышле́ния Его́ о нас сокро́вище. Ра́дуйся, су́щим в беда́х прибе́жище; ра́дуйся, скорбя́щих утеше́ние. Ра́дуйся, больны́х исцеле́ние; ра́дуйся, немощны́х укрепле́ние. Ра́дуйся, вдов заступле́ние; ра́дуйся, сиро́тствующих милосе́рдая Ма́ти. Ра́дуйся, заблужда́ющих на путь и́стины обраще́ние; ра́дуйся, гре́шников к покая́нию воззва́ние. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 10
Спасти́ хотя́щи мно́гия лю́ди от бед и скорбе́й, источа́еши, Богома́ти, неоску́дный исто́чник ми́лости от Своея́ ико́ны ро́ду на́шему: се бо и в сто́льном гра́де Москве́ блага́я Врата́рница явля́ешися всем поклоня́ющимся Тебе́, ско́рое вспоможе́ние подава́ющи, и в но́вой оби́тели И́верстей благода́ти струи́ от ико́ны Твоея́ испуща́еши, и во ины́х граде́х, оби́телех и ве́сех чту́щим Тя поле́зное проше́ние исполня́ющи. Те́мже, прославля́я Бо́га, да́вшаго нам благода́ть такову́ю, вопие́м Ему́: Аллилу́иа.
Икос 10
Стена́ еси́ и́ноческому чи́ну, Богоро́дице, и всем, к Тебе́ прибега́ющим; и́бо небесе́ и земли́ Творе́ц, все́лься в де́вственней утро́бе Твое́й, научи́ всех чистоты́ и целому́дрия ревни́телей возглаша́ти Тебе́: Ра́дуйся, де́вства сосу́де избра́нный; ра́дуйся, чисте́йший о́бразе целому́дрия. Ра́дуйся, черто́же безсеменнаго уневе́щения; ра́дуйся, Неве́сто Неневе́стная. Ра́дуйся, Се́ятеля чистоты́ ро́ждшая; ра́дуйся, ве́рных Го́сподеви сочета́вшая. Ра́дуйся, в бу́ри искуше́ний ско́рая помо́щнице; ра́дуйся, прило́ги врага́ отража́ющая. Ра́дуйся, мглу душевре́дных страсте́й отгоня́ющая; ра́дуйся, по́мыслы очища́ющая. Ра́дуйся, земны́я сла́сти презира́ти науча́ющая; ра́дуйся, к го́рнему умы́ и сердца́ направля́ющая. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 11
Пе́ние вся́кое побежда́ется, спростре́тися тща́щееся ко мно́жеству мно́гих щедро́т Твои́х: равночи́сленныя бо песка́ пе́сни а́ще прино́сим Ти, Влады́чице на́ша Богоро́дице, ничто́же соверша́ем досто́йно, я́же подава́еши нам, о Тебе́ вопию́щим: Аллилу́иа.
Икос 11
Светоприе́мную свещу́, су́щим во тьме бед я́вльшуюся, зрим святу́ю ико́ну Богома́тере: невеще́ственный бо огнь благода́ти прие́млющи, луча́ми чуде́с всех озаря́ет, науча́ющи си́це взыва́ти Благослове́нней: Ра́дуйся, во вся́ких ну́ждах ско́рое вспоможе́ние; ра́дуйся, в печа́лех бы́строе услы́шание. Ра́дуйся, от огня́, меча́ и наше́ствия иноплеме́нных нас избавля́ющая; ра́дуйся, от гла́да и напра́сныя сме́рти нас освобожда́ющая. Ра́дуйся, от я́звы и всегуби́тельства сме́ртнаго нас соблюда́ющая; ра́дуйся, бе́дствующим в пути́, на су́ше и на вода́х внеза́пное вспоможе́ние. Ра́дуйся, язв душе́вных и теле́сных врачева́ние; ра́дуйся, оста́вленных врачми́ в Свои́ ру́це прие́млющая. Ра́дуйся, милосе́рдая уте́шительнице всех скорбя́щих и обремене́нных; ра́дуйся, не отверга́ющая всех презре́нных и отве́рженных. Ра́дуйся, са́мых отча́янных из ро́ва поги́бели похища́ющая; ра́дуйся, и мене́, обнаже́ннаго до́брых дел, не оставля́ющая Свои́м покро́вом и заступле́нием. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 12
Благода́ть да́ти восхоте́в долго́в дре́вних, всех долго́в реши́тель челове́ком, прии́де Собо́ю ко отше́дшим Того́ благода́ти и, раздра́в рукописа́ние, дарова́ нам кре́пкое Богоблагода́тныя хода́тайство, да вопие́м вси моли́твами Ея́: Аллилу́иа.
Икос 12
Пою́ще Твоя́ чудеса́, явля́емая нам в жи́зни сей, хва́лим Тя, Богоро́дице, я́ко ми́лости исто́чник неисчерпа́емый. Но, припа́дающе к Тебе́ пред чудотво́рною ико́ною Твое́ю, мо́лим Тя смире́нно: бу́ди нам покро́в и защище́ние и в день кончи́ны на́шея, и егда́ и́мамы предста́ти на суд стра́шному Престо́лу Сы́на Твоего́, да вопие́м Ти: Ра́дуйся, во сла́ве приседя́щая Престо́лу Сы́на Твоего́ и та́мо нас воспомина́ющая; ра́дуйся, с Сы́ном Твои́м и Бо́гом ве́чно ца́рствующая и о нас хода́тайствующая. Ра́дуйся, упова́ющим на Тя коне́ц живота́ непосты́ден да́рующая; ра́дуйся, безболе́зненную и ми́рную кончи́ну устроя́ющая. Ра́дуйся, мыта́рств го́рьких избавле́ние; ра́дуйся, от вла́сти кня́зя возду́шнаго освобожде́ние. Ра́дуйся, грехо́в на́ших непоминове́ние; ра́дуйся, по Го́споде упова́ние нам блаже́нныя жи́зни. Ра́дуйся, упова́ющим на Тя одесну́ю Сы́на Твоего́ стоя́ние устроя́ющая; ра́дуйся, блаже́ннаго гла́са О́наго, Небе́снаго Ца́рствия насле́дие обеща́ющаго, слы́шати сподобля́ющая. Ра́дуйся, Блага́я Ма́ти, всех чту́щих Тя жи́ти с Собо́ю вселя́ющая; ра́дуйся, кре́пкая наде́ждо ве́чнаго спасе́ния всем христиа́ном. Ра́дуйся, блага́я Врата́рнице, две́ри ра́йския ве́рным отверза́ющая.
