Уладзіслаў Ахроменка

Уладзіслаў Ахроменка павінны быў зрабіцца знакамітым піяністам, але, ужо заняўшы першае месца на нацыянальным конкурсе маладых выканаўцаў і скончыўшы Беларускую дзяржаўную кансерваторыю, сурёзна пашкодзіў палец, што паставіла крыж на далейшай музычнай карере. Потым была праца ў рэдакцыях часопісаў і газэтаў, творчасьць ў жанры літаратуры і актыўны ўдзел у беларускім і ўкраінскім нацыянальных рухах. Разам з Максімам Клімковічам, які быў сааўтарам многіх твораў, Уладзіслаў стаў пачынальнікам жанру беларускага кінарамана. Прыгодніцкая літаратура, гістарычны і футурыстычны дэтэктыў, альтэрнатыўная гісторыя – жанры, у якіх глыбіня талента і мастацтва творцы паднялі беларускую літаратуру на новую вышыню.

Нажаль, выдатны празаік, драматург і кінасцэнарыст заўчасна сыйшоў ад нас. У кастрычніку 2018-га, пад час творчай камандзіроўкі ў Польшчу здарыўся інфаркт, праз некалькі дзён у шпіталі Беластоку сэрца пісьменьніка спынілася.