Ды мекс монь эрямом истямо? Эли вейке совамо Кенкшень пинге

Алтави покштян-бабан туртов:

Бектяшкинтнэнень, Калинкинтнэнень,

Кузнецовтнэнень ды Шикаевтненень

Переводчик Татьяна Швецова

© Дика Кара, 2021

© Татьяна Швецова, перевод, 2021

ISBN 978-5-0051-1729-8

Создано в интеллектуальной издательской системе Ridero

Сынь ёжос. Кунсолозевинь. Вень асодавикс ды тандавтыця гайтть. Якшамо. Пелян панжомо сельмень. Седеяк пек конясынь. Ды седе паро ули а лексемскак.

«Менельсэнть, паряк, тешттне кирвазсть», – апак учо сась тень мель.

Мейле сась лия: «Сындест, улема, пек ды пек ламо».

«Ламо – те зяро?» – поладовсь превсэнь кортамось.

«Вана бути панжовлинь сельмень, сестэ неевлинь ды весе-весе ловновлинь», – арсезевинь.

Ансяк сельметне а панжтнемат. Маряви, самай те шкастонть косо-бути тосо, чоподасонть, ёзмолдыть пельниця вишка сельме ды понав кувака кичкере пильгине марто покш шанжавт, менельга ливтнить кедьнимилявт, ды эштё кува-бути тувак лызы мезе-бути вельть тандавтыця, ирныця ды пшти кенже марто.

Эйкакшпингстэ монь тонавтсть а пелеме чоподадо. Те, келя, Венть зоровамонзо.

Зярдо сон валги Масторонть лангс, весементь мазылгавты: понгавтни валдо тештеть ды кеверди менелентень Ков. Ды аламо кие ванны мазычинть лангс, ды малав кияк вень шкане а мизолды. Весе удыть. Секс сон нусмакады, тердьсы инжекс Чоподанть, ды сынь налксить кекшнемнесэ ды тандавтнемкасо.

«Эряви учомс, зярдо сы валскесь», – чакась пряс буволдыця арсема.

Мон яла пелинь ды учинь.

Сась мезе-бути лембе, ды мон аламодо ойминь. Ды эно, видьстэ меремс, ансяк аламодыне. Мон тешкас а содылинь, ков понгинь, ды маринь, кода кие-бути лангозон ваны.

– Шумбрачи! – эзинь кирдеве ды эль марявиксстэ, сельмень апак панжо, пшкадинь мон. – Шумбрачи! Кияк мари эйсэнь?

– Мари-мари, – каятотсь кинь-бути вайгелезэ алдо.

– Шумбрачи! – таго меринь мон сэтьместэ ды кунсолозевинь.

– Ды мезть тон мекев-васов шумбрачи ды шумбрачи! Мон шумбран, ды оно уш зярс, потамодо а арсянгак, – одс мерсь кие-бути.

– Тон кие? – кевкстинь мон.

– Ковр Семёнович – персиянь кумбонь раське – пильгеть ало. Энялдан вечкемс, а безардемс эйстэнь.

Мон пек пелинь. Ды теке марто бажинь содамо-чарькодеме. Пек. Сельмень панжомадо мелесь ульнесь инедеяк ине. Ансяк мон яла теньс эзинь муе вийть.