Кондак 13
О Всепе́тая Ма́ти, Пресвята́я Госпоже́ Де́во Богоро́дице! При́зри на нас, принося́щих смире́нно со слеза́ми ма́лыя сия́ моли́твы пред пречи́стым Твои́м о́бразом и все упова́ние и наде́жду возложи́вших на Тя, и изба́ви нас всех бед и напа́стей в животе́ сем и бу́дущия изми́ му́ки, да, спаса́емии Тобо́ю, вопие́м вы́ну: Аллилу́иа.
Этот кондак читается трижды, затем 1-й икос «А́нгел предста́тель…» и 1-й кондак «Взбра́нной Воево́де…»
Молитвы
О Пресвята́я Де́во, Ма́ти Го́спода, Цари́це небесе́ и земли́! Вонми́ многоболе́зненному воздыха́нию душ на́ших, при́зри с высоты́ святы́я Твоея́ на нас, с ве́рою и лю́бовию поклоня́ющихся пречи́стому о́бразу Твоему́. Се бо, грехми́ погружа́емии и скорбьми́ обурева́емии, взира́юще на Твой о́браз, я́ко живе́й Ти су́щей с на́ми, прино́сим смире́нная моле́ния на́ша. Не и́мамы бо ни ины́я по́мощи, ни ина́го предста́тельства, ни утеше́ния, то́кмо Тебе́, о Ма́ти, всех скорбя́щих и обремене́нных! Помози́ нам, немощны́м, утоли́ скорбь на́шу, наста́ви на путь пра́вый нас, заблужда́ющих, уврачу́й и спаси́ безнаде́жных, да́руй нам про́чее вре́мя живота́ на́шего в ми́ре и тишине́ проводи́ти, пода́ждь христиа́нскую кончи́ну и на Стра́шнем Суде́ Сы́на Твоего́ яви́ся нам милосе́рдая засту́пница, да всегда́ пое́м, велича́ем и сла́вим Тя, я́ко Благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.
О Пресвята́я Госпоже́ Влады́чице Богоро́дице, приими́ недосто́йную моли́тву на́шу, и сохрани́ нас от наве́та злых челове́к и от напра́сныя сме́рти, и да́руй нам пре́жде конца́ покая́ние, на моле́ние на́ше умилосе́рдися и ра́дости в печа́ли ме́сто да́руй. И изба́ви нас, Госпоже́, от вся́кия беды́ и напа́сти, ско́рби и печа́ли и от вся́каго зла. И сподо́би нас, гре́шных рабо́в Твои́х, одесну́ю ста́ти во Второ́м Прише́ствии Сы́на Твоего́, Христа́ Бо́га на́шего, и насле́дники нас бы́ти сподо́би Ца́рствия Небе́снаго и жи́зни ве́чныя со все́ми святы́ми в бесконе́чные ве́ки веко́в. Аминь.
Акафист
Пресвятой Богородице в честь иконы Ея Казанской
(празднование 8/21 июля и 22 октября/4 ноября)
Кондак 1
Избра́нней от всех родо́в Засту́пнице ро́да христиа́нскаго, покро́вом Своея́ бла́гости покрыва́ющей страну́ на́шу правосла́вную, благода́рственная пе́ния прино́сим Ти, Богоро́дице, о явле́нии чу́дныя Твоея́ ико́ны. Ты же, яко всеми́лостивая, всех притека́ющих к Тебе́ помо́щнице, заступа́й нас во всех скорбе́х и ну́ждах, беда́х и напа́стех, да зове́м Ти: Ра́дуйся, Засту́пнице усе́рдная ро́да христиа́нскаго.
Икос 1
А́нгел предста́тель по́слан бысть рещи́ Богоро́дице «Ра́дуйся», егда́ Бог Сло́во воплоща́шеся во утро́бе Ея́; и мы, гре́шнии, прославля́юще явле́ние чу́дныя Ея́ ико́ны и Боже́ственнаго Младе́нца Спа́са Христа́, со умиле́нием вопие́м Благода́тней: Ра́дуйся, Богоизбра́нная Отрокови́це; ра́дуйся, Ма́ти Бо́жия. Ра́дуйся, Цари́це небесе́ и земли́; ра́дуйся, све́тлое Це́ркве Небе́сныя и земны́я украше́ние. Ра́дуйся, а́нгелы чти́мая; ра́дуйся, пева́емая от серафи́м. Ра́дуйся, све́тлое проро́ческое сбы́тие; ра́дуйся, апо́столов похвало́. Ра́дуйся, му́ченическое испове́дание; ра́дуйся, преподо́бных ве́нче. Ра́дуйся, пра́ведных весе́лие; ра́дуйся, гре́шных упова́ние. Ра́дуйся, Засту́пнице усе́рдная ро́да христиа́нскаго.
Кондак 2
Ви́дящи, Всенепоро́чная, с высоты́ небе́снаго жили́ща Своего́, иде́же с Сы́ном Твои́м в сла́ве пребыва́еши, скорбь рабо́в Твои́х в новопросвеще́ннем гра́де, я́ко гне́внаго ра́ди Бо́жия посеще́ния ве́ра Христо́ва поруга́ема быва́ет ага́рянским злове́рием, благоволи́ла еси́ яви́ти ико́ну Свою́, чудесы́ ю́ прославля́ющи, да утвержда́емии зна́меньми Твоея́ благода́ти, христолюби́вии лю́дие ве́рно вопию́т Бо́гу: Аллилу́иа.
Икос 2
Разуме́ние трикра́тнаго явле́ния Богома́тере му́драя отрокови́ца и́щущи, тече́ ко власте́м, пове́дающи им ди́вное явле́ние и гро́зное преще́ние: мы же дивя́щеся свы́ше да́нному отрокови́це вразумле́нию, благогове́йно вопие́м к Преблагослове́нней: Ра́дуйся, устна́ми чи́стыми хвалу́ Бо́гови соверша́ющая; ра́дуйся, та́йны благода́ти Бо́жия ве́рным открыва́ющая. Ра́дуйся, неве́рных сумни́тельно слы́шание; ра́дуйся, ве́рных изве́стная похвало́. Ра́дуйся, мо́лние, неве́рных устра́шающая; ра́дуйся, сла́вою чуде́с Твои́х ве́рных ра́зум озаря́ющая. Ра́дуйся, агаря́нскаго злове́рия обличе́ние; ра́дуйся, горды́ни их низложе́ние. Ра́дуйся, ве́ры христиа́нския утвержде́ние; ра́дуйся, почита́ния святы́х ико́н освяще́ние. Ра́дуйся, скорбь на́шу в ра́дость претворя́ющая; ра́дуйся, несумне́нною наде́ждою нас увеселя́ющая. Ра́дуйся, Засту́пнице усе́рдная ро́да христиа́нскаго.
Кондак 3
Си́ла Вы́шняго благода́тию Богома́тере умудри́ и укрепи́ отрокови́цу к иска́нию многоце́ннаго Бо́жия да́ра, и та, с ве́рою дерза́ющи о Го́споде, приступи́ к труду́ и, скры́тое в земли́ обре́тши сокро́вище святы́я ико́ны Богома́терни, ра́достно возопи́ к Бо́гу: Аллилу́иа.
Икос 3
Име́ющи благоутро́бное промышле́ние о новопросвеще́нных лю́дех гра́да Каза́ни, от пречестны́я Твоея́ ико́ны то́ки чуде́с источи́ла еси́, Влады́чице, слепы́м теле́сныма очи́ма зре́ние подава́ющи, омраче́нных же душе́вно све́том богопозна́ния и благоче́стия озаря́ющи, де́вствующим под осене́нием Твоея́ ико́ны приста́нище небу́рное да́рующи. Сего́ ра́ди зове́м Ти: Ра́дуйся, явле́нием ико́ны Твоея́ тьму лю́тых обстоя́ний отгоня́ющая; ра́дуйся, луча́ми чуде́с всех просвеща́ющая. Ра́дуйся, слепы́х прозре́ние; ра́дуйся, омраче́нных смы́слом просвеще́ние. Ра́дуйся, сла́во Правосла́вия; ра́дуйся, ти́хое приста́нище и́щущих спасе́ния. Ра́дуйся, Ма́ти целому́дрия; ра́дуйся, покро́ве и огражде́ние де́вства. Ра́дуйся, Е́юже ликовству́ет все мно́жество ве́рных; ра́дуйся, Ея́же ра́ди рыда́ет де́монское по́лчище. Ра́дуйся, всех христиа́н вожделе́нная помо́щнице; ра́дуйся, всех скорбя́щих ра́досте. Ра́дуйся, Засту́пнице усе́рдная ро́да христиа́нскаго.
Кондак 4
Бу́рю смяте́ний и крамо́лы врага́ми воздви́гнутую в стране́ на́шей утоли́ти тща́шеся блаже́нный Ермоге́н, списа́тель чуде́с Твоея́, Богома́ти, ико́ны, сле́зно пред не́ю моля́шеся и, ви́дев, я́ко во́инству правосла́вному в щит и побе́дное зна́мение Твоя́ ико́на дарова́ся, ве́рою укрепля́емый до конца́ живота́ своего́, вопия́ше Бо́гу: Аллилу́иа.
Икос 4
Слы́шавше правосла́внии во́ини открове́нную преподо́бным Се́ргием святи́телю Арсе́нию та́йну, я́ко предста́тельством Богома́тере суд об Отече́стве на́шем прело́жен на ми́лость, ико́ну Богома́терню, я́ко зна́мя побе́дное, прии́мше, исхи́тиша ма́терь градо́в ру́сских из рук супоста́т и возопи́ша засту́пнице христиа́н: Ра́дуйся, Ма́ти Бо́га Вы́шняго; ра́дуйся, я́ко за всех мо́лиши Сы́на Твоего́, Христа́ Бо́га на́шего. Ра́дуйся, я́ко всем твори́ши спасти́ся в держа́вный Твой покро́в прибега́ющим; ра́дуйся, засту́пнице всех су́щих в скорбе́х и боле́знех. Ра́дуйся, всем моля́щимся сокруше́нным се́рдцем пред пречи́стым Твои́м о́бразом поле́зная да́рующая; ра́дуйся, избавле́ние зол всем, невозвра́тно наде́жду иму́щим на Тя. Ра́дуйся, ти́хое и до́брое приста́нище; ра́дуйся, ско́рая помо́щнице. Ра́дуйся, гото́вый и те́плый покро́ве спасения; ра́дуйся, источа́ющая нам неоску́дныя ми́лости. Ра́дуйся, предваря́ющая на по́мощь; ра́дуйся, избавля́ющая от всех бед. Ра́дуйся, Засту́пнице усе́рдная ро́да христиа́нскаго.
Кондак 5
Боготе́чная звезда́ яви́ся Твоя́, Богома́ти, ико́на, всю страну́ Росси́йскую обтека́ющая, луча́ми чуде́с Твои́х осиява́ющая всех блужда́ющих по мо́рю стра́стнаго жити́я, мрак печа́лей и мглу вся́ких неду́г и скорбе́й прогоня́ющая и наставля́ющая на путь спасе́ния с ве́рою к Тебе́ притека́ющих и вопию́щих к Бо́гу: Аллилу́иа.
Икос 5
Ви́дев царь Петр, я́ко от святы́я ико́ны Богома́терни благода́тию Бо́жиею содева́ются мно́гия чудеса́, прие́млет ю́ в путеводи́тельницу во́инству своему́ и в день бра́ни на све́ев в щит и покро́в, и победи́в до конца́ врага́ с по́мощию Богома́тере, тем ка́мень соверше́нный во основа́ние но́ваго ца́рствующего гра́да положи́, ико́ну же Твою́ чу́дную, я́ко освяще́ние, я́ко щит и огражде́ние, в сердце́ гра́да поста́ви. Сего́ ра́ди вопие́м Пречисте́й: Ра́дуйся, жили́ще и до́ме Христа́ Бо́га на́шего; ра́дуйся, вмести́лище неизрече́нныя Его́ сла́вы. Ра́дуйся, гра́де одушевле́нный, при́сно ца́рствующий; ра́дуйся, пала́то преукраше́нная. Ра́дуйся, ра́досте градо́в и ве́сей; ра́дуйся, непобеди́мое христиа́н в беда́х храни́лище и предгра́дие. Ра́дуйся, Це́ркве Правосла́вныя похвало́; ра́дуйся, Ру́сской земли́ утвержде́ние. Ра́дуйся, христолюби́ваго во́инства помо́щнице; ра́дуйся, враго́в одоле́ние. Ра́дуйся, от бед избавле́ние; ра́дуйся, Ма́терними Твои́ми щедро́тами всех посеща́ющая. Ра́дуйся, Засту́пнице усе́рдная ро́да христиа́нскаго.
Кондак 6
Предстоя́щи пред пречи́стым Твои́м о́бразом архиере́ев сосло́вии и вси лю́дие, мона́си и мирсти́и, пропове́дуют, Госпоже́ Богороди́тельнице, вели́кия Твоя́ ми́лости, я́ко гра́ды огражда́еши, оби́тели покрыва́еши, ве́си защища́еши, и, ве́дуще Тя вои́стинну помо́щницу си́льну и непобеди́му, со слеза́ми прино́сят Ти моли́твы, да простре́ши к Сы́ну Твоему́ Богоно́сныя ру́ки за лю́ди Твоя́, во е́же изба́вити нас от всех бед и напа́стей, да благода́рне вопие́м Бо́гу: Аллилу́иа.
Икос 6
Возсия́вши просвеще́ние и́стинное и отгна́вши дре́вле лесть ага́рянскую во новопросвеще́нней стране́ Каза́нской, ны́не во всех гра́дех росси́йских све́тиши све́том чуде́с и ми́лостей: притека́ющии бо с ве́рою ко Твое́й ико́не цельбоно́сней скорбе́й избавле́ние, неду́гов исцеле́ние и ра́дости вся́кия исполне́ния прие́млют, вопию́ще усе́рдно: Ра́дуйся, неистощи́мый исто́чниче святы́ни; ра́дуйся, многотеку́щая реко́ Боже́ственная благода́ти. Ра́дуйся, гре́шных с Бо́гом примире́ние; ра́дуйся, грехо́в на́ших очище́ние. Ра́дуйся, благоче́стия наста́внице; ра́дуйся, в до́брых де́лех утвержде́ние и по́моще. Ра́дуйся, до́брыя обе́ты приемлющая; ра́дуйся, благи́м наме́рением спосо́бствующая. Ра́дуйся, злыя начина́ния разруша́ющая; ра́дуйся, вра́жия ко́зни расторга́ющая. Ра́дуйся, ско́рая челове́ком помо́щнице; ра́дуйся, ми́лость сугу́бо нам подаю́щая. Ра́дуйся, Засту́пнице усе́рдная ро́да христиа́нскаго.
Кондак 7
Хотящу́ наро́ду правосла́вному испове́дати ми́лости Преблагослове́нныя Цари́цы не́ба и земли́ и по си́ле благода́рственная принести́ о избавле́нии е́го от наше́ствия иноплеме́нных, ди́вному хра́му, созда́нному в честь пречу́дныя ико́ны, побе́дная в дар принесе́, да вси па́мятующе ми́лость Богома́тере, спа́сшия град сей и страну́, вы́ну воспева́ют Бо́гу благода́рными усты́: Аллилу́иа.
Икос 7
Сто́льному гра́ду Росси́и свята́я ико́на Твоя́, Богома́ти, вои́стинну яви́ся блага́я Одиги́трия, я́коже дре́вле Царегра́ду: к Тебе́ бо прибега́ют лю́дие, по́мощи Твоея́ на нача́ло пути́ и дел свои́х прося́ще и благода́рственная принося́ще моле́ния пред пречи́стою ико́ною Твое́ю за избавле́ние от скорбе́й и напа́стей, Тебе́ помо́щницу и Засту́пницу кре́пкую ве́дают. Те́мже благода́рственно вопие́м Ти: Ра́дуйся, Росси́йския страны́ покро́ве; ра́дуйся, Правосла́вия в ней огражде́ние и утвержде́ние. Ра́дуйся, несокруши́мый щи́те во́инов на́ших; ра́дуйся, броне́ их неуязви́мая. Ра́дуйся, ко́зни враго́в облича́ющая; ра́дуйся, я́ко паучи́ну их растерза́ющая. Ра́дуйся, нече́стия обличе́ние; ра́дуйся, крамо́лы разруше́ние. Ра́дуйся, ю́ных от заблужде́ний исправле́ние; ра́дуйся, ста́рцев утеше́ние. Ра́дуйся, душевре́дных уче́ний низложе́ние; ра́дуйся, душеполе́зных зна́ний дарова́ние. Ра́дуйся, Засту́пнице усе́рдная ро́да христиа́нскаго.
Кондак 8
Стра́нно и сумни́тельно неве́рующим слу́шати, ка́ко от ико́ны Твоея́ то́ки благода́ти истека́ют, воня́ живо́тная благоуха́ет; мы же, ве́рующе сло́ву, рече́нному Тобо́й, Влады́чице, к первонапи́санней ико́не: «С тобо́й Моя́ благода́ть и си́ла», упова́ем, я́ко и с се́ю ико́ною благода́ть Твоя́ вы́ну: те́мже благогове́йно предстоя́ще лобыза́ем ю́, поклоня́емся ей, я́ко Тебе́ Саме́й су́щей, честь бо ико́ны на первообра́зное восхо́дит, и Твоя́ благода́ть се́ю ико́ною зна́мения и чудеса́ содева́ет всем с ве́рою притека́ющим к Тебе́ и вопию́щим Бо́гу: Аллилу́иа.
Икос 8
Вся бы́вши горе́, к небе́сным взя́та, и земны́х не оставля́еши, Богома́ти, свяще́нным Твои́м предста́тельством: и́маши бо Ма́тернее дерзнове́ние ко Христу́ Бо́гу на́шему. Те́мже утверди́ в ми́ре глубо́це правосла́вных житие́ и вся поле́зная всегда́ да́руй рабо́м Твои́м, да велича́юще воспева́ем Ти: Ра́дуйся, Невмести́маго вмести́лище; ра́дуйся, осене́нная си́лою Вы́шняго. Ра́дуйся, прозя́бшая Клас Небе́сный; ра́дуйся, мир весь душепа́губнаго гла́да изба́вльшая. Ра́дуйся, вы́ну хода́тайствующая за род наш; ра́дуйся, я́ко мно́го мо́жет моли́тва Твоя́ пред Сы́ном Твои́м и Бо́гом. Ра́дуйся, всех нас при Кресте́ Сы́на Твоего́ усынови́вшая; ра́дуйся, всегда́ Ма́тернюю любо́вь к нам явля́ющая. Ра́дуйся, хода́таице ве́чных благ; ра́дуйся, и во вре́менней жи́зни поле́зная нам подаю́щая. Ра́дуйся, изве́стное прибе́жище на́ше во всех ско́рбных обстоя́ниих; ра́дуйся, несомне́нное утеше́ние в печа́лех. Ра́дуйся, Засту́пнице усе́рдная ро́да христиа́нскаго.
Кондак 9
Вся́каго естества́ а́нгельскаго превы́шшая яви́лася еси́, Пресвята́я Де́во: Бо́га бо зачала́ еси́ пло́тию, Невмести́маго все́ми вмести́ла еси́ во утро́бе Твое́й, на рука́х носи́ла еси́ Нося́щаго весь мир дла́нию; те́мже, я́ко честне́йшую херуви́м и сла́внейшую без сравне́ния серафи́м велича́юще Тя, вопие́м о Тебе́ Бо́гу: Аллилу́иа.
Икос 9
Вити́и многовеща́ннии, я́ко ры́бы безгла́снии, ви́дим о Тебе́, Богоро́дице: недоуме́ет бо всяк язы́к благохвали́ти Тя по достоя́нию, изумева́ет ум пе́ти Тя, Богоро́дице; оба́че Блага́я су́щи, приими́ и от нас арха́нгельский глас, Тебе́ вопию́щих: Ра́дуйся, Благода́тная; ра́дуйся, я́ко Госпо́дь с Тобо́ю. Ра́дуйся, Благослове́нная в жена́х; ра́дуйся, обре́тшая благода́ть у Бо́га. Ра́дуйся, роди́вшая Спаси́теля ми́ру; ра́дуйся, Ма́ти Сы́на Бо́жия. Ра́дуйся, Роди́тельнице Ве́чнаго Царя́; ра́дуйся, израсти́вшая нам плод живота́. Ра́дуйся, освяще́нная Ду́хом Святы́м; ра́дуйся, осене́нная си́лою Всевы́шняго. Ра́дуйся, ве́рная Рабо́ Госпо́дня; ра́дуйся, я́ко Тя блажа́т вси ро́ди. Ра́дуйся, Засту́пнице усе́рдная ро́да христиа́нскаго.
Кондак 10
Спасти́ хотя́щи мно́гия от находя́щих зол, скорбе́й и боле́зней, чу́дную ико́ну Твою́, Богома́ти, дарова́ла еси́, ея́же ра́ди слепи́и прозира́ют, хроми́и хо́дят, разсла́бленнии возстаю́т, бесну́ющиися исцеля́ются, земли́ плодоно́сие подае́тся, лю́дие от смертоно́сныя я́звы избавля́ются, гра́ды и до́мы от огня́ спаса́ются; те́мже прославля́юще Бо́га, даю́щаго нам таковы́я ми́лости, вопие́м Ему́ усе́рдно: Аллилу́иа.
Икос 10
Стена́ еси, Богоро́дице, стране́ Росси́йстей, градо́м огражде́ние и сла́ва, правосла́вному во́инству на враги́ укрепле́ние. Те́мже, благодаря́ще Тя, вопие́м: Ра́дуйся, прославля́ющих Тя прославля́ющая; ра́дуйся, не чту́щих Тя посрамля́ющая. Ра́дуйся, враго́в устраше́ние; ра́дуйся, от наше́ствия иноплеме́нных избавле́ние. Ра́дуйся, во́инов кре́посте; ра́дуйся, в дни бра́ни забра́ло и огражде́ние. Ра́дуйся, в дни ми́ра живоно́сный са́де, увеселя́ющий сердца́ ве́рных; ра́дуйся, ору́жие, его́же трепе́щут де́мони. Ра́дуйся, спаси́тельный еле́й, умаща́ющий грехо́вныя ра́ны ка́ющихся; ра́дуйся, те́плое на́ше упова́ние. Ра́дуйся, несумне́нная на́ша наде́ждо; ра́дуйся, ти́хое и до́брое приста́нище. Ра́дуйся, Засту́пнице усе́рдная ро́да христиа́нскаго.
Кондак 11
Пе́ние хвале́бное и благода́рственное прино́сят Тебе́, Влады́чице, припа́дающе ко ико́не Твое́й и любе́зно лобыза́юще ю́, дев ли́цы, под держа́вным покро́вом Твои́м ти́хое и ми́рное и́ноческое житие́ провожда́ющии, и возложи́вше на Тя все упова́ние, ра́достно вопию́т Богу́: Аллилу́иа.
Икос 11
Я́ко светоприе́мную свещу́, зрим Твою́ честну́ю ико́ну, Пресвята́я Влады́чице: та бо невеще́ственный огнь благода́ти Твоея́ восприе́мши, и в подо́биих ея́ но́вы возжига́ет свети́льники, прича́стны то́яжде си́лы благода́тныя, и озаря́ет чудесы́, наставля́ющи на путь спасе́ния всех вопию́щих Ти си́це: Ра́дуйся, Неве́сто Неневе́стная; ра́дуйся, Богоизбра́нная Отрокови́це, Ма́ти Де́во. Ра́дуйся, до́брая наста́внице непоро́чнаго де́вства; ра́дуйся, храни́тельнице ревну́ющих о чистоте́. Ра́дуйся, жен похвало́; ра́дуйся, дев велича́ние. Ра́дуйся, вдов заступле́ние; ра́дуйся, сиро́т призре́ние. Ра́дуйся, ни́щих пита́тельнице; ра́дуйся, наги́х оде́яние. Ра́дуйся, печа́льных утеше́ние; ра́дуйся, скорбя́щих весе́лие. Ра́дуйся, Засту́пнице усе́рдная ро́да христиа́нскаго.
Кондак 12
Благода́ть да́ти восхоте́вши почита́ющим Тя с любо́вию, Богороди́тельнице, прису́щую Ти си́лу благода́тную оста́вила еси́ во святы́х Твои́х ико́нах, и́бо Боже́ственная благода́ть, спребыва́ющи тем, зна́мения и чудеса́ вы́ну содева́ет и душе́вных и теле́сных неду́г исцеле́ние всем с ве́рою приходя́щим подае́т Твои́ми Богома́терними непреста́нными к Бо́гу моли́твами о вопию́щих Ему́: Аллилу́иа.
Икос 12
Пою́ще Твоя́ чудеса́, бы́вшая в дре́вняя и настоя́щая времена́, хва́лим Тя, я́ко живоно́сный исто́чник благода́ти, я́ко неистощи́мую ре́ку чуде́с, я́ко бе́здну ми́лости и щедро́т, и все упова́ние по Бо́зе возлага́юще на Тя и в сей и в бу́дущей жи́зни, прославля́юще Тя, вопие́м: Ра́дуйся, христиа́н непосты́дное упова́ние; ра́дуйся, ве́рных спаси́тельное прибе́жище. Ра́дуйся, ненаде́жных наде́яние; ра́дуйся, отча́янных спасе́ние. Ра́дуйся, ба́не, омыва́ющая со́весть; ра́дуйся, росо́, оживля́ющая ду́ши. Ра́дуйся, боле́зней врачевство́ ско́рое и безме́здное; ра́дуйся, от всех бед бы́строе избавле́ние. Ра́дуйся, уте́шительнице во вся́кой ско́рби; ра́дуйся, из глубины́ поги́бели спаса́ющая. Ра́дуйся, отра́до в день сме́рти; ра́дуйся, еди́ная наде́ждо и по сме́рти. Ра́дуйся, Засту́пнице усе́рдная ро́да христиа́нскаго.
Кондак 13
О Всепе́тая Ма́ти, ро́ждшая всех святы́х Святе́йшее Сло́во, приими́ ны́не ма́лое сие́ моле́ние и, вели́чия ра́ди бла́гости Твоея́ и бе́здны щедро́т Твои́х, не помяни́ мно́жества грехо́в на́ших, но испо́лни во благи́х проше́ния на́ша, подава́ющи те́лу здра́вие, души́ спасе́ние, избавля́ющи от вся́кия ну́жды и печа́ли и Ца́рствия Небе́снаго насле́дники сотворя́ющи всех ве́рно вопию́щих Бо́гу: Аллилу́иа.
Этот кондак читается трижды, затем 1-й икос «А́нгел предста́тель…» и 1-й кондак «Избра́нней от всех…»
Молитва
О Пресвята́я Госпоже́ Влады́чице Богоро́дице! Со стра́хом, ве́рою и любо́вию припа́дающе пред честно́ю ико́ною Твое́ю, мо́лим Тя: не отврати́ лица́ Твоего́ от прибега́ющих к Тебе́, умоли́, милосе́рдая Ма́ти, Сы́на Твоего́ и Бо́га на́шего, Го́спода Иису́са Христа́, да сохрани́т ми́рну страну́ на́шу, Це́рковь Свою́ Святу́ю да незы́блему соблюде́т от неве́рия, ересе́й и раско́ла. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты еси́ всеси́льная христиа́н Помо́щница и Засту́пница. Изба́ви всех с ве́рою Тебе́ моля́щихся от паде́ний грехо́вных, от наве́та злых челове́к, от вся́ких искуше́ний, скорбе́й, бед и от напра́сныя сме́рти; да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние прегреше́ний, да вси благода́рне воспева́юще вели́чия Твоя́, сподо́бимся Небе́снаго Ца́рствия и та́мо со все́ми святы́ми просла́вим пречестно́е и великоле́пое и́мя Отца́ и Сы́на и Свята́го Ду́ха. Ами́нь.
Акафист
Пресвятой Богородице в честь иконы Ея «Достойно есть» («Милующая»)
(празднование 11/24 июня)
Кондак 1
Избра́нней Бо́гом от челове́ческаго ро́да послужи́ти воплоще́нию Предве́чнаго Сло́ва, Преблагослове́нней Де́ве Богоро́дице, досто́йно воспева́емой от а́нгел на небеси́, мы гре́шнии на земли́ дерза́ем приноси́ти хвале́бное пе́ние; е́же ми́лостиво от нас прие́мши, Всеми́лующая Цари́це Богоро́дице, от вся́ких бед нас спаси́ и ве́чных мук свободи́, да зове́м Ти: Ра́дуйся, христиа́ном Помо́щнице и милосе́рдая о гре́шных Предста́тельнице.
Икос 1
Арха́нгел Гаврии́л с небесе́ по́слан бысть от Тебе́, Богоро́дице, к смире́нному послу́шнику Горы́ Афо́нския, в пусты́нней ке́лии воспева́вшему Ти хвале́бныя пе́сни пред свято́ю Твое́ю ико́ною, да научи́т его́ пе́ти песнь небе́сную, е́юже славосло́вят Тя а́нгели в Сио́не Го́рнем. Те́мже и мы до́льнии, воспомина́я таково́е Твое́ о лю́дех благопромышле́ние, со благодаре́нием вопие́м Ти си́це: Ра́дуйся, досто́йно восхваля́емая от арха́нгел и а́нгел; ра́дуйся, ублажа́емая от всех Небе́сных Сил. Ра́дуйся, Присноблаже́нная и Пренепоро́чная; ра́дуйся, Ма́ти Бо́га на́шего. Ра́дуйся, честне́йшая херуви́м; ра́дуйся, сла́внейшая без сравне́ния серафи́м. Ра́дуйся, без истле́ния Бо́га Сло́ва ро́ждшая; ра́дуйся, вои́стину су́щая Богоро́дице. Ра́дуйся, велича́емая на небеси́ и на земли́; ра́дуйся, воспева́емая го́рними и до́льними. Ра́дуйся, еди́на благослове́нная в жена́х; ра́дуйся, израсти́вшая нам плод живота́. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 2
Ви́дев послу́шник пусты́нный ди́внаго прише́льца, в ке́лию его́ прише́дшаго и песнь пресла́дкую Тебе́, Влады́чице, воспе́вшаго, не уразуме́ в нем а́нгела бы́ти, но зело́ услади́ся пе́нием его́ небе́сным и проси́, да напи́шет ему́ словеса́ пое́мыя пе́сни; егда́ же узре́, я́ко под пе́рстом его́ ка́менная дска умягчи́ся, и пи́шемая словеса́ на ней углуби́шася, я́ко на песце́, позна́ в сем чуде́сное де́йство и возопи́ к ро́ждшемуся от Тебе́ Бо́гу Сло́ву: Аллилу́иа.
Икос 2
Ра́зумом богоозаре́нным но́вую песнь открыва́я, рече́ арха́нгел послу́шнику, я́ко та́ко воспева́ют Тя, Богоро́дице, а́нгелов ли́цы в оби́телех го́рних, и повеле́ ему́, да возвести́т челове́ком словеса́ пе́сни небе́сныя и научи́т их ангелоподо́бно пе́ти Тебе́: Ра́дуйся, благода́тная Мари́е; ра́дуйся, я́ко Госпо́дь с Тобо́ю. Ра́дуйся, благослове́нная в жена́х; ра́дуйся, Неискусобра́чная Роди́тельнице Бо́га Сло́ва. Ра́дуйся, непоро́чное селе́ние Ду́ха Свята́го; ра́дуйся, зача́тие несказа́нное яви́вшая. Ра́дуйся, рождество́ нетле́нное показа́вшая; ра́дуйся, Ма́терью и Де́вою пребы́вшая. Ра́дуйся, во обою́ непоро́чно и свя́то Себе́ сохра́ньшая; ра́дуйся, а́нгелов чистото́ю Твое́ю превозше́дшая. Ра́дуйся, го́рних умо́в непрестаю́щее удивле́ние; ра́дуйся, челове́ческаго ро́да возвышение. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 3
Си́лою Бо́жиею Гаврии́л арха́нгел тве́рдый ка́мень в мя́гкий воск претвори́ и на нем пе́рстом свои́м написа́ словеса́ пе́сни хвале́бныя Тебе́, Богоро́дице, да вси позна́ют вели́кое чу́до и несомне́нно уве́руют, я́ко та́ко вои́стину воспева́ют Тя горе́ Си́лы Небе́сныя, и́мже подража́юще, и мы пое́м вели́чия Твоя́, Де́во, и в ра́дости духо́вней вопие́м просла́вльшему Тя Бо́гу: Аллилу́иа.
Икос 3
Име́я простоту́ душе́вную и непоро́чное се́рдце, послу́шник смире́нный сподо́бися а́нгельския бесе́ды и лицезре́ния чинонача́льника го́рних сил, мы же, лука́вством и зло́бою потемне́ннии, со тре́петом взира́юще на святу́ю ико́ну Твою́, Влады́чице, мо́лим Ти ся приле́жно, обрати́ ны от злоб на́ших и научи́ нас во смире́нии и кро́тости ду́ха глаго́лати Тебе́: Ра́дуйся, Го́ру Афо́нскую освяти́вшая Твои́м благода́тным прису́тствием; ра́дуйся, хо́лмы и де́бри ея́ испо́лнившая сла́вою Твои́х чуде́с. Ра́дуйся, а́нгельскаго явле́ния сподо́бльшая пустынножи́тельство Афо́нское; ра́дуйся, оби́тели и́ноческия в нем умно́жившая во спасе́ние душ челове́ческих. Ра́дуйся, и всем, в посте́ и моли́тве пребыва́ющим, обеща́вшая Твое́ заступле́ние; ра́дуйся, от треволне́ния мо́ря жите́йскаго спаса́ющая ка́ющихся. Ра́дуйся, благода́ть Сы́на Твоего́ и Бо́га низводя́щая на места́, Тебе́ посвяща́емыя; ра́дуйся, рай мы́сленный показа́вшая хра́мы Бо́жия. Ра́дуйся, приста́нище небу́рное содева́ющая в о́нех и́щущим спасе́ния; ра́дуйся, всем потре́бным ко благоче́стию нас снабдева́ющая. Ра́дуйся, жи́тельствующим богоуго́дно пода́тельнице благ вре́менных и ве́чных; ра́дуйся, хода́таице нам Ца́рствия Небе́снаго. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 4
Бу́ря недоуме́ния смути́ ста́рца и́нока, егда́ услы́ша песнь но́ву и чу́дну из уст своего́ ученика́ и узре́ дску ка́менну, я́ко воск, начерта́ние прии́мшу; егда́ же уве́да о посеще́нии ди́внаго посети́теля, Гаврии́лом наре́кшагося, уразуме́, я́ко той есть, и́же дре́вле благовести́ Тебе́, Де́во, безсе́менное зача́тие Бо́га Сло́ва. Те́мже велича́я вели́чия Твоя́, Цари́це го́рних и до́льних, воспева́ше ра́достно а́нгелов и челове́ков Творцу́: Аллилу́иа.
Икос 4
Слы́шавше о посеще́нии арха́нгелове и́ноцы Горы́ Афо́нския, стека́хуся ви́дети дску, на не́йже преесте́ственно начерта́на бы́ша письмена́ пе́сни небе́сныя, и воспева́ху Тя благогове́йно пред свято́ю ико́ною Твое́ю, Влады́чице, пред не́юже воспе́ Тя арха́нгел. Приими́ у́бо и на́ша приноси́мыя Тебе́ моли́твы с пе́нием таковы́м: Ра́дуйся, я́ко о Тебе́ ра́дуется а́нгельский собо́р; ра́дуйся, я́ко о Тебе́ торжеству́ет челове́ческий род. Ра́дуйся, на руку́ Твое́ю носи́вшая Нося́щего вся́ческая; ра́дуйся, вмести́вшая во чре́ве Твое́м Невмести́маго всем ми́ром. Ра́дуйся, Созда́телю Твоему́ плоть заимода́вшая; ра́дуйся, Красне́йшаго па́че всех сыно́в челове́ческих ро́ждшая. Ра́дуйся, млеко́м пита́вшая Пита́ющаго вся́ческая; ра́дуйся, попече́ние име́вшая о Сы́не Твое́м, Су́щем Промысли́теле всея́ тва́ри. Ра́дуйся, похвало́ де́вства; ра́дуйся, ма́терей сла́во. Ра́дуйся, в рождестве́ де́вство сохра́ньшая; ра́дуйся, рождество́ с де́вством сочета́вшая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 5
Богови́дец Моисе́й иногда́ на ка́менных скрижа́лех зако́н Бо́жий, начерта́нный пе́рстом Бо́жиим, получи́, и́ноцы же Горы́ Афо́нския песнь небе́сную во сла́ву Богома́тере, на дске ка́менней начерта́нную, от арха́нгела прия́ша, и сим науче́ннии а́нгельское славосло́вие Тебе́ приноси́ти, воспе́ша та́ко благоволи́вшему о них Бо́гу: Аллилу́иа.
Икос 5
Ви́девше нача́льницы Горы́ Афо́нския чу́до ве́лие в явле́нии арха́нгелове и пе́сни но́вей, дску с начерта́нными от а́нгела письмены́ препроводи́ша к царю́ и патриа́рху Царягра́да, во увере́ние и́стины пресла́внаго сего́ чудесе́; ти́и же ра́достно прия́ша ю́, я́ко зало́г благоволе́ния Бо́жия, во всей Це́ркви Правосла́вней узако́ниша воспева́ти песнь а́нгельскую в похвалу́ Тебе́, Богоро́дице, и взыва́ху Ти во умиле́нии си́це: Ра́дуйся, преукраше́нная ле́потами всех доброде́телей, Де́во; ра́дуйся, Неве́сто Неневе́стная. Ра́дуйся, возрасти́вшая цвет неувяда́емый, Христа́; ра́дуйся, раю́ слове́сный, дре́во жи́зни нам прозя́бшая. Ра́дуйся, се́не небе́сная, от зно́я страсте́й нас сохраня́ющая; ра́дуйся, покро́ве ми́ру, ши́рший о́блака. Ра́дуйся, дре́во благосенноли́ственное, прохла́ду спаси́тельную ве́рным подаю́щее; ра́дуйся, исто́чниче воды́ живы́я, от нея́же пия́й ктому́ не умира́ет. Ра́дуйся, Судии́ пра́веднаго умоле́ние; ра́дуйся, грехо́в на́ших проще́ние. Ра́дуйся, во сла́ве небе́сней одесну́ю Бо́га пребыва́ющая; ра́дуйся, земноро́дных милосе́рдием Твои́м не оставля́ющая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 6
Пропове́дует Свята́я Це́рковь вели́чие чуде́с Твои́х, Мари́е Богоро́дице, и све́тло красу́ется, воспева́я Ти песнь а́нгельскую, от небе́с на зе́млю принесе́нную чинонача́льником го́рних сил Гаврии́лом; с ни́мже помоли́ся, Госпоже́ Пречи́стая, к Сы́ну Твоему́ и Бо́гу, да незы́блему во благоче́стии сохрани́т Це́рковь Свою́ и посрами́т вся воста́ния ерети́ческая и раско́льническая, нас же, чад ея́, сподо́бит неосужде́нно воспева́ти Ему́: Аллилу́иа.
Икос 6
Возсия́ла еси́ мно́гими луча́ми чуде́с, о Ми́лостивая Богома́ти, чрез святу́ю ико́ну Твою́, Влады́чице, и си́ми не то́чию Го́ру Афо́нскую, но и мно́жайшая места́ озари́ла еси́, да научи́мся зва́ти Тебе́: Ра́дуйся, ра́досте на́ша, услажда́ющая ско́рбныя сердца́, к Тебе́ отве́рстыя; ра́дуйся, блага́я Засту́пнице, на по́мощь к нам ускоря́ющая. Ра́дуйся, зало́г спаси́тельный нам в ико́не Твое́й дарова́вшая; ра́дуйся, Афо́нскую Го́ру и мно́гия стра́ны е́ю просла́вльшая. Ра́дуйся, наде́ждо на́ша изве́стная; ра́дуйся, упова́ние на́ше непосты́дное. Ра́дуйся, скорбе́й на́ших разреше́ние; ра́дуйся, печа́лей на́ших утоле́ние. Ра́дуйся, ве́ры правосла́вныя утвержде́ние; ра́дуйся, неве́рия и злове́рия посрамле́ние. Ра́дуйся, любве́ Боже́ственныя явле́ние; ра́дуйся, чуде́с пресла́вных соверше́ние. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 7
Хотя́щим жа́ти спасе́ние ми́лостивая Покрови́тельница и Помо́щница явля́ешися, Ма́ти Бо́жия, и при́сно хода́тайствуеши за них к Сы́ну Твоему́ и Бо́гу, а́ще бо кто и па́дает в не́кое согреше́ние, не́мощию пло́ти обложе́н, оба́че Тобо́ю возста́ние получа́ет во спасе́ние, я́ко всем хо́щеши спасти́ся и в ра́зум и́стины приити́ воспева́ющим Христу́ Бо́гу: Аллилу́иа.
Икос 7
Но́во не́бо и нова́ земля́ угото́ваны от Сы́на Твоего́ и Бо́га лю́бящим Его́, Госпоже́ Всеблага́я, к ни́мже стяжа́хом Тя путеводи́тельницу изря́дну. Те́мже мо́лим Тя, не попусти́ нас поги́бнути в де́брех грехо́вных, но приведи́ нас стезе́ю пра́вою в страну́ све́та и ра́дости ве́чныя, да Тебе́ вопие́м хвале́бно: Ра́дуйся, Сио́на Го́рняго перве́йшее украше́ние; ра́дуйся, оби́телей до́льних присногото́вое заступле́ние. Ра́дуйся, земле́ блага́я, клас спаси́тельный ми́ру израсти́вшая; ра́дуйся, ни́во неора́нная, оплодотворе́нная Ду́хом Святы́м. Ра́дуйся, Огнь Божества́ во чре́во Твое́ прие́мшая; ра́дуйся, глад па́дшаго челове́чества хле́бом жи́зни утоли́вшая. Ра́дуйся, престо́ле Царя́ сла́вы; ра́дуйся, пала́то преукраше́нная Вседержи́теля. Ра́дуйся, хра́ме одушевле́нный Триипоста́снаго Бо́га; ра́дуйся, две́ре Госпо́дня, е́юже Сын Бо́жий про́йде к нам. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 8
Стра́нное явле́ние арха́нгела, на Горе́ Афо́нстей иногда́ бы́вшее, смотре́ние бысть Боже́ственное, и́мже просла́вися всепе́тое и́мя Твое́, Мари́е Богоро́дице, и вси ве́рнии научи́шася ангелоподо́бно воспева́ти Тя, херуви́мов честне́йшую и серафи́мов славне́йшую Ма́терь Бо́га на́шего, о Не́йже ра́дуется вся́кая тварь и род челове́ческий благода́рно взыва́ет ко Го́споду: Аллилу́иа.
Икос 8
Все упова́ние на́ше на Тя возлага́ем, Ма́ти Бо́жия, и в ско́рбех на́ших к святе́й ико́не Твое́й усе́рдно притека́ем, ча́юще от нея́ утеше́ние благода́тное получи́ти. Помози́ у́бо нам, Влады́чице, с терпе́нием и благодаре́нием вся́кия ско́рби переноси́ти и вме́сто ро́пота малоду́шнаго благоумиле́нно взыва́ти Тебе́: Ра́дуйся, всех скорбя́щих ра́досте; ра́дуйся, всех печа́льных утеше́ние. Ра́дуйся, тружда́ющихся и обремене́нных сла́дкий поко́е; ра́дуйся, боле́знующих и огорче́нных живи́тельная отра́до. Ра́дуйся, в час ско́рбных недоуме́ний мысль благу́ю на се́рдце полага́ющая; ра́дуйся, во дни уны́ния наде́ждою ве́чных благ воодушевля́ющая. Ра́дуйся, искуша́емым ру́ку по́мощи простира́ющая; ра́дуйся, гнев Бо́жий от глав на́ших отводя́щая. Ра́дуйся, ми́рное устрое́ние обурева́емым напа́стьми подаю́щая; ра́дуйся, во благи́х жела́ния на́ша ди́вно исполня́ющая. Ра́дуйся, терпели́вых страда́льцев дара́ми благода́тными увенчава́ющая; ра́дуйся, всех благоподвиза́ющихся блаже́нства ра́йскаго сподобля́ющая. Ра́дуйся, христиа́ном Помо́щнице и милосе́рдая о гре́шных Предста́тельнице.
Кондак 9
Вси а́нгели небе́снии немо́лчными похвала́ми Тя ублажа́ют, Цари́це и Влады́чице всея́ тва́ри, мы же земни́и и пе́рстнии ку́ю похвалу́ досто́йную принесе́м Ти, Всепе́тая? Оба́че, наде́ющеся на милосе́рдие Твое́ неисче́тное, любо́вию к Тебе́ понужда́еми, пое́м чудеса́ Твоя́, пропове́дуем благодея́ния Твоя́, славосло́вим и́мя Твое́ и, усе́рдно припа́дая ко святе́й ико́не Твое́й, ра́бски вопие́м изображе́нному на ней вку́пе с Тобо́ю Богомладе́нцу Христу́: Аллилу́иа.
Икос 9
Вети́й ри́торския глаго́лы не дово́льни к пе́нию чуде́с Твои́х, Богоро́дице, оба́че блага́я су́щи, ве́ру на́шу вме́сто ри́торскаго благослове́сия ми́лостиво приими́, ве́си бо и любо́вь на́шу, е́юже сердца́ на́ша к Тебе́ испо́лнены. Те́мже благоутро́бно услы́ши нехи́тростныя на́ша пе́сни, и́миже дерза́ем благохвали́ти Тя си́це: Ра́дуйся, сопресто́льное Отцу́ Сло́во в ложесна́х Твои́х вмести́вшая; ра́дуйся, Свет незаходи́мый ро́ждшая. Ра́дуйся, жизнь ве́чную ми́ру дарова́вшая рождество́м Твои́м; ра́дуйся, Преве́чнаго, я́ко Младе́нца, на руку́ Твое́ю носи́вшая. Ра́дуйся, гра́де одушевле́нный Всецаря́; ра́дуйся, ски́ние освяще́нная жива́го Бо́га. Ра́дуйся, ни́жняя сочета́вшая с вы́шними; ра́дуйся, миротво́рице, боже́ственнаго ми́ра преиспо́лненная. Ра́дуйся, до́брых вино́вная; ра́дуйся, злых премене́ние. Ра́дуйся, ору́жие на враги́ всекре́пкое; ра́дуйся, щи́те ве́рных несокруши́мый. Ра́дуйся, христиа́ном Помо́щнице и милосе́рдая о гре́шных Предста́тельнице.
Бесплатный фрагмент закончился.